തിരുവനന്തപുരം: മുഖ്യമന്ത്രിയുടെ വസതിയില് ഇ.ഡി. പരിശോധന നടക്കുന്നതിനിടെ ഉണ്ടായ സംഘര്ഷത്തില് പോലീസിന്റെ നിസ്സഹകരണ നിലപാട് കടുത്ത വിമര്ശനത്തിന് വഴിവെക്കുന്നു. മുന്കൂട്ടി സംഘര്ഷ സാധ്യതയുണ്ടെന്ന ഇന്റലിജന്സ് മുന്നറിയിപ്പ് ഉണ്ടായിരുന്നിട്ടും മതിയായ സുരക്ഷ ഒരുക്കാന് പോലീസ് തയ്യാറായില്ലെന്നാണ് ആക്ഷേപം. ഇ.ഡി. ഉദ്യോഗസ്ഥര്ക്കെതിരേ ആക്രമണം നടന്നപ്പോഴും വാഹനങ്ങള് തകര്ക്കപ്പെട്ടപ്പോഴും പോലീസ് ഏറെ നേരം കാഴ്ചക്കാരായി നിന്നത് പുതിയ സര്ക്കാരിനും തിരിച്ചടിയായി. കേന്ദ്ര ആഭ്യന്തര മന്ത്രാലയം റിപ്പോര്ട്ട് തേടിയതോടെ വിഷയത്തിന് ദേശീയ ശ്രദ്ധയും ലഭിച്ചു.
സംഭവം കൈവിട്ടതോടെ ഉന്നത പോലീസ് ഉദ്യോഗസ്ഥര് രംഗത്തിറങ്ങിയെങ്കിലും അതുവരെ ആക്രമണത്തില് പങ്കെടുത്ത പ്രവര്ത്തകര് സി.പി.എം. ഏരിയ കമ്മിറ്റി ഓഫീസിലേക്ക് മാറിയിരുന്നു. നേതാക്കളുടെ നേതൃത്വത്തില് പോലീസ് പ്രവേശനം തടയാനുള്ള ശ്രമവും ഉണ്ടായി. ഒടുവില് കേന്ദ്ര ഏജന്സികളുടെ ഇടപെടല് ശക്തമാകുമെന്ന ആശങ്ക ഉയര്ന്നതോടെയാണ് ചിലരെ അറസ്റ്റ് ചെയ്തതെന്നാണ് സൂചന. ഉന്നത ഉദ്യോഗസ്ഥര്ക്കും ഭരണകക്ഷി നേതാക്കള്ക്കുമിടയിലെ അടുപ്പം വീണ്ടും ചര്ച്ചയാകുന്നതിനിടെയാണ് ഒത്തുതീര്പ്പ് നാടകമെന്ന ആരോപണവും ശക്തമാകുന്നത്.
ഇതിനിടെ, ഇ.ഡി. നടപടികളെക്കുറിച്ച് യു.ഡി.എഫും പ്രതിരോധ നിലപാടിലാണ് എന്ന വിലയിരുത്തലും രാഷ്ട്രീയ വൃത്തങ്ങളില് സജീവമാണ്. കർത്തയുടെ ഡയറിയില് ചില യു.ഡി.എഫ്. നേതാക്കളുടെ പേരുകളും പരാമര്ശിക്കപ്പെട്ടിട്ടുണ്ടെന്ന സൂചന പുറത്തുവന്നതോടെയാണ് മുന്നണിക്കുള്ളിലും ആശങ്ക ഉയര്ന്നത്. ഇ.ഡി. അന്വേഷണം കൂടുതല് വ്യാപിക്കുകയാണെങ്കില് രാഷ്ട്രീയമായി വലിയ പ്രത്യാഘാതമുണ്ടാകുമെന്ന ഭയം ഇരുവിഭാഗങ്ങളിലുമുണ്ടെന്നാണ് സൂചന. അതുകൊണ്ടുതന്നെ പരസ്യ വിമര്ശനങ്ങള്ക്കപ്പുറം വിഷയത്തില് സൂക്ഷ്മമായ നിലപാടാണ് പ്രതിപക്ഷവും സ്വീകരിക്കുന്നതെന്ന് രാഷ്ട്രീയ നിരീക്ഷകര് ചൂണ്ടിക്കാട്ടുന്നു.
അതേസമയം, തിരുവനന്തപുരത്തെ അക്രമം സി.പി.എം. ആസൂത്രണം ചെയ്തതാണെന്ന് ആഭ്യന്തര മന്ത്രി രമേശ് ചെന്നിത്തല ആരോപിച്ചു. പിണറായിയിലും കോഴിക്കോടും യാതൊരു പ്രശ്നവുമില്ലാതെ ഇ.ഡി. പരിശോധന പൂര്ത്തിയായപ്പോള് തലസ്ഥാനത്ത് മാത്രം സംഘര്ഷം ഉണ്ടായത് ദുരൂഹമാണെന്നാണ് അദ്ദേഹത്തിന്റെ പ്രതികരണം. സമാധാനപരമായ പ്രതിഷേധമെന്ന ഉറപ്പ് നല്കിയ ശേഷമാണ് പാര്ട്ടി നേതാക്കളുടെ സാന്നിധ്യത്തില് അക്രമം നടന്നതെന്നും ആക്രമണത്തില് പങ്കെടുത്തവരെ പാര്ട്ടി ഓഫീസിനുള്ളില് ഒളിപ്പിക്കാന് ശ്രമമുണ്ടായതായും അദ്ദേഹം ആരോപിച്ചു. ഇ.ഡി. ഉദ്യോഗസ്ഥര്ക്കുനേരേയുള്ള ആക്രമണവും വാഹന നശീകരണവും നിയമവാഴ്ചയെ വെല്ലുവിളിക്കുന്നതാണെന്നും കുറ്റക്കാര്ക്കെതിരെ കടുത്ത നടപടി തുടരുമെന്നും ആഭ്യന്തര മന്ത്രി മുന്നറിയിപ്പ് നല്കി.
Leave a Reply