ലണ്ടന്: ഗ്രേറ്റ് ബ്രിട്ടണ് സീറോ മലബാര് രൂപതയുടെ രണ്ടാം വാര്ഷികത്തില് രൂപതയിലുടനീളം തിരുവചനങ്ങള്ക്കു കാതോര്ക്കുവാനും, വിവേചനത്തിന്റെയും, ജ്ഞാനത്തിന്റെയും ചൈതന്യ നിറവിനുതകുന്ന പരിശുദ്ധാത്മ ശുശ്രുഷകള് നടത്തുവാനും മാര് ജോസഫ് സ്രാമ്പിക്കല് പിതാവ് തന്റെ സുവിശേഷവല്ക്കരണ കര്മ്മ യജ്ഞവുമായി വീണ്ടും ബ്രിട്ടനിലെ സഭാമക്കള്ക്കിടയിലേക്ക്.
പരിശുദ്ധാത്മ ശുശ്രുഷകളിലൂടെ കോടിക്കണക്കിനു ജനങ്ങള്ക്കിടയില് ദൈവീക സാന്നിദ്ധ്യവും, അനുഗ്രഹ സ്പര്ശവും അനുഭവവേദ്യമാക്കുവാന് അഭിഷേകം ലഭിച്ചിട്ടുള്ള പ്രമുഖ സുവിശേഷകരില് ഒരാളും, സെഹിയോന് ശുശ്രുഷകളുടെ സ്ഥാപകനും ആയ സേവ്യര് ഖാന് വട്ടായില് അച്ചന് ലണ്ടന് റീജണല് ബൈബിള് കണ്വെന്ഷന് നയിക്കും.
ഹാരോ ലെഷര് സെന്റരില് ലണ്ടന് റീജണല് അഭിഷേകാഗ്നി കണ്വെന്ഷനു വിവിധ ഹാളുകളിലായി അനുഗ്രഹങ്ങളുടെ പറുദീസ തീര്ക്കുമ്പോള് പ്രായാടിസ്ഥാനത്തില് കുട്ടികള്ക്കു വേണ്ടി രണ്ടു വിഭാഗങ്ങളിലായി പ്രശസ്ത വചന പ്രഘോഷകന് ഫാ.സോജി ഓലിക്കലിന്റെ നേതൃത്വത്തില് സെഹിയോന് യു.കെ മിനിസ്ട്രി ശുശ്രുഷകള് നടത്തുന്നതാണ്. നാളിന്റെ വിശ്വാസ ദീപങ്ങള്ക്കു ആത്മീയമായ ഊര്ജ്ജവും, ജ്ഞാനവും, നന്മകളും കൂടുതലായി പകരുവാന് കിട്ടുന്ന ഈ സുവര്ണ്ണാവസരം മാതാപിതാക്കള് മക്കള്ക്കായി നല്കാവുന്ന ഏറ്റവും അമൂല്യമായ സംഭാവനയാവും.
ലണ്ടന് റീജണല് അഭിഷേകാഗ്നി കണ്വെന്ഷന് നവംബര് 4 നു ഞായറാഴ്ച രാവിലെ 9:00 നു പരിശുദ്ധ അമ്മക്ക് ജപമാല സമര്പ്പിച്ചു കൊണ്ട് ആരംഭിക്കുന്നതായിരിക്കും. വൈകുന്നേരം അഞ്ചു മണി വരെയാണ് ശുശ്രുഷകള് ക്രമീകരിച്ചിരിക്കുന്നത്. കുമ്പസാരത്തിനുള്ള സൗകര്യവും ഒരുക്കിയിട്ടുണ്ട്.
ഇമ്പം പകരുന്ന കുടുംബങ്ങളായി മാറുവാനും, ദൈവ സന്താനങ്ങളായി വിളങ്ങുവാനും ഉതകുന്ന അനുഗ്രഹദായകമായ അഭിഷേകാഗ്നി കണ്വെന്ഷന് ശുശ്രുഷകളിലേക്കു വികാരി ജനറാള് ഫാ. തോമസ് പാറയടിയില്, കണ്വീനര് ഫാ.ജോസ് അന്ത്യാംകുളം, ചാപ്ലൈന്മാരായ ഫാ.സെബാസ്റ്റ്യന് ചാമക്കാല, ഫാ.ഹാന്സ് പുതിയകുളങ്ങര, കണ്വെന്ഷന് സംഘാടക സമിതി എന്നിവര് ഏവരെയും സസ്നേഹം സ്വാഗതം ചെയ്യുന്നു.
കൂടുതല് വിവരങ്ങള്ക്ക്:
ഷാജി വാട്ഫോര്ഡ്: 07737702264;
ജോമോന് ഹെയര്ഫീല്ഡ്: 07804691069
സിറിയക്ക് മാളിയേക്കല്: 07446355936
Harrow leisure Centre,
Christchurch Ave,
Harrow HA3 5BD
പ്രസ്റ്റണ്: ഗ്രേറ്റ് ബ്രിട്ടണ് സീറോ മലബാര് രൂപതയുടെ ദ്വിതീയ ബൈബിള് കണ്വെന്ഷന് ‘അഭിഷേകാഗ്നി 2018’ ഒക്ടോബര് 20-ാം തിയതി ആരംഭിക്കുന്നു. അട്ടപാടി സെഹിയോന് ശുശ്രൂഷകളുടെ ഡയറക്ടര് ഫാ. സേവ്യര് ഖാന് വട്ടായിലും ടീമുമാണ് ഗ്രേറ്റ് ബ്രിട്ടണിലെ എട്ടു നഗരങ്ങളില് എട്ടു ദിനങ്ങളിലായി നടക്കുന്ന കണ്വെന്ഷന് നയിക്കുന്നത്. രൂപതാദ്ധ്യക്ഷന് മാര് ജോസഫ് സ്രാമ്പിക്കല് എല്ലാ ദിവസവും വിശുദ്ധ കുര്ബാന അര്പ്പിച്ച് സുവിശേഷസന്ദേശം നല്കുന്നതുമാണ്.
2018 ഒക്ടോബര് 20-ാം തിയതി ശനിയാഴ്ച ബര്മിംഹാം ബതേല് കണ്വെന്ഷന് സെന്ററില് ആരംഭിക്കുന്ന കണ്വെന്ഷന് 21-ാം തിയതി ഞായറാഴ്ച സ്കോട്ട്ലണ്ടിലെ മദര് വെല് സിവിക്ക് സെന്ററിലും 24-ാം തിയതി ബുധനാഴ്ച പ്രേസ്റ്റണിലെ സെന്റ് അല്ഫോന്സാ ഓഫ് ഇമ്മാകുലേറ്റ് കണ്സെപ്ഷന് കത്തീഡ്രലിലും 25-ാം തീയതി വ്യാഴാഴ്ച നോറിച്ച് സെന്റ് ജോണ് ദ് ബാപ്റ്റിസ്റ്റ് കത്തീഡ്രലിലും 27-ാം തിയതി ശനിയാഴ്ച ബോണ്മൗത്ത് ലൈഫ് സെന്ററിലും 28-ാം തിയതി ഞായറായ്ച ചെല്ട്ടണം റേസ് കോഴ്സിലും നവംബര് 3-ാം തിയതി മാഞ്ചസ്റ്ററിലെ ബൗളേഴ്സ് എക്സിബിഷന് സെന്റെറിലും നവംബര് 4-ാം തിയതി ഞായറാഴ്ച ലണ്ടനിലെ ക്രൈസ്റ്റ് ചര്ച്ച് അവന്യുവിലുള്ള ഹാരോ ലെഷര് സെന്ററിലും വെച്ചാണ് നടത്തപ്പെടുന്നത്. ഓരോ ദിവസവും രാവിലെ 9 മണിക്ക് ആരംഭിച്ച് വൈകുന്നേരം 5 മണിക്കാണ് സമാപിക്കുന്നത്. കണ്വെന്ഷന് ദിവസങ്ങളില് കൂട്ടികള്ക്കായി പ്രത്യേക ശുശ്രൂഷകളും ക്രമീകരിച്ചിട്ടുണ്ട്. കണ്വെന്ഷന് ഒരുക്കമായി ഒക്ടോബര് 18 വ്യാഴാഴ്ച രാവിലെ 10 മണി മുതല് രാത്രി 10 മണി വരെ ബര്മിംഹാമിനടുത്തിള്ള സോള്ട്ടിലിയിലെ അവര് ലേഡി ഓഫ് റോസറി ആന്റ് സെന്റ് തെരേസാ ഓഫ് ലിസ്യു ദൈവാലയത്തില് വെച്ച് ദിവ്യകാരുണ്യ ആരാധനയും പ്രാര്ത്ഥനകളും ഉണ്ടായിരിക്കുന്നതാണ്.
രൂപതാദ്ധ്യക്ഷന് മാര് ജോസഫ് സ്രാമ്പിക്കല് രക്ഷാധികാരിയും വികാരി ജനറാള് റവ. ഡോ. മാത്യു ചൂരപ്പൊയ്കയില് ജനറല് കോര്ഡിനേറ്ററും നവസുവിശേഷവത്കരണത്തിനു വേണ്ടിയുള്ള കമ്മീഷന് ചെയര്മാന് റവ. ഫാ. സോജി ഓലിക്കല് ജനറല് കണ്വീനറും വികാരി ജനറാളന്മാരായ റവ. ഡോ. തോമസ് പാറയടിയില് എം. എസ്. റ്റി., റവ. ഫാ. സജിമോന് മലയില്പുത്തന്പുര, റവ. ഫാ. ടെറിന് മുല്ലക്കര, റവ. ഫാ. ജോസഫ് വെമ്പാടംതറ വി. സി., റവ. ഫാ. ഫിലിപ്പ് പന്തമാക്കല്, റവ. ഫാ. ടോമി ചിറയ്ക്കല്മണവാളന്, റവ. ഫാ. പോള് വെട്ടിക്കാട്ട് സി. എസ്. റ്റി., റവ. ഫാ. ജോസ് അന്തിയാംകുളം എം.സി.ബി.എസ്. എന്നിവരുടെ നേതൃത്വത്തിലുള്ള വിപുലമായ കമ്മറ്റി കണ്വെന്ഷന് നേതൃത്വം നല്കുന്നതാണ്.
വത്തിക്കാൻ സിറ്റി: പോൾ ആറാമൻ മാർപാപ്പ, ദരിദ്രരോടു പക്ഷം ചേർന്നു പ്രവർത്തിച്ചതിന്റെ പേരിൽ സ്വേച്ഛാധിപത്യ ഭരണകൂടം ദേവാലയത്തിൽ വിശുദ്ധ കുർബാനമധ്യേ വധിച്ച ആർച്ച്ബിഷപ് ഓസ്കർ റൊമേറോ എന്നിവരും മറ്റ് അഞ്ചുപേരും ഇന്നു വിശുദ്ധരുടെ പട്ടികയിൽ. സെന്റ് പീറ്റേഴ്സ് ബസിലിക്കയുടെ ചത്വരത്തിൽ നടക്കുന്ന ചടങ്ങിൽ ഫ്രാൻസിസ് മാർപാപ്പ മുഖ്യ കാർമികത്വം വഹിക്കും.
1963 മുതൽ 78 വരെ കത്തോലിക്കാസഭയെ നയിച്ച പോൾ ആറാമൻ മാർപാപ്പയുടെ കാലത്താണു വത്തിക്കാൻ സൂനഹദോസിന്റെ പ്രധാന സമ്മേളനങ്ങളെല്ലാം നടന്നത്. പുരോഗമന ചിന്തയെയും യാഥാസ്ഥിതികത്വത്തെയും സംയോജിപ്പിച്ചു സഭയിൽ മാറ്റങ്ങൾ വരുത്തിയ ആളാണ് അദ്ദേഹം. ഇന്ത്യയിൽ ആദ്യം സന്ദർശനം നടത്തിയ (1964 ഡിസംബർ, മുംബൈ) മാർപാപ്പ, സഭൈക്യ നീക്കങ്ങൾക്കു കരുത്തുപകർന്നു മറ്റു ക്രിസ്തീയ സഭാ അധിപന്മാരുമായി കൂടിക്കാഴ്ചകൾ തുടങ്ങിയ മാർപാപ്പ എന്നിങ്ങനെ പല വിശേഷണങ്ങളും അദ്ദേഹത്തിനുണ്ട്. സെപ്റ്റംബർ 26 ആണ് തിരുനാൾ ദിനം.
ലാറ്റിനമേരിക്കയിലെ എൽസാൽവദോറിലായിരുന്നു ആർച്ച്ബിഷപ് ഓസ്കർ റൊമേറോയുടെ (1917-80) ജീവിതം. 1980 മാർച്ച് 24-നാണ് ഭരണകൂടത്തിന്റെ വാടകക്കൊലയാളികൾ ദിവ്യബലി മധ്യേ അദ്ദേഹത്തെ വെടിവച്ചു വീഴ്ത്തിയത്. വിമോചന ദൈവശാസ്ത്രത്തിന്റെ അനുയായി ആയിരുന്നില്ലെങ്കിലും സ്വേച്ഛാധിപത്യത്തിനും ചൂഷണത്തിനുമെതിരേ ശക്തമായി പോരാടിയ ആളാണ് അദ്ദേഹം. മറ്റു ക്രൈസ്തവ വിഭാഗങ്ങളും അദ്ദേഹത്തിന്റെ തിരുനാൾദിനം (മാർച്ച് 24) തങ്ങളുടെ ആരാധനക്രമ കലണ്ടറിൽ പെടുത്തിയിട്ടുണ്ട്. സിസ്റ്റേഴ്സ് അഡോറേഴ്സ് ഓഫ് ദ മോസ്റ്റ് ഹോളി സാക്രമെന്റ് എന്ന സഭയുടെ സ്ഥാപകനായ ഇറ്റാലിയൻ വൈദികൻ ഫ്രൻചെസ്കോ സ്പിനെല്ലി (1853-1913), ഇറ്റലിയിലെ നേപ്പിൾസുകാരനായ വൈദികൻ വിൻചെൻസോ റൊമാനോ (1751-1831), ഇൻസ്റ്റിറ്റ്യൂട്ട് ഓഫ് ദ പുവർ ഹാൻഡ് മെയ്ഡ്സ് ഓഫ് ജീസസ് ക്രൈസ്റ്റ് എന്ന സഭ സ്ഥാപിച്ച ജർമൻകാരിയായ മരിയ കാതറീന കാസ്പർ (1820-1898), സ്പെയിനിൽ ജനിച്ച് അർജന്റീനയിൽ മരിക്കുകയും മിഷനറി ക്രൂസേഡേഴ്സ് ഓഫ് ദ ചർച്ച് എന്ന സഭ സ്ഥാപിക്കുകയും ചെയ്ത നസാറിയ ഇഗ്നാസിയ (1886-1943), രോഗപീഡകൾക്കടിപ്പെട്ട് 19 വർഷം മാത്രം ജീവിച്ച (1817-1836) ഇറ്റലിക്കാരൻ നുൺസിയോ സുൾപ്രീസിയോ എന്നിവരാണ് വിശുദ്ധരായി നാമകരണം ചെയ്യപ്പെടുന്ന മറ്റുള്ളവർ.
ഫാ. ബിജു കുന്നക്കാട്ട്
ഏവരും ആകാംക്ഷയോടെ കാത്തിരുന്ന ആ ദിവസങ്ങള് അരികിലെത്തുകയാണ്. ഈ വര്ഷത്തെ ഗ്രേറ്റ് ബ്രിട്ടന് രൂപതാ ബൈബിള് കലോത്സവത്തിന് അരങ്ങുണരാന് ഇനി ദിവസങ്ങള് മാത്രം ബാക്കി. ബ്രിസ്റ്റോളില് വെച്ച് നടക്കുന്ന കലോത്സവം വിജയകരമായി നടപ്പാക്കാനുള്ള ഒരുക്കങ്ങള് അതിവേഗം നടന്നുവരികയാണ്. ഗ്രേറ്റ് ബ്രിട്ടന് രൂപതാ ബൈബിള് കലോത്സവത്തില് പങ്കെടുക്കുന്നതിനായി റീജ്യണല് മത്സരങ്ങളില് വിജയിച്ചവരുടെ പേരുവിവരങ്ങള് അതാതു റീജിയണല് കോഡിനേറ്റര്മാര് ഉടന് തന്നെ രജിസ്റ്റര് ചെയ്യേണ്ടതാണ്. മാഞ്ചസ്റ്റര് ഒഴികെയുള്ള റീജ്യണുകള് ഒക്ടോബര് 21ന് മുന്പ് മത്സരാര്ത്ഥികളുടെ പേരുവിവരങ്ങള് രജിസ്റ്റര് ചെയ്യണം.
വിവിധ റീജിയണുകളില് മത്സരിച്ച് വിജയിച്ചവരാണ് ബ്രിസ്റ്റോളില് വെച്ച് നടക്കുന്ന ബൈബിള് കലോത്സവ വേദിയില് അന്തിമ പോരാട്ടത്തിന് ഇറങ്ങുന്നത്. നവംബര് 10ന് ഗ്രീന്വേ സെന്ററിലാണ് കലോത്സവം അരങ്ങേറുക. വീറുംവാശിയും പ്രകടനമാക്കുന്ന റീജിയണല് മത്സരങ്ങള് പൂര്ത്തിയാകുന്ന മുറയ്ക്കാകും അന്തിമ മത്സരരാര്ത്ഥികളുടെ പട്ടിക തയ്യാറാകുക. മാഞ്ചസ്റ്റര് ഒഴികെയുള്ള റീജ്യണുകളില് ഒക്ടോബര് 14ഓടെ മത്സരവിജയികളെ പ്രഖ്യാപിക്കും. മാഞ്ചസ്റ്റര് റീജിയണല് മത്സരങ്ങള് 27നാണ് കലാശക്കൊട്ട് തീര്ക്കുക.
ഇതോടെ ബ്രിസ്റ്റോള് ബൈബിള് കലോത്സവത്തിനുള്ള കാഹളം മുഴങ്ങും. അന്തിമപോരാട്ടത്തിനായുള്ള തയ്യാറെടുപ്പിലാണ് റീജിയണല് മത്സരവിജയികള്. മത്സരാര്ത്ഥികളുടെ വിവരങ്ങള് റീജിയണല് കോര്ഡിനേറ്റര്മാര് ഈ മാസം 21ന് മുന്പായി അയക്കേണ്ടതാണ്. വിജയികളുടെ രജിസ്ട്രേഷന് അവസാനിക്കുന്ന തീയതി 21 ആണ്. ഉപന്യാസം (1824, മുതിര്ന്നവര്), ഷോര്ട്ട് ഫിലിം മേക്കേഴ്സ് എന്നിവര് ഇവ 15ാം തീയതിയ്ക്ക് മുന്പ് അയക്കണം. മത്സരത്തിലേക്കുള്ള എന്ട്രികള് [email protected] എന്ന ഇ-മെയില് വിലാസത്തിലോ, ബൈബിള് കലോത്സവത്തിന്റെ വെബ്സൈറ്റിലേക്കോ അയക്കണം.
കലോത്സവത്തോട് അനുബന്ധിച്ച് പുറത്തിറങ്ങുന്ന സുവനീര് അവസാനഘട്ട പണിപ്പുരയിലാണ്. ഈ ആഴ്ചയോടെ ബൈബിള് കലോത്സവത്തിന്റെ ചരിത്ര വഴികളിലൂടെ സഞ്ചരിക്കുന്ന സുവനീര് പുറത്തിറക്കാനുള്ള ശ്രമങ്ങളാണ് നടന്നുവരുന്നത്.
കൂടുതല് വിവരങ്ങള്ക്ക്:
ഫാദര് പോള് വെട്ടിക്കാട്ട്: 07450243223
ജോജി മാത്യു: 07588445030
Kalotsavam Date: 10th November 2018
Venue: Greenway Cetnre, Southmead, Bristol BS10 5PY
www.smegbbiblekalotsavam.com :Email : [email protected]
ഫാ. ബിജു കുന്നയ്ക്കാട്ട്
ബര്മ്മിംഗ്ഹാം: ഗ്രേറ്റ് ബ്രിട്ടണ് സീറോ മലബാര് രൂപത ഒരുക്കുന്ന രണ്ടാം അഭിഷേകാഗ്നി ഏകദിന ബൈബിള് കണ്വെന്ഷന്റെ ആദ്യ ദിനത്തിന് കവന്ട്രി റീജിയണും ബര്മ്മിംഗ്ഹാം ബഥേല് കണ്വെന്ഷന് സെന്ററും ആതിഥേയമരുളും. 20-ാം തിയതി ശനിയാഴ്ച്ച രാവിലെ 9 മണിക്ക് ജപമാല പ്രാര്ത്ഥനയോടെ ഏകദിന കണ്വെഷന് ആരംഭിക്കും. വൈകീട്ട് 5 മണിക്ക് ദിവ്യകാരുണ്യ ആരാധനയോടെയാണ് തിരുക്കര്മ്മങ്ങള് സമാപിക്കുന്നത്.
ഗ്രേറ്റ് ബ്രിട്ടണ് സീറോ മലബാര് രൂപതാധ്യക്ഷന് മാര് ജോസഫ് സ്രാമ്പിക്കല്, ലോക പ്രശസ്ത വചന പ്രഘോഷകനും സെഹിയോന് മിനിസ്ട്രീസിന്റെ ഡയറക്ടറുമായ റവ. ഫാ. സേവ്യര് വട്ടായില് തുടങ്ങിയവര് ശുശ്രൂഷകള്ക്ക് നേതൃത്വം നല്കും. ജപമാല പ്രാര്ത്ഥന, ആരാധനാസ്തുതി ഗീതങ്ങള്, ഗാന ശുശ്രൂഷ, വി. കുര്ബാന, തിരുവചന പ്രഭാഷണങ്ങള്, അനുഭവ സാക്ഷ്യങ്ങള്, ദിവ്യകാരുണ്യ ആരാധന തുടങ്ങിയ തിരുക്കര്മ്മങ്ങള് വിശ്വാസികള്ക്ക് ആത്മീയതയുടെ നവ്യാനുഭവം സമ്മാനിക്കും.
കവന്ട്രി റിജിയണിലെ വി. കുര്ബാന കേന്ദ്രങ്ങളില് ശുശ്രൂഷ ചെയ്യുന്ന മലയാളി വൈദികരും മറ്റ് ഇടവകകളില് ശുശ്രൂഷ ചെയ്യുന്ന മലയാളി വൈദികരും സന്യാസിനികളും റിജീയണിലെ എല്ലാ വി. കുര്ബാന കേന്ദ്രങ്ങളിലുമുള്ള വിശ്വാസികളും ദൈവാനുഭവത്തിന്റെ ആഘോഷത്തിനായി ബഥേല് കണ്വെന്ഷന് സെന്ററില് വരുന്ന ശനിയാഴ്ച്ച ഒത്തുച്ചേരും. ബഥേല് കണ്വെന്ഷന് സെന്ററിന്റെ വിലാസം: West Bromwich, B70 7JW.
കണ്വെന്ഷന് ദിവസം കുട്ടികള്ക്കായി പ്രത്യേക ശുശ്രൂഷകള് ക്രമീകരിക്കും. കണ്വെന്ഷന്റെ ഒരുക്കത്തിനും വിജയത്തിനുമായി 18-ാം തിയതി വ്യാഴം Our Lady of Rosary and st. Theresa of Lisieux, B8 3BB ദേവാലയത്തില് വെച്ച് 12 മണിക്കൂര് (രാവിലെ 10 മുതല് രാത്രി 10 വരെ) ദിവ്യകാരുണ്യ ആരാധന ഉണ്ടായിരിക്കും. കണ്വെന്ഷന്റെ ഒരുക്കത്തിനായുള്ള ക്രമീകരണങ്ങള് പൂര്ത്തായായി വരുന്നതായി റീജിയണല് ഡയറക്ടര് റവ. ഫാ. ടെറിന് മുള്ളക്കര അറിയിച്ചു. എല്ലാ വിശ്വാസികളെയും ഈ ഏകദിന ബൈബിള് കണ്വെന്ഷനിലേക്ക് യേശുനാമത്തില് സ്വാഗതം ചെയ്യുന്നു
രാജേഷ് ജോസഫ്, ലെസ്റ്റര്
ദൈവ കുമാരന് വഴിയൊരുക്കുവാന് ലോകസൃഷ്ടിക്കു മുന്പേ തെരഞ്ഞെടുക്കപ്പെട്ട വലിയ പദ്ധതിയുടെ പേരാണ് മറിയം. മറിയം എന്ന വാക്കിനര്ത്ഥം എനിക്ക് പ്രിയപ്പെട്ടവള് എന്നാണ്. നീ സ്ത്രീകളില് ഭാഗ്യവതി നിന് ഉദര ഫലം അനുഗ്രഹീതം എന്ന എലിസബത്തിന് വാക്കുകള് ആ പദ്ധതിയുടെ പ്രതിധ്വനികളാണ്. മറിയത്തിന് സഭയിലും സമൂഹത്തിലും ഏറെ പ്രസക്തമാകുന്നത് മറ്റൊന്നുമല്ല സൃഷ്ടാവ് അതിന് സൃഷ്ടിയില് ഉരുവായി എന്ന ലോക സത്യമാണ്.
മാറിയത്തിന് നൈര്മല്യം നമ്മുടൊയൊക്കെ ജീവിതങ്ങള്ക്ക് എന്നും മാതൃക ആകേണ്ടതാണ്. ദൈവ കുമാരന് ജന്മം നല്കാന് ദൈവം തെരഞ്ഞെടുത്ത സാധരണക്കാരില് സാധരണക്കാരിയായ യഹൂദ സ്ത്രീ. പരുഷ മേധാവിത്വം അതിന്റെ പൂര്ണതയിലുള്ള കാലത്തു തന് കൊച്ചു ജീവിതവുമായി പരിണയപെട്ടു ജീവിച്ച നിഷ്കളങ്കിതയായ ഗ്രാമ വിശുദ്ധിയുടെ പ്രതീകമായ എളിയവളെ ദൈവം തന് പ്രിയ പുത്രനുവേണ്ടി തെരഞ്ഞെടുക്കുന്ന സുന്ദരമായ കാഴ്ച. മറിയത്തിന് മഹത്വം എന്ന് പറയുന്നത് അവളുടെ നിസാരതയാണ്. എന്റെ ഇഷ്ടമല്ല അങ്ങയുടെ ഇഷ്ടം നിറവേറട്ടെ എന്ന് പറഞ്ഞു ദൈവേഷ്ടം ശിരസാ വഹിച്ചവള്. തന് ബലഹീനതകളെ ദൈവത്തിന് ഇഷ്ടമാക്കി മാറ്റിയ സ്ത്രീത്വത്തിന്റെ മഹനീയ മാതൃക. ദൈവം എനിക്ക് വലിയ കാര്യങ്ങള് ചെയ്തിരിക്കുന്നു എന്ന് സന്തോഷത്തോടെ പറയുവാന് ഇന്നീ ആധുനിക ലോകത്തില് എത്ര പേര്ക്ക് സാധിക്കും എന്നുള്ളത് ചോദ്യ ചിഹ്നമായി അവശേഷിക്കുന്നു.
പന്ത്രണ്ടു നക്ഷത്ര തലയുള്ള ലോകത്തിന് റാണിയായ മറിയമല്ല മറിച്ച് ചെറിയവരില് ചെറിയവളായി, ദാസിയുടെ താഷ്മയായി, വിനീതരെ ഉയര്ത്തുന്ന ദൈവ പദ്ധതിയോടു ചേര്ന്ന് നില്ക്കുന്ന കരുണാദ്രയായ ‘അമ്മ. തന് ദിവ്യ കുമാരനെ മാറോടു ചേര്ത്ത് പിടിച്ചു നസ്രത്തുമുതല് കാല്വരി വരെ സന്തോഷങ്ങളിലും, സങ്കടങ്ങളിലും, താങ്ങും തണലുമായി ചേര്ന്ന് നിന്ന ഈശോയുടെ സഹയാത്രിക.
ലോക ചരിത്രത്തില് മറ്റൊരു സ്ത്രീക്കും ലഭിക്കാത്ത സ്ഥാനം തന് എളിമകൊണ്ടും, വിധേയത്വം കൊണ്ടും, അനുസരണം കൊണ്ടും നേടി മറിയം. ലോകത്തില് ഏറ്റവും കൂടുതല് പരാമര്ശിക്കപ്പെട്ടിട്ടുള്ള മറ്റൊരു സ്ത്രീയില്ല. നമ്മുടെ ഈശോയുടെ ‘അമ്മ ദുഖിതരുടെ, പാവങ്ങളുടെ, ഭാരപ്പെടുന്നവരുടെ, സഹയാത്രിക, ഈശോ നമുക്കായി നല്കിയ നമ്മുടെ സ്വന്തം ‘അമ്മ. കാനയില് നമുക്കായി സമരസപ്പെട്ട വിശുദ്ധിയുടെ വിളനിലമായ മറിയം നമ്മുടെ ഒഷിഞ്ഞ മണ്കുടങ്ങളെ നിറയ്ക്കട്ടെ. മുന്തിയ വീഞ്ഞായി നമ്മെ മാറ്റട്ടേ. നന്മ നിറഞ്ഞവളെ നിനക്ക് സ്വസ്തി.
ജിമ്മി മൂലക്കുന്നം
ബിർമിങ്ഹാം: വിശ്വാസജീവിതത്തിലൂടെ നന്മയുടെ പാത സ്വീകരിച്ചു നിത്യസൗഭാഗ്യം കൈവരിക്കുവാനുള്ള അവസരമാണ് ബൈബിള് കണ്വന്ഷനിലൂടെയും ധ്യാനങ്ങളിലൂടെയും നമുക്ക് ലഭിക്കുന്നത്. അതിനുള്ള ഏറ്റവും വലിയ ഒരവസരമാണ് ഇപ്പോൾ കവെൻട്രി റീജിയണനിൽ ഉള്ള വിശ്വാസികൾക്ക് വന്നു ചേർന്നിരിക്കുന്നത്. ഈ വരുന്ന ഇരുപതാം തിയതി ബെഥേൽ കൺവെൻഷൻ സെന്ററിൽ വച്ച് എപ്പാർക്കി ഓഫ് ഗ്രേറ്റ് ബ്രിട്ടൻ രൂപതയുടെ രണ്ടാമത് ബൈബിള് കണ്വെന്ഷൻ ബഹുമാനപ്പെട്ട ഫാദർ സേവ്യർ ഖാൻ വട്ടായിൽ നയിക്കുന്നു. ബിഷപ്പ് മാര്.ജോസഫ് സ്രാമ്പിക്കല് തിരുക്കര്മ്മങ്ങള്ക്ക് നേതൃത്വം നല്കും. ചാപ്ലയിന്മാരായ ഫാദർ സെബാസ്റ്റ്യൻ നാമത്തിൽ, ഫാദർ ടെറിൻ മുല്ലക്കര, ഫാദർ ജോർജ്ജ് എട്ടുപറയിൽ, ഡോ: മനോ എന്നിവര്ക്കൊപ്പം സംഘാടകസമിതിയും ചേർന്ന് കവെൻട്രി റീജിയണൽ തലത്തിൽ വിപുലമായ ഒരുക്കങ്ങളാണ് നടത്തിവരുന്നത്.
‘വിരിയുവാന് വെമ്പുന്ന മുട്ടയുടെ ഉള്ളില് പിറക്കുവാന് കൊതിക്കുന്ന ഒരു ജീവന് ഒളിഞ്ഞു കിടപ്പുണ്ട്’, ‘അഴിയുവാന് തുടങ്ങുന്ന ധാന്യത്തിന്റെ ഉള്ളില് അനേകര്ക്ക് തണല് ആകേണ്ട ഒരു മരത്തിന്റെ ആഗ്രഹം മറഞ്ഞു കിടപ്പുണ്ട്’ എന്നപോലെ മനുഷ്യമനസ്സുകളിൽ ഉള്ള നന്മയെ വെളിച്ചത്തേക്കെത്തിക്കുവാൻ, നല്ല ജീവിതത്തിലേക്ക് നയിക്കുവാൻ ഇത്തരം ധ്യാനങ്ങൾക്ക് സാധിക്കുമെന്നതിൽ തർക്കമില്ല. ഈ ലോകത്തിൽ “മാറ്റമില്ലാത്തത് മാറ്റത്തിന്” മാത്രമാണ്. മാറ്റം അത് ഓരോ ജീവിതത്തിലും സംഭവിക്കേണ്ട, അല്ലെങ്കില് സംഭവിച്ചുകൊണ്ടിരിക്കുന്ന ഒരു പ്രതിഭാസമാണ്. ആയിരിക്കുന്ന അവസ്ഥയില് നിന്നും ആയിരിക്കേണ്ട അവസ്ഥയിലേക്ക് ഉള്ള പ്രയാണത്തിലാണ് ഓരോ മനുഷ്യ ജീവിതവും. ഓരോ ജീവിതത്തിനും ഓരോ ലക്ഷ്യങ്ങള് ഏല്പിക്കപ്പെട്ടിട്ടുണ്ട്. അതുകൊണ്ടുതന്നെ, അനിവാര്യമായ മാറ്റമെന്ന പ്രക്രിയയിലൂടെ കടന്നുപോകുമ്പോള് മാത്രമേ ആ യഥാര്ഥ ലക്ഷ്യത്തില് എത്തിച്ചേരുവാന് നമുക്കു സാധിക്കുകയുള്ളു.
ഓരോ പ്രവാസജീവിതവും ഒരു പലായനമാണ് അതോടൊപ്പം ഒരു മാറ്റവുമാണ്. എല്ലാം വിട്ടെറിഞ്ഞു പോകുന്ന ദു:ഖകരമായ കാഴ്ച അതിനുണ്ട്. അതിലെ ഭാഷയും ശരീര ചലനവും പശ്ചാത്തലവും അഭയാര്ഥികളുമായി തികച്ചും ചേരുന്നുണ്ട്. പ്രവാസ ജീവിതത്തിലെ ശിഥിലമായ തെളിച്ചത്തില് നിന്നും ആശ്വാസത്തിന്റെ ഇളംകാറ്റ് വരുമെന്ന് വിശ്വസിക്കുന്നു. അതിനായി പ്രാർത്ഥിക്കുന്നു. ആ വിശ്വാസം നമ്മുടെ ജീവിതത്തെ മുന്നോട്ട് നയിക്കുന്നു. അതോടൊപ്പം നമ്മുടെ കുടുംബവും കുട്ടികളും… അവരുടെ നല്ല നാളെക്കായി കഠിനപ്രയഗ്നം നടത്തുന്ന നമ്മൾ മലയാളികൾ… വ്യത്യസ്ഥങ്ങളായ സാമൂഹിക പശ്ചാത്തലത്തിൽ ജീവിക്കുന്ന മക്കളുടെ ജീവിതം നേർ വഴിക്ക് തിരിച്ചുവിടാൻ കൺവെൻഷനുകൾക്ക് സാധിക്കും എന്ന് തിരിച്ചറിയുക…
കേട്ടറിഞ്ഞ ക്രിസ്തുവിനെ തൊട്ടറിഞ്ഞ അനുഭവങ്ങളുടെ സാക്ഷ്യം നമുക്കോരോരുത്തര്ക്കും പങ്കുവയ്ക്കുവാന് ഉണ്ടാകും. നമ്മുടെ പഴയകാല ജീവിതത്തിന്റെ കെട്ടുപാടുകള് പൊട്ടിച്ചെറിഞ്ഞുകൊണ്ട് കടന്നുവന്നിരിക്കുന്ന നമ്മില് ഓരോരുത്തരിലും ക്രിസ്തുവിലുള്ള പുതിയ ജീവിതത്തിന്റെ സന്തോഷം എന്നും നിലനിര്ത്തുവാന് നമുക്കു കഴിയണം. തന്നെ മൂടിയിരുന്ന മുട്ടത്തോടിനുള്ളിലേക്ക് കോഴിക്കുഞ്ഞിന് വീണ്ടും പ്രവേശിക്കുവാന് കഴിയാത്തതുപോലെ, തന്നെ പൊതിഞ്ഞിരുന്ന ധാന്യമണിയുടെ ഉള്ളില് വീണ്ടും കയറിപ്പറ്റുവാന് വന്മരത്തിനു സാധിക്കാത്തതുപോലെ, നമ്മുടെ ആ പഴയ ജീവിതസാഹചര്യങ്ങളിലേക്ക് ഒരിക്കലും തിരികെ പോകുവാന് സാധ്യമല്ല എന്ന യാഥാര്ഥ്യത്തെ കെടാതെ ഉള്ളില് സൂക്ഷിക്കുവാന് ധ്യാനങ്ങൾ നമുക്ക് ശക്തി തരും.
ലോകത്തിന്റെ ചിന്തകള് മാടിവിളിക്കുമ്പോള് അവയോടൊക്കെ ‘എനിക്കൊരു ക്രിസ്തു ഉണ്ട്’ എന്ന് ഉറക്കെവിളിച്ചുപറയുവാനുള്ള ആത്മധൈര്യം നേടിയെടുക്കാൻ ഈ മാസം ഇരുപതാം തിയതി ബെഥേൽ കൺവെൻഷൻ സെന്ററിലേക്ക് കടന്നു വരിക. ക്രിസ്തുവിന്റെ സ്നേഹത്തില് നിന്നും ഊര്ജം സ്വീകരിച്ചുകൊണ്ട്, അവിടുത്തെ ജീവനുള്ള തിരുവചനത്തില് നിന്നും ശക്തി സംഭരിച്ചുകൊണ്ട് അനേകര്ക്ക് താങ്ങാകുവാന്, ക്രിസ്തുവിലേക്കുള്ള വഴിവിളക്കാകുവാന് വിളിക്കപ്പെട്ട നമുക്കോരോരുത്തര്ക്കും ആ ലക്ഷ്യം സാധിക്കുവാനുള്ള വഴികൾ കണ്ടെത്താൻ ഈ കൺവെൻഷൻ നമ്മളോരുരുത്തരെയും സഹായിക്കട്ടെ എന്ന് പ്രത്യാശിക്കുന്നു. ഒന്നോർക്കുക ഇന്ന് വരെ ഒരു ധ്യാനം കൂടി ആരുടേയും ജീവിതം നശിച്ചു പോയിട്ടില്ല…. മറിച്ച് ഒരുപാട് ജീവിതങ്ങൾക്ക് വഴികാട്ടി ആയിത്തീർന്നിട്ടുണ്ട് എന്ന യാഥാർഥ്യം മറക്കരുത്… ചെവിയുള്ളവൻ കേൾക്കട്ടെ…
സ്പിരിച്വല് റിന്യൂവല് മിനിസ്ട്രിയുടെ 10 മുതല് 14 വരെയുള്ള കുട്ടികളുടെ താമസിച്ചുള്ള ധ്യാനം എബ്ളേസ് 2018 ഒക്ടോബര് 20 മുതല് 22 വരെ സൗത്താംപ്ടണില് നടക്കും. എസ്ആര്എം യുകെ, എസ്ആര്എം അയര്ലണ്ട് എസ്ആര്എം യൂത്ത് യുകെ ടീം എന്നിവരുടെ നേതൃത്വത്തില് നടക്കുന്ന ധ്യാനം ഫാ. ജോസഫ് സേവ്യര്, ഫാദര് ഡെസ് കോണലി, ബ്രദര് സേവി ജോസഫ് എന്നിവര് നയിക്കും.
സ്ഥലം : സെന്റ് ജോസഫ്, 8 ലിന്ദ്റസറ്റ് റോഡ്, സൗത്താംപ്റ്റണ് , SO40 7DU
കൂടുതല് വിവരങ്ങള്ക്ക് : ജിഷ ഷാം : 07576013812, സെലിന് സിബി : 07738688139
ബാബു ജോസഫ്
ബര്മിംങ്ഹാം: നാളത്തെ രണ്ടാം ശനിയാഴ്ച്ച കണ്വെന്ഷനില് ഹോളി വീന് ആചാരണത്തിന് പുറമേ ‘സീക്ക് ദ കിങ്ഡം ‘ എന്ന പേരില് കുട്ടികള്ക്കായി പ്രത്യേക പ്രോഗ്രാം. നാളെയെപ്പറ്റി ആകുലപ്പെടാതെ ആദ്യം ദൈവത്തിന്റെ രാജ്യവും നീതിയും അന്വേഷിക്കാന് കുട്ടികളെ ഉദ്ബോധിപ്പിക്കുന്ന ഈ ശുശ്രൂഷയില് ആരാധന ,കുമ്പസാരം തുടങ്ങിയവയും ഉണ്ടായിരിക്കും. പരിശുദ്ധ ദൈവമാതാവിനോടുള്ള ജപമാല ഭക്തിയെ ആദരപൂര്വ്വം ഏറ്റുപറഞ്ഞുകൊണ്ട് നടത്തപ്പെടുന്ന ഒക്ടോബര്മാസ രണ്ടാം ശനിയാഴ്ച കണ്വെന്ഷന് ഫാ.സോജി ഓലിക്കല് നയിക്കും. അത്യത്ഭുതകരമായ രോഗശാന്തിയും വിടുതലും തത്ഫലമായുള്ള നിരവധി സാക്ഷ്യങ്ങളുമാണ് രണ്ടാം ശനിയാഴ്ച്ചകണ്വെന്ഷനിലൂടെ ബഥേലില് ഓരോമാസവും നടക്കുന്നത്. വചനം മനുഷ്യനായ് അവതരിക്കാന് ജീവിതമേകിയ മരിയാംബികയോടുള്ള പ്രത്യേക ജപമാല മഹത്വത്തിന്റെ ഒക്ടോബറില് ദൈവമാതാവിന്റെ മധ്യസ്ഥതയാല് യേശുനാമത്തില് പ്രകടമായ അദ്ഭുതങ്ങളും അടയാളങ്ങളും വര്ഷിക്കാന് ശക്തമായ ഉപവാസ മധ്യസ്ഥ പ്രാര്ത്ഥനയുമായി സെഹിയോന് കുടുംബം ഒരുങ്ങിക്കഴിഞ്ഞു. ദേശഭാഷാ വ്യത്യാസമില്ലാതെ ആയിരങ്ങള് പങ്കെടുക്കുന്ന കണ്വെന്ഷനില് ഇത്തവണ ഗ്രേറ്റ് ബ്രിട്ടണ് രൂപത ബിഷപ്പ് മാര്.ജോസഫ് സ്രാമ്പിക്കല്, തൃശൂര് ഷെക്കീനായ് മിനിസ്ട്രി ഡയറക്ടറും പ്രശസ്ത വചനപ്രഘോഷകനുമായ ബ്രദര് സന്തോഷ് കരുമത്ര എന്നിവരും പങ്കെടുക്കും.
യേശുവില് ഒന്നാകാന് അനുദിനം വിശുദ്ധിയില് വളരാന് വിശുദ്ധ ജീവിതങ്ങളെ പരിചയപ്പെടുത്തിക്കൊണ്ട് നാളെയുടെ വാഗ്ദാനമായ കുട്ടികളിലൂടെ ‘ഹോളിവീന്’ ആഘോഷങ്ങളും നാളെ രണ്ടാം ശനിയാഴ്ച്ച കണ്വെന്ഷനില് നടക്കും. യൂറോപ്പില് ക്രൈസ്തവ മാഹാത്മ്യത്തിന്റെ പുനരുത്ഥാരണത്തിനായി ദൈവികേതരസങ്കല്പങ്ങളുടെ പ്രതിരൂപമായ ഹാലോവീന് ആഘോഷങ്ങള്ക്ക് പകരം വിശുദ്ധരുടെയും മാലാഖമാരുടെയും വേഷവിധാനങ്ങളോടെ ക്രിസ്തുവിന്റെ പടയാളികളാകുവാന് കുട്ടികളെയും മാതാപിതാക്കളെയും ഉദ്ബോധിപ്പിച്ചുകൊണ്ട് രണ്ടാം ശനിയാഴ്ച്ച കണ്വെന്ഷനില് കഴിഞ്ഞവര്ഷം തുടക്കമിട്ട ഹോളിവീന് ആഘോഷങ്ങള് ദൈവരാജ്യ സ്ഥാപനം മുന്നിര്ത്തി ഈ വര്ഷവും ഏറ്റവും ശ്രദ്ധേയമായരീതിയില് നടത്തുവാന് സെഹിയോന് യൂറോപ്പ് ഒരുങ്ങിക്കഴിഞ്ഞു. പ്രായഭേദമെന്യേ സാധിക്കുന്ന എല്ലാ കുട്ടികളും വിശുദ്ധരുടെയോ മാലാഖാമാരുടെയോ ക്രിസ്തീയതയ്ക്കു പ്രാമുഖ്യം നല്കുന്ന മറ്റെന്തെങ്കിലും വേഷവിധാനങ്ങളോടെയോ നാളെ 13/10/18 ന് രണ്ടാം ശനിയാഴ്ച്ച കണ്വെന്ഷനിലേക്ക് എത്തിച്ചേരണമെന്ന് കുട്ടികളോടും മാതാപിതാക്കളോടും സെഹിയോന് യൂറോപ്പിനുവേണ്ടി പ്രാര്ത്ഥനയോടെ ഫാ.സോജി ഓലിക്കല് അഭ്യര്ത്ഥിക്കുന്നു.
രണ്ടാം ശനിയാഴ്ച്ച കണ്വന്ഷനെപ്പറ്റിയുള്ള പ്രോമോ വീഡിയോ കാണാം
മള്ട്ടികള്ച്ചറല് ഉപഭോഗ സംസ്കാരത്തിന്റെ പിടിയിലമര്ന്ന യുകെയിലും യൂറോപ്പിലും കഴിഞ്ഞ അനേക വര്ഷങ്ങളായി സ്ഥിരമായി എല്ലാമാസവും കുട്ടികള്ക്കും യുവജനങ്ങള്ക്കും വിശ്വാസജീവിതത്തില് വളരാനുതകുന്ന ക്രിസ്തീയ ജീവിതമൂല്യങ്ങള് വിവിധശുശ്രൂഷകളിലൂടെ പകര്ന്നു നല്കാന് സാധിക്കുന്നത് രണ്ടാംശനിയാഴ്ച കണ്വെന്ഷന്റെ പ്രധാന സവിശേഷതയാണ്. കുട്ടികള്ക്കായി ഓരോതവണയും ഇംഗ്ലീഷില് പ്രത്യേക കണ്വെന്ഷന്തന്നെ നടക്കുന്നു.അനേകം കുട്ടികളും കൗമാരപ്രായക്കാരുമാണ് ഓരോ രണ്ടാംശനിയാഴ്ച കണ്വെന്ഷനിലും മാതാപിതാക്കളോടോ മറ്റ് മുതിര്ന്നവര്ക്കൊപ്പമോ യുകെയുടെ വിവിധ പ്രദേശങ്ങളില്നിന്നായി എത്തിക്കൊണ്ടിരിക്കുന്നത്. കിംങ്ഡം റവലേറ്റര് എന്ന കുട്ടികള്ക്കായുള്ള മാസിക ഓരോരുത്തര്ക്കും സൗജന്യമായി നല്കിവരുന്നു. കുറഞ്ഞ സമയം കൊണ്ട് ഏറെ ശ്രദ്ധിക്കപ്പെട്ട ലിറ്റല് ഇവാഞ്ചലിസ്റ് എന്ന പുസ്തകവും വളര്ച്ചയുടെ പാതയില് കുട്ടികള്ക്ക് വഴികാട്ടിയാവുന്നു.
രണ്ടു വേദികളിലായി ഒരേസമയം ഇംഗ്ലീഷിലും മലയാളത്തിലും നടക്കുന്ന കണ്വെന്ഷനില് കടന്നുവരുന്ന ഏതൊരാള്ക്കും മലയാളത്തിലും ഇംഗ്ലീഷിലും മറ്റു ഭാഷകളിലും കുമ്പസാരിക്കുന്നതിനും സ്പിരിച്വല് ഷെയറിംങ്ങിനുമുള്ള സൗകര്യം ഉണ്ടായിരിക്കും. വിവിധ പ്രായക്കാരായ ആളുകള്ക്ക് ഇംഗ്ലീഷിലും മലയാളത്തിലുമുള്ള ബൈബിള്, പ്രാര്ത്ഥനാ പുസ്തകങ്ങള്, മറ്റ് പ്രസിദ്ധീകരണങ്ങള് എന്നിവ കണ്വെന്ഷന് സെന്ററില് ലഭ്യമാണ്. പതിവുപോലെ രാവിലെ 8ന് മരിയന് റാലിയോടെ തുടങ്ങുന്ന കണ്വെന്ഷന് വൈകിട്ട് 4 ന് ദിവ്യകാരുണ്യ പ്രദക്ഷിണത്തോടെ കണ്വെന്ഷന് സമാപിക്കും. കണ്വെന്ഷനായുള്ള പ്രാര്ത്ഥനാ ഒരുക്ക ശുശ്രൂഷ ബര്മിങ്ഹാമില് നടന്നു. കണ്വെന്ഷന്റെ ആത്മീയവിജയത്തിനായി പ്രാര്ത്ഥനാസഹായം അപേക്ഷിക്കുന്ന ഫാ.സോജി ഓലിക്കലും സെഹിയോന് കുടുംബവും യേശുനാമത്തില് മുഴുവനാളുകളെയും ഈ ജപമാലമാസത്തില് നാളെ രണ്ടാം ശനിയാഴ്ച ബര്മിംങ്ഹാം ബഥേല് സെന്ററിലേക്ക് യേശുനാമത്തില് വീണ്ടും ക്ഷണിക്കുന്നു.
അഡ്രസ്സ് :
ബഥേല് കണ്വെന്ഷന് സെന്റര്
കെല്വിന് വേ
വെസ്റ്റ് ബ്രോംവിച്ച്
ബര്മിംങ്ഹാം ( Near J1 of the M5)
B70 7JW.
കൂടുതല് വിവരങ്ങള്ക്ക് ;
ഷാജി 07878149670.
അനീഷ്.07760254700
ബിജുമോന് മാത്യു 07515 368239
Sandwell and Dudley ട്രെയിന് സ്റ്റേഷന്റെ തൊട്ടടുത്തായിട്ടുള്ള കണ്വെന്ഷന് സെന്ററിലേക്ക് യുകെയുടെ വിവിധ പ്രദേശങ്ങളില്നിന്നും ഏര്പ്പെടുത്തിയിട്ടുള്ള കോച്ചുകളെയും മറ്റ് വാഹനങ്ങളെയുംപറ്റിയുള്ള പൊതുവിവരങ്ങള്ക്ക്
ടോമി ചെമ്പോട്ടിക്കല് 07737935424.
ബിജു എബ്രഹാം 07859 890267
ഫാ.ഹാപ്പി ജേക്കബ്
സദ് വാര്ത്തകള് കേള്ക്കുവാനും പങ്കുവെക്കുവാനും സ്നേഹിക്കുവാനും ആ സ്നേഹത്തില് ആത്മാര്ത്ഥത നുകരുവാനും കഴിയുമായിരുന്ന ഒരു കാലത്തിന്റെ പ്രജകള് ആയിരുന്നല്ലോ നാം. സ്നേഹം നിഷ്കളങ്കമായിരുന്നു, പങ്കുവെക്കലുകള് ജീവനുള്ളവയായിരുന്നു, ആത്മാര്ത്ഥത ഹൃദയത്തില് നിന്നുള്ളവയായിരുന്നു. എന്നാല് ഇന്ന് നമുക്ക് ചുറ്റും കണ്ണും കാതും പായിച്ചാല് സംശയവും കാപട്യവും പ്രമാണലംഘനങ്ങളും മാത്രമുള്ള ഒരു ജീവിതലോകത്തിന്റെ പരിച്ഛേദനം മുന്നില് പ്രത്യക്ഷപ്പെടും. അതിനിടയില് നുറുങ്ങുവെളിച്ചമായി നന്മകള് എവിടെയോ മിന്നുന്നതും കാണാം. പരിശോധനയും ചികിത്സയും നമുക്കാണോ വേണ്ടത് അതോ നമുക്കു ചുറ്റുമുള്ളവര്ക്കാണോ വേണ്ടത്. വേദനകള്ക്ക് ശമനവും പാപവിടുതല് പ്രസംഗിക്കുകയും ആത്മതപനങ്ങള്ക്ക് ഉറവിടവുമായ ദൈവസന്നിധി പോലും മലീമസ വാര്ത്തകള്ക്ക് നടുവില് സ്ഥാനം പിടിച്ചു കഴിഞ്ഞു. ഈ അവസരത്തില് പ്രയോജനപ്പെടും എന്ന വിശ്വാസത്തില് ചില ചിന്തകള് പങ്കുവെക്കട്ടെ.
ഈ ലോകം മുഴുവനും ഒരു തറവാടായി നാം ഓരോരുത്തരും സഹോദരങ്ങളുമായും കഴിഞ്ഞ കാലത്തിന്റെ വളര്ച്ചയിലെ അടുത്ത ഏടിലാണ് ഈ സംഭവങ്ങള് അരങ്ങേറിയിരിക്കുന്നത് എന്ന വസ്തുത ആശ്ചര്യത്തോടെ മാത്രമേ ഉള്ക്കൊള്ളാന് കഴിയൂ. വേദപുസ്തകത്തില് ആത്മീക മനുഷ്യനെയും പ്രാകൃത മനുഷ്യനെയും ഇരുവരുടെയും സ്വഭാവ രീതികളും വിവരിക്കുന്നുണ്ട്. ഹൈന്ദവ ധര്മ്മത്തില് ദേവനും അസുരനുമുണ്ട്. ഇവിടെ എല്ലാം വിജയമായും നീതിയായും സ്നേഹമായും വര്ണ്ണനയില് വിരിയുന്നത് ആത്മീകവും ദേവനും ഒക്കെയാണ്. ദൈനംദിന ജീവിത സാഹചര്യങ്ങളിലും നാം ഈ വേര്തിരിവ് പല രൂപത്തിലും അനുവര്ത്തിക്കുകയും പഠിപ്പിക്കുകയും പരിപോഷിപ്പിക്കുകയും ചെയ്യുന്നുണ്ടല്ലോ. പ്രകൃതിപോലും രാത്രി പകല് ഭേദങ്ങളില് ഈ അവസ്ഥയെ കാട്ടിത്തരുന്നു. ഇരുട്ട് ഭയത്തിന്റെ പ്രതീകമെങ്കില് പകല് സമാധാനവും സ്വസ്ഥതയും നമുക്ക് നല്കുന്നു. ധര്മ്മം, നീതി, നേര് എന്ന് നാം ഉപയോഗിക്കുന്ന വാക്കുകളില് എല്ലാം കുറച്ചു കാലം ശരി നാം കണ്ടിരുന്നു. അത്ത് ഇതെല്ലാം ലോക തറവാട്ടിലെ എല്ലാ അംഗങ്ങളും മനസിലാക്കുകയും അതിന് അനുസരിച്ച് ജീവിക്കുകയും ചെയ്തിരുന്നു.
കാലം കഴിഞ്ഞു, പഴഞ്ചന് രീതികളെല്ലാം പോയ്മറഞ്ഞു. ഏവരും ഒരുപോലെ ആധുനികന്മാരായി. ചിന്തകള്ക്ക് വ്യതിയാനമുണ്ടായി. നീതി എന്റെയും നിന്റേതും വ്യത്യസ്തമായി. കാഴ്ചപ്പാടുകള്ക്ക് അര്ത്ഥം ഇല്ലാതായി. സാമൂഹികം ഈഗോയ്ക്ക് വഴിമാറി. നേട്ടങ്ങള്ക്കിടയിലുള്ള അപചയങ്ങള് മനസിലാക്കാതെ കുന്നുകൂടി നമുക്കു മീതെ നിഴലുകളായി രൂപാന്തരപ്പെട്ടു. ദൈവനീതിക്ക് പ്രചാരകരേറി. ജാതിമത ഭേദമെന്യേ മുന്പ് മറ്റെങ്ങും കണ്ടിട്ടില്ലാത്ത വണ്ണം പ്രസംഗകരും ജ്ഞാനികളും ധ്യാനഗുരുക്കന്മാരും ഉണര്ന്നു വന്നു. വാര്ത്താമാധ്യമങ്ങളും സാമൂഹിക മാധ്യമങ്ങളും ആത്മീയതയുടെ പ്രോക്താക്കളായി. അറിഞ്ഞും അറിയാതെയും നാം ഓരോരുത്തരും ദിനങ്ങള്, മണിക്കൂറുകള്, വേണ്ട രാത്രി പോലും ഉറക്കം കളഞ്ഞ് ഫോര്വേര്ഡ് യന്ത്രങ്ങളായി ഈ കര്മ്മത്തില് പങ്കാളികളായി. എന്നിട്ടും പ്രകാശം കെടുന്നതല്ലാതെ ആളിക്കത്തിക്കുവാന് കഴിയാതെ വന്നു. പ്രകൃതിക്ക് മനംമടുത്തു. കാലങ്ങളായി ഭേദമാകാതെ കിടന്ന പല രോഗങ്ങളും രോഗികളും കിടക്ക വിട്ടോടി.
എല്ലാവര്ക്കും ഒരേ സ്വരം, ഒരേ പ്രാര്ത്ഥന, ഒരേ ചിന്ത. ജീവിതത്തിന്റെ ദര്ശനം തന്നെ മാറിയ നാളുകള് പിടിച്ചടക്കിയതെല്ലാം കണ്മുന്നില് കുതിര്ന്നു വീണത് നിസഹായമായി നോക്കി നിന്നപ്പോള് ചിലരെങ്കിലും അന്വേഷിച്ച ദൈവചൈതന്യം കണ്ടെത്തി. അത് സ്വന്തം ഹൃദയത്തില് തന്നെ കണ്ടെത്തിയവരുണ്ട്, സഹജീവികളുടെ മുഖത്ത് കണ്ടെത്തിയവരുണ്ട്. അപ്പോഴാണ് അയല്ക്കാര് സഹോദരങ്ങളായത്, ആരുമല്ലാതിരുന്നവര് ആത്മമിത്രങ്ങളും ആയത്. മനുഷ്യരാല് അസാധ്യമായത് ദൈവത്തിന് നിസാരമായി സാധ്യമെന്ന് ഇനിയെങ്കിലും മനസിലാക്കിയാല് നന്ന്.
മങ്ങിപ്പോയ വെളിച്ചം ആളിക്കത്തിയ ദിവസങ്ങള് ആയിരുന്നു. ജീവിതം സാധാരണമായി വരാന് തുടങ്ങിയപ്പോള് വീണ്ടും കേള്ക്കാന് തുടങ്ങി, കേള്ക്കാന് ആഗ്രഹിക്കാത്ത വാര്ത്തകള്. പീഡനങ്ങള്, കലഹങ്ങള്, ആചാരങ്ങള്, അനുഷ്ഠാനങ്ങള് എല്ലാം സമാധാനത്തെ കെടുത്തുന്ന വാര്ത്തകളായി ദിനംപ്രതി കടന്നു വരുന്നു. പല ശരികളും തെറ്റായും തെറ്റുകള് ശരിയുമായി. ഇന്നലെവരെ നാം പരിപാലിച്ച് അനുഷ്ഠിച്ചിരുന്ന മര്യാദകള് ഇന്ന് ലംഘനങ്ങളായി മാറി. പരിശുദ്ധതയുടെ ഇടങ്ങള് മലിനതയുടെ കൂത്തരങ്ങായി. ദൈവനിഷേധവും അര്ദ്ധസത്യങ്ങളും നമുക്ക് ഫാഷനായി. ഓരോ ദിവസവും ആഘോഷിക്കുവാന് എന്തെങ്കിലും പുതുതായി വേണം. അത് സമൂഹം നല്കുകയും ചാനലുകള് പ്രചരിപ്പിക്കുകയും നാം ആത്മസന്തോഷം നേടുകയും ചെയ്യുന്നു. ഒരു പീഡന വാര്ത്തയില്ലെങ്കില് സുഖമായി ഉറക്കം നടക്കില്ല. ഒരു സ്നേഹിതന്റെ കമന്റാണ്. അത് ആത്മീക മേഖലയില് നിന്നായാല് കൂടുതല് ഇഷ്ടം.
എന്തേ ഇങ്ങനെയാകുന്നു. നമുക്കു തന്നെ മൂല്യങ്ങള് തിരിച്ചു പിടിക്കാന് കഴിയാതെ പോയോ? അതോ അതിനും പ്രകൃതി നീതിവാഹകയാകേണ്ടി വരുമോ? ഇപ്പോഴത്തെ അവസ്ഥയില് ആര് ആരെ പഠിപ്പിക്കും? ആര് ആരെ ന്യായം വിധിക്കും? നിയമം ചിലരെ അഴിക്കുള്ളില് ആക്കിയപ്പോള് പുറത്തു നിന്നവര് ആശ്വസിച്ചു. എന്നാല് ദൈവിക നീതി അത് തുല്യമല്ലോ. ഹൃദയശുദ്ധി അത് മാത്രമേ പരിഹാരമുള്ളു. ഏതു നന്മയും തിന്മയും അതിന്റെ ആരംഭം ഹൃദയത്തില് നിന്നല്ലേ?
രോഗി വൈദ്യന്റെ അടുക്കല് ചെല്ലുകയും ചികിത്സാവിധി ഏറ്റുവാങ്ങുകയും അത് അനുസരിക്കുകയും ചെയ്താലല്ലേ രോഗം ശമിക്കൂ. ഉപവാസവും പ്രാര്ത്ഥനയും ആണ് മരുന്നായി വേദപുസ്തകവും മറ്റു ഗ്രന്ഥങ്ങളും ചൂണ്ടിക്കാണിക്കുന്നത്. ദൈവിക നീതി പുലരട്ടെ. കാലിക ധര്മ്മം നീതിക്ക് മുതല്ക്കൂട്ടാകട്ടെ.
