Malayalam UK

Spiritual

വിൻസൻഷ്യൻ മിനിസ്ട്രി നയിക്കുന്ന, ‘മരിയൻ റെസിഡൻഷ്യൽ ധ്യാനം’ റാംസ്‌ഗേറ്റിൽ 9 ന് വെള്ളിയാഴ്ച്ച മുതൽ; ഫാ. പോൾ എട്ടിയിൽ, ഫാ. മാർട്ടിൻ ചിറ്റാടിയിൽ, ഫാ പോൾ പള്ളിച്ചംകുടിയിൽ എന്നിവർ നയിക്കും

അപ്പച്ചൻ കണ്ണഞ്ചിറ

റാംസ്‌ഗേറ്റ് : ആഗോള കത്തോലിക്ക സഭ പരിശുദ്ധ ജപമാല മാസമായി ആചരിക്കുന്ന ഒക്ടോബർ മാസത്തിൽ, വിൻസൻഷ്യൻ മിനിസ്ട്രി നയിക്കുന്ന ത്രിദിന മരിയൻ റസിഡൻഷ്യൽ ധ്യാനം വെള്ളിയാഴ്ച്ച ആരംഭിക്കും. രാംസ്ഗേറ്റിലെ വിൻസൻഷ്യൻ റിട്രീറ്റ് സെൻററിൽ ഒക്ടോബർ 9 വെള്ളിയാഴ്ച്ച ആരംഭിക്കുന്ന മരിയൻ ധ്യാനം അഭിഷിക്ത വചന പ്രഘോഷകരും, ധ്യാന ഗുരുക്കളുമായ ഫാ. തോമസ് ഏട്ടിയിൽ, ഫാ മാർട്ടിൻ ചിറ്റാടിയിൽ, ഫാ. പോൾ പള്ളിച്ചംകുടിയിൽ എന്നിവരാവും നയിക്കുക.

ഒക്ടോബർ 9 ന് വെള്ളിയാഴ്ച്ച രാവിലെ 7 മണിക്ക് ആരംഭിക്കുന്ന മരിയൻ ധ്യാന ശുശ്രൂഷകൾ, ഒക്ടോബർ 11 ന് ഞായറാഴ്ച്ച വൈകുന്നേരം 4 മണിയോടെ സമാപിക്കും. ധ്യാനാർത്ഥികൾക്കായി വ്യാഴാഴ്ച്ച വൈകുന്നേരം മുതൽ റാംസ്‌ഗേറ്റിൽ താമസസൗകര്യങ്ങൾ സജ്ജീകരിക്കുന്നുണ്ട്. മൂന്നു ദിവസത്തെ ഭക്ഷണവും താമസത്തിനുമായി £ 75 മാത്രമാണ് പണം ഈടാക്കുക.

സ്വർഗ്ഗത്തിന്റെയും ഭൂമിയുടെയും രാജ്ഞിയും, അനുഗ്രഹ കൃപകളുടെ ശക്തയായ മദ്ധ്യസ്ഥയുമായ പരിശുദ്ധ അമ്മയോടുള്ള ഭക്തിയും, സ്നേഹവും, വിശ്വാസവും ആഴത്തിൽ വേരൂന്നുന്നതിനും, ഏറ്റുപറയുന്നതിനുള്ള അവസരമായ മരിയൻ ധ്യാനത്തിലേക്ക് ഏവരെയും സ്നേഹപൂർവ്വം സ്വാഗതം ചെയ്യുന്നതായി വിൻസൻഷ്യൻ ടീം അറിയിക്കുന്നു.

Registration : https://www.divineuk.org/residential-retreats
For Contact : +447474787890,
Email: [email protected], Website:www.divineuk.org

Venue: Divine Retreat Centre, St. Augustine’s Abbey Ramsgate,
Kent, CT11 9PA

ഗ്രേറ്റ് ബ്രിട്ടൻ സീറോ മലബാർ രൂപത ബൈബിൾ കലോൽസവ റീജിയണൽ മത്സരങ്ങൾക്ക് ഇന്ന് സ്കോട് ലൻഡിൽ തിരി തെളിയും . രൂപത ഷോർട് ഫിലിം മത്സരങ്ങൾക്ക് പേരുകൾ നൽകാനുള്ള അവസാന തിയതി ഒക്ടോബർ 10ന്

ഷൈമോൻ തോട്ടുങ്കൽ(PRO)

ബർമിംഗ്ഹാം .ഗ്രേറ്റ് ബ്രിട്ടൻ സീറോ മലബാർ രൂപത ബൈബിൾ കലോൽസവത്തിന് മുന്നോടിയായി നടക്കുന്ന റീജിയണൽ മത്സരങ്ങൾക്ക് ഇന്ന് സ്കോട് ലൻഡിൽ തുടക്കം. രൂപതയിലെ പന്ത്രണ്ട് റീജിയണുകളിലെ നൂറിലധികം ഇടവകകൾ/മിഷനുകൾ / പ്രൊപ്പോസ്ഡ് മിഷനുകളിൽനിന്നുമുള്ള മത്സരാർത്ഥികളാണ് വിവിധ റീജിയനിലുകളിലായി വിവിധ ദിവസങ്ങ മത്സരങ്ങളിൽ പങ്കെടുക്കുന്നത്. സ്കോട് ലൻഡ് റീജിയണിന്റെ മത്സരങ്ങൾ ഇന്ന് ARMADALE ACADEMY,West Main Street, Armadale, West Lothian, EH48 3 LY യിൽ നടത്തപ്പെടും. പ്രെസ്റ്റൺ റീജിയണിൽ രചന മത്സരങ്ങളും എഴുത്തുമത്സരങ്ങളും ഇന്ന് ലിവർപൂളിൽ വച്ച് നടത്തപ്പെടും

മത്സരങ്ങളുടെ സുഗമമായ നടത്തിപ്പിനാവശ്യമായ എല്ലാ ഒരുക്കങ്ങളും പൂർത്തിയായതായി റീജിയണൽ കോർഡിനേറ്റർമാർ അറിയിച്ചു.

മത്സരങ്ങൾ എല്ലാ റീജിയണുകളിലും ഏകീകൃതമായ രീതിയിൽ നടക്കുന്നതിനായി നിയമാവലിയും വിഷയങ്ങളും ക്രമബദ്ധമായി തയ്യാറാക്കിയിട്ടുണ്ട്. രജിസ്ട്രേഷനും നടത്തിപ്പും സംബന്ധിച്ച രൂപതാകേന്ദ്രത്തിന്റെ നിർദേശങ്ങൾ രൂപത ബൈബിൾ അപ്പസ്റ്റോലേറ്റ് ഇതിനകം തന്നെ എല്ലാ റീജിയണുകളിലും കൈമാറിയിട്ടുണ്ട്.

എല്ലാ റീജിയണുകളിലെയും മത്സരങ്ങൾ നവംബർ 1 നോടുകൂടി പൂർത്തിയാകും. ഓരോ റീജിയണിലും മത്സരങ്ങൾ നടത്തുന്നതിനായുള്ള കലോത്സവ എക്സിക്യൂട്ടീവ് കമ്മിറ്റികൾ രൂപതയിൽ നിന്നും നിർദ്ദേശിച്ചിരിക്കുന്ന മാനദണ്ഡങ്ങൾക്കനുസരിച്ച് രൂപീകരിച്ചിട്ടുണ്ട് . ഈ കമ്മിറ്റികളുടെ നേതൃത്വത്തിലായിരിക്കും റീജിയണൽ ബൈബിൾ കലോത്സവം നടത്തപ്പെടുക.

ഓരോ എയ്ജ് വിഭാഗത്തിലും റീജിയണൽ തലത്തിൽ ഒന്നാം സ്ഥാനം നേടുന്ന മത്സരാർത്ഥികൾക്കാണ് നവംബർ 21-ന് ലീഡ്സ് റീജിയണിലെ സ്കെന്തോർപ്പിൽ നടക്കുന്ന രൂപതാതല മത്സരങ്ങളിൽ പങ്കെടുക്കാൻ അവസരം ലഭിക്കുന്നത്.

രൂപത തലത്തിൽ സംഘടിപ്പിക്കുന്ന ഷോർട്ട് ഫിലിം മത്സരങ്ങൾക്കുള്ള രജിസ്ട്രേഷൻ [email protected] എന്ന ഈമെയിലുവഴി ഒക്ടോബർ 10-നകം പൂർത്തിയാക്കണം. പൂർത്തീകരിച്ച ഷോർട്ട് ഫിലിം ഒക്ടോബർ 18 രാത്രി 12 മണിയ്ക്ക് മുൻബ് സമർപ്പിച്ചിരിക്കണം.

കലോത്സവത്തെക്കുറിച്ചും നിയമാവലിയെക്കുറിച്ചും കൂടുതൽ അറിയുന്നതിനായി താഴെ നൽകിയിരിക്കുന്ന ലിങ്ക് സന്ദർശിക്കണം എന്ന് ബൈബിൾ അപ്പോസ്റ്റലേറ്റ് പി ആർ ഓ ജിമ്മിച്ചൻ ജോർജ് അറിയിച്ചു .

ക്രോയ്ഡോൺ ഒരുങ്ങുന്നു; രാജേഷ് ചേർത്തലയുടെ ഭജൻസ് സന്ധ്യ ഒക്ടോബർ 4ന്

ലണ്ടൻ: യുകെ മലയാളികളുടെ പ്രിയപ്പെട്ട സംഗീത സംഘാടകരായ 5 Star Events ന്റെ ആഭിമുഖ്യത്തിൽ, ഓടക്കുഴൽ മാന്ത്രികൻ രാജേഷ് ചേർത്തല നയിക്കുന്ന ഭക്തി സംഗീത സന്ധ്യ ക്രോയ്ഡോണിൽ അരങ്ങേറുന്നു. ‘BHAJANS SANDHYA with RAJESH CHERTHALA – UK Tour 2026’ എന്ന സംഗീത പരിപാടി ഒക്ടോബർ 4 ഞായറാഴ്ച ക്രോയ്ഡോൺ ട്രിനിറ്റി സ്കൂളിൽ വെച്ചാണ് നടക്കുക.

ഫ്ലൂട്ടിൽ തീർക്കുന്ന ഭക്തിയുടെ ദിവ്യാനുഭൂതിയുമായി രാജേഷ് ചേർത്തലയും ഒൻപത് അംഗ സംഘവും ഒരുക്കുന്ന ഈ സന്ധ്യ യുകെയിലെ സംഗീതാസ്വാദകർക്ക് മറക്കാനാവാത്ത അനുഭവമായിരിക്കും.

കൂടുതൽ വിവരങ്ങൾക്കും ടിക്കറ്റ് ബുക്കിങ്ങിനും: 07405 513236, 07949 717228, 07753 110042, 07917 361127

സീറോ മലബാർ കാത്തലിക് കോൺഗ്രസ് (എസ്.എം.സി.സി) സുറിയാനി ഭാഷാ അക്കാദമി ആരംഭിക്കുന്നു. ആറുമാസ ഓൺലൈൻ സർട്ടിഫിക്കറ്റ് കോഴ്സിലേക്ക് രജിസ്ട്രേഷൻ തുടങ്ങി

ജോസ് തോമസ്

ഷിക്കാഗോ: സീറോ മലബാർ സഭയുടെ സമ്പന്നമായ സുറിയാനി ഭാഷാ-ആരാധനാക്രമ പൈതൃകം പഠിക്കാനും സംരക്ഷിക്കാനും പുതുതലമുറയിലേക്ക് പകർന്നുനൽകാനും ലക്ഷ്യമിട്ട് സീറോ മലബാർ കാത്തലിക് കോൺഗ്രസ് (എസ്.എം.സി.സി) സുറിയാനി ഭാഷ അക്കാഡമി (Syriac Learning Academy) ആരംഭിക്കുന്നു. ഷിക്കാഗോ സെന്റ് തോമസ് സീറോ മലബാർ രൂപതയുടെ മാർഗനിർദേശത്തിൽ എസ്.എം.സി.സി വിദ്യാഭ്യാസ-ഗവേഷണ വിഭാഗത്തിന്റെ നേതൃത്വത്തിലാണ് ഈ പുതിയ പഠന സംരംഭം ആവിഷ്കരിച്ച് ഏകോപിപ്പിക്കുന്നത്.

വടവാതൂർ പൊന്തിഫിക്കൽ ഓറിയന്റൽ ഇൻസ്റ്റിറ്റ്യൂട്ട് ഓഫ് റിലീജിയസ് സ്റ്റഡീസിലെ സുറിയാനി ദൈവശാസ്ത്ര വിഭാഗത്തിന്റെ സഹകരണത്തോടെയാണ് അടിസ്ഥാന സുറിയാനി ഭാഷാ പഠനത്തിൽ ആറുമാസത്തെ ഓൺലൈൻ സർട്ടിഫിക്കറ്റ് കോഴ്സ് നടത്തുന്നത്.

സുറിയാനി അക്ഷരമാല, അടിസ്ഥാന വായനയും ഉച്ചാരണവും, ദൈനംദിന പദങ്ങളും പ്രയോഗങ്ങളും, അടിസ്ഥാന വ്യാകരണം, സീറോ മലബാർ ആരാധനാക്രമത്തിൽ ഉപയോഗിക്കുന്ന സുറിയാനി പദങ്ങളും പ്രാർത്ഥനകളും അവയുടെ അർത്ഥവും പശ്ചാത്തലവും തുടങ്ങിയവ പഠനത്തിന്റെ ഭാഗമാകും. ഭാഷാ പഠനത്തോടൊപ്പം സീറോ മലബാർ സഭയുടെ ആരാധനാക്രമ പാരമ്പര്യത്തെയും ആത്മീയ-സാംസ്കാരിക പൈതൃകത്തെയും കൂടുതൽ അടുത്തറിയാനുള്ള അവസരവും കോഴ്സ് ഒരുക്കും.

2026 നവംബർ 4-ന് ആദ്യ ബാച്ച് ആരംഭിക്കും. രണ്ടാഴ്ചയിലൊരിക്കൽ ബുധനാഴ്ച രാത്രി 9 മണിക്ക് (അമേരിക്കൻ ഈസ്റ്റേൺ സമയം), 45 മിനിറ്റ് വീതം ഓൺലൈനായിരിക്കും ക്ലാസുകൾ. പ്രായപരിധിയില്ലാതെ സുറിയാനി ഭാഷ പഠിക്കാൻ താൽപര്യമുള്ള എല്ലാവർക്കും കോഴ്സിൽ ചേരാം. ആദ്യ ബാച്ചിൽ 60 സീറ്റുകൾ മാത്രമാണ് ലഭ്യമാകുക. രജിസ്ട്രേഷൻ ഫീസ് 100 ഡോളർ ആണ്.

വിശ്വാസപരിശീലന അധ്യാപകർ, വിദ്യാർത്ഥികൾ, പള്ളി ഗായകസംഘാംഗങ്ങൾ, ദൈവശാസ്ത്ര വിദ്യാർത്ഥികൾ, സീറോ മലബാർ സഭയുടെയും ഇടവകകളുടെയും വിവിധ ശുശ്രൂഷകളിലും പ്രവർത്തനങ്ങളിലും സജീവമായി പങ്കെടുക്കുന്ന അൽമായർ എന്നിവരുടെ പങ്കാളിത്തമാണ് അക്കാദമി പ്രത്യേകമായി പ്രതീക്ഷിക്കുന്നത്. അതോടൊപ്പം, സുറിയാനി ഭാഷയും സഭയുടെ ആരാധനാക്രമ പൈതൃകവും പഠിക്കാൻ താൽപര്യമുള്ള എല്ലാവർക്കും കോഴ്സിൽ പങ്കെടുക്കാം.

കോഴ്സ് വിജയകരമായി പൂർത്തിയാക്കുന്നവർക്ക് നിശ്ചിത പഠന മാനദണ്ഡങ്ങൾക്കനുസരിച്ച് സർട്ടിഫിക്കറ്റ് നൽകും. കൂടാതെ, ഭാവിയിൽ ആവശ്യമുള്ള വിദ്യാർത്ഥികൾക്ക് ഈ പഠനത്തിന് അക്കാദമിക് ക്രെഡിറ്റ് ലഭ്യമാക്കുന്നതിനായി സർവകലാശാലകളുമായി സഹകരിക്കാനുള്ള സാധ്യതയും പരിശോധിച്ചുവരുന്നു. ബന്ധപ്പെട്ട സർവകലാശാലകളുടെ അംഗീകാരത്തിനും അക്കാദമിക് നിബന്ധനകൾക്കും വിധേയമായിട്ടായിരിക്കും ഇത് നടപ്പാക്കുക.

അക്കാദമിക്ക് സഭാപരവും അക്കാദമികവും സാംസ്കാരികവുമായ മാർഗനിർദേശങ്ങൾ നൽകുന്നതിനുള്ള ഉപദേശക സമിതിയിൽ അഭിവന്ദ്യ മാർ ജോയ് ആലപ്പാട്ട് – ഷിക്കാഗോ സെന്റ് തോമസ് സീറോ മലബാർ രൂപതാധ്യക്ഷൻ; അഭിവന്ദ്യ മാർ ജോസഫ് കല്ലറങ്ങാട്ട് – പാലാ രൂപതാധ്യക്ഷൻ; ഫാ. ജോസഫ് പാലയ്ക്കൽ സി.എം.ഐ. – ഇന്ത്യൻ സംഗീതശാസ്ത്രജ്ഞൻ, ഗായകൻ, സംഗീതസംവിധായകൻ; റവ. ഡോ. പോളി മണിയാട്ട് — പ്രസിഡന്റ്, പൊന്തിഫിക്കൽ ഓറിയന്റൽ ഇൻസ്റ്റിറ്റ്യൂട്ട് ഓഫ് റിലീജിയസ് സ്റ്റഡീസ് (POIRS), ഡോ. ആൻഡ്രൂസ് മേയ്ക്കാട്ടുകുന്നേൽ – ഡയറക്ടർ, ബേത് അപ്രേം നസ്രാണി ദയറ, ഫാ. സിറിൽ തയ്യിൽ, അസിസ്റ്റന്റ് ഡയറക്ടർ ബേത് അപ്രേം നസ്രാണി ദയറ, കപ്പുംതല, റവ. ഫാ. ജോർജ് ഇളമ്പാശ്ശേരിൽ – എസ്.എം.സി.സി ദേശീയ ഡയറക്ടർ, ഡോ. ജെയിംസ് കുറുച്ചി — പണ്ഡിതൻ, പെൻസിൽവേനിയ സർവകലാശാലയിലെ (UPenn) റിട്ടയേർഡ് മലയാള ഭാഷാ അധ്യാപകൻ എന്നിവർ അംഗങ്ങളാണ്. ആവശ്യാനുസരണം കൂരിയ നിർദേശിക്കുന്ന മറ്റു സുറിയാനി പണ്ഡിതരെയും വൈദികരെയും വിദ്യാഭ്യാസ വിദഗ്ധരെയും ഉപദേശക സമിതിയിൽ ഉൾപ്പെടുത്താനും പദ്ധതിയുണ്ട്. ഫാ. വർഗീസ് മാറ്റത്തിൽ – ഡയറക്ടർ, സുറിയാനി ദൈവശാസ്ത്ര വിഭാഗം, POIRS; ഫാക്കൽറ്റി മേധാവിയായി പ്രവർത്തിക്കും.

ആദ്യമെത്തുന്നവർക്ക് മുൻഗണന എന്ന അടിസ്ഥാനത്തിലായിരിക്കും ആദ്യ ബാച്ചിലേക്കുള്ള പ്രവേശനം. താൽപര്യമുള്ളവർ www.smccusa.org എന്ന വെബ്സൈറ്റിലൂടെ രജിസ്റ്റർ ചെയ്യണം. രജിസ്ട്രേഷൻ നടപടികളുടെ ഭാഗമായി ഫീസ് അടയ്ക്കുന്നതിനുള്ള ലിങ്കും വെബ്സൈറ്റിൽ ലഭ്യമാകും. പ്രസിദ്ധീകരിച്ചിരിക്കുന്ന ക്യു.ആർ. കോഡ് സ്കാൻ ചെയ്താലും രജിസ്ട്രേഷൻ പേജിലേക്ക് നേരിട്ട് പ്രവേശിക്കാം. ആദ്യ ബാച്ചിലെ 60 സീറ്റുകൾ നിറഞ്ഞുകഴിഞ്ഞാൽ ലഭിക്കുന്ന രജിസ്ട്രേഷനുകൾക്ക് അടുത്ത ബാച്ചിൽ മുൻഗണന നൽകുന്നതാണ്.

സീറോ മലബാർ കാത്തലിക് കോൺഗ്രസ് (എസ്.എം.സി.സി) വിദ്യാഭ്യാസ-ഗവേഷണ വിഭാഗത്തിന്റെ നേതൃത്വത്തിലും ഏകോപനത്തിലുമാണ് സുറിയാനി ഭാഷ അക്കാഡമി (Syriac Learning Academy) എന്ന ആശയം രൂപപ്പെടുത്തുകയും വിവിധ സഭാ-അക്കാദമിക സ്ഥാപനങ്ങളുമായുള്ള സഹകരണം ഏകോപിപ്പിച്ച് പദ്ധതി നടപ്പാക്കുന്നതിനുള്ള പ്രവർത്തനങ്ങൾ മുന്നോട്ടുകൊണ്ടുപോകുകയും ചെയ്യുന്നത്. സീറോ മലബാർ കാത്തലിക് കോൺഗ്രസ് (എസ്.എം.സി.സി) ദേശീയ സമിതിയുടെ പിന്തുണയോടെ ദേശീയ ഡയറക്ടർ – റവ. ഫാ. ജോർജ് ഇളമ്പാശ്ശേരിൽ; ദേശീയ പ്രസിഡന്റ് – ജോർജ് വി. ജോർജ്; ദേശീയ സെക്രട്ടറി – ഷോളി കുമ്പിളുവേലി; ദേശീയ ട്രഷറർ – ടോമി തോമസ് പുല്ലാപ്പള്ളി; വിദ്യാഭ്യാസ-ഗവേഷണ വിഭാഗം ചെയർമാൻ – ജോസ് തോമസ്; പ്രോഗ്രാം കോഓർഡിനേറ്റർ – സിറിയക് സ്കറിയ; ബോർഡ് ഓഫ് ഡയറക്ടേഴ്സ് – സിജിൽ പാലയ്ക്കലോടി എന്നിവർ പരിപാടിയുടെ സംഘാടനത്തിനും നടത്തിപ്പിനും നേതൃത്വം നൽകുന്നു.

സീറോ മലബാർ സഭയുടെ വിശ്വാസത്തിന്റെയും ആരാധനാക്രമത്തിന്റെയും ചരിത്രത്തിന്റെയും വിലപ്പെട്ട പൈതൃകമായ സുറിയാനി ഭാഷയെ പഠിക്കാനും മനസ്സിലാക്കാനും സംരക്ഷിക്കാനും വരുംതലമുറകളിലേക്ക് കൈമാറാനും ആഗ്രഹിക്കുന്ന എല്ലാവരെയും എസ്.എം.സി.സി സുറിയാനി ഭാഷ അക്കാഡമി (SMCC Syriac Learning Academy)-യുടെ ആദ്യ ബാച്ചിലേക്ക് സ്വാഗതം ചെയ്യുന്നതായി സംഘാടകർ അറിയിച്ചു.

യുകെ – മലങ്കര യാക്കോബായ സുറിയാനി ഓർത്തഡോക്സ് സഭയുടെ യു. കെ ഭദ്രാസനത്തിനു ചരിത്ര നേട്ടം! യു.കെ മലങ്കര യാക്കോബായ സുറിയാനി ഓർത്തഡോക്സ് ഭദ്രാസനത്തിന് സ്വന്തം ആസ്ഥാന മന്ദിരം.

യു.കെ മലങ്കര യാക്കോബായ സുറിയാനി ഓർത്തഡോക്സ് സഭയെ സംബന്ധിച്ച് ഏറെ സന്തോഷത്തിന്റെയും അനുഗ്രഹത്തിന്റെയും ദിനമാണിന്ന്. ഭദ്രാസനത്തിന്റെ ചിരകാല സ്വപ്നമായിരുന്ന സ്വന്തം ഭദ്രാസന ആസ്ഥാന മന്ദിരത്തിന്റെ തീറാധാരം (Sale Deed) ഒപ്പിടൽ പൂർത്തിയായി.

ഭദ്രാസന മെത്രാപ്പോലീത്ത അഭിവന്ദ്യ ഐസക് മോർ ഒസ്താത്തിയോസ് തിരുമേനിയുടെ നേതൃത്വത്തിലാണ് ഈ ചരിത്ര നേട്ടം കൈവരിച്ചത്.

ലെസ്റ്ററിന് സമീപം *Earl Shilton Independent Chapel, High Street, Earl Shilton LE9 7LR* എന്ന വിലാസത്തിലുള്ള മന്ദിരമാണ് ഭദ്രാസന ആസ്ഥാനമായി വാങ്ങിയിരിക്കുന്നത്.

ഭദ്രാസന ജനറൽ ബോഡി അധികാരപ്പെടുത്തിയ പ്രകാരം ഭദ്രാസന സെക്രട്ടറി Fr. എബിൻ മാർക്കോസ് ഊന്നുകല്ലിങ്കൽ, ട്രഷറർ ഷിബി ചേപ്പനത്ത്, കൗൺസിൽ അംഗങ്ങളായ വിജി. കെ പി, ജിബി ജോയി എന്നിവർ തീറാധാരത്തിൽ ഒപ്പുവച്ചു. ബിൽഡിംഗ് കമ്മിറ്റി അംഗം മനോജ് വർഗീസിന്റെ സാന്നിധ്യത്തിൽ മന്ദിരത്തിന്റെ താക്കോൽ കൗൺസിൽ അംഗങ്ങൾ ഏറ്റുവാങ്ങി.

യുവത്വത്തിന്റെ വിശ്വാസ പ്രഘോഷണ വേദിയായി ഗ്രേറ്റ് ബ്രിട്ടൻ രൂപത യുവജന സംഗമം ഹന്ദൂസ 2026

ഷൈമോൻ തോട്ടുങ്കൽ

ലെസ്റ്റർ .പ്രാർഥനയുടെ ശാന്തതയും സംഗീതത്തിന്റെ ഉണർവും സൗഹൃദത്തിന്റെ ഊഷ്‌മളതയും ഒരുമിച്ചപ്പോൾ ഗ്രേറ്റ് ബ്രിട്ടൻ സീറോ മലബാർ രൂപതയുടെ യുവജന സംഗമമായ “ഹന്ദൂസ 2026 “മനോഹരമായ വിശ്വാസ പ്രഖ്യാപന വേദിയായി മാറി . ലെസ്റ്റെറിലെ മഹർ സെന്ററിൽ രൂപതയുടെ വിവിധ ഇടവക, മിഷൻ പ്രൊപ്പോസഡ്‌ മിഷനുകളിൽ നിന്നായി 1300 ലധികം യുവജനങ്ങൾ പങ്കെടുത്ത സംഗമം പ്രാർത്ഥനയും സംഗീതവും കലാപരിപാടികളും സൗഹൃദക്കൂട്ടായ്മയും നിറഞ്ഞ ദിനമായി മാറി

സപ്രാ പ്രാർത്ഥനയോടും ദിവ്യകാരുണ്യ ആരാധനയോടും കൂടിയാണ് പരിപാടികൾ ആരംഭിച്ചത്. തുടർന്ന് രൂപതാധ്യക്ഷൻ മാർ ജോസഫ് സ്രാമ്പിക്കൽ പിതാവിന്റെ കാർമികത്വത്തിൽ വിശുദ്ധ കുർബാന അർപ്പിച്ചു. രൂപതയുടെ വിവിധ പ്രദേശങ്ങളിൽ നിന്നെത്തിയ വൈദികർ സഹ കാർമ്മികർ ആയി .വിശുദ്ധ കുർബാന മദ്ധ്യേ ഉള്ള സന്ദേശത്തിൽ ക്രൈസ്തവജീവിതത്തിൽ ഈശോയ്ക്കുള്ള കേന്ദ്രസ്ഥാനം പിതാവ് ഓർമിപ്പിച്ചു. ഈശോയെ അറിയുന്നതിലും അവിടുത്തോടു വ്യക്തിപരമായ സൗഹൃദം പുലർത്തുന്നതിലുമാണ് യഥാർഥ സന്തോഷമെന്നും വിശുദ്ധ കുർബാനയുടെ സൗന്ദര്യം തിരിച്ചറിഞ്ഞ് വിശ്വാസം ആനന്ദത്തോടെ ജീവിക്കണമെന്നും അദ്ദേഹം യുവജനങ്ങളോട് ആഹ്വാനം ചെയ്തു.

യുവജനങ്ങളുടെ നേതൃത്വത്തിൽ ഉള്ള സമയം ബാൻഡ് നയിച്ച ആരാധനാഗാനങ്ങൾ സംഗമത്തിന് ആവേശം പകർന്നു. എസ്എംവൈഎം രൂപത ഡയറക്ടർ ഫാ. ജോസഫ് മുക്കാട്ടും രൂപത എസ്എംവൈഎം പ്രസിഡന്റ് ഡെറിക് ഷൈൻ എന്നിവർ പ്രസംഗിച്ചു . യുവജനങ്ങൾ രൂപതയുടെ ഭാവി മാത്രമല്ല, രൂപതയുടെ ഇന്നിന്റെ ഭാഗം തന്നെയാണെന്ന് ഫാ. മുക്കാട്ട് ഓർമിപ്പിച്ചു. തുടർന്ന് നടന്ന സൗഹൃദപരിചയ പരിപാടികളും യുവജനങ്ങളുടെ സജീവ പങ്കാളിത്തത്തിന് അവസരമൊരുക്കി.

വിവിധ റീജിയനുകളിലെ യുവജനങ്ങളുടെ കഴിവുകളും സാംസ്കാരിക പൈതൃകവും അവതരിപ്പിച്ച നസ്രാണി സാംസ്കാരിക പരിപാടി ദിനത്തിലെ മറ്റൊരു ആകർഷണമായി. മത്സരത്തിൽ കാന്റർബറി ഒന്നാം സ്ഥാനവും പ്രസ്റ്റൺ രണ്ടാം സ്ഥാനവും ബർമിംഗ്ഹാം മൂന്നാം സ്ഥാനവും നേടി. പരിപാടിയുടെ സമാപനത്തിൽ അമേരിക്കൻ സീറോ മലബാർ റാപ്പർ പ്രോഡിജിൽ അവതരിപ്പിച്ച ഗാനങ്ങളും യുവജനങ്ങളെ ആവേശത്തിലാഴ്ത്തി. രൂപത ചാൻസിലർ റെവ ഡോ മാത്യു പിണക്കാട്ട് ,ഫിനാൻസ് ഓഫീസർ റെവ ഫാ ജോ മൂലശ്ശേരി വി സി , വിവിധ ഇടവക /മിഷൻ/പ്രൊപ്പോസഡ്‌ മിഷനുകളിൽ നിന്നുള്ള വൈദികർ എന്നിവരും സംഗമത്തിൽ പങ്കെടുത്തു .

“Awakened by Ruha. Anchored in Discipline” എന്നതായിരുന്നു ഈ വർഷത്തെ പ്രമേയം. ‘ആത്മാവ്’ എന്നർഥമുള്ള സുറിയാനി പദമായ ‘റൂഹാ’യെ ആധാരമാക്കിയ പ്രമേയം, വിശ്വാസത്തിൽ ഉണരാനും ഈശോയിൽനിന്നുള്ള യഥാർഥ ആനന്ദം കണ്ടെത്താനും യുവജനങ്ങളെ ക്ഷണിച്ചു. അടുത്ത ഹന്ദൂസ 2027 സെപ്റ്റംബർ 25ന് നടക്കുമെന്ന പ്രഖ്യാപനത്തോടെയാണ് സംഗമം സമാപിച്ചത്.

കെന്റിൽ വിനായക ചതുർത്ഥി ആഘോഷവും സൂര്യകാലടി മഹാഗണപതിഹോമവും ഭക്തിസാന്ദ്രമായി

ഗ്രേവ്സെന്റ് (കെന്റ്): യുണൈറ്റഡ് കിംഗ്ഡം കെന്റ് ഹിന്ദു സമാജത്തിന്റെ ആഭിമുഖ്യത്തിൽ കെന്റ് അയ്യപ്പ ക്ഷേത്രത്തിന്റെ നേതൃത്വത്തിൽ സംഘടിപ്പിച്ച വിനായക ചതുർത്ഥി ആഘോഷത്തിന്റ ഭാഗമായി വിനായക ഭക്തർക്കായി സംഘടിപ്പിച്ച സൂര്യകാലടി അഷ്ടദ്രവ്യ മഹാഗണപതിഹോമം ഭക്തിസാന്ദ്രമായി സമാപിച്ചു.

സെപ്റ്റംബർ 20 ഞായറാഴ്ച രാവിലെ 10 മണി മുതൽ ഡബ്ബ്സ് ഫെയ്സ് ഫാം, ഗ്രേവ്സെന്റ് (DA13 9BL)ൽ വെച്ചാണ് ചടങ്ങുകൾ നടന്നത്.

കേരളത്തിലെ പ്രശസ്ത താന്ത്രികാചാര്യൻ മുഖ്യകാർമ്മികൻ തന്ത്രി ബ്രഹ്മശ്രീ. സൂര്യകാലടി സൂര്യൻ, ജയസൂര്യൻ ഭട്ടതിരിപ്പാട് മുഖ്യ കാർമ്മികത്വം വഹിച്ചു. ഐശ്വര്യം, സമാധാനം, ദിവ്യാനുഗ്രഹം എന്നിവ നൽകുന്ന നാളികേരവും മറ്റ് ശുഭകരമായ ദ്രവ്യങ്ങളും അഗ്നിയിൽ അർപ്പിക്കുന്ന അതീവ പവിത്രമായ ചടങ്ങാണ് അഷ്ടദ്രവ്യ മഹാഗണപതിഹോമം. തടസ്സങ്ങൾ നീക്കുന്നവനും ജ്ഞാനം നൽകുന്നവനുമായ ഗണപതിക്ക് സമർപ്പിച്ചിരിക്കുന്ന ഈ അനുഗ്രഹീത മഹോത്സവത്തിൽ കെന്റ് ഉൾപ്പെടെ യു.കെ യുടെ വിവിധ ഭാഗങ്ങളിൽ നിന്നായി നൂറുകണക്കിന് ഭക്തജനങ്ങൾ പങ്കെടുത്തു.

പരിപാടി വിജയകരമാക്കാൻ സഹകരിച്ച എല്ലാ ഭക്തജനങ്ങൾക്കും, വോളണ്ടിയേഴ്സിനും, സ്പോൺസർമാർക്കും കെന്റ് അയ്യപ്പ ക്ഷേത്ര കമ്മിറ്റി നന്ദി രേഖപ്പെടുത്തി.

കെന്റ് അയ്യപ്പ ക്ഷേത്രത്തിന്റെ നേതൃത്വത്തിൽ വിനായക ഭക്തർക്കായി പ്രത്യേക അഷ്ടദ്രവ്യ മഹാഗണപതി ഹോമം സെപ്റ്റംബർ 20ന് നടത്തുന്നു

ലണ്ടൻ: യു കെ. കെന്റ് അയ്യപ്പ ക്ഷേത്രം സംഘടിപ്പിക്കുന്ന വിനായക ചതുർത്ഥി മഹോത്സവം 2026 സെപ്റ്റംബർ 20 ഞായറാഴ്ച ആഘോഷിക്കും.

വിഘ്‌നങ്ങൾ അകറ്റി വിജയവും ഐശ്വര്യവും നൽകുന്ന ഗണപതി ഭഗവാന് സമർപ്പിച്ചാണ് ഈ വർഷത്തെ മഹോത്സവം. പ്രസിദ്ധമായ സൂര്യകാലടി മഹാ ഗണപതി ഹോമവും അഷ്ടദ്രവ്യ മഹാ ഗണപതി ഹോമവും ഇതിന്റെ ഭാഗമായി നടത്തപ്പെടും.

പ്രസിദ്ധ തന്ത്രി ബ്രഹ്മശ്രീ സൂര്യകാലടി സൂര്യൻ ജയസൂര്യൻ ഭട്ടതിരിപ്പാട് ഹോമത്തിന് മുഖ്യ കാർമികത്വം വഹിക്കും. തേങ്ങ ഉൾപ്പെടെയുള്ള മംഗളകരമായ എട്ട് ദ്രവ്യങ്ങൾ ഉപയോഗിച്ച് ഐശ്വര്യം, സമാധാനം, ദൈവാനുഗ്രഹം എന്നിവയ്ക്കായി നടത്തുന്ന പുണ്യ കർമമാണ് അഷ്ടദ്രവ്യ മഹാ ഗണപതി ഹോമം.

തീയതി: ഞായർ, 20 സെപ്റ്റംബർ 2026

സമയം: രാവിലെ 10:00 മുതൽ ഉച്ചയ്ക്ക് 1:00 വരെ

വേദി: Dabbs Place Farm, Gravesend, Kent, DA13 9BL

(രജിസ്ട്രേഷന് ശേഷം കൃത്യമായ ലൊക്കേഷൻ വിവരങ്ങൾ നൽകുന്നതാണ്)

പരിമിതമായ രജിസ്ട്രേഷനാണ് ഉള്ളത്. രജിസ്ട്രേഷൻ അവസാനിക്കുന്ന തീയതി: വെള്ളി, 18 സെപ്റ്റംബർ 2026

രജിസ്ട്രേഷനും കൂടുതൽ വിവരങ്ങൾക്കും പോസ്റ്ററിലെ QR കോഡ് സ്കാൻ ചെയ്യുക അല്ലെങ്കിൽ താഴെ കാണുന്ന നമ്പറുകളിൽ ബന്ധപ്പെടുക:

07838 170203 | 07985 245890 | 07973 151975 | 07906 130390 | 07507 766652 | 07795 575065

Email: [email protected]

Website: kentayyappatemple.org

കെന്റ് അയ്യപ്പ ക്ഷേത്രത്തിൽ പ്രതിമാസ അയ്യപ്പ പൂജ – സെപ്റ്റംബർ 19ന്

യു കെ : കെന്റ് അയ്യപ്പ ക്ഷേത്രത്തിലെ ഈ മാസത്തെ പ്രതിമാസ അയ്യപ്പ പൂജ സെപ്റ്റംബർ 19 ശനിയാഴ്ച നടക്കും.

രാവിലെ 8.30 ന് ഗണപതി ഹോമത്തോടെ ആരംഭിക്കുന്ന ചടങ്ങുകൾ വൈകിട്ട് 6.30 മുതൽ 9.30 വരെ വിവിധ പൂജകളോടെ നടക്കും.

സൂര്യകാലടി തന്ത്രി ബ്രഹ്മശ്രീ സൂര്യൻ ജയസൂര്യൻ ഭട്ടതിരിപ്പാടിന്റെ മുഖ്യ കാർമികത്വത്തിലാണ് പൂജകൾ നടക്കുക.

അഭിഷേകം, വിളക്ക് പൂജ, ലളിതാ സഹസ്രനാമ അർച്ചന, ഭജൻസ്, ധാര വഴിപാട്, നീരാഞ്ജനം, ഒറ്റയപ്പം , പടിപൂജ, ഹരിവരാസനം, അന്നദാനം എന്നിവ ഉണ്ടായിരിക്കും.

ഭക്തർ ശ്രദ്ധിക്കേണ്ട കാര്യങ്ങൾ:

വിളക്ക് പൂജയ്ക്കായി രണ്ട് കെട്ട് പൂക്കൾ, ഒരു നാളികേരം, സ്വന്തം നിലവിളക്ക് എന്നിവയും നീരാഞ്ജനത്തിനായി ഒരു നാളികേരവും കൊണ്ടുവരണമെന്ന് ക്ഷേത്ര ഭാരവാഹികൾ അറിയിച്ചു.

സ്ഥലം: 1 Northgate, Rochester ME1 1LS (Friends Meeting House, Quaker Meeting House – First Floor)

വിവരങ്ങൾക്ക്: 07838 170203, 07985 245890, 07507 766652, 07906 130390, 07973 151975

www.kentayyappatemple.org | [email protected]

കെന്റ് അയ്യപ്പ ക്ഷേത്രത്തിൽ വിനായക ചതുർത്ഥി പ്രത്യേക പൂജകൾ ഭക്തിസാന്ദ്രമായി നടത്തപ്പെട്ടു

കെന്റ്: കെന്റ് അയ്യപ്പ ക്ഷേത്രത്തിൽ വിനായക ചതുർത്ഥിയോടനുബന്ധിച്ച് പ്രത്യേക പൂജകളും ഹോമങ്ങളും ഭക്തിനിർഭരമായ അന്തരീക്ഷത്തിൽ നടന്നു. സെപ്റ്റംബർ 14 തിങ്കളാഴ്ച നടന്ന ചടങ്ങുകളിൽ നിരവധി ഭക്തർ നേരിട്ടും ഓൺലൈൻ ആയും പങ്കെടുത്തു. രാവിലെ ക്ഷേത്രം തുറന്നതിനെ തുടർന്ന് നിർമാല്യ ദർശനം, അഭിഷേകം, മലർ നിവേദ്യം, ഉഷഃപൂജ എന്നിവ നടന്നു. തുടർന്ന് സൂര്യ കാലടി മഹാഗണപതി ഹോമം ഭക്തിപൂർവം നടത്തി. ക്ഷേത്രത്തിലെ ഗണപതി പ്രതിഷ്ഠ നടത്തിയ തന്ത്രി ബ്രഹ്മശ്രീ സൂര്യ കാലടി മന സൂര്യൻ ജയസൂര്യ ഭട്ടതിരിപ്പാടിന്റെ മുഖ്യ കാർമികത്വത്തിലായിരുന്നു ചടങ്ങുകൾ.

രാവിലെ 10 മണിക്ക് കലശപൂജയും 11 മണിക്ക് കലശാഭിഷേകവും നടന്നു. തുടർന്ന് ഉച്ചപൂജയ്ക്ക് ശേഷം ക്ഷേത്രം അടച്ചു. വൈകുന്നേരം ക്ഷേത്രം വീണ്ടും തുറന്നതോടെ പ്രത്യേക ദീപാരാധന നടന്നു. തുടർന്ന് അത്താഴപൂജയും അപ്പം മൂടലും ഉൾപ്പെടെയുള്ള ചടങ്ങുകൾക്ക് ശേഷം രാത്രി 9 മണിയോടെ ക്ഷേത്രം അടച്ചു.
വിനായക ചതുർത്ഥി ആഘോഷങ്ങളുടെ ഭാഗമായി ക്ഷേത്രത്തിൽ അന്നദാനവും ഒരുക്കിയിരുന്നു. ക്ഷേത്ര ഭാരവാഹികളും ഭക്തജനങ്ങളും ചേർന്ന് ആഘോഷങ്ങൾ ഭംഗിയായി സംഘടിപ്പിച്ചു. ചടങ്ങുകൾ ഭക്തിസാന്ദ്രമായ അന്തരീക്ഷത്തിൽ സമാപിച്ചു.