ലണ്ടൻ: യുകെയിലെ ഹൈന്ദവ സമൂഹത്തെ ജാതി-വിഭാഗ-രാഷ്ട്രീയ ചിന്തകൾക്ക് അതീതമായി ഒരൊറ്റ കുടക്കീഴിൽ അണിനിരത്തുക എന്ന ലക്ഷ്യത്തോടെ രൂപീകരിക്കപ്പെട്ട ‘ഹൈന്ദവം’ കേന്ദ്ര സംഘടനയുടെ പ്രഥമ സംഗമം ‘ഹൈന്ദവം 2026’ പ്രൗഢഗംഭീരമായി നടന്നു. 2026 ജൂൺ 27 ശനിയാഴ്ചയാണ് സംഘടനയുടെ ചരിത്രപരമായ ഈ പ്രഥമ സംഗമം അരങ്ങേറിയത്. സൗത്ത് വെസ്റ്റ് ഇംഗ്ലണ്ട്, വെസ്റ്റ് മിഡ്ലാൻഡ്സ്, വെയ്ൽസ് തുടങ്ങിയ മേഖലകളിലെ പതിനാലോളം സജീവ ഹൈന്ദവ അസോസിയേഷനുകളുടെ സംയുക്ത പങ്കാളിത്തത്തോടെയാണ് ഈ മാതൃ സംഘടനക്കു രൂപം നൽകിയിരിക്കുന്നത്.
കഴിഞ്ഞ ഫെബ്രുവരിയിൽ ബ്രിസ്റ്റോളിൽ ഒത്തുകൂടിയ പ്രതിനിധികളുടെ ആലോചനാ യോഗമാണ് യുകെയിലെ ഹൈന്ദവർക്കായി വിപുലമായ ഒരു വേദി ഒരുക്കുക എന്ന ലക്ഷ്യത്തോടെ ഈ കൂട്ടായ്മയ്ക്ക് അടിത്തറയിട്ടത്. നമ്മുടെ സനാതന സംസ്കാരത്തെ തനിമയോടെ വരുംതലമുറയ്ക്ക് പകർന്നുനൽകാനും, വിഘടിച്ചു നിൽക്കുന്ന ഘടകങ്ങളെ ഏകോപിപ്പിക്കാനും ‘ഹൈന്ദവം’ സംഘടനയിലൂടെ സാധിക്കുമെന്ന് ഭാരവാഹികൾ വ്യക്തമാക്കി. മറ്റു സംഘടനകൾക്കും സ്നേഹാദരങ്ങളോടെ സ്വാഗതം.
യുകെയിൽ നിലവിൽ ഈ കൂട്ടായ്മയുടെ ഭാഗമാകാതെ, മാറിനിൽക്കുന്ന മറ്റെല്ലാ ഹൈന്ദവ സംഘടനകളെയും സമാന ചിന്താഗതിയുള്ള കൂട്ടായ്മകളെയും ‘ഹൈന്ദവം’ എന്ന ഈ വലിയ കുടുംബത്തിലേക്ക് ഭാരവാഹികൾ സ്നേഹപൂർവ്വം സ്വാഗതം ചെയ്തു. നമ്മുടെ ഐക്യവും സാംസ്കാരിക തനിമയും കൂടുതൽ കരുത്തുറ്റതാക്കാൻ എല്ലാ സംഘടനകളുടെയും പങ്കാളിത്തം അനിവാര്യമാണെന്നും, ഒരുമിച്ച് ഒരു കുടക്കീഴിൽ അണിനിരക്കാൻ താല്പര്യമുള്ള എല്ലാ കൂട്ടായ്മകൾക്കുമായി ഹൈന്ദവത്തിന്റെ വാതിലുകൾ എപ്പോഴും തുറന്നിട്ടിരിക്കുകയാണെന്നും ഭാരവാഹികൾ ഓർമ്മിപ്പിച്ചു.
സംഗമത്തിൽ സംഘടനയുടെ ഔദ്യോഗിക ഉദ്ഘാടനം കമ്മിറ്റി അംഗങ്ങൾ എല്ലാവരും ചേര്ന്ന് ഭദ്രദീപം കൊളുത്തി നിർവ്വഹിച്ചു. ചടങ്ങിൽ സംഘടനയുടെ ലോഗോ പ്രകാശനം കൂടി നടന്നു. നമ്മുടെ സംസ്കാരത്തെ നെഞ്ചിലേറ്റിക്കൊണ്ട് ശക്തമായ ഒരു പ്ലാറ്റ്ഫോം ഒരുക്കാൻ ഈ കൂട്ടായ്മയ്ക്ക് സാധിക്കുമെന്ന് പ്രസിഡന്റ് ബിനു ദാമോദരൻ തന്റെ ഉദ്ഘാടന പ്രസംഗത്തിൽ പ്രത്യാശ പ്രകടിപ്പിച്ചു. തുടർന്ന് ജോയിന്റ് സെക്രട്ടറി റിജേഷ് രാജ് അധ്യക്ഷ പ്രസംഗം നടത്തി. കേരളത്തിലെ ഹൈന്ദവ സംസ്കാരത്തെക്കുറിച്ചുള്ള ദീർഘകാല പഠനങ്ങളിലൂടെ പ്രശസ്തനായ ഓക്സ്ഫോർഡിലെ പ്രൊഫസർ ഡോ. അലക്സ് ഗെത്ത് ചടങ്ങിൽ മുഖ്യപ്രഭാഷണം നടത്തി; ഏറെ അറിവുപകരുന്നതും ഹൃദ്യവുമായിരുന്നു അദ്ദേഹത്തിന്റെ വാക്കുകൾ.
നിലവിലെ ഭാരവാഹികൾ:
പ്രസിഡന്റ്: ബിനു ദാമോദരൻ (Newport)
സെക്രട്ടറി: വർണ്ണ വിജയൻ (ബ്രിസ്റ്റോൾ)
ട്രഷറർ: കൃഷ്ണ ചന്ദ്രൻ ഉണ്ണിത്താൻ (Gloucester)
വൈസ് പ്രസിഡന്റ്: മനോജ് കൃഷ്ണൻ (Cardiff)
ജോയിന്റ് സെക്രട്ടറി: റിജേഷ് രാജ് (Yeovil)
ജോയിന്റ് ട്രഷറർ: മനോജ്കുമാർ ശിവരാമൻ നായർ
പി.ആർ.ഓ: അഭിജിത്ത് മുരളി (Hereford)
കൾച്ചറൽ കോർഡിനേറ്റർ: സിനു പയ്യന (Bristol)
സംഘടനയുടെ സുഗമമായ പ്രവർത്തനങ്ങൾക്കായി പ്രശാന്ത്, സനോജ്, ലക്ഷ്മി, വിനീത്, ഹരിദാസ്, രാജേഷ്, രേഖ, ഉണ്ണി, ബിബിൻ എന്നിവരടങ്ങുന്ന ശക്തമായ ഒരു എക്സിക്യൂട്ടീവ് കമ്മിറ്റിയും രൂപീകരിച്ചിട്ടുണ്ട്.
യുകെയുടെ വിവിധ ഭാഗങ്ങളിൽ നിന്നുള്ള നിരവധി കുടുംബങ്ങൾ പങ്കെടുത്ത പരിപാടിയിൽ കുട്ടികളുടെയും മുതിർന്നവരുടെയും വൈവിധ്യമാർന്ന കലാപരിപാടികളും കളികളും അരങ്ങേറി. വരും ദിവസങ്ങളിൽ കൂടുതൽ ശക്തമായ ജനക്ഷേമ-സാംസ്കാരിക പ്രവർത്തനങ്ങളുമായി മുന്നോട്ടുപോകാനാണ് സംഘടന ലക്ഷ്യമിടുന്നത്. യുകെയിലെ ജീവിതരീതികളെയും സംസ്കാരത്തെയും ആദരിച്ചുകൊണ്ട് തന്നെ, നമ്മുടെ സനാതന വിശ്വാസങ്ങളും മൂല്യങ്ങളും മുറുകെപ്പിടിച്ച് ഒരുമിച്ച് മുന്നേറുക എന്നതും ഈ കൂട്ടായ്മയുടെ പ്രധാന ലക്ഷ്യങ്ങളിലൊന്നാണ്. സംഘടനയുടെ സെക്രട്ടറി വർണ്ണ വിജയൻ നിർവ്വഹിച്ച നന്ദിപ്രകാശനത്തോടെയാണ് (Vote of Thanks) പ്രൗഢഗംഭീരമായ പരിപാടികൾക്ക് സമാപനമായത്.
Leave a Reply