ക്യാന്സര് നിര്ണ്ണയത്തില് വിപ്ലവകരമെന്ന് വിശേഷിപ്പിക്കാവുന്ന ശ്വാസ പരിശോധന ബ്രിട്ടനില് പരീക്ഷിക്കുന്നു. രോഗമുള്ളവരുടെ നിശ്വാസ വായുവിലൂടെ പുറത്തു വരുന്ന ക്യാന്സര് മുദ്രകളുള്ള തന്മാത്രകളെ കണ്ടെത്തുകയാണ് ഇതിനായി തയ്യാറാക്കിയിരിക്കുന്ന ബ്രെത്ത് ബയോപ്സി ഡിവൈസ് ചെയ്യുന്നത്. പ്രാഥമിക ഘട്ടത്തിലുള്ള ക്യാന്സറുകള് പോലും ഈ രീതിയിലൂടെ കണ്ടെത്താന് കഴിയും. ഫലപ്രദമായി ചികിത്സിച്ചു ഭേദമാക്കാന് കഴിയുന്ന ഘട്ടത്തില്ത്തന്നെ രോഗനിര്ണ്ണയം വളരെ ചെലവു കുറഞ്ഞ രീതിയില് നടത്താന് ഈ ഉപകരണം സഹായിക്കുമെന്നാണ് ശാസ്ത്രജ്ഞര് പറയുന്നത്. ആയിരക്കണക്കിനാളുകളെ മാരക രോഗത്തില് നിന്ന് രക്ഷിക്കാനും ഹെല്ത്ത്കെയര് ചെലവില് മില്യന് കണക്കിന് പൗണ്ട് ലാഭമുണ്ടാക്കാനും ഇത് സഹായിക്കുമെന്നുമാണ് നിര്മാതാക്കള് അവകാശപ്പെടുന്നത്.
കേംബ്രിഡ്ജിലെ അഡന്ബ്രൂക്സ് ഹോസ്പിറ്റലിലായിരിക്കും പരീക്ഷണം നടക്കുക. ഇത് രണ്ടു വര്ഷത്തോളം നീണ്ടു നില്ക്കും. ക്യാന്സര് രോഗികളും അല്ലാത്തവരുമായ 1500 പേരിലായിരിക്കും പരീക്ഷണം നടത്തുക. ആദ്യഘട്ടത്തില് അന്നനാളത്തിലും ആമാശയത്തിലും ക്യാന്സര് ഉള്ള രോഗികളെയായിരിക്കും പരിശോധനയ്ക്ക് വിധേയമാക്കുക. പിന്നീട് പ്രോസ്റ്റേറ്റ്, കിഡ്നി, മൂത്രസഞ്ചി, കരള്, പാന്ക്രിയാസ് എന്നിവിടങ്ങളില് ക്യാന്സര് ബാധിച്ചവരെ ഉപകരണം ഉപയോഗിച്ച് പരിശോധിക്കും. ക്യാന്സര് എന്ന മഹാരോഗം നേരത്തേ കണ്ടെത്താനും രോഗികളെ രക്ഷിക്കാനും ഇത്തരത്തിലുള്ള ഉപകരണങ്ങള് അടിയന്തരമായി നിര്മിക്കണമെന്ന് ക്യാന്സര് റിസര്ച്ച് യുകെ കേംബ്രിഡ്ജ് സെന്ററിലെ പ്രൊഫ. റബേക്ക ഫിറ്റ്സ്ജെറാള്ഡ് പറഞ്ഞു.
നിസ്വാസ വായുവിലൂടെ ക്യാന്സര് ലക്ഷണങ്ങള് സ്ഥിരീകരിക്കുകയാണ് ഈ പരിശോധനയിലൂടെ ചെയ്യുന്നത്. സാങ്കേതിക വിദ്യയുടെ അടുത്ത ഘട്ട വികാസത്തിലേക്കുള്ള നിര്ണ്ണായക ചുവടുവെയ്പ്പാണ് ഇതെന്നും അവര് അഭിപ്രായപ്പെട്ടു. ബ്രിട്ടീഷ് കമ്പനിയായ ഔള്സ്റ്റോണ് മെഡിക്കല് ആണ് ഈ ഉപകരണം കണ്ടെത്തിയിരിക്കുന്നത്. കമ്പനിയും ക്യാന്സര് റിസര്ച്ച് യുകെയും ചേര്ന്നാണ് പാന് ക്യാന്സര് ട്രയല് ഫോര് ഏര്ലി ഡിറ്റക്ഷന് ഓഫ് ക്യാന്സര് ഇന് ബ്രെത്ത് എന്ന പേരില് പരീക്ഷണം നടത്തുന്നത്.
ബെയ്ജിങ്: ചരിത്രം സൃഷ്ടിച്ച് ചൈനയുടെ ചാങ്ഇ4 പേടകം ചന്ദ്രന്റെ വിദൂരഭാഗത്തേക്ക് വിജയകരമായി ഇറങ്ങി. ഭൂമിയില് നിന്നും ദൃശ്യമാകാത്ത ചന്ദ്രന്റെ വിദൂര ഭാഗത്ത് (ഫാര് സൈഡ്) ഇതുവരെ പേടകങ്ങളൊന്നും ഇറങ്ങിയിട്ടില്ല. ചന്ദ്രനു ചുറ്റും കറങ്ങുന്ന വിവിധ ഉപഗ്രഹങ്ങള് ചിത്രങ്ങളെടുത്തിട്ടുണ്ടെങ്കിലും ഈ ഭാഗത്ത് ആദ്യമായാണ് പേടകം ഇറങ്ങുന്നത്. ലോകത്തിലാകമാനം നടക്കുന്ന പര്യവേഷണ ഗവേഷണങ്ങളില് നാഴികല്ലാകും ചാങ്ഇ4 പേടകം എന്നാണ് കരുതുന്നത്. ചാങ്ഇ4 പേടകം അതിന്റെ പ്രവര്ത്തനം ആരംഭിച്ചിട്ടുണ്ട്. പേടകത്തില് നിന്നുള്ള ആദ്യ ചിത്രവും ഇതിനോടകം ലഭ്യമായി കഴിഞ്ഞു. ഡിസംബര് 8 നു വിക്ഷേപിച്ച പേടകം 12നു ചന്ദ്രന്റെ ഭ്രമണപഥത്തിലെത്തി. തുടര്ന്നു 18 ദിവസത്തെ യാത്രയ്ക്കു ശേഷം ലക്ഷ്യത്തിലെത്തിയത്.
ഭൂമിയെ ഭ്രമണം ചെയ്യുന്ന അതേ തോതിലാണു ചന്ദ്രന് സ്വയം കറങ്ങുന്നതും. ‘ടൈഡല് ലോക്കിങ്’ എന്ന ഈ പ്രത്യേകത മൂലം ചന്ദ്രന്റെ വിദൂരഭാഗം ഭൂമിക്ക് അഭിമുഖമായി ഒരിക്കലും വരില്ല. മനുഷ്യര്ക്കു ദൃശ്യമല്ലാത്തതിനാല് ഇരുണ്ട ഭാഗം എന്നും ഇത് അറിയപ്പെടുന്ന ഫാര് സൈഡില് വലിയ ഗവേഷണങ്ങളൊന്നും നടത്താന് മനുഷ്യര്ക്ക് കഴിഞ്ഞിരുന്നില്ല. എന്നാല് ചാങ്ഇ4 പേടകം വിജയകരമായി ഇറങ്ങിയതോടെ ഫാര് സൈഡിനെക്കുറിച്ച് കൂടുതല് വിവരങ്ങള് ലഭിക്കും. ചന്ദ്രനെക്കുറിച്ചുള്ള സുപ്രധാന വിവരങ്ങള് ലഭ്യമാകുമെന്നാണ് ശാസ്ത്രജ്ഞരുടെ പ്രതീക്ഷ. ചാങ്ഇ4 പേടകത്തിന് ഭൂമിയിലേക്ക് നേരിട്ട് വിവരങ്ങള് കൈമാറുക സാധ്യമല്ല. അതിനാല് ബഹിരാകാശത്തുള്ള മറ്റൊരു ഉപഗ്രഹം വഴിയാവും വിവരങ്ങള് ഭൂമിയിലേക്ക് എത്തിക്കുക.
ക്യാമറകള്, റഡാര്, സ്പെക്ട്രോമീറ്ററുകള് തുടങ്ങിയ ഉപകരണങ്ങളുമായാണ് പേടകം ചന്ദ്രനിലിറങ്ങിയിരിക്കുന്നത്. ചന്ദ്രന്റെ ദക്ഷിണഭാഗത്തുള്ള അതിപ്രാചീനമായ ഐയ്റ്റ്കന് മേഖലയിലെ ഉപരിതല, ധാതു ഘടനകള് പഠിക്കുകയാണു പ്രധാനലക്ഷ്യം. ദൗത്യം വിജയിച്ചതോടെ രാജ്യാന്തര ബഹിരാകാശ മത്സരത്തില് ചൈനയ്ക്ക് വലിയ നേട്ടമാണ് ഉണ്ടായിരിക്കുന്നത്. ഫാര് സൈഡില് നിന്ന് ഭൂമിയിലേക്ക് നേരിട്ട് ബന്ധപ്പെടാന് സാധിക്കില്ലെന്നതായിരുന്നു ദൗത്യത്തിന്റെ പ്രധാന പ്രതിസന്ധി. എന്നാല് മറ്റൊരു ഉപഗ്രഹം വഴി ഇത് സാധ്യമായതോടെ കാര്യങ്ങള് എളുപ്പമായി.
കേക്കുകള്, ബിസ്കറ്റ്, മിഠായികള് തുടങ്ങിയവയ്ക്ക് പുഡ്ഡിംഹ് ടാക്സ് ഏര്പ്പെടുത്താനൊരുങ്ങി ഗവണ്മെന്റ്. പഞ്ചസാരയുടെ അമിത ഉപയോഗം നിയന്ത്രിക്കാനുള്ള നീക്കങ്ങളുടെ ഭാഗമായാണ് നടപടി. പഞ്ചസാര അമിതമായി അടങ്ങിയിരിക്കുന്ന ആഹാരത്തിന്റെ ഉപയോഗം ജനങ്ങളില് അമിത വണ്ണത്തിന് കാരണമാകുന്നുവെന്ന മുന്നറിയിപ്പുകളുടെ അടിസ്ഥാനത്തിലാണ് ഈ നീക്കം. കുട്ടികള് 10 വയസ് പ്രായമെത്തുന്നതു വരെ 18 വയസില് ഉപയോഗിക്കുന്ന അത്രയും പഞ്ചസാര കഴിക്കുന്നുണ്ടെന്നാണ് പുതിയ പഠനം വ്യക്കമാക്കുന്നത്. സാധാരണ ഭക്ഷ്യോല്പ്പന്നങ്ങളില് പഞ്ചസാരയുടെ അളവ് നിയന്ത്രിക്കാന് ഉത്പാദകര്ക്ക് മാനദണ്ഡങ്ങള് ഏര്പ്പെടുത്തിയിട്ടുണ്ടെങ്കിലും അവ പാലിക്കപ്പെടുന്നില്ല. പുഡ്ഡിംഗുകളുടെ കാര്യത്തില് നിയന്ത്രണമേ ഉണ്ടാകുന്നില്ലെന്നാണ് വെളിപ്പെടുത്തല്.
ഇതോടെയാണ് പഞ്ചസാരയടങ്ങിയ ഭക്ഷണങ്ങള്ക്ക് പ്രത്യേക നികുതി ഏര്പ്പെടുത്തണമെന്ന ആവശ്യം ഉയരുന്നത്. പബ്ലിക് ഹെല്ത്ത് ഇംഗ്ലണ്ടിലെ ചീഫ് ന്യൂട്രീഷനിസ്റ്റ് ഡോ.ആലിസണ് ടെഡ്സ്റ്റോണ് ഇക്കാര്യം ആവശ്യപ്പെട്ടു. സ്പ്രിംഗില് വരുന്ന അവലോകനത്തില് പഞ്ചസാരയുടെ കാര്യത്തില് നിയന്ത്രണമുണ്ടാകുന്നില്ലെങ്കില് നികുതി ഏര്പ്പെടുത്തണമെന്നാണ് അവര് നല്കുന്ന നിര്ദേശം. വേണ്ടിവന്നാല് മറ്റു നടപടികള് സ്വീകരിക്കണമെന്ന് ആവശ്യപ്പെട്ടേക്കുമെന്നും അവര് വ്യക്തമാക്കി. ശീതള പാനീയങ്ങള്ക്ക് ഏര്പ്പെടുത്തിയിരിക്കുന്ന ഷുഗര് ടാക്സിന്റെ അതേ മാതൃകയിലായിരിക്കും പുഡ്ഡിംഗ് ടാക്സും പ്രാവര്ത്തികമാക്കുക. കഴിഞ്ഞ വര്ഷമാണ് ഇത് നടപ്പാക്കിയത്.
2020 ഓടെ ഭക്ഷ്യ വസ്തുക്കളിലെ പഞ്ചസാരയുടെ അളവ് പകുതിയായി കുറയ്ക്കണമെന്നാണ് ഫുഡ് ഇന്ഡ്സ്ട്രിക്ക് നല്കിയിരിക്കുന്ന നിര്ദേശം. ബ്രേക്ക്ഫാസ്റ്റ് സീരിയലുകള്, യോഗര്ട്ട്, കേക്ക്, ബിസ്കറ്റ്, മിഠായികള്, ചോക്കളേറ്റ്, ഐസ്ക്രീം, സ്പ്രെഡുകള് എന്നിവയിലെ പഞ്ചസാരയുടെ അളവ് നിയന്ത്രിക്കണമെന്നാണ് നിര്ദേശിക്കപ്പെട്ടിരിക്കുന്നത്.
പനിക്കും ജലദോഷത്തിനുമുള്ള മരുന്നുകള് ബ്രാന്ഡ് പേരുകളിലുള്ളതാണെങ്കില് അവയ്ക്ക് ആറിരട്ടിയിലധികം വില നല്കേണ്ടതായി വരുന്നുവെന്ന് വെളിപ്പെടുത്തല്. ലോയ്ഡ്സില് 16 സുഡാഫെഡ് കണ്ജഷന് ആന്ഡ് ഹഡേക്ക് റിലീഫ് ഗുളികയടങ്ങിയ ബോക്സിന് 4.09 പൗണ്ടാണ് വില. അതേസമയം ഈ മരുന്നിന്റെ ഘടകങ്ങള് മാത്രമുള്ള ഗാല്ഫാം മാക്സ് സ്ട്രെങ്ത് കോള്ഡ് ആന്ഡ് ഫ്ളൂ ക്യാപ്സ്യൂളിന് പൗണ്ട്സ്ട്രെച്ചറില് 69 പെന്സ് മാത്രമേ നല്കേണ്ടതുള്ളു. ശിശുക്കള്ക്കായുള്ള 100 മില്ലി കാല്പോള് സിറപ്പിന് 3.5 പൗണ്ടാണ് ബൂട്ട്സ് ഈടാക്കുന്നത്. എന്നാല് ഹെല്ത്ത്പോയിന്റ് ചില്ഡ്രന്സ് പാരസെറ്റമോള് സസ്പെന്ഷന് വില്കോയില് 1.20 പൗണ്ട് മാത്രം നല്കിയാല് മതിയാകും. ഒരേ മരുന്ന് തന്നെയാണ് ഇത്.
ലെംസിപ് കോള്ഡ് ആന്ഡ് ഫ്ളൂ ക്യാപ്സ്യൂളിനും ബെനിലില് കോള്ഡ് ആന്ഡ് ഫളൂ മാക്സ് ക്യാപ്സ്യൂളിനും ഒരേ ഘടകങ്ങള് തന്നെയാണ് ഉള്ളത്. എന്നാല് പൗണ്ട്സ്ട്രെച്ചറില് ലഭിക്കുന്നതിനാണ് വിലക്കുറവ്. എല്ലാ മരുന്നുകളും ഏറ്റവും ഗുണനിലവാരമുള്ള ഒരേ വസ്തുക്കള് ഉപയോഗിച്ചു തന്നെയാണ് നിര്മിക്കുന്നതെന്ന് റോയല് ഫാര്മസ്യൂട്ടിക്കല് സൊസൈറ്റിയിലെ ലൂയിജി മാര്ട്ടീനി പറയുന്നു. ഡോസും ഫോര്മുലേഷനും ഒന്നുതന്നെയാണെങ്കില് ബ്രാന്ഡഡ് മരുന്നുകളും ജാനറിക് മരുന്നുകളും ഒന്നുതന്നെയാണെന്നും മാര്ട്ടീനി പറയുന്നു. പിഎല് നമ്പര് കണ്ടെത്തിയാല് ഒരേ മരുന്നുകളില് തന്നെ കുറഞ്ഞ വിലയുള്ളവ കണ്ടെത്താന് ബുദ്ധിമുട്ടുണ്ടാകില്ലെന്നാണ് മണി സേവിംഗ് എക്സ്പെര്ട്ട് വക്താവ് പറയുന്നത്. മരുന്നുദ്പാദകര്ക്ക് ഓരോ മരുന്നുകള്ക്കും നല്കുന്ന ലൈസന്സ് നമ്പറാണ് ഇത്.
ഉദാഹരണത്തിന് PL 12063/0104 എന്നത് പനിക്കും ജലദോഷത്തിനുമുള്ള മരുന്നാണ്. പല ബ്രാന്ഡിലും പാക്കേജിലുമാണെങ്കിലും പിഎല് നമ്പര് ഒന്നാണെങ്കില് അത് ഒരേയിനത്തില്പ്പെട്ട മരുന്നു തന്നെയാണ്. തങ്ങള് റീട്ടെയില് പ്രൈസ് നിര്ദേശിക്കാറേയുള്ളുവെന്നും റീട്ടെയിലറാണ് ഇക്കാര്യത്തില് അന്തിമ തീരുമാനം എടുക്കുന്നതെന്നും കാല്പോളിന്റെയും സുഡാഫെഡിന്റെയും നിര്മാതാക്കളായ ജോണ്സണ് ആന്ഡ് ജോണ്സണ് പറയുന്നു.
ഭൂമിയില് നിന്ന് ഏറ്റവും അകലെ വെച്ച് പകര്ത്തിയ ബഹിരാകാശ വസ്തുവിന്റെ ചിത്രം അയച്ച് നാസയുടെ ന്യൂ ഹൊറൈസണ്സ് ബഹിരാകാശ ദൗത്യം. അള്ട്ടിമ ത്യൂള് എന്ന പേരില് അറിയപ്പെടുന്ന ഇതിന് സ്നോമാന്റെ ആകൃതിയാണ് ഉള്ളത്. രണ്ടു ഗോളങ്ങള് കൂടിച്ചേര്ന്ന ആകൃതിയാണ് ഇതിന്. ചെറിയ ഭാഗത്തിന് ത്യൂള് എന്നും വലുതിന് അള്ട്ടിമ എന്നുമാണ് ശാസ്ത്രജ്ഞര് പേരു നല്കിയിരിക്കുന്നത്. ഇവ രണ്ടും ചേര്ത്ത് അള്ട്ടിമ ത്യൂള് എന്ന് ഈ വസ്തുവിന് പേരിട്ടു. ഭൂമിയില് നിന്ന് 6.5 ബില്യന് കിലോമീറ്റര് അകലെ നിന്നാണ് ഈ ചിത്രം പകര്ത്തിയിരിക്കുന്നത്. അതുകൊണ്ടുതന്നെ സ്വന്തം റെക്കോര്ഡ് കൂടി തകര്ത്തിരിക്കുകയാണ് ന്യൂ ഹൊറൈസണ്സ്.
സൗരയൂഥത്തില് ഭൂമിയില് നിന്ന് ഏറ്റവും അകലെ വെച്ച് ചിത്രമെടുത്തതും ന്യൂ ഹൊറൈസണ്സ് തന്നെയാണ്. 2015ല് പ്ലൂട്ടോയെ കടന്നു പോകുമ്പോളായിരുന്നു അത്. ഇവിടെ നിന്ന് 1.5 ബില്യന് കിലോമീറ്റര് അകലെയാണ് അള്ട്ടിമ ത്യൂളിനെ കണ്ടെത്തിയിരിക്കുന്നത്. സൗരയൂഥത്തിന് അതിരിടുന്ന ക്വിപ്പര് ബെല്റ്റ് എന്ന കുള്ളന് ഗ്രഹങ്ങളുടെയും ചുണ്ടന് ഗ്രഹങ്ങളുടെയും കൂട്ടത്തിലാണ് അള്ട്ടിമ ത്യൂള് ഉള്ളത്. ക്വിപ്പര് ബെല്റ്റില് അള്ട്ടിമയെപ്പോലെ പതിനായിരക്കണക്കിന് ചെറിയ വസ്തുക്കളുണ്ട്. 4.6 ബില്യന് വര്ഷങ്ങള്ക്കു മുമ്പ് ഗ്രഹങ്ങള് രൂപപ്പെട്ടത് എങ്ങനെയാണെന്നതിനുള്ള തെളിവുകള് ഈ വസ്തുക്കളില് ഉണ്ടെന്നാണ് കരുതുന്നത്.
ജനനത്തില് തന്നെ കൂടിച്ചേര്ന്നതായിരിക്കും അള്ട്ടിമയും ത്യൂളും എന്നാണ് ശാസ്ത്രജ്ഞന്മാര് കരുതുന്നത്. ക്വിപ്പര് ബെല്റ്റില് സൂര്യനെ ചുറ്റുന്ന ഇത് 2 മുതല് 3 കിലോമീറ്റര് മാത്രം വേഗതയിലാണ് സഞ്ചരിക്കുന്നതെന്ന് ന്യൂ ഹൊറൈസണ്സ് ഗവേഷകനായ ജെഫ് മൂര് പറയുന്നു. ഒരു ഇരുണ്ട വസ്തുവാണ് ഇതെന്നും ന്യൂ ഹൊറൈസണ്സ് വ്യക്തമാക്കുന്നു. ചിലപ്പോള് ചുവന്ന നിറമായിരിക്കാം ഇതിനെന്നും ശാസ്ത്രജ്ഞര് പറയുന്നു.
ന്യൂസ് ഡെസ്ക്.
ശബരിമലയിൽ യുവതികൾ ദർശനം നടത്തിയതായി സ്ഥിരീകരിച്ചു. ഇന്ന് പുലർച്ചെ 3.15 നായിരുന്നു യുവതികളായ ബിന്ദുവും കനക ദുർഗ്ഗയുമാണ് പോലീസ് സഹായത്തോടെ അതീവ രഹസ്യമായി ദർശനം നടത്തിയത്. അർദ്ധരാത്രിയിൽ പുരുഷൻമാർ ഉൾപ്പെടുന്ന എട്ടംഗ സംഘത്തിന്റെ ഭാഗമായാണ് ഇവർ പമ്പയിൽ എത്തിയത്. സുരക്ഷ ഒരുക്കുന്നതിലുള്ള ബുദ്ധിമുട്ട് പോലീസ് അറിയിച്ചെങ്കിലും ഇവർ പിന്മാറാൻ തയ്യാറായില്ല. തുടർന്ന് പോലീസ് രഹസ്യ പദ്ധതി തയ്യാറാക്കുകയായിരുന്നു. വലിയ നടപ്പന്തലിൽ എത്തിയ യുവതികളെ മേൽപ്പാലം വഴി കടത്തിവിടാതെ ട്രാക്ടർ കടന്നു പോവുന്ന വഴിയിലൂടെയാണ് സന്നിധാനത്തേയ്ക്ക് എത്തിച്ചത്. യുവതികൾ ദർശനം നടത്തി പമ്പയിൽ തിരിച്ചെത്തിയ ശേഷമാണ് ഇക്കാര്യം ദേവസ്വം ബോർഡ് അധികൃതർ പോലും അറിയുന്നത്. യുവതികൾ തന്നെ തങ്ങളുടെ പക്കലുണ്ടായിരുന്ന മൊബൈൽ ഫോൺ ദൃശ്യങ്ങൾ പുറത്തു വിട്ടാണ് വാർത്ത ലോകത്തോട് അറിയിച്ചത്.
ശബരിമലയിൽ ആചാരലംഘനം നടന്നതിനേത്തുടർന്ന് തന്ത്രി നട അടച്ചു. ദർശനം നടത്തിയ യുവതികളുടെ വീടിന് പോലീസ് കനത്ത സുരക്ഷ ഏർപ്പെടുത്തി. സംസ്ഥാനത്തിന്റെ വിവിധ ഭാഗങ്ങളിൽ വ്യാപകമായ അക്രമസംഭവങ്ങൾ അരങ്ങേറുകയാണ്. തലസ്ഥാനത്ത് പോലീസും ബി ജെ പി – യുവമോർച്ചാ പ്രവർത്തകരും തമ്മിൽ തെരുവു യുദ്ധമായിരുന്നു നടന്നത്. പല സ്ഥലങ്ങളിലും കടകൾ അടപ്പിച്ചു. വാഹന ഗതാഗതം മിക്കയിടങ്ങളിലും പ്രതിഷേധത്തെത്തുടർന്ന് തടസപ്പെട്ടിരിക്കുകയാണ്. നാളെ സംസ്ഥാന വ്യാപകമായ ഹർത്താലിന് ശബരിമല കർമ്മസമിതി ആഹ്വാനം ചെയ്തിട്ടുണ്ട്. യു ഡി എഫ് നാളെ കരിദിനമാചരിക്കുകയാണ്.
എനര്ജി പ്രൈസില് ഏര്പ്പെടുത്തുന്ന പരിധി ഫലത്തില് ഉപഭോക്താക്കള്ക്ക് നഷ്ടമാകുമെന്ന് വിലയിരുത്തല്. മികച്ച ഡീലുകള്ക്ക് വേണ്ടിയുള്ള അന്വേഷണം നിര്ത്താന് ഇത് ഉപഭോക്താക്കളെ പ്രേരിപ്പിക്കുമെന്നും അതിലൂടെ പ്രതിവര്ഷം ഉപഭോക്താക്കളുടെ പോക്കറ്റില് നിന്ന് 200 പൗണ്ടെങ്കിലും നഷ്ടമാകുമെന്നും എനര്ജി റെഗുലേറ്റര് ഓഫ്ജെം സമ്മതിച്ചു. ഇന്നു മുതലാണ് എനര്ജി ബില്ലുകളില് പരിധി നിലവില് വരുന്നത്. ഇതനുസരിച്ച് 1137 പൗണ്ടിനു മേല് ഉപഭോക്താക്കളില് നിന്ന് ഒരു വര്ഷം ഈടാക്കാന് എനര്ജി സപ്ലയര്മാര്ക്ക് സാധിക്കില്ല. ഫിക്സഡ് താരിഫില് തുടരുന്നവര്ക്കായിരിക്കും ഇതിന്റെ പ്രയോജനം കൂടുതല് ലഭിക്കുന്നത്.
ഈ പ്രൈസ് ക്യാപ്പിന്റെ പ്രയോജനം 11 മില്യന് കുടുംബങ്ങള്ക്ക് ലഭിക്കുമെന്നാണ് ഓഫ്ജെം കണക്കുകൂട്ടുന്നത്. ഒരേ സപ്ലയറുടെ സേവനം ദീര്ഘകാലമായി തുടരുന്ന ഇവരുടെ താരിഫ് കുറച്ചു കൂടി ഉയര്ന്ന തലത്തിലേക്ക് മാറ്റാനും കഴിഞ്ഞിട്ടുണ്ട്. എന്നാല് ഓഫ്ജെം നടത്തിയ ഇംപാക്ട് അസസ്മെന്റില് ക്യാപ്പിന്റെ യഥാര്ത്ഥ ഗുണഭോക്താക്കളാകുന്നത് ഇവരില് മൂന്നിലൊന്ന് പേര് മാത്രമാണെന്നാണ്. ഇവര് പണം ലാഭിക്കുന്നതിനായി സേവനദാതാക്കളെ മാറ്റി പരീക്ഷിക്കുന്നവരാണെന്നും വ്യക്തമായിട്ടുണ്ട്.
മാര്ക്കറ്റിലെ ഏറ്റവും കുറഞ്ഞ താരിഫ് പ്രൈസ് ക്യാപ്പിലും താഴ്ന്ന നിരക്കിലാണ് ഉള്ളത്. എനര്ജി സപ്ലയര്മാരെ മാറ്റിക്കൊണ്ടിരിക്കുന്ന ശരാശരി ഉപഭോക്താവിന് പ്രതിവര്ഷം 921 പൗണ്ട് മാത്രമാണ് അടക്കേണ്ടതായി വരികയെന്ന് പ്രൈസ് കംപാരിസണ് വെബ്സൈറ്റായ comparethemarket.com പറയുന്നു. ഓഫ്ജെം ഏര്പ്പെടുത്തിയ പരിധിക്കൊപ്പം ബില്ത്തുക നല്കുന്ന സാധാരണ ഉപഭോക്താവിനേക്കാള് 216 പൗണ്ട് കുറവാണ് ഇതെന്നും സൈറ്റ് വ്യക്തമാക്കുന്നു.
ന്യൂഇയര് ഈവില് മാഞ്ചസ്റ്ററിര് കത്തി ഉപയോഗിച്ച് ആക്രമണം നടത്തിയയാള് അള്ളാ എന്ന് ഉറക്കെ ഉച്ചരിച്ചുവെന്ന് ദൃക്സാക്ഷി. മാഞ്ചസ്റ്റര് വിക്ടോറിയ സ്റ്റേഷനിലാണ് ആക്രമണം ഉണ്ടായത്. ഒരു സ്ത്രീക്കും പുരുഷനും ബ്രിട്ടീഷ് ട്രാന്സ്പോര്ട്ട് പോലീസ് ഓഫീസര്ക്കും ആക്രമണത്തില് കുത്തേറ്റു. രാത്രി 9 മണിക്കു മുമ്പായി പ്ലാറ്റ്ഫോമില് വെച്ചായിരുന്നു ആക്രമണം. ഇതേത്തുടര്ന്ന് സ്റ്റേഷന് അടച്ചിടുകയും അക്രമിയെ നീളമേറിയ കത്തിയുമായി പോലീസ് അറസ്റ്റ് ചെയ്യുകയും ചെയ്തു. സംഭവത്തിന് തീവ്രവാദ ബന്ധമുണ്ടോ എന്നാണ് പോലീസ് ഇപ്പോള് അന്വേഷിക്കുന്നത്. പ്രതി താമസിച്ചിരുന്നതായി കരുതുന്ന ചീറ്റ്ഹാം ഹില് റെസിഡന്സില് ഗ്രേറ്റര് മാഞ്ചസ്റ്റര് പോലീസ് തെരച്ചില് നടത്തി.
ഇത് ഭീകരാക്രമണത്തിന്റെ ഗണത്തില് പെടുത്തിയാണ് തങ്ങള് അന്വേഷിക്കുന്നതെന്ന് ചീഫ് കോണ്സ്റ്റബിള് ഇയാന് ഹോപ്കിന്സ് പറഞ്ഞു. ഗ്രേറ്റര് മാഞ്ചസ്റ്റര് പോലീസിന്റെ സഹായത്തോടെ കൗണ്ടര് ടെററിസം ഓഫീസര്മാരാണ് അന്വേഷണം നടത്തുന്നത്. അറസ്റ്റിലായ അക്രമിയെക്കുറിച്ചുള്ള കൂടുതല് വിവരങ്ങള് ശേഖരിച്ചു വരികയാണ്. മാഞ്ചസ്റ്ററില് നടന്ന ഭീകരാക്രമണമെന്ന് സംശയിക്കുന്ന സംഭവത്തില് പരിക്കേറ്റവര്ക്കൊപ്പം നില്ക്കുന്നുവെന്ന് പ്രധാനമന്ത്രി തെരേസ മേയ് പറഞ്ഞു. കുത്തേറ്റ മൂന്നു പേരുടെയും നില അതീവ ഗുരുതരമാണെന്നായിരുന്നു ആദ്യ റിപ്പോര്ട്ടുകള്.
എന്നാല് ബ്രിട്ടീഷ് ട്രാന്സ്പോര്ട്ട് പോലീസ് ഓഫീസര് ചികിത്സക്കു ശേഷം ആശുപത്രി വിട്ടു. ഇയാളുടെ തോളിനാണ് കുത്തേറ്റത്. ബ്രിട്ടീഷ് ട്രാന്സ്പോര്ട്ട് പോലീസ് തന്നെയാണ് അക്രമിയെ കീഴടക്കിയത്. ഇതിനിടെയാണ് പോലീസ് ഉദ്യോഗസ്ഥന് കുത്തേറ്റത്.
കീമോതെറാപ്പി ബ്രെസ്റ്റ് ക്യാന്സര് ശരീരത്തിന്റെ മറ്റു ഭാഗങ്ങളിലേക്ക് പടരാന് കാരണമാകുമെന്ന് വെളിപ്പെടുത്തല്. കീമോതെറാപ്പിക്കായി സാധാരണ ഉപയോഗിച്ചു വരുന്ന രണ്ടു മരുന്നുകളാണ് രോഗം മറ്റിടങ്ങളിലേക്ക് പടര്ത്തുന്നതെന്ന് പഠനത്തില് വ്യക്തമായി. പാക്ലിടാക്സല്, ഡോക്സോറൂബിസിന് എന്നീ മരുന്നുകളാണ് വില്ലന്മാരെന്നാണ് വ്യക്തമായിരിക്കുന്നത്. ട്യൂമറുകളില് നിന്ന് പ്രോട്ടീനുകളെ രക്തത്തില് കലരാന് ഇവ സഹായിക്കുകയും രക്തത്തിലൂടെ അവ മറ്റ് അവയവങ്ങളില് എത്തുകയും ചെയ്യും. ഈ പ്രോട്ടീന് പുറത്തു വരാതെ തടഞ്ഞുകൊണ്ട് നടത്തിയ പരീക്ഷണങ്ങളില് രോഗം പടരുന്നതായി കണ്ടെത്തിയില്ല.
ടാക്സോള് എന്ന പേരിലാണ് പാക്ലിടാക്സല് അറിയപ്പെടുന്നത്. ഏഡ്രിയമൈസിന് എന്നും ഡോക്സോറൂബിസിന് അറിയപ്പെടാറുണ്ട്. ഇവ ബ്രെസ്റ്റ് ക്യാന്സര് ട്യൂമറുകളെ എക്സോസോമുകള് എന്ന് അറിയപ്പെടുന്ന ദ്രാവകം നിറഞ്ഞ ചെറിയ കുമിളകള് പുറത്തു വിടാന് സഹായിക്കുന്നു. ബ്രെസ്റ്റ് ക്യാന്സറിന് അനുബന്ധമായി സാധാരണ കാണപ്പെടുന്നത് ശ്വാസകോശം, അസ്ഥി, കരള്, മസ്തിഷ്കം എന്നിവിടങ്ങളിലെ ക്യാന്സറാണ്. എന്നാല് ഇവ ഏതൊക്കെ അവയവങ്ങളിലെ ക്യാന്സറുകളാണ് സൃഷ്ടിക്കുന്നതെന്നത് അവ്യക്തമാണ്.
ഈ കണ്ടെത്തല് ബ്രെസ്റ്റ് ക്യാന്സര് ചികിത്സയില് കീമോതെറാപ്പി കൂടുല് ഫലപ്രദമായി നടത്താന് സഹായിക്കുമെന്ന് ശാസ്ത്രജ്ഞന്മാര് പ്രതീക്ഷ പ്രകടിപ്പിച്ചു. സ്വിസ് ഇന്സ്റ്റിറ്റ്യൂട്ട് ഓഫ് എക്സ്പിരിമെന്റല് ക്യാന്സര് റിസര്ച്ച് ആണ് പഠനം നടത്തിയത്. സാധാരണ ഗതിയില് ശസ്ത്രക്രിയക്കു മുമ്പാണ് ബ്രെസ്റ്റ് ക്യാന്സര് രോഗികളില് കീമോതെറാപ്പി നല്കുന്നത്. ട്യൂമര് ചുരുങ്ങുന്നതിനായാണ് ഇപ്രകാരം ചെയ്യുന്നത്. നിയോഅഡ്ജുവന്റ് തെറാപ്പി എന്ന പേരില് അറിയപ്പെടുന്ന ഈ രീതി അനുവര്ത്തിക്കുന്നത് ആരോഗ്യമുള്ള കലകള് ശരീരത്തില് നിന്ന് നഷ്ടമാകുന്നത് ഒഴിവാക്കാനും സഹായിക്കും. ചില രോഗികളില് കീമോതെറാപ്പി കഴിയുന്നതോടെ ട്യൂമര് അപ്രത്യക്ഷമാകാറുണ്ട്. ഇത്തരക്കാര്ക്ക് ശസ്ത്രക്രിയയുടെ ആവശ്യം ഉണ്ടാകാറില്ല.
നിയോഅഡ്ജുവന്റ് തെറാപ്പിയില് ട്യൂമര് ഇല്ലാതാകുന്നത് വളരെ അപൂര്വം മാത്രമാണ്. ട്യൂമറിന്റെ വളര്ച്ച തടയാന് കീമോതെറാപ്പിക്ക് സാധിച്ചില്ലെങ്കില് ക്യാന്സര് ശരീരത്തിന്റെ മറ്റു ഭാഗങ്ങളിലേക്ക് പടരും. യുകെയിലും അമേരിക്കയിലുമുള്ള സ്ത്രീകളില് എട്ടിലൊരാള്ക്ക് ബ്രെസ്റ്റ് ക്യാന്സര് ഉണ്ടാകുന്നുണ്ടെന്നാണ് കണക്കുകള് വ്യക്തമാക്കുന്നത്.
മോട്ടോര്വേ മിഡില് ലെയിനിലൂടെ കുറഞ്ഞ വേഗതയില് വാഹനമോടിച്ച ഡ്രൈവര്ക്ക് ടിക്കറ്റ് നല്കി പോലീസ്. തെംസ് വാലി പോലീസിന്റെ റോഡ് യൂണിറ്റ് ഇതിന്റെ വീഡിയോ സോഷ്യല് മീഡിയയില് പങ്കുവെച്ചിട്ടുണ്ട്. മിഡില് ലെയിനിലെ വേഗം കുറഞ്ഞ ഡ്രൈവിംഗ് അപകടങ്ങള്ക്ക് വലിയ കാരണമാകുന്നുവെന്ന വെളിപ്പെടുത്തല് വന്ന് ദിവസങ്ങള്ക്കുള്ളിലാണ് ഈ വീഡിയോ ഫുട്ടേജ് പുറത്തു വിട്ടിരിക്കുന്നത്. പോലീസ് വീഡിയോയില് കാണുന്ന കാറിന്റെ ഡ്രൈവര്ക്ക് അശ്രദ്ധമായി വാഹനമോടിച്ചതിനുള്ള ടിക്കറ്റാണ് നല്കിയതെന്ന് പോസ്റ്റ് പറയുന്നു. ന്യൂ ഇയര് വൈകുന്നേരം എം4ല് ന്യൂബറിയില് ബര്ക്ക്ഷയറിന് സമീപം ജംഗ്ഷന് 12നും 13നുമിടയില് വെച്ചാണ് പോലീസ് ഈ വീഡിയോ ചിത്രീകരിച്ചത്.
Vehicle stopped on the #M4 J12 towards 13 (near #Newbury) for #MiddleLaneHogging.
🚙 in lane 2 for over a mile whilst I was directly behind in a marked #BMW. Lane 1 totally clear the entire time. Ticket issued for #CarelessDriving.
If it’s clear move across! 🤦🏼♂️👮🏼♂️#P5562 pic.twitter.com/BHGBvmmAxC
— TVP Roads Policing (@tvprp) December 31, 2018
സ്ലോ ഡ്രൈവിംഗ് മൂലമുണ്ടാകുന്ന അപകടങ്ങള് ഒരു വര്ഷത്തില് മൂന്നിരട്ടിയായി വര്ദ്ധിച്ചിട്ടുണ്ടെന്ന് ഡിപ്പാര്ട്ട്മെന്റ് ഫോര് ട്രാന്സ്പോര്ട്ട് വിശകലനത്തിലാണ് വ്യക്തമായത്. 2017ല് ഈ വിധത്തിലുണ്ടായ അപകടങ്ങളില് 175 പേര്ക്ക് പരിക്കേല്ക്കുകയും രണ്ടു പേര് മരിക്കുകയും ചെയ്തു. സ്പീഡ് ലിമിറ്റിലും കുറഞ്ഞ വേഗതയില് മിഡില് ലെയിനിലൂടെ വാഹനമോടിക്കുന്നവരുടെ എണ്ണം വര്ദ്ധിച്ചിട്ടുണ്ടെന്ന് ഓട്ടോമൊബൈല് അസോസിയേഷനും അറിയിക്കുന്നു. ഇതു മൂലം മോട്ടോര്വേകളില് വാഹനങ്ങളുടെ നിരയുണ്ടാകുകയും ഗതാഗതക്കുരുക്കുകളും ഡ്രൈവര്മാര് തമ്മിലുള്ള കലഹങ്ങളും വര്ദ്ധിക്കുന്നുണ്ടെന്നും അസോസിയേഷന് വ്യക്തമാക്കുന്നു.
ഇടതു ലെയിന് ഒഴിവാണെങ്കില് കുറഞ്ഞ വേഗതയില് ഓടിക്കുന്നവര് അവിടേക്ക് മാറണമെന്നാണ് പോലീസ് നല്കുന്ന നിര്ദേശം. വീഡിയോയിലുള്ള സില്വര് ബിഎംഡബ്ല്യു കാര് ഒരു മൈലോളം മിഡില് ലെയിനിലൂടെയായിരുന്നു ഓടിയത്. പോലീസ് തൊട്ടു പിന്നാലെയുണ്ടായിരുന്നിട്ടും ഡ്രൈവര് ഇതേ ലെയിനില് തുടരുകയായിരുന്നു. ഇടതു ലെയിന് ഈ സമയമത്രയും ഒഴിഞ്ഞു കിടക്കുകയായിരുന്നുവെന്നും പോലീസ് അറിയിക്കുന്നു.
