ന്യൂസ് ഡെസ്ക്, മലയാളം യുകെ

യുകെ മലയാളികൾക്ക് ഏപ്രിൽ മാസം മുതൽ സാമ്പത്തികമായി അധിക ചിലവുകൾ നേരിടേണ്ടി വരുമെന്ന റിപ്പോർട്ടുകൾ ആണ് പുറത്തു വരുന്നത് വിവിധ ബില്ലുകളും നികുതികളും ഉയരുമ്പോൾ ചില മേഖലകളിൽ ആശ്വാസകരമായ പ്രഖ്യാപനങ്ങളും ഉണ്ടായിട്ടുണ്ട്. ഏപ്രിൽ മുതൽ വാട്ടർ ബില്ലുകളിൽ വർധനവ് ഉണ്ടാകും. ഇംഗ്ലണ്ടും വെയിൽസും ഉൾപ്പെടെ ശരാശരി 5.4% (ഏകദേശം £33) വർധനവാണ് പ്രതീക്ഷിക്കുന്നത്. സ്കോട്ട് ലൻഡിൽ ഇത് 8.7% വരെ ഉയരും. ചില സേവനദാതാക്കളുടെ ഉപഭോക്താക്കൾക്ക് £50 -ലധികം അധികചെലവും വരാം എന്നാണ് പുറത്തുവരുന്ന വിവരങ്ങൾ സൂചിപ്പിക്കുന്നത്.

കൗൺസിൽ ടാക്സ് നിരക്കുകളും മിക്കയിടങ്ങളിലും 4.99% വരെ ഉയരും. ചില കൗൺസിലുകളിൽ ഇത് 8–10% വരെ എത്താൻ സാധ്യതയുണ്ട്. അതേസമയം ടിവി ലൈസൻസ് ഫീസും £5.50 വർധിച്ച് ഏകദേശം £180 ആയി ഉയരും. ഇതോടൊപ്പം വാഹന ഉടമകൾക്ക് റോഡ് ടാക്സ് (VED) ഇനത്തിൽ കൂടുതൽ തുക നൽകേണ്ടി വരും. 2017ന് ശേഷം രജിസ്റ്റർ ചെയ്ത പെട്രോൾ, ഡീസൽ, ഹൈബ്രിഡ് വാഹനങ്ങൾക്ക് £200 ആണ് പുതിയ നിരക്ക്. മുമ്പ് ഒഴിവാക്കിയിരുന്ന ഇലക്ട്രിക് വാഹനങ്ങൾക്കും ഇനി നികുതി ബാധകമാകും. £40,000-ത്തിന് മുകളിൽ വിലയുള്ള വാഹനങ്ങൾക്ക് അധികമായി ആഡംബര നികുതി അടയ്‌ക്കേണ്ടിവരും.

WhatsApp Image 2024-12-09 at 10.15.48 PM

Migration 2

AHPRA Registration

STEP into AHPRA NCNZ

വിമാന യാത്രകൾക്കും ചെലവ് കൂടും. എയർ പാസഞ്ചർ ഡ്യൂട്ടി വർധനവ് കാരണം യൂറോപ്പ് ഉൾപ്പെടെയുള്ള യാത്രകളുടെ ടിക്കറ്റ് നിരക്കുകൾ ഉയരും. എന്നാൽ റെയിൽവേ നിരക്കുകൾ താൽക്കാലികമായി വർധിപ്പിക്കാത്തത് സാധാരണക്കാർക്ക് ഒരു ആശ്വാസമാണ്. ബ്രോഡ്‌ബാൻഡ്, മൊബൈൽ സേവനങ്ങൾക്ക് പ്രതിമാസം £4 വരെ വർധനവുണ്ടാകും. പ്രമുഖ സേവനദാതാക്കൾ ഇതിനകം തന്നെ നിരക്ക് വർധനവ് പ്രഖ്യാപിച്ചിട്ടുണ്ട്. സ്റ്റാമ്പ് നിരക്കുകളും ഉയരും . ഫസ്റ്റ് ക്ലാസ് £1.80 ആയും സെക്കൻഡ് ക്ലാസ് 91 പെൻസായും മാറും. മദ്യവിലകളിലും വർധനവ് പ്രതീക്ഷിക്കാം, പ്രത്യേകിച്ച് പബ്ബുകളിൽ.

പാസ്‌പോർട്ട് ഫീസും £100 കടക്കും. ഓൺലൈൻ അപേക്ഷയ്ക്ക് ഏകദേശം £102, പോസ്റ്റൽ അപേക്ഷയ്ക്ക് £115.50 വരെ നൽകേണ്ടിവരും. കുറഞ്ഞ വരുമാനക്കാർക്കും പെൻഷൻകാർക്കും ചില ആശ്വാസങ്ങൾ ലഭിക്കും. നാഷണൽ ലിവിംഗ് വേജ് മണിക്കൂറിന് £12.71 ആയി ഉയരും. യുവാക്കൾക്കും ഇതിന്റെ ഗുണം ലഭിക്കും. സ്റ്റേറ്റ് പെൻഷൻ 4.8% വർധിച്ച് ആഴ്ചയിൽ £241.30 ആയി മാറും. യൂണിവേഴ്സൽ ക്രെഡിറ്റ് ഉൾപ്പെടെയുള്ള വിവിധ ആനുകൂല്യങ്ങൾക്കും 3.8% വരെ വർധനവ് ഉണ്ടാകും. കൂടാതെ എനർജി പ്രൈസ് ക്യാപ്പ് കുറയുന്നതോടെ ശരാശരി ഊർജ്ജ ബില്ലുകളിൽ ഏകദേശം £100 -ലധികം കുറവ് പ്രതീക്ഷിക്കാം. പ്രിസ്ക്രിപ്ഷൻ നിരക്കുകൾ മാറ്റമില്ലാതെ തുടരുമെന്നതും ആശ്വാസകരമാണ്.