ന്യൂസ് ഡെസ്ക് മലയാളം യുകെ

യു കെ :- ചരക്ക് കപ്പലുകൾക്ക് സുഗമമായി കടന്നു പോകുന്നതിനായി ചെങ്കടലിലെ പാത സുരക്ഷിതമാക്കുവാൻ യുഎസിന്റെ നേതൃത്വത്തിലുള്ള ഓപ്പറേഷൻ പ്രോസ്പിരിറ്റി ഗാർഡിയനിൽ ബ്രിട്ടീഷ് യുദ്ധക്കപ്പലായ എച്ച് എം എസ് ഡയമണ്ടും പങ്കുചേർന്നിരിക്കുകയാണ്. ചെങ്കടലിൽ ഇറാൻ പിന്തുണയുള്ള ഹൂത്തികൾ നടത്തിയ ഏറ്റവും വലിയ ആക്രമണത്തെ കപ്പൽ വിജയകരമായി പ്രതിരോധിച്ചതായി പ്രതിരോധ സെക്രട്ടറി ഗ്രാന്റ് ഷാപ്‌സ് പറഞ്ഞു. സീ വൈപ്പർ ആന്റി-എയർ മിസൈൽ സിസ്റ്റം ഉപയോഗിച്ച് മറ്റ് കപ്പലുകളെ വ്യോമ പ്രതിരോധത്തോടെ സംരക്ഷിക്കുക എന്നതാണ് കപ്പലിന്റെ പ്രധാന നിയോഗമെന്ന് പ്രതിരോധ മന്ത്രാലയം അറിയിച്ചു. ശത്രു ഭീഷണികൾ ദൂരെ നിന്നുതന്നെ അറിയുവാൻ ഇതിലൂടെ സാധിക്കുമെന്നും, ചരക്ക് കപ്പലുകൾ തടയാനുള്ള ഹൂതികളുടെ നീക്കത്തെ ഏതു വിധേനയും തടയുമെന്നും പ്രതിരോധ മന്ത്രാലയം അറിയിച്ചു.

ചെങ്കടലിലൂടെ സഞ്ചരിക്കുന്ന ചരക്ക് കപ്പലുകൾക്ക് നേരെയുള്ള ആക്രമണങ്ങളുടെ ഉത്തരവാദിത്തം ഹൂതി സംഘം ഏറ്റെടുത്തതിന് തൊട്ടുപിന്നാലെ, യെമനിലെ ഇറാൻ ആസ്ഥാനമായുള്ള വിമത ഗ്രൂപ്പായ ഹൂതികൾക്കെതിരെ പ്രതികാര ആക്രമണം നടത്താൻ അമേരിക്കയും യുണൈറ്റഡ് കിംഗ്ഡവും ഒന്നിക്കും എന്ന മുന്നറിയിപ്പ് നേരത്തെ തന്നെ നൽകി കഴിഞ്ഞിരുന്നു. എച്ച് എം എസ് ഡയമണ്ടിന് പുറമെ, എച്ച് എം എസ് റിച്ച്മെണ്ട് എന്ന കപ്പലും ബ്രിട്ടൻ ചെങ്കടലിൽ വിന്യസിച്ചിട്ടുണ്ട്. ചെങ്കടലിലൂടെയുള്ള പെട്രോളിങ്ങിനാണ് ഈ കപ്പൽ കൂടുതലായും ഉപയോഗിക്കുക എന്ന് പ്രതിരോധ മന്ത്രാലയം അറിയിച്ചു.

ഇതിനിടെ യെമനിലെ ഹൂതി താവളങ്ങൾ തകർക്കാൻ ലക്ഷ്യമിട്ട് യുഎസും യുകെയും നടത്തിയ വ്യോമാക്രമണം, ഇസ്രായേൽ-ഹമാസ് യുദ്ധത്തിനിടയിൽ പ്രദേശത്തെ സംഘർഷങ്ങൾ കൂടുതൽ വഷളാക്കിയിട്ടുണ്ട്. യുഎസ് ഭരണകൂടം ആഹ്വാനം ചെയ്ത വ്യോമാക്രമണത്തിന് ബ്രിട്ടീഷ് പ്രധാനമന്ത്രി ഋഷി സുനക് അനുമതി നൽകിയതായും ബ്ലൂംബര്‍ഗ് റിപ്പോർട്ട് ചെയ്തു. പാലസ്തീനിലെ തങ്ങളുടെ സഖ്യകക്ഷിയായ ഹമാസിനോട് ഐക്യദാർഢ്യം പ്രഖ്യാപിച്ചു കൊണ്ട്, ഗാസയിൽ നടക്കുന്ന യുദ്ധത്തിൽ പ്രതിഷേധിച്ചാണ് ഇസ്രായേലുമായി ബന്ധമുള്ള കപ്പലുകളെ എല്ലാം തന്നെ ഹൂതികൾ ആക്രമിക്കുവാൻ ശ്രമിച്ചത്. എന്നാൽ ആക്രമണത്തിൽപ്പെട്ട കപ്പലുകൾക്ക് ഇസ്രായേലുമായി യാതൊരു ബന്ധവും ഇല്ല. തുടർന്ന് ചെങ്കടലിലൂടെയുള്ള ചരക്ക് ഗതാഗതം താറുമാറാകുന്ന സാഹചര്യത്തിലാണ് യുഎസ്, യുകെ പോലെയുള്ള വൻ ശക്തികൾ പ്രശ്നത്തിൽ ഇടപെട്ടത്. ചെങ്കടലിലെ ആക്രമണങ്ങൾ പല രാജ്യങ്ങളുടെയും വിതരണ ശൃംഖലയെയും എണ്ണവിലയെയും സാരമായി ബാധിച്ചു. ഇത്തരം ഒരു സാഹചര്യത്തിൽ കാര്യങ്ങൾ എങ്ങനെയാകുമെന്ന് വിലയിരുത്തുകയാണ് ലോകരാജ്യങ്ങൾ.

ന്യൂസ് ഡെസ്ക് മലയാളം യുകെ

യുകെയിലെ പ്രമുഖ എൻഎച്ച്എസ് ആശുപത്രികളിലും രോഗികളെ ചികിൽസിക്കുന്നതിനുള്ള പോരായ്‌മ ചൂണ്ടിക്കാട്ടിയുള്ള ബിബിസി റിപ്പോർട്ട് പുറത്ത്. 20 വർഷത്തെ റെക്കോർഡുകൾ വിലയിരുത്തി തയാറാക്കിയ റിപ്പോർട്ടിൽ വടക്കൻ അയർലൻഡും വെയിൽസും ഫോർ ഹവർ ആക്സിഡന്റ് ആൻഡ് എമെർജൻസി(എ&ഇ) ടാർഗറ്റ് ഒരിക്കൽ പോലും നിറവേറ്റിയിട്ടില്ലെന്ന് കണ്ടെത്തി. ഇത് അപകട-അടിയന്തര സഹായങ്ങൾക്കായി പ്രവേശിക്കുന്ന രോഗികൾ ചികിത്സയ്ക്കായും മറ്റും നാല് മണിക്കൂറിൽ കൂടുതൽ കാത്തിരിക്കാതിരിക്കാനായി നടപ്പാക്കിയ നിയമമാണ്.

എ&ഇ, ക്യാൻസർ, പ്ലാൻഡ് കെയറിനുള്ള കാത്തിരുപ്പ് സമയം എന്നിവ ഉൾക്കൊള്ളുന്ന മൂന്ന് പ്രധാന ലക്ഷ്യങ്ങളാണ് റിപ്പോർട്ടിനായി ഏറ്റവും കൂടുതൽ പരിഗണിച്ചത്. കഴിഞ്ഞ ഏഴ് വർഷങ്ങളിലെ കണക്കുകൾ പരിശോധിക്കുമ്പോൾ സ്‌കോട്ട്‌ലൻഡിലെ എൻഎച്ച്എസ് മാത്രമാണ് എ&ഇയിലെ ടാർഗറ്റ് പൂർത്തിയാക്കിയിരിക്കുന്നത്. എന്നാൽ ഇത് 2020-ൽ രോഗികളുടെ എണ്ണം കുറഞ്ഞിരുന്ന ലോക്ക്ഡൗൺ കാലഘട്ടത്തിൽ ആയിരുന്നു.

അതേസമയം തങ്ങളുടെ പിഴവുകൾ മനസിലാക്കി പ്രവർത്തിക്കാനുള്ള അവസരമാണിതെന്ന് കിംഗ്സ് ഫണ്ട് തിങ്ക് ടാങ്ക് ചീഫ് അനലിസ്റ്റ് ശിവ ആനന്ദശിവ പറഞ്ഞു. ചികിത്സകളിൽ വരുന്ന കാലതാമസം രോഗികളെ അപകടത്തിലാക്കുന്നുവെന്ന അഭിപ്രായം മുന്നോട്ട് വരുന്നുണ്ട്. ചികിത്സയ്ക്കായി കാത്തിരിക്കുമ്പോൾ പലരുടെയും ആരോഗ്യം മോശമാവുന്ന സാഹചര്യം ഉണ്ടാവാറുണ്ടെന്ന് എൻഎച്ച്എസ് പേഷ്യന്റ്സ് അസോസിയേഷൻ ചീഫ് എക്സിക്യൂട്ടീവ് റേച്ചൽ പവർ പറഞ്ഞു. അതേസമയം വെയ്റ്റിംഗ് ടൈം കുറയ്ക്കാനുള്ള നീക്കങ്ങൾ ഉടൻ നടപ്പിലാക്കുമെന്ന് അധികൃതർ വ്യക്തമാക്കി.

ന്യൂസ് ഡെസ്ക് മലയാളം യുകെ

യു കെ :- മറ്റുള്ളവരുടെ കണ്ണുകളെ അന്ധമാക്കാൻ കഴിവുള്ള തരത്തിൽ മിന്നുന്ന കാർ ഹെഡ് ലൈറ്റുകൾ രാത്രി ഡ്രൈവർമാർക്ക് ഉണ്ടാക്കുന്ന പ്രശ്നം ബ്രിട്ടനിൽ ചർച്ച വിഷയമായി മാറിയിരിക്കുകയാണ്. മറ്റു വാഹനം ഓടിക്കുന്നവരെ ബുദ്ധിമുട്ടിക്കാതിരിക്കുവാൻ ഡ്രൈവർമാർ തങ്ങളുടെ ഹെഡ് ലൈറ്റുകൾ ശരിയായി ക്രമീകരിച്ചിട്ടുണ്ടെന്ന് ഉറപ്പുവരുത്തണമെന്ന നിർദ്ദേശം ആരോഗ്യവിദഗ്ധരും മറ്റ് അധികൃതരും നൽകുന്നു. ബ്ലൂ ടിന്റ് എൽ ഇ ഡി ബൾബുകളും, ഉച്ചയ്ക്ക് വരുന്ന എസ് യു വി കളുടെ എണ്ണവും ആണ് ഇത്തരത്തിലുള്ള ലൈറ്റുകളുടെ ക്രമാതീതമായ ഉപയോഗത്തിന് കാരണമായത്. ഹെഡ് ലൈറ്റുകളിൽ നിന്നുണ്ടാകുന്ന ഗ്ലെയർ മൂലം ബുദ്ധിമുട്ട് അനുഭവിക്കുന്ന ഡ്രൈവർമാർ അതിന് എന്തെങ്കിലും നടപടികൾ ഉണ്ടാകണമെന്ന് ആഗ്രഹിക്കുന്നതായി ആർ എ സി വക്താവ് റോഡ് ഡെന്നിസ് പറഞ്ഞു. ഉടൻതന്നെ ഈ പ്രശ്നം പരിഹരിക്കുവാനായി ഗവൺമെന്റിൻെറ ഭാഗത്ത് നിന്നും ശക്തമായ നടപടി ഉണ്ടാകണമെന്ന് ആവശ്യമാണ് ഭൂരിഭാഗം പേരും ഉന്നയിക്കുന്നത്.

ഹെഡ് ലൈറ്റുകളിൽ നിന്നുള്ള ശക്തമായ ഗ്ലെയറിൽ നിന്നും രക്ഷപ്പെടാനായി ചില മാർഗങ്ങൾ ഇവയാണ്.ഗ്ലെയർ വളരെ പ്രശ്‌നകരമായാൽ ഒരു അപകടം ഒഴിവാക്കാനായി ഡ്രൈവർമാർ വാഹനത്തിന്റെ വേഗത കുറയ്ക്കേണ്ടത് ആവശ്യമാണ്. എന്നാൽ പിന്നിൽ നിന്നുള്ള കൂട്ടിയിടി ഒഴിവാക്കാനായി വളരെ പെട്ടെന്ന് വേഗത കുറയ്ക്കരുതെന്ന നിർദ്ദേശവുമുണ്ട്. അതോടൊപ്പം തന്നെ വിൻഡ്സ് ക്രീനുകൾ വ്യക്തമായി കാണുവാനായി വൃത്തിയായി സൂക്ഷിക്കണം. ചില സമയങ്ങളിൽ കാർ ഹീറ്ററുകളിൽ നിന്നുള്ള വൃത്തിഹീനമായ വായു ഗ്ലാസിലേക്ക് അടിക്കുന്നത് മൂലം ഇന്റീരിയറിൽ മങ്ങിയ ഒരു ഫിലിം അടിഞ്ഞുകൂടുവാൻ സാധ്യതയുണ്ടെന്നും ഇത് ഹെഡ് ലൈറ്റുകളിൽ നിന്നുള്ള തിളക്കം വർദ്ധിപ്പിക്കുന്നതിന് ഇടയാക്കുന്നതിനാൽ ഇത്തരം സാഹചര്യങ്ങൾ ഒഴിവാക്കണമെന്നും ഡ്രൈവർമാർക്ക് നിർദ്ദേശമുണ്ട്. എതിരെ വരുന്ന ഹെഡ് ലൈറ്റുകളിലേക്ക് നേരിട്ട് നോക്കരുതെന്നും, പകരം റോഡിന്റെ ഇടതുവശത്ത് ശ്രദ്ധിച്ചു റോഡിലുള്ള വെള്ള വരകളിലേക്ക് ശ്രദ്ധ കേന്ദ്രീകരിക്കണം എന്നുമാണ് ആർ എ സി നൽകുന്ന നിർദ്ദേശം. ഡ്രൈവർമാർ സ്വയമേവ ബ്രൈറ്റ് ലൈറ്റുകൾക്ക് പകരം ലോ ബീമുകൾ ഉപയോഗിക്കാൻ ശ്രദ്ധിക്കണം. ഇത്തരത്തിൽ അവനവന്റെ സുരക്ഷയോടൊപ്പം തന്നെ മറ്റുള്ളവരുടെ സുരക്ഷയ്ക്ക് കൂടി പ്രാധാന്യം നൽകുന്ന തരത്തിൽ ഡ്രൈവർമാർ പെരുമാറണമെന്ന നിർദ്ദേശമാണ് വിദഗ്ധർ നൽകുന്നത്.

ന്യൂസ് ഡെസ്ക് മലയാളം യുകെ

എൻഎച്ച്എസിന് കോവിഡ് ഏൽപ്പിച്ച ആഘാതം വളരെ വലുതായിരുന്നു. എന്നാൽ അതിലുപരി വിവിധ വിഭാഗങ്ങളിൽ പെട്ട ജീവനക്കാരുടെ സമരം എൻഎച്ച്എസിന്റെ അടിവേരിളക്കിയതിന്റെ റിപ്പോർട്ടുകൾ പുറത്തുവന്നുകൊണ്ടിരിക്കുകയാണ് . കഴിഞ്ഞ ചൊവ്വാഴ്ച അവസാനിച്ച ജൂനിയർ ഡോക്ടർമാരുടെ സമരം മൂലം ഒരു 110,000 -ത്തിലധികം രോഗികളുടെ അപ്പോയിന്റ്മെന്റുകൾ ആണ് റദ്ദാക്കേണ്ടതായി വന്നത്.

കഴിഞ്ഞ 13 മാസമായി നേഴ്സുമാരുടെയും ഡോക്ടർമാരുടെയും മറ്റ് ജീവനക്കാരുടെയും സമരപരമ്പരകളുടെ ഭാഗമായി 1.3 മില്യണിലധികം അപ്പോയിന്റ്മെന്റുകളാണ് പുന:ക്രമീകരിക്കേണ്ടതായി വന്നിരിക്കുന്നത്. ഏറ്റവും പുതിയതായി നടന്ന ഡോക്ടർമാരുടെ സമരം എൻഎച്ച്എസ്സിന്റെ ചരിത്രത്തിലെ തന്നെ ഏറ്റവും ദൈർഘ്യമേറിയതായിരുന്നു . 35 ശതമാനം ശമ്പള വർദ്ധനവിനാണ് ബ്രിട്ടീഷ് മെഡിക്കൽ അസോസിയേഷന്റെ നേതൃത്വത്തിൽ ഡോക്ടർമാർ പണിമുടക്കിന് ഇറങ്ങിയത്.

മാറ്റിവയ്ക്കേണ്ടതായി വന്ന അപ്പോയിന്റ്മെന്റുകളുടെ എണ്ണം പുറത്തുവന്നതിലും വളരെ കൂടുതലായിരിക്കുമെന്നാണ് നാഷണൽ മെഡിക്കൽ ഡയറക്ടർ ആയ പ്രൊഫസർ സർ സ്റ്റീഫൻ പോവിഡ് പറഞ്ഞത്. കാലാവസ്‌ഥാജന്യ രോഗങ്ങളായ ചിക്കൻപോക്സും ഫ്ലൂവും രാജ്യത്ത് പടർന്നു പിടിക്കുന്നതിനെ കുറിച്ചുള്ള ജാഗ്രതാ നിർദേശം യുകെ ഹെൽത്ത് സെക്യൂരിറ്റി ഏജൻസി പുറപ്പെടുവിച്ചിരുന്നു. നിലവിലെ സാഹചര്യങ്ങൾ ഇത് എൻഎച്ച്എസിന്റെ മേൽ കടുത്ത സമ്മർദ്ദം സൃഷ്ടിക്കുമെന്നാണ് പൊതുവേ വിലയിരുത്തപ്പെടുന്നത്

ന്യൂസ് ഡെസ്ക് മലയാളം യുകെ

യുകെയിൽ മഞ്ഞും തണുപ്പും മഴയും കനത്തതോടെ അതിനോട് അനുബന്ധിച്ചുള്ള കാലാവസ്ഥാജന്യ രോഗങ്ങൾ പടർന്നു പിടിക്കുന്നതിന്റെ റിപ്പോർട്ടുകൾ പുറത്തുവന്നു . ഫ്ലൂവും കൊറോണ വൈറസും ചിക്കൻപോക്സും സ്കാർലറ്റ് പനിയും പടർന്നു പിടിക്കുന്ന സാഹചര്യത്തിൽ കടുത്ത ജാഗ്രത പുലർത്തണമെന്ന് യുകെ ഹെൽത്ത് സെക്യൂരിറ്റി ഏജൻസി മുന്നറിയിപ്പ് നൽകിയിട്ടുണ്ട്. അസുഖബാധിതരായ കുട്ടികളെ സ്കൂളുകളിൽ അയക്കാതിരിക്കുക, വാക്സിനുകൾ എടുക്കുക, ഏതെങ്കിലും രീതിയിൽ രോഗ ലക്ഷണമുള്ളവർ എത്രയും പെട്ടെന്ന് എൻഎച്ച്എസ് ആരോഗ്യ കേന്ദ്രങ്ങളിൽ നിന്ന് ഓൺലൈൻ ഉപദേശം സ്വീകരിക്കുക തുടങ്ങിയ നിർദേശങ്ങളാണ് നിലവിൽ നൽകിയിരിക്കുന്നത്.

വാക്സിനുകൾ യഥാസമയം എടുക്കുന്നത് ഒരു പരിധിവരെ ഈ പ്രതിസന്ധിയെ തരണം ചെയ്യാൻ സഹായിക്കും. കുട്ടികൾക്ക് ഫ്ലൂ വാക്സിൻ നൽകേണ്ട സമയവും സ്ഥലവും എപ്പോഴാണെന്ന് എൻഎച്ച്എസ് ആരോഗ്യ കേന്ദ്രങ്ങളിൽ നിന്ന് അറിയാൻ സാധിക്കും. കുട്ടികൾക്ക് വേദനയില്ലാതെ മൂക്കിലൂടെ നൽകുന്ന നേസൽ സ്പ്രേ വാക്സിനുകൾ ഇന്ന് ലഭ്യമാണ്. ഏതെങ്കിലും രീതിയിൽ കുട്ടികളിൽ രോഗലക്ഷണങ്ങൾ ഉണ്ടെങ്കിൽ മാതാപിതാക്കൾക്ക് ഫോണിലൂടെയോ ഓൺലൈൻ ആയോ ചികിത്സാ നിർദ്ദേശങ്ങൾ സ്വീകരിക്കാനുള്ള സംവിധാനവും എൻഎച്ച്എസ് ഒരുക്കിയിട്ടുണ്ട്.

ഏതെങ്കിലും രീതിയിൽ അസുഖബാധിതരായ കുട്ടികളെ സ്കൂളുകളിൽ വിടരുതെന്ന നിർദ്ദേശം പല മാതാപിതാക്കൾക്കും ബുദ്ധിമുട്ട് ഉളവാക്കും. ഭാര്യയും ഭർത്താവും ജോലിക്ക് പോകുന്ന സാഹചര്യങ്ങളിൽ കുട്ടികൾ സ്കൂളുകളിൽ പോകാതിരിക്കുകയാണെങ്കിൽ ആരെങ്കിലും ലീവെടുക്കേണ്ട സാഹചര്യമാണ് ഉരുത്തിരിഞ്ഞിരിക്കുന്നത്. യുകെ മലയാളികളിൽ ഭൂരിഭാഗവും ആരോഗ്യ മേഖലയിൽ ജോലി ചെയ്യുന്നവരായതുകൊണ്ട് തന്നെ പെട്ടെന്ന് അവധിയെടുക്കുന്നതിൽ ഒട്ടേറെ പരിമിതികളുണ്ട്

ന്യൂസ് ഡെസ്ക് മലയാളം യുകെ

പ്രതിസന്ധി ഘട്ടത്തിൽ നയിക്കാൻ സഭയുടെ നാലാമത് മേജർ ആർച്ച് ബിഷപ്പായി മാർ റാഫേൽ തട്ടിലിനെ സീറോ മലബാർ സഭയുടെ സിനഡ് തിരഞ്ഞെടുത്തു. മാർ റാഫേൽ നിലവിൽ ഷംഷാബാദ് രൂപതയുടെ മെത്രാനാണ്. നാളെ ഉച്ചകഴിഞ്ഞ് സെൻറ് തോമസ് മൗണ്ടിലാണ് സ്ഥാനാരോഹണം നിശ്ചയിച്ചിരിക്കുന്നത്.

സിനഡിൽ നടന്ന രഹസ്യ ബാലറ്റിലൂടെ നടത്തിയ വോട്ടെടുപ്പിനൊടുവിൽ പുതിയ മേജർ ആർച്ച്‌ ബിഷപ്പിന്റെ പേര് വത്തിക്കാന്റെ കൂടി അന്തിമ അനുമതി ലഭിച്ചതോടെയാണ് ഒരേസമയം അന്തിമ പ്രഖ്യാപനം വത്തിക്കാനിലും കാക്കനാട് സെന്റ്. തോമസ് മൗണ്ടിലും പ്രഖ്യാപിച്ചത്.

തൃശ്ശൂർ അതിരൂപതയിലെ തട്ടിൽ ഔസേപ്പ് – ത്രേസ്യ ദമ്പതികളുടെ ഇളയ മകനായ മാർ റാഫേൽ തട്ടിൽ ജനിച്ചത് 1956 ഏപ്രിൽ 21 -നാണ് . 1980 ഡിസംബർ 21 -ന് പൗരോഹിത്യം സ്വീകരിച്ച മാർ റാഫേൽ തൃശ്ശൂർ അതിരൂപതയുടെ സഹായമെത്രാനായും ബ്രൂണി രൂപതയുടെ സ്ഥാനിക മെത്രാനുമായിരുന്നു.

സഭയ്ക്ക് എല്ലാ പ്രതിസന്ധികളെയും ദൈവാനുഗ്രഹത്താൽ തരണം ചെയ്യാൻ കഴിയുമെന്ന് സ്ഥാന ലബ്ധിക്കുശേഷം മാർ റാഫേൽ തട്ടിൽ പ്രതികരിച്ചു .കുർബാന തർക്കത്തിന്റെ പേരിൽ ഒട്ടേറെ പ്രതിസന്ധികളിലൂടെ കടന്നുപോകുന്ന സീറോ മലബാർ സഭയുടെ മേജർ ആർച്ച് ബിഷപ്പിന് പുതിയ പദവി നൽകുന്നത് ഒട്ടേറെ വെല്ലുവിളികളാണ് . കുർബാന തർക്കത്തെ കുറിച്ച് ഇപ്പോൾ അഭിപ്രായം ഒന്നും പറയുന്നില്ലെന്നും എല്ലാവരെയും കേട്ട ശേഷം പരിഹാരം ഉണ്ടാക്കാമെന്നുമാണ് പ്രശ്നത്തെ കുറിച്ച് അദ്ദേഹം നടത്തിയ പ്രതികരണം .

ന്യൂസ് ഡെസ്ക് മലയാളം യുകെ

യു കെ :- കുട്ടികൾക്കെതിരെയുള്ള ലൈംഗിക അതിക്രമങ്ങളിൽ ഇപ്പോൾ കുറ്റവാളികളാകുന്നവരിൽ ഭൂരിഭാഗവും പ്രായപൂർത്തിയാകാത്തവരാണെന്ന പോലീസ് ഡേറ്റ ജനങ്ങളെ ഞെട്ടിപ്പിക്കുന്നതാണ്. ആൺകുട്ടികൾ തങ്ങളുടെ സ്‌മാർട്ട്‌ഫോണുകളിൽ അക്രമാസക്തമായ അശ്ലീലം കാണുകയും പിന്നീട് പെൺകുട്ടികളെ ആക്രമിക്കുകയും ചെയ്യുകയും ചെയ്യുന്ന സാഹചര്യം വർദ്ധിച്ചു വരികയാണെന്ന് പോലീസ് വ്യക്തമാക്കി. കുട്ടികൾക്കെതിരെയുള്ള ലൈംഗിക അതിക്രമങ്ങളുടെ എണ്ണത്തിൽ നാലിരട്ട് വർദ്ധനവ് ഉണ്ടായിട്ടുണ്ടെന്നും പോലീസ് ഡേറ്റ ചൂണ്ടിക്കാട്ടുന്നു. സാധാരണയായി മുതിർന്നവർ കുട്ടികൾക്കെതിരെ നടത്തുന്ന കുറ്റകൃത്യങ്ങളെയാണ് ഗുരുതരമായി കാണുന്നതെങ്കിലും, എന്നാൽ ഇപ്പോൾ 17 വയസോ അതിൽ താഴെയോ പ്രായമുള്ളവർ നടത്തുന്ന ലൈംഗിക അതിക്രമങ്ങളുടെ എണ്ണത്തിലുള്ള വർദ്ധന പരിഭ്രാന്തി ഉളവാക്കുന്നതാണെന്ന് നാഷണൽ പോലീസ് ചീഫ്സ് കൗൺസിൽ പുറത്തിറക്കിയ റിപ്പോർട്ടിൽ വ്യക്തമാക്കുന്നുണ്ട്.

ഒരു സാഹചര്യത്തിൽ നാല് വയസ്സുള്ള ഒരു കുട്ടി സ്വന്തം സഹോദരന്റെ മോശം ചിത്രം അപ്‌ലോഡ് ചെയ്യുവാൻ സ്മാർട്ട്ഫോൺ ഉപയോഗിച്ചുവെന്ന് ആരോപിച്ചുള്ള കേസ് വരെ പോലീസിന് റഫർ ചെയ്യപ്പെട്ടതായും റിപ്പോർട്ടിൽ വ്യക്തമാക്കുന്നുണ്ട്. എന്നാൽ ഇത് സംബന്ധിച്ച് കൂടുതൽ വിവരങ്ങൾ ഒന്നും തന്നെ പോലീസ് അധികൃതർ പുറത്തുവിടാൻ തയ്യാറായിട്ടില്ല. 2022-ൽ ഇംഗ്ലണ്ടിലും വെയിൽസിലും മൊത്തം 107,000 റിപ്പോർട്ടുകളാണ് കുട്ടികൾക്കെതിരായ ലൈംഗിക കുറ്റകൃത്യങ്ങൾ ആരോപിക്കുന്ന തരത്തിൽ പോലീസിന് ലഭിച്ചത്. ലൈംഗിക അതിക്രമം മുതൽ അസഭ്യമായ ചിത്രങ്ങൾ നിർമ്മിക്കുകയും ചെയ്ത കേസുകൾ വരെ ഇതിലുണ്ട്.

ഈ കേസുകളിൽ കുറ്റാരോപിതരായ 52% പേരും കുട്ടികൾ ആണെന്നത് സാഹചര്യങ്ങളുടെ രൂക്ഷമായ അവസ്ഥയെ ചൂണ്ടിക്കാട്ടുന്നു. സ്മാർട്ട് ഫോണുകളിലൂടെ അശ്ലീലമായ ചിത്രങ്ങൾ കാണുകയും പങ്കുവയ്ക്കുകയും ചെയ്യുന്നതാണ് ഇത്തരത്തിലുള്ള കുറ്റകൃത്യങ്ങളിലേക്ക് കുട്ടികളെ നയിക്കുന്നതെന്ന നിഗമനമാണ് പോലീസ് നടത്തുന്നത്. കുട്ടികളോടുള്ള ക്രൂരത തടയുന്നതിനുള്ള നാഷണൽ സൊസൈറ്റി (എൻഎസ്‌പിസിസി) തങ്ങളുടെ ഹെൽപ്പ് ലൈനിന്റെ ശേഷി വർദ്ധിപ്പിക്കുകയും അവബോധം വളർത്തുകയും ചെയ്യാനുള്ള എല്ലാ നടപടികളും എടുക്കുമെന്ന് അറിയിച്ചു. അതിലൂടെ മുതിർന്നവർക്ക് കുട്ടികളെ ദുരുപയോഗം ചെയ്യുന്നതിനെക്കുറിച്ചുള്ള സംശയങ്ങൾ എത്രയും വേഗം അറിയിക്കാനുള്ള വാതിൽ ഉണ്ടാകുമെന്നും അവർ പറഞ്ഞു.

ന്യൂസ് ഡെസ്ക് മലയാളം യുകെ

യുകെയിൽ സ്വന്തമായി ഒരു വീട് എന്നത് ഇവിടെയുള്ള എല്ലാ മലയാളികളുടെയും സ്വപ്നമാണ്. പണപ്പെരുപ്പവും ജീവിത ചിലവു വർദ്ധനവും മൂലം കടുത്ത സാമ്പത്തിക പ്രതിസന്ധിയിലൂടെ കടന്നുപോകുമ്പോൾ വീട് എന്ന സ്വപ്നം മാറ്റിവയ്ക്കേണ്ട അവസ്ഥയാണ് പലരും നേരിടുന്നത്. അതിൻറെ കൂടെയാണ് ഉയർന്ന പലിശ നിരക്കുകളെ കുറിച്ചുള്ള ആശങ്ക.

എന്നാൽ കടുത്ത മത്സരങ്ങളെ തുടർന്ന് കൂടുതൽ ധനകാര്യ സ്ഥാപനങ്ങൾ പലിശ നിരക്ക് കുറച്ചത് യുകെ മലയാളികൾക്ക് അനുഗ്രഹമാകും. രാജ്യത്തെ ശരാശരി മോർട്ട്ഗേജ് വായ്പ നിരക്കുകൾ രണ്ട് വർഷത്തെ ശരാശരി ഫിക്സഡ് മോർട്ട്ഗേജ് നിരക്ക് 5.92% നിന്ന്സ് 5.53 ശതമാനമായി കുറഞ്ഞത് വീട് വാങ്ങുന്നവർക്ക് പ്രയോചനം ചെയ്യും . യുകെയിലെ ഏറ്റവും വലിയ മോർട്ട്ഗേജ് ദാതാക്കളായ ഹാലിഫാക്‌സ്, ലീഡ്‌സ് ബിൽഡിംഗ് സൊസൈറ്റി എന്നീ ധനകാര്യ സ്ഥാപനങ്ങൾ നിരക്കുകൾ വെട്ടിക്കുറച്ച വാർത്ത മലയാളം യുകെ റിപ്പോർട്ട് ചെയ്തിരുന്നു .

അതിനു പിന്നാലെ മറ്റ് രണ്ട് പ്രധാന ധനകാര്യ സ്ഥാപനങ്ങളായ ബാർക്ലേസും സാന്റാൻഡറും നിരക്കുകൾ കുറച്ചത് കൂടുതൽ പേർക്ക് പ്രയോജനം ചെയ്യും. നിലവിൽ ഏകദേശം 1.6 ദശലക്ഷം ബാങ്ക് വായ്പ എടുത്തവർക്കും കുറഞ്ഞ നിരക്കിലേയ്ക്ക് മാറുന്നതിലൂടെ പലിശ നിരക്ക് കുറയുന്നതിന്റെ പ്രയോജനം ചെയ്യും. 2024 -ൽ വീടുകളുടെ വില വീണ്ടും കുറയുമെന്ന റിപ്പോർട്ടുകൾ നേരത്തെ പുറത്തുവന്നിരുന്നു . വീടുകളുടെ വില 5 % കുറയാനുള്ള സാധ്യതയാണ് ഈ രംഗത്തെ വിദഗ്ധർ പ്രവചിക്കുന്നത്. കടുത്ത സാമ്പത്തിക മാന്ദ്യം മൂലം വീട് മേടിക്കാനാഗ്രഹിക്കുന്നവരുടെ സാമ്പത്തിക ഭദ്രതയിൽ കനത്ത ഇടിവ് നേരിട്ടതാണ് വീടുകളുടെ വില കുറയുവാനുള്ള പ്രധാന കാരണമായി ചൂണ്ടിക്കാണിക്കപ്പെടുന്നത് . സുരക്ഷിതമല്ലാത്ത സമ്പദ് വ്യവസ്ഥ വീട് വാങ്ങാനോ മാറാനോ ആഗ്രഹിക്കുന്ന ആളുകളുടെ ആത്മവിശ്വാസം കുറച്ചേക്കാനുള്ള സാധ്യതയുണ്ട്.

മാറിയ കുടിയേറ്റ നയത്തിന്റെ പശ്ചാത്തലത്തിൽ നേഴ്സുമാർ ഒഴികെയുള്ള മലയാളികൾക്ക് യുകെ യോടുള്ള അഭിനിവേശം കുറഞ്ഞിട്ടുണ്ട്. കെയർ വിസയിൽ എത്തിയവർക്ക് ആശ്രിത വിസയിൽ കുടുംബാംഗങ്ങളെ കൊണ്ടുവരാൻ സാധിക്കാത്തതും വിദ്യാർത്ഥി വിസയിൽ എത്തുന്നവർക്കുള്ള കടുത്ത നിയന്ത്രണങ്ങളും യുകെയിൽ വീട് മേടിക്കുന്നതിൽ നിന്ന് ഒട്ടുമിക്ക മലയാളികളെയും പിന്തിരിപ്പിക്കുമെന്നാണ് പലരും മലയാളം യുകെ ന്യൂസിനോട് അഭിപ്രായപ്പെട്ടത്.

ന്യൂസ് ഡെസ്ക് മലയാളം യുകെ

സീറോ മലബാർ സഭയെ നയിക്കാനുള്ള ചരിത്ര നിയോഗം ഇനി മാർ ജോസഫ് കലറങ്ങാട്ടിലിന് . സീറോ മലബാർ സഭാ ആർച്ച് ബിഷപ്പിനെ തിരഞ്ഞെടുക്കാനുള്ള നടപടികൾ സഭാ സിനഡിൽ പൂർത്തിയായി. മാർച്ച് ജോസഫ് കല്ലറങ്ങാട് സന്നദ്ധത അറിയിച്ച സാഹചര്യത്തിൽ ഇന്നോ നാളെയോ പുതിയ ആർച്ച് ബിഷപ്പിനെ ഔദ്യോഗികമായി പ്രഖ്യാപിക്കും എന്നാണ് അറിയാൻ സാധിക്കുന്നത്.

മാർ ജോസഫ് കല്ലറങ്ങാട്ട് സഭാ തലവനാകുന്നതോടെ പാലാ രൂപതയുടെ അധ്യക്ഷപദവിയിലേക്ക് നിലവിൽ ഗ്രേറ്റ് ബ്രിട്ടൻ രൂപതയുടെ അധ്യക്ഷനായ മാർ ജോസഫ് സ്രാമ്പിക്കൽ എത്തുമെന്ന് മലയാളം യുകെ ന്യൂസ് നേരത്തെ റിപ്പോർട്ട് ചെയ്തിരുന്നു. അങ്ങനെയാണെങ്കിൽ ഗ്രേറ്റ് ബ്രിട്ടൻ രൂപതയ്ക്ക് പുതിയ അധ്യക്ഷന്റെ നിയമനം ഉടനെയുണ്ടാവുകയും ചങ്ങനാശേരി ആർച്ച് ബിഷപ്പ് മാർ ജോസഫ് പെരുന്തോട്ടം വിരമിക്കുന്ന സാഹചര്യത്തിൽ പുതിയ രൂപതാധ്യക്ഷനെ കുറിച്ച് ഈ സിനഡിൽ തന്നെ തീരുമാനം ആകുമോ എന്നതും എല്ലാവരും ഉറ്റുനോക്കുന്ന വിഷയമാണ്.

പുതിയ സഭാധ്യക്ഷ സ്ഥാനാരോഹണം എന്ന് നടക്കും എന്നതിനെ കുറിച്ച് ഇപ്പോൾ വ്യക്തത വന്നിട്ടില്ല. പുതിയ ആർച്ച് ബിഷപ്പിന്റെ സ്ഥാനാരോഹണം നടക്കേണ്ട സെന്റ് മേരീസ് ബസിലിക്ക അടഞ്ഞു കിടക്കുന്ന സാഹചര്യത്തിൽ എന്തായിരിക്കും തീരുമാനമെന്നത് എല്ലാവരും ഉറ്റുനോക്കുന്ന വിഷയമാണ്. സഭാ അധ്യക്ഷനും സഭയ്ക്കും പുതിയ ഒരു ആസ്ഥാന രൂപതയെ കുറിച്ച് ബിഷപ്പുമാർക്കിടയിൽ ഏകാഭിപ്രായം രൂപീകരിക്കാൻ പറ്റിയിട്ടില്ലെന്നാണ് റിപ്പോർട്ടുകൾ . കൂടുതൽ വിശ്വാസി സമൂഹമുള്ള ചങ്ങനാശ്ശേരിയിലേയ്ക്ക് സഭാ ആസ്ഥാനം പറിച്ചു നടണമെന്ന അഭിപ്രായവും ഉയർന്നു വന്നതായും സൂചനയുണ്ട്

ന്യൂസ് ഡെസ്ക് മലയാളം യുകെ

2001 -ലാണ് യുകെയിലേയ്ക്ക് മലയാളി കുടിയേറ്റം ഏറ്റവും കൂടിയ നിലയിൽ ആരംഭിച്ചത്. അതിന് കാരണം സ്ഥിരോത്‌സാഹികളും മനുഷ്യസ്നേഹികളുമായ മലയാളി നേഴ്സുമാർക്ക് എൻഎച്ച്എസിന്റെ ഹോസ്പിറ്റലുകളിൽ സേവനം ചെയ്യാൻ അവസരം ലഭിച്ചതായിരുന്നു. യുകെയിലെ ഒട്ടുമിക്ക മേഖലകളിലും തങ്ങളുടെ പ്രാവീണ്യം തെളിയിക്കാൻ ഈ കഠിനാധ്വാനികളായ ആരോഗ്യ പ്രവർത്തകർക്കും അവരുടെ കുടുംബാംഗങ്ങൾക്കും കഴിഞ്ഞു.

എന്നാൽ യുകെയിലേയ്ക്കുള്ള കുടിയേറ്റത്തിന്റെ അടുത്തഘട്ടം കൂടുതൽ സങ്കീർണമായിരുന്നു. വിദ്യാർത്ഥി വിസയിലും കെയർ വിസയിലും എത്തി യുകെയിൽ പി ആർ എടുക്കാനുള്ള ശ്രമത്തിന്റെ ഭാഗമായി ഒട്ടേറെ മലയാളികൾ ആണ് ഇവിടെ എത്തി ചേർന്നിരിക്കുന്നത്. ഇങ്ങനെ എത്തിയവരിൽ ഭൂരിഭാഗവും ഏജൻസി നൽകിയ മോഹന വാഗ്ദാനങ്ങൾ വിശ്വസിച്ചാണ് വിമാനം കയറിയത്. കഴിഞ്ഞകാലം വരെ വിദ്യാർത്ഥി വിസയിലും കെയർ വിസയിലും എത്തിയവർക്ക് ആശ്രിത വിസയിൽ കുടുംബാംഗങ്ങളെ കൊണ്ടുവരാൻ സാധിക്കുമായിരുന്നു.

എന്നാൽ സ്ഥിതിഗതികൾ മാറിമറിഞ്ഞത് പെട്ടെന്നാണ്. ബ്രിട്ടന്റെ പുതിയ കുടിയേറ്റം നയം എങ്ങനെ യുകെയിലെ! മലയാളി സമൂഹത്തെ ബാധിക്കുമെന്നതിൻറെ നിരവധി വിശകലനങ്ങൾ മലയാളം യുകെ ന്യൂസിൽ പ്രസിദ്ധീകരിച്ചിരുന്നു. ഉപരിപഠനത്തിനായി യുകെയിലെത്തുന്ന മലയാളി വിദ്യാർഥികളെ ബാധിക്കുന്ന സുപ്രധാനമായ പല മാറ്റങ്ങളും ഈ വർഷം ആരംഭം മുതൽ നിലവിൽ വന്നു. ഇതിൻറെ ഫലമായി ഇനിമുതൽ ഗവേഷണ വിദ്യാർത്ഥികൾക്കും സ്കോളർഷിപ്പോടുകൂടി പഠിക്കാൻ എത്തുന്നവർക്കും മാത്രമായിരിക്കും ആശ്രിത വിസയിൽ കുടുംബാംഗങ്ങളെ കൊണ്ടുവരുവാൻ സാധിക്കുന്നത്.

പുതിയ നിയമം ഏറ്റവും കൂടുതൽ തിരിച്ചടിയായിരിക്കുന്നത് മലയാളികൾക്കാണ്. യുകെയിൽ എത്തിച്ചേരാൻ മാത്രമായി ഭാര്യയോ ഭർത്താവോ സ്റ്റഡി വിസയിൽ എത്തിയ ആയിരങ്ങളാണ് ഇവിടെയുള്ളത്. നിയമം മാറുന്നതിന് മുമ്പ് തന്നെ സ്റ്റഡി വിസയ്ക്കായുള്ള നടപടിക്രമങ്ങൾ ആരംഭിച്ച ഒട്ടേറെ പേരാണ് പുതിയ നിയമ മാറ്റത്തിന്റെ വെളിച്ചത്തിൽ വെട്ടിലായിരിക്കുന്നത്. പലരും ബാങ്കുകളിൽ നിന്ന് ലക്ഷങ്ങൾ ആണ് ലോണായി എടുത്തിരിക്കുന്നത്. നേരത്തെ സ്റ്റഡി വിസയിൽ വരുന്നവരുടെ ഭർത്താവ് ,ഭാര്യ, 18 വയസ്സിൽ താഴെയുള്ള കുട്ടികൾ എന്നിവർക്കായിരുന്നു ആശ്രിത വിസ അനുവദിച്ചിരുന്നത്.

ബിരുദ വിദ്യാർഥികളുടെ പോസ്റ്റ് സ്റ്റഡി വർക്ക് പെർമിറ്റുകൾക്ക് പഴയതിൽ നിന്ന് മാറ്റമില്ല. ബിരുദം പൂർത്തിയാക്കിയ വിദ്യാർത്ഥികൾക്ക് യുകെയിൽ രണ്ട് വർഷവും പി എച്ച് ഡി വിദ്യാർത്ഥികൾക്ക് മൂന്നുവർഷവും പോസ്റ്റ് സ്റ്റഡി വർക്ക് വിസയിൽ ജോലി ചെയ്യാൻ നിലവിലെ നിയമം അനുവദിക്കുന്നുണ്ട്. പുതിയ കുടിയേറ്റ നയം നിലവിൽ വന്നതോടെ യുകെയിലേയ്ക്ക് ഉള്ള മലയാളി വിദ്യാർത്ഥികളുടെ ഒഴുക്ക് കുറയുമെന്നാണ് കരുതപ്പെടുന്നത്. ഇനി ഗവേഷണത്തിനും സ്കോളർഷിപ്പോടുകൂടിയും വരുന്ന ഏറ്റവും മിടുക്കരായ വിദ്യാർത്ഥികൾ മാത്രമാണ് യുകെയിലെ യൂണിവേഴ്സിറ്റികളിൽ അഡ്മിഷനു വേണ്ടി പരിശ്രമിക്കൂ.

കടുത്ത സാമ്പത്തിക പ്രതിസന്ധിയിലായിരുന്ന യൂണിവേഴ്സിറ്റികളെയും മറ്റ് വിദ്യാഭ്യാസ സ്ഥാപനങ്ങളെയും കരകയറ്റാനാണ് വിദേശ വിദ്യാർഥികളെ ആകർഷിക്കാനുള്ള പോസ്റ്റ് സ്റ്റഡി വർക്ക് പെർമിറ്റും മറ്റ് ആനുകൂല്യങ്ങളും സർക്കാർ നടപ്പിലാക്കിയത്. ഇന്ത്യയുൾപ്പെടെയുള്ള രാജ്യങ്ങളിൽ നിന്ന് കോടിക്കണക്കിന് രൂപയുടെ വിദേശ മൂലധനമാണ് ഇതിലൂടെ യുകെയിലേയ്ക്ക് ഒഴുകിയെത്തിയത്. ആവശ്യമായ മൂലധന സമ്പാദനത്തിലൂടെ വിദ്യാഭ്യാസ സ്ഥാപനങ്ങൾ സുരക്ഷിതമായപ്പോൾ പെട്ടെന്ന് സർക്കാർ നയം മാറ്റിയത് മൂലം കണ്ണീരിലായത് ഒട്ടേറെ വിദ്യാർഥികളുടെ ഭാവി പ്രതീക്ഷകളെയാണ്.

ഇനി നേഴ്സുമാർക്ക് മാത്രമേ യുകെയിൽ എത്തുന്നതിനെ കുറിച്ച് സ്വപ്നം കാണാൻ സാധിക്കുകയുള്ളൂ. മുൻപുള്ളതു പോലെ തന്നെ എൻഎച്ച്എസിൽ ജോലി ചെയ്യുന്നവർക്കുള്ള എല്ലാ ആനുകൂല്യങ്ങൾ എല്ലാം തന്നെ ഇപ്പോഴും നിലവിലുണ്ട് .