എം.എല്‍.എ തിരുവഞ്ചൂര്‍ രാധാകൃഷ്ണന്റെ കാര്‍ അപകടത്തില്‍പ്പെട്ടു. പുലര്‍ച്ചെ 12.45ന് തിരുവനന്തപുരം നാലാംഞ്ചിറയിലായിരുന്നു അപകടം. എം.എല്‍.എയും ഡ്രൈവറും അപകടത്തില്‍ നിന്ന് പരുക്കില്ലാതെ രക്ഷപ്പെട്ടു.കോട്ടയത്തുനിന്ന് തിരുവനന്തപുരത്തേക്കു വരുവഴിയായിരുന്നു അപകടം. ഡ്രൈവര്‍ ഉറങ്ങിപ്പോയതാണ് അപകടകാരണം.

മലയാളം യുകെ ന്യൂസ് ടീം.

സ്കിൽഡ് മൈഗ്രേഷൻ യുകെയുടെ സാമ്പത്തിക അടിത്തറ മെച്ചപ്പെടുത്തുന്ന ഒരു പ്രധാന ഘടകമാണെന്ന് ഹോം ഓഫീസ്. മലയാളം യുകെ പ്രൊമോട്ട് ചെയ്ത ഇ പെറ്റീഷനോട് ഗവൺമെന്റ് പ്രതികരിച്ചു. ടയർ 2 വിസയിൽ ജോലി ചെയ്യുന്ന നഴ്സുമാർ സെറ്റിൽമെൻറിന് അപേക്ഷിക്കുമ്പോൾ കുറഞ്ഞ ശമ്പളം 35,000 പൗണ്ട് വേണം എന്ന നിബന്ധനയിൽ നിന്ന് ഒഴിവാക്കുമെന്ന് ഹോം ഓഫീസ് അറിയിച്ചു. ഭാവിയിൽ നഴ്സുമാരെ ഷോർട്ടേജ് ഒക്കുപ്പേഷൻ ലിസ്റ്റിൽ നിന്ന് മാറ്റിയാലും സെറ്റിൽമെൻറ് സമയത്ത് അവർക്ക് ഇളവ് ലഭിക്കും. മൈഗ്രേഷൻ അഡ്‌വൈസറി കമ്മിറ്റി എന്ന സ്വതന്ത്ര ചുമതലയുള്ള ബോഡിയുടെ നിർദ്ദേശ പ്രകാരമാണ്  നിലവിൽ 35,000 പൗണ്ട് എന്ന മിനിമം ശമ്പള പരിധി സെറ്റിൽമെൻറിന് ഏർപ്പെടുത്തിയിരുന്നത്. ആനന്ദ് കുമാർ എന്ന ഫിസിയോ തെറാപ്പിസ്റ്റ് ആരംഭിച്ച പെറ്റീഷന് വിപുലമായ പബ്ളിസിറ്റി നല്കാനും നിരവധി രാഷ്ട്രീയ നേതാക്കളെ ബന്ധപ്പെട്ട് ഓൺലൈൻ ഒപ്പുശേഖരണത്തിന് വൻ പ്രചാരം നല്കാനും മലയാളം യുകെ ന്യൂസ് ടീം നടപടികൾ സ്വീകരിച്ചിരുന്നു. ഇ പെറ്റീഷൻറെ ലിങ്കും മലയാളം യുകെ നിരവധി തവണ പ്രസിദ്ധീകരിച്ചിരുന്നു. 10,000 ഓൺലൈൻ ഒപ്പുകൾ ലഭിക്കുമ്പോളാണ് ഗവൺമെൻറ് പ്രതികരിക്കുന്നത്. നിലവിൽ 13,000ലേറെ ഒപ്പുകൾ ലഭിച്ചു കഴിഞ്ഞു.

ന്യൂസ് പബ്ളിഷിംഗിൽ രണ്ടാം വർഷത്തിലേയ്ക്ക് കടക്കുന്ന മലയാളം യുകെ ഓൺലൈൻ ന്യൂസിൻറെ സാമൂഹിക പ്രതിബദ്ധതയ്ക്ക് ലഭിക്കുന്ന അംഗീകാരവുമാണ് ഈ പെറ്റീഷൻറെ വിജയം. നിരവധി മലയാളികൾ ഈ പെറ്റീഷനിൽ മലയാളം യുകെ ന്യൂസിലെ ലിങ്ക് വഴി ഒപ്പു വയ്ക്കുകയും തങ്ങളുടെ ജോലി സ്ഥലങ്ങളിൽ മറ്റുള്ളവർക്ക് ഇതുമായി ബന്ധപ്പെട്ട ലിങ്ക് ഷെയർ ചെയ്ത് നല്കുകയും ചെയ്തിരുന്നു. മലയാളം യുകെ നല്കിയ പിന്തുണയ്ക്കു ഇപെറ്റീഷനു തുടക്കമിട്ട ബർമിങ്ങാമിൽ ജോലി ചെയ്യുന്ന ആനന്ദ് കുമാർ നന്ദി അറിയിച്ചു. സെറ്റിൽമെന്റിന് അപേക്ഷിക്കുമ്പോൾ ഹോം ഓഫീസ് അപേക്ഷ നിരസിക്കുമോ എന്ന ആശങ്കയിൽ കഴിഞ്ഞിരുന്ന നിരവധി മലയാളി നഴ്സുമാർക്ക് ഈ നയം മാറ്റം ആശ്വാസമാകും. നെറ്റ് മൈഗ്രേഷനിൽ കുറവ് വരുത്താൻ ശ്രമിക്കുന്നതിനോടൊപ്പം വിദഗ്ദരായ വർക്ക് ഫോഴ്സിനെ രാജ്യത്ത് സൃഷ്ടിക്കാൻ പ്രതിജ്ഞാബദ്ധമാണ് ഗവൺമെന്റ് എന്ന് പ്രതികരണത്തിൽ പറയുന്നു. 100,000 ഒപ്പുകൾ ലഭിച്ചാൽ ഈ പെറ്റീഷനേക്കുറിച്ച് പാർലമെൻറിൽ ചർച്ച നടക്കും. കുറഞ്ഞ ശമ്പളം 35,000 പൗണ്ട് ഉണ്ടെങ്കിൽ മാത്രമേ പി.ആറിന് അപേക്ഷിക്കാൻ യോഗ്യത ഉണ്ടാവുകയുള്ളൂ എന്ന നിയമത്തിൽ ഇളവ് വേണമെന്നാണ് പെറ്റീഷൻ ഗവൺമെന്റിനോട് ആവശ്യപ്പെട്ടിരുന്നത്. മലയാളികൾ അടക്കം നിരവധി പേർക്ക് ഈ ശമ്പള പരിധി നിയമം മൂലം ബുദ്ധിമുട്ട് ഉണ്ടാക്കിയിട്ടുണ്ട്. നിരവധി പേർക്ക് പി.ആർ അപേക്ഷകൾ നിരസിക്കപ്പെടുന്ന സാഹചര്യവും ഇതുമൂലം സംജാതമായി.

NHS അടക്കമുള്ള പൊതുമേഖലയിൽ ജോലി ചെയ്യുന്നവർക്ക് തുടക്ക ശമ്പളം ഇപ്പോഴും വളരെ കുറവാണ്. നോൺ യൂറോപ്യൻ രാജ്യങ്ങളിൽ നിന്നുള്ളവർക്കാണ് ഈ നിയമം ബാധകം. കഴിഞ്ഞ ഏപ്രിൽ മുതലാണ് ഈ കുറഞ്ഞ ശമ്പള പരിധി നിയമം ഹോം ഓഫീസ് നടപ്പിലാക്കിയത്. ഓവർ ടൈം, അലവൻസ്‌, ബോണസ് അടക്കം പലർക്കും 35,000 പൗണ്ടിനു മുകളിൽ വാർഷിക ശമ്പളം ലഭിക്കുന്നുണ്ടെങ്കിലും ഇത്രയും അടിസ്ഥാന ശമ്പളം വേണമെന്ന ഹോം ഓഫീസിൻറെ കടുംപിടുത്തം ആയിരക്കണക്കിന് കുടിയേറ്റക്കാരെയാണ് പ്രതിസന്ധിയിലാക്കിയത്. ഇന്ത്യയിൽ നല്ല ശമ്പളത്തിൽ ജോലി ചെയ്തിരുന്നവർ കൂടുതൽ മെച്ചപ്പെട്ട ജീവിത നിലവാരം ലക്ഷ്യമാക്കി യുകെയിലേക്ക് ചേക്കേറിയപ്പോൾ ഇങ്ങനെ ഒരു നിയമ മാറ്റം മുന്നിൽ കണ്ടിരുന്നില്ല. നാട്ടിലേയ്ക്കു തിരിച്ചു പോകേണ്ടി വരുന്ന അവസ്ഥ മലയാളികൾ അടക്കമുള്ള നിരവധി ഇന്ത്യൻ കുടുംബങ്ങളെ പ്രതിസന്ധിയിൽ ആക്കുകയായിരുന്നു.

ഗവൺമെൻറിന്റെ പ്രതികരണത്തിന്റെ ലിങ്ക് താഴെ കൊടുത്തിരിക്കുന്നു.

https://petition.parliament.uk/petitions/176987

ലണ്ടന്‍: ഭൂമിക്ക് ഏറ്റവും വലിയ ഭീഷണിയാണ് വര്‍ദ്ധിച്ചു വരുന്ന പ്ലാസ്റ്റിക് മാലിന്യം. ഏറ്റവും കുറഞ്ഞ വേഗത്തില്‍ നശിക്കുന്ന വസ്തുക്കൡ ഒന്നാണ് പ്ലാസ്റ്റിക്. കോടിക്കണക്കിന് ടണ്‍ പ്ലാസ്റ്റിക് മാലിന്യം കുഴിച്ചു മൂടുന്നുണ്ടെന്നാണ് കണക്ക്. ഇത് പരിസ്ഥിതിക്കും സൂക്ഷ്മജീവികള്‍ ഉള്‍പ്പെടുന്ന ആവാസ വ്യവസ്ഥയ്ക്കും ഉണ്ടാക്കുന്ന നാശം ചെറുതല്ല. പക്ഷേ ഈ പ്രശ്‌നത്തിനു പ്രകൃതിതന്നെ പരിഹാരമൊരുക്കിയിരിക്കുന്നു എന്ന വിവരമാണ് പുറത്തു വരുന്നത്. പ്ലാസ്റ്റിക് തിന്ന് ജീവിക്കാന്‍ കഴിയുന്ന തരം കൃമികളെ കണ്ടെത്തിയെന്നാണ് വിവരം.

തേനീച്ചക്കൂടുകളില്‍ കാണുന്ന വാക്‌സ് വേമുകളാണ് ഇവ. ഫെഡറിക ബെര്‍ട്ടോച്ചിനി എന്ന തേനീച്ച കര്‍ഷകയാണ് ഇതിനെക്കുറിച്ചുള്ള വിവരങ്ങള്‍ പങ്കുവെക്കുന്നത്. തേനീച്ചക്കൂടുകളില്‍ പരാദമായി ജീവിക്കുന്ന ഇവ തേനീച്ചക്കൂട്ടിലെ മെഴുകിലാണ് വളരുന്നത്. ഇവയുടെ ഭക്ഷണവും ഇതുതന്നെ. ഇവയെ കൂടുകളില്‍ നിന്ന മാറ്റി പ്ലാസ്റ്റിക് ബാഗുകളില്‍ സൂക്ഷിച്ചപ്പോളാണ് ബാഗുകളില്‍ ദ്വാരങ്ങള്‍ വീണത് ശ്രദ്ധിച്ചത്. ഈ കൃമികള്‍ പ്ലാസ്റ്റിക് ഭക്ഷണമാക്കുകയായിരുന്നു.

സ്‌പെയിനിലെ കാന്റാബ്രിയയില്‍ ബയോമെഡിസിന്‍, ബയോടെക്‌നോളജി പ്രൊഫസര്‍ കൂടിയായ ഇവര്‍ ഇത് ശ്രദ്ധിക്കുകയും കൂടുതല്‍ പഠനങ്ങള്‍ നടത്തുകയും ചെയ്തു. കേംബ്രിഡ്ജ് യൂണിവേഴ്‌സിറ്റിയിലെ പാവ്‌ലോ ബോംബെല്ലി, ക്രിസ്റ്റഫര്‍ ഹോവ് എന്നിവരുമായി ചേര്‍ന്ന് നടത്തിയ നിരീക്ഷണത്തില്‍ ഈ പുഴുക്കള്‍ പ്ലാസ്റ്റിക് തിന്നുന്നതായി വ്യക്തമായി. ഒരു എന്‍സൈമാണ് പുഴുക്കള്‍ക്ക് ഈ കഴിവ് നല്‍കുന്നത്. ഇവയെ വ്യാവസായികമായി ഉല്‍പാദിപ്പിച്ചാല്‍ ലോകം നേരിടുന്ന വലിയൊരു ഭീഷണിക്കാവും പരിഹാരമാകുക.

തിരുവനന്തപുരം: മൂന്നാറില്‍ പെമ്പിളൈ ഒരുമൈ നടത്തുന്ന സമരത്തിന് ജനപിന്തുണ ഇല്ലെന്ന് മുഖ്യമന്ത്രി നിയമസഭയില്‍. അവിടെ നടക്കുന്ന സമരത്തിന് പിന്നില്‍ സര്‍ക്കാര്‍ വിരുദ്ധ തിമിരം ബാധിച്ചവര്‍ മാത്രമാണ്. പെമ്പിളൈ ഒരുമയുടെ സമരത്തെ പൊലീസിനെ ഉപയോഗിച്ച് അടിച്ചമര്‍ത്താന്‍ ശ്രമിക്കുന്നു എന്ന പ്രതിപക്ഷത്തിന്റെ ആരോപണം തീര്‍ത്തും ശരിയല്ലെന്നും മുഖ്യമന്ത്രി സഭയില്‍ പറഞ്ഞു.

മൂന്നാറില്‍ നടന്ന സംഭവങ്ങളില്‍ ഡിവൈഎസ്പിയുടെ നേതൃത്വത്തില്‍ അന്വേഷണം നടക്കുന്നുണ്ട്. പോലീസിന്റെ ഔദ്യോഗിക കൃത്യനിര്‍വ്വഹണം തടഞ്ഞതിനാണ് സമരക്കാര്‍ക്കെതിരെ കേസെടുത്തിട്ടുള്ളത്. മൂന്നാറില്‍ പൊമ്പിളൈ ഒരുമൈ നടത്തുന്ന സമരത്തെ അവരുടെ തന്നെ സംഘടന തള്ളിപ്പറഞ്ഞിട്ടുണ്ടെന്നും മുഖ്യമന്ത്രി സഭയില്‍ വ്യക്തമാക്കി. പ്രശ്‌നങ്ങളെ തെറ്റായ രീതിയില്‍ വഴിതിരിച്ച് വിടാനുള്ള ശ്രമമാണ് നടക്കുന്നതെന്നും പിണറായി വിജയന്‍ പറഞ്ഞു.

നേരത്തെ സഭയില്‍ പെമ്പിളൈ ഒരുമൈ സമരത്തെ പൊലീസിനെ ഉപയോഗിച്ച് അടിച്ചമര്‍ത്താന്‍ ശ്രമം നടക്കുന്നുവെന്നും ഇത് സഭയില്‍ ചര്‍ച്ച ചെയ്യണമെന്നും ആവശ്യപ്പെട്ട് വി.ഡി. സതീശന്‍ അടിയന്തരപ്രമേയത്തിന് നോട്ടീസ് നല്‍കിയിരുന്നു. എന്നാല്‍ സ്പീക്കര്‍ ഇതിന് അനുമതി നിഷേധിച്ചു.

സൗത്ത് വെയില്‍സ്: ഇന്‍ഷുറന്‍സ് തുക തട്ടുന്നതിനായി മനഃപൂര്‍വം അപകടമുണ്ടാക്കിയ എന്‍എച്ച്എസ് നേഴ്‌സിനെ ജോലിയില്‍ നിന്ന് പിരിച്ചുവിട്ടു. നിക്കോള ബാര്‍ട്ട്‌ലെറ്റ് എന്ന 50കാരിയായ നേഴ്‌സിനാണ് തട്ടിപ്പ് പുറത്തു വന്നതിനേത്തുടര്‍ന്ന് ജോലി നഷ്ടമായത്. അപകടത്തില്‍ പരിക്കുപറ്റിയെന്ന് റിപ്പോര്‍ട്ട് ചെയ്തതിനേത്തുടര്‍ന്ന് ഇവര്‍ക്ക് 16,764 പൗണ്ട് നഷ്ടപരിഹാരം ഇന്‍ഷുറന്‍സ് കമ്പനിയില്‍ നിന്ന് ലഭിച്ചിരുന്നു. സൗത്ത് വെയില്‍സിലെ ന്യൂപോര്‍ട്ടിലുള്ള ബന്ധുവിന്റെ ഈസിഫിക്‌സ് എന്ന ഗ്യാരേജുമായി ചേര്‍ന്നാണ് ഇന്‍ഷുറന്‍സ് പണം തട്ടിയെടുക്കാന്‍ ഇവര്‍ ശ്രമിച്ചത്.

ന്യൂപോര്‍ട്ടില്‍ വെച്ച് തന്റെ വാഹനത്തില്‍ മറ്റൊരു വാഹനം ഇടിച്ചു എന്നായിരുന്നു ഇവര്‍ അവകാശപ്പെട്ടത്. 2010ല്‍ നടന്നുവെന്ന് അവകാശപ്പെടുന്ന അപകടത്തില്‍ തനിക്കും തന്റെ സഹോദരനും പരിക്ക് പറ്റിയതായും വാഹനം പൂര്‍ണ്ണമായും തകര്‍ന്നുവെന്നുമായിരുന്നു ഇവര്‍ പറഞ്ഞിരുന്നത്. വാഹനം ഉപയോഗശൂന്യമായെന്ന് എഴുതിത്തള്ളിയ ഗ്യാരേജില്‍ പോലീസ് നടത്തിയ അന്വേഷണത്തിലാണ് കള്ളിപൊളിഞ്ഞത്. 2009നും 2011നുമിടയില്‍ 7,50,000 പൗണ്ട് തട്ടിയെടുക്കാന്‍ 28 വ്യാജ അപകടങ്ങള്‍ ഈ ഗ്യാരേജ് സൃഷ്ടിച്ചിട്ടുണ്ടെന്നും അന്വേഷണത്തില്‍ വ്യക്തമായി.

ഗ്യാരേജിലെ സിസിടിവി ദൃശ്യങ്ങളാണ് ഇവരെ കുടുക്കിയത്. ഒരു ലാന്‍ഡ് റോവര്‍ ഒരു ഫോര്‍ക്ക് ലിഫ്റ്റ് ട്രക്കിലേക്ക് മനഃപൂര്‍വം ഇടിച്ചു കയറ്റുന്നതിന്റെ വീഡിയോ ഇവിടെനിന്ന് ലഭിച്ചു. തട്ടിപ്പ് നടത്തിയ സംഭവത്തില്‍ ബാര്‍ട്ടെലെറ്റ് ഗൂഢാലോചന നടത്തിയതായും ഇവര്‍ കുറ്റക്കാരിയാണെന്നും കാര്‍ഡിഫ് ക്രൗണ്‍ കോടതി 2015ല്‍ വിധിച്ചിരുന്നു. 9 മാസത്തെ ജയില്‍ തടവും 250 മണിക്കൂര്‍ കമ്യൂണിറ്റി സര്‍വീസും 1350 പൗണ്ട് തിരിച്ചടക്കാനുമാണ് ഇവര്‍ക്ക് ലഭിച്ച ശിക്ഷ.

തൊഴിലിനെ അപകീര്‍ത്തിപ്പെടുത്തിയതിനാണ് വൈസ്റ്റാര്‍ ഫോര്‍ ഹോസ്പിറ്റല്‍ ഇവരെ പുറത്താക്കിയത്. 2018 ജനുവരിയിലാണ് രണ്ട് വര്‍ഷത്തേക്ക് സസ്‌പെന്‍ഡ് ചെയ്യപ്പെട്ട ഇവരുടെ തടവ് ശിക്ഷ അവസാനിക്കുന്നത്. അപ്പോഴേക്കും ഒരു പ്രൊഫഷണല്‍ മിസ്‌കോണ്‍ഡക്റ്റ് ട്രയല്‍ ഇവര്‍ക്കെതിരെ ഉണ്ടാകും.

ലണ്ടന്‍: മസിലുകള്‍ പെരുപ്പിച്ച് ആകര്‍ഷകമായി ശരീരവുമായി നടക്കാന്‍ എല്ലാവര്‍ക്കും താല്‍പര്യമുണ്ട്. പക്ഷേ അതിനായി ജിമ്മില്‍ പോയി വ്യായാമം ചെയ്യാനോ അതിനായി തയ്യാറാക്കിയിരിക്കുന്ന ഭക്ഷണശീലങ്ങള്‍ പിന്‍തുടരാനോ ആര്‍ക്കും താല്‍പര്യമില്ല. എല്ലാത്തിനും എളുപ്പവഴികള്‍ തേടുന്നതാണല്ലോ ഏവര്‍ക്കും ശീലം. ഇത്തരക്കാര്‍ക്ക് സന്തോഷം പകരുന്ന വാര്‍ത്തയാണ് ഇപ്പോള്‍ പുറത്തു വരുന്നത്. മസില്‍ ഉണ്ടാക്കുന്ന മരുന്നിന്റെ കണ്ടുപിടിത്തത്തിലേക്ക് ശാസ്ത്രലോകം ഒരു പടികൂടി അടുത്തിരിക്കുന്നു എന്നാണ് ആ വാര്‍ത്ത.

ശരീരത്തെ ക്ഷീണിപ്പിക്കുന്ന പ്രോട്ടീന്‍ ആയ മയോസ്റ്റാറ്റിനെക്കുറിച്ചുള്ള പഠനമാണ് പുതിയ വഴിത്തിരിവില്‍ എത്തിയിരിക്കുന്നത്. ഇവ ശരീരത്തില്‍ നിര്‍മിക്കപ്പെടുന്നത് ഒഴിവാക്കാനായാല്‍ ശരീരത്തിലെ പേശികള്‍ കൂടുതല്‍ വളരുകയും ഹൃദയത്തിന്റെയും വൃക്കകളുടെയും ആരോഗ്യവും സംരക്ഷിക്കാനും ആകുമെന്നാണ് കണ്ടെത്തിയിരിക്കുന്നത്. എലികളില്‍ നടത്തിയ പരീക്ഷണങ്ങള്‍ വിജയകരമാണെന്ന് ശാസ്ത്രജ്ഞര്‍ വ്യക്തമാക്കി. മനുഷ്യരില്‍ ഈ മാര്‍ഗം വളരെ ഫലപ്രദമാകുമെന്നാണ് കരുതുന്നത്. ശരീരത്തില്‍ ഈ പ്രോട്ടീന്‍ ഉല്‍പാദിപ്പിക്കുന്നത് പുതിയ മരുന്ന് തടയുന്നു. പൊണ്ണത്തടിയുള്ളവരില്‍ മയോസ്റ്റാറ്റിന്‍ ഉല്‍പാദനത്തിന്റെ അളവ് കൂടുതലാണ്. ഇത് പേശികളുടെ നിര്‍മാണത്തെ തടയുകയും ശരീരത്തിന് തളര്‍ച്ചയുണ്ടാക്കുകയും ചെയ്യും

അമേരിക്കയിലെ ജോര്‍ജിയയിലുള്ള ഓഗസ്റ്റ യൂണിവേഴ്‌സിറ്റിയിലാണ് ഇതു സംബന്ധിച്ചുള്ള ഗവേഷണങ്ങള്‍ നടക്കുന്നത്. പൊണ്ണത്തടിയെ ചെറുക്കുകയും വ്യായാമത്തിന്റെ എല്ലാ ഫലങ്ങളും നല്‍കുകയും ചെയ്യുന്ന ഒരു ഗുളികയുടെ കണ്ടെത്തലിലേക്കാണ് തങ്ങള്‍ നീങ്ങുന്നതെന്ന് ഗവേഷകരില്‍ ഒരാളായ ജോഷ്വ ബുച്ചര്‍ പറഞ്ഞു. പേശീക്ഷയത്തിനും അര്‍ബുദ ചികിത്സയ്ക്കും എയിഡ്‌സിനു വരെ ഈ മരുന്ന് ഫലപ്രദമായി ഉപയോഗിക്കാനാകുമെന്നാണ് കരുതുന്നത്.

കരിപ്പൂർ ∙ കോഴിക്കോട് വിമാനത്താവളത്തിൽ എയർ ഇന്ത്യ വിമാനത്തിന്റെ എൻജിനിൽ ഒന്ന് പൊട്ടിത്തകർന്ന് റൺവേയിൽ ചിതറി. നിയന്ത്രണംവിട്ടു റൺവേയിൽനിന്നു തെന്നിമാറിയ വിമാനത്തിന്റെ ചക്രവും പൊട്ടിത്തെറിച്ചതോടെ ഏതാനും സമയത്തേക്കു വിമാനത്താവളം ആശങ്കയിലാഴ്ന്നു. ദുബായിലേക്കുള്ള വിമാനമാണ് ഇന്നലെ രാവിലെ പതിനൊന്നരയ്ക്ക് അപകടത്തിൽപെട്ടത്. 172 യാത്രക്കാരാണ് വിമാനത്തിലുണ്ടായിരുന്നത്.

പെമ്പിളൈ ഒരുമൈ പ്രവര്‍ത്തകര്‍ക്കെതിരെ എം.എം മണി നടത്തിയ സ്ത്രീവിരുദ്ധ പ്രസ്താവനക്കെതിരെ പ്രതിഷേധത്തിന് ആക്കം കൂട്ടി ഇന്നുമുതല്‍ പെമ്പിളൈ ഒരുമൈയുടെ നിരാഹാരസമരം. നേതാക്കളായ ഗോമതി അഗസ്റ്റിന്‍, കൗസല്യ തങ്കമണി എന്നിവരാണ് അനിശ്ചിതകാല നിരാഹാരം ഇരിക്കുന്നത്. പ്രസ്താവന നടത്തിയ മന്ത്രി മൂന്നാറിലെത്തി തൊഴിലാളികളുടെ കാലുപിടിച്ച് മാപ്പുപറയണമെന്ന ഉറച്ച നിലപാടിലാണ് പെമ്പിളൈ ഒരുമൈ.
ഇത്രയും ഹീനമായ പ്രസ്താവന നടത്തിയ മന്ത്രി മണി രാജിവെക്കണമെന്ന ആവശ്യവും ഇവര്‍ ഉന്നയിക്കുന്നു. രണ്ടുതവണ മണി ഖേദപ്രകടനം നടത്തിയെങ്കിലും മൂന്നാറിലെത്തി മന്ത്രി മാപ്പുപറയണമെന്ന് തന്നെയാണ് പ്രതിഷേധക്കാരുടെ നിലപാട്. ഞായറാഴ്ച വൈകിട്ടോടെ ആരംഭിച്ച സമരത്തിന് പിന്തുണയുമായി ബിജെപി, കോണ്‍ഗ്രസ്, ആം ആദ്മി പാര്‍ട്ടിയ തുടങ്ങിയ രാഷ്ട്രീയ സംഘടനകളും സമരപന്തലില്‍ എത്തിയിരുന്നു.

സമരം കൊണ്ട് തൊഴിലാളികള്‍ക്ക് ബുദ്ധിമുട്ടുണ്ടാകില്ലെന്നും അതിനാല്‍ സംഘടനയ്ക്ക് വേണ്ടി നേതൃനിരയിലുളളവര്‍ മാത്രമേ സമരത്തില്‍ പങ്കെടുക്കൂവെന്നും ഗോമതി സമരത്തെക്കുറിച്ച് വ്യക്തമാക്കി. അതേ സമയം മൂന്നാറിലെ കയ്യേറ്റ വിഷയങ്ങളിലടക്കം വിവാദങ്ങളില്‍ അകപ്പെട്ട സിപിഐഎം നേതൃത്വം ഇന്നുവൈകിട്ട് മൂന്നാറില്‍ വിശദീകരണ യോഗം നടത്തുന്നുണ്ട്.

ലണ്ടന്‍: വായു മലിനീകരണത്തിന്റെ ഫലമായി കൂട്ടമരണങ്ങള്‍ ഇല്ലാത്തിടത്തോളം ഇക്കാര്യത്തില്‍ അടിയന്തര സാഹചര്യം ഇല്ലെന്ന് എന്‍വയണ്‍മെന്റ് സെക്രട്ടറി ആന്‍ഡ്രിയ ലീഡ്‌സം. അന്തരീക്ഷ മലിനീകരണം നിയന്ത്രിക്കാനുള്ള പദ്ധതികള്‍ വൈകിപ്പിക്കാന്‍ സര്‍ക്കാര്‍ ശ്രമിക്കുന്നതിനിടെയാണ് വിവാദ പരാമര്‍ശവുമായി ലീഡ്‌സം എത്തിയത്. അന്തരീക്ഷത്തില്‍ അനിയന്ത്രിതമായി വ്യാപിക്കുന്ന നൈട്രജന്‍ ഡയോക്‌സൈഡിന്റെ അളവ് നിയന്ത്രിക്കാനുള്ള നടപടികള്‍ എടുക്കാതെ നടപടികള്‍ വൈകിക്കാനുള്ള സര്‍ക്കാര്‍ ശ്രമത്തിനെതിരെ വ്യാപക വിമര്‍ശനമാണ് ഉയരുന്നത്. ഡീസല്‍ വാഹനങ്ങളില്‍ നിന്നാണ് ഈ വിഷവാതകം അന്തരീക്ഷത്തില്‍ എത്തുന്നത്.

തെരഞ്ഞെടുപ്പിന്റെ പശ്ചാത്തലത്തില്‍ സര്‍ക്കാര്‍ നയങ്ങള്‍ രഹസ്യമായി നടപ്പാക്കാന്‍ ശ്രമിക്കുന്നതായി പ്രതിപക്ഷം ആരോപിക്കുന്നു. തന്റെ കൈകള്‍ ബന്ധിക്കപ്പെട്ടിരിക്കുന്നതായി സെക്രട്ടറി അവകാശപ്പെടുന്നതിനെയും ലേബര്‍ വിമര്‍ശിക്കുന്നു. പൊതുജനാരോഗ്യത്തെ ബാധിക്കുന്ന സാഹചര്യങ്ങളില്‍ ഈ നിയന്ത്രണങ്ങള്‍ എടുത്തു കളയാവുന്നതാണ്. എന്നാല്‍ പ്രത്യേക അടിയന്തര സാഹചര്യങ്ങള്‍ ഉടലെടുക്കുന്ന സാഹചര്യങ്ങളില്‍ മാത്രമാണ് സര്‍ക്കാര്‍ ഇത്തരം നടപടികള്‍ എടുക്കാറുള്ളതെന്ന് ലീഡ്‌സം വ്യക്തമാക്കി.

ഭക്ഷ്യവിഷബാധ പോലെയുള്ളവ സംഭവിക്കുമ്പോളും മറ്റുമാണ് അടിയന്തര നടപടികള്‍ എടുക്കേണ്ടതായി വരുന്നത്. എന്നാല്‍ വായു മലിനീകരണം അത്തരത്തില്‍ വ്യത്യസ്തമായ ഒന്നല്ലെന്നാണ് ലീഡസം പറയുന്നത്. വര്‍ഷത്തില്‍ 40,000 അകാല മരണങ്ങള്‍ക്ക് കാരണമാകുന്ന വായു മലിനീകരണം അടിയന്തര പ്രാധാന്യമര്‍ഹിക്കുന്ന പ്രശ്‌നമല്ലെന്നാണോ എന്ന ചോദ്യമാണ് ഇതോടെ ഉയര്‍ന്നത്. എന്നാല്‍ അടിയന്തരം എന്ന വാക്ക് ലീഡ്‌സം ഉപയോഗിച്ചില്ല.

ലണ്ടന്‍: സ്‌കൂള്‍ അവധി ദിനങ്ങള്‍ യുകെയില്‍ 30 ലക്ഷത്തോളം വിദ്യാര്‍ത്ഥികളെ പട്ടിണിയിലേക്ക് തള്ളിവിടുന്നതായി വെളിപ്പെടുത്തല്‍. എംപിമാരുടെയും ലോര്‍ഡ്‌സ് അംഗങ്ങളുടെയും സര്‍വകക്ഷി സമിതിയാണ് ഈ അവലോകനം നടത്തിയത്. സ്‌കൂളില്‍ നിന്ന് സൗജന്യ ഉച്ചഭക്ഷണം ലഭിക്കുന്ന 10 ലക്ഷത്തോളം കുട്ടികളും ദരിദ്ര സാഹചര്യങ്ങളില്‍ നിന്ന് വരുന്ന 20 ലക്ഷത്തോളം കുട്ടികളുമാണ് സമ്മര്‍ അവധി ദിനങ്ങളില്‍ പട്ടിണിയുടെ നിഴലിലാകുന്നത്. സ്‌കൂളുകളില്ലാത്ത സമയത്ത് പട്ടിണിയാകുന്നതിനു പുറമേ മികച്ച വിദ്യാഭ്യാസം ലഭിക്കുന്നതിനും ആരോഗ്യകരമായ ജീവിതം നയിക്കുന്നതിനുമുള്ള സാഹചര്യങ്ങളും ഇവര്‍ക്ക് നഷ്ടമാകുന്നുണ്ടെന്നും സമിതി വിലയിരുത്തുന്നു.

സ്‌കൂള്‍ ക്യാന്റീനുകള്‍ പ്രവര്‍ത്തിക്കാത്ത അവധിക്കാലത്ത് ഈ വിദ്യാര്‍ത്ഥികള്‍ക്ക് ഭക്ഷണം ലഭ്യമാക്കുന്നതിന് ചാരിറ്റികളും ലോക്കല്‍ ചര്‍ച്ചുകളുമായി ചേര്‍ന്ന് പദ്ധതികള്‍ തയ്യാറാക്കണമെന്നും ഇതിനായി ഷുഗര്‍ ടാക്‌സില്‍ നിന്ന് ലഭിക്കുന്ന 41.5മില്യന്‍ പൗണ്ട് ഉപയോഗിക്കാന്‍ തയ്യാറാകണമെന്നുമാണ് സമിതി മന്ത്രിമാരോട് ആവശ്യപ്പെടുന്നത്. അവധി ദിനങ്ങള്‍ക്കു ശേഷം മടങ്ങിയെത്തുന്ന കുട്ടികളില്‍ പോഷകക്കുറവ് മൂലമുള്ള പ്രശ്‌നങ്ങള്‍ കാണാറുണ്ടെന്നും സമിതി വിലയിരുത്തി. ഇത് കുട്ടികളുടെ ബുദ്ധിശക്തിയെയും പഠനനിലവാരത്തെയും വരെ ബാധിക്കുന്നുണ്ടെന്നാണ് കണ്ടെത്തിയിരിക്കുന്നത്.

അവധി ദിനങ്ങള്‍ക്കു ശേഷം ഈ വിധത്തില്‍ ഒട്ടേറെ കുട്ടികള്‍ സ്‌കൂളുകളില്‍ എത്തുന്നു എന്നത് വാസ്തവമാണെന്നും ഇംഗ്ലണ്ടിനു പുറമേ, വെയില്‍സ്, സ്‌കോട്ട്‌ലന്‍ഡ്, നോര്‍ത്തേ്ണ്‍ അയര്‍ലന്‍ഡ് എന്നിവിടങ്ങളിലും സമാന സാഹചര്യമാണ് നിലവിലുള്ളതെന്നും സമിതി വ്യക്തമാക്കുന്നു. ക്രിസ്പുകളും ബിസ്‌കറ്റുകളും മാത്രം കഴിക്കുന്ന കുട്ടികള്‍ക്ക് ഛര്‍ദ്ദി പോലുള്ള ശാരീരികാസ്വസ്ഥതകളുണ്ടാകുന്നുണ്ട്. ഫുട്‌ബോള്‍ മത്സരങ്ങളില്‍ നിന്ന് ശാീരീരികക്ഷമതയില്ലാത്തതിനാല്‍ ഇവര്‍ പുറത്തേക്ക് പോകുന്നതായും സമിതി നിരീക്ഷിക്കുന്നു.