ന്യൂസ് ഡെസ്ക്, മലയാളം യുകെ
ഏഥൻസ്: ഗ്രീസിന്റെ തലസ്ഥാനമായ ഏഥൻസിൽ അക്രോപൊളിസിന് സമീപമുള്ള പ്ലാക്ക മേഖലയിൽ കെട്ടിടത്തിലുണ്ടായ ശക്തമായ സ്ഫോടനത്തിൽ ബ്രിട്ടീഷ് പൗരൻ ഉൾപ്പെടെ ആറ് പേർ മരിച്ചു. വെള്ളിയാഴ്ചയുണ്ടായ സ്ഫോടനത്തിൽ അവധിക്കാല താമസത്തിനായി ഉപയോഗിച്ചിരുന്ന കെട്ടിടം പൂർണമായി തകർന്നുവീണു. മരിച്ചവരിൽ നാല് അമേരിക്കൻ വിനോദസഞ്ചാരികളും ഒരു ബ്രിട്ടീഷ് പൗരനും ഒരു ഗ്രീക്ക് പൗരനുമാണുള്ളത്. ഗ്രീക്ക് പൗരൻ ഇതേ കെട്ടിടത്തിൽ താമസിച്ചിരുന്ന വയോധിക ദമ്പതികളിൽ ഒരാളാണെന്നാണ് റിപ്പോർട്ട്.
വാതക ചോർച്ചയാകാം സ്ഫോടനത്തിന് കാരണമെന്നാണ് പ്രാഥമിക നിഗമനം. സ്ഫോടനത്തിന്റെ ശക്തിയിൽ മൂന്ന് നില കെട്ടിടം പൂർണമായും തകർന്നുവീഴുകയും സമീപത്തെ കെട്ടിടങ്ങൾക്ക് കേടുപാടുകൾ സംഭവിക്കുകയും ചെയ്തു. അവശിഷ്ടങ്ങൾ റോഡിലാകെ ചിതറിക്കിടന്നു. സ്ഫോടനത്തെ തുടർന്ന് സമീപത്തെ റോഡുകളിൽ വീണ വസ്തുക്കൾ പതിച്ച് ചിലർക്ക് പരുക്കേറ്റതായും ചില കെട്ടിടങ്ങളിൽനിന്ന് ആളുകളെ ഒഴിപ്പിച്ചതായും പ്രാദേശിക മാധ്യമങ്ങൾ റിപ്പോർട്ട് ചെയ്തു. വെള്ളിയാഴ്ച ഏഥൻസ് വിമാനത്താവളത്തിൽനിന്നുള്ള വിമാനത്തിൽ കയറാൻ എത്താതിരുന്നതോടെയാണ് മരിച്ച വിനോദസഞ്ചാരികളെ കാണാതായതായി സ്ഥിരീകരിച്ചത്.
അക്രോപൊളിസിനും ഒളിമ്പ്യൻ സ്യൂസിന്റെ ക്ഷേത്രത്തിനും ഇടയിലുള്ള റോഡിലാണ് സ്ഫോടനം നടന്നത്. ശനിയാഴ്ചയും രക്ഷാപ്രവർത്തകർ അവശിഷ്ടങ്ങൾക്കിടയിൽ തെരച്ചിൽ നടത്തി. ജീവൻ രക്ഷപ്പെട്ടവരെ കണ്ടെത്തുന്നതിനായി മണ്ണുമാന്തി യന്ത്രങ്ങളും താപനില കണ്ടെത്തുന്ന ക്യാമറകളും ഉപയോഗിച്ചു. ശനിയാഴ്ച ഉച്ചയോടെ ആറ് പേരുടെയും മൃതദേഹങ്ങൾ കണ്ടെടുത്തതായി അധികൃതർ അറിയിച്ചു. സംഭവത്തിൽ ഗ്രീക്ക് അധികൃതരുമായി ബന്ധപ്പെടുന്നുണ്ടെന്ന് ബ്രിട്ടീഷ് വിദേശകാര്യ ഓഫീസ് അറിയിച്ചു.
Leave a Reply