റോമി കുര്യാക്കോസ്

ബോൾട്ടൺ: ബോൾട്ടൺ മലയാളി അസോസിയേഷൻ (ബി എം എ) സംഘടിപ്പിച്ച ഈസ്റ്റർ – വിഷു – ഈദ് ആഘോഷങ്ങൾ വർണ്ണാഭമായി സംഘടിപ്പിച്ചു. ശനിയാഴ്ച ഫാൻവർത്തിലെ സെന്റ്. ജയിംസ് ചർച്ച് ഹാളിൽ വൈകിട്ട് 6 മണിക്ക് വലിയ സദസ്സിനെ സാക്ഷി നിർത്തിക്കൊണ്ടാണ് ആഘോഷ സായഹ്നത്തിന്റെ തിരശില ഉയർന്നത്. രാത്രി 11 വരെ നീണ്ടുനിന്ന പരിപാടി കലാപരമായ വൈവിധ്യത്താലും സാംസ്കാരിക ഐക്യത്തിന്റെ സന്ദേശത്താലും ശ്രദ്ധേയമായി.

അസോസിയേഷൻ പ്രസിഡന്റ്‌ ഷൈനു ക്ലെയർ മാത്യൂസ് ചടങ്ങിന്റെ ഔദ്യോഗിക ഉദ്ഘാടനം നിർവഹിച്ചു. ഭരണസമിതി അംഗങ്ങളും നാട്ടിൽ നിന്നും എത്തിച്ചേർന്ന മാതാപിതാക്കക്കാളും ചേർന്ന് ഭദ്രദീപത്തിന്റെ തിരി തെളിച്ചു. അസോസിയേഷൻ ജനറൽ സെക്രട്ടറി റോമി കുര്യാക്കോസ് 2025 – 2026 കാലഘട്ടത്തിലെ റിപ്പോർട്ടും ട്രഷറർ ടോം തോമസ് കണക്കും അവതരിപ്പിച്ചു.

പ്രശസ്ത കലാകാരൻ ജോബി പാലയുടെ നേതൃത്വത്തിൽ അവതരിപ്പിച്ച സംഗീത-ഹാസ്യ സ്റ്റേജ് ഷോ ആഘോഷത്തിന്റെ പ്രധാന ആകർഷണമായി. ഹാസ്യവും സംഗീതവും ഒരുമിച്ച വിരുന്ന് പ്രേക്ഷകരെ ആവേശഭരിതരാക്കി.

ബി എം എയിലെ കലാകാരന്മാർ അവതരിപ്പിച്ച വിവിധ കലാപരിപാടികൾക്കും മികച്ച പ്രതികരണമാണ് ലഭിച്ചത്. കുട്ടികളുടെ തീം ഡാൻസുകൾ പ്രത്യേകമായി ശ്രദ്ധ നേടി. 29 വനിതകൾ ഒന്നിച്ചണിഞ്ഞ ‘റിതം ഓഫ് യൂണിറ്റി’ എന്ന നൃത്താവിഷ്കാരം വേദിയെ വിസ്മയിപ്പിച്ചു. ഐക്യവും സാംസ്കാരിക വൈവിധ്യവും പ്രതിഫലിപ്പിച്ച കലാവിരുന്നുകൾ വലിയ കൈയടികളോടെയാണ് സ്വീകരിക്കപ്പെട്ടത്. അസോസിയേഷന്റെ സ്ഥാപക പ്രസിഡന്റും മുതിർന്ന അംഗവുമായ ഫിലിപ്പ് കൊച്ചിട്ടി ബി എം എയിലെ കൊച്ചു കുട്ടികൾക്ക് വിഷുക്കൈനീട്ടം നൽകി. വിഭവസമൃദ്ധമായ സ്നേഹവിരുന്നും ഒരുക്കിയിരുന്നു. ശ്രീമതി. സുബി ഷിബു സ്റ്റേജിന്റെ നിയന്ത്രണവും അവതരണവും നിർവഹിച്ചു.

കുടുംബാംഗങ്ങളും സമൂഹാംഗങ്ങളും വലിയ തോതിൽ പങ്കെടുത്ത പരിപാടി സൗഹൃദത്തിന്റെയും കൂട്ടായ്മയുടെയും വേദിയായി മാറി. മുൻകൂട്ടി രജിസ്റ്റർ ചെയ്ത പങ്കാളിത്തം പരിപാടിയുടെ വലിയ വിജയത്തിന് കാരണമായി എന്ന് സംഘാടകർ അറിയിച്ചു.

ബിബിൻ കെ ജോയ്

വൂസ്റ്റർ: വെസ്റ്റ് മിഡ്ലാൻഡിലെ വൂസ്റ്റർ ഫാമിലി ക്ലബ്ബിന്റെ നേതൃത്വത്തിൽ കുട്ടികളും മുതിർന്നവരുമുൾപ്പെടെ നിരവധി കലാപ്രതിഭകളുടെ നൃത്തവും സംഗീതവും സമന്വയിപ്പിച്ച് വിവിധ കലാപരിപാടികളോടെ  സംഘടിപ്പിച്ച ഈസ്റ്റർ-വിഷു ആഘോഷം പങ്കെടുത്ത എല്ലാവർക്കും അവിസ്മരണീയവും മനോഹരവുമായൊരു ദൃശ്യവിരുന്നായി മാറി. പ്രകൃതിരമണീയമായ സ്ഥലത്ത് സ്ഥിതി ചെയ്യുന്ന വൂസ്റ്റർ പീപ്പിൾട്ടൺ ഹാളിൽ സംഘടിപ്പിച്ച ആഘോഷ പരിപാടികളുടെ ഔപചാരികമായ ഉദ്ഘാടനം ലോക കേരളസഭാംഗവും മലയാളം മിഷൻ യുകെ ചാപ്റ്റർ പ്രസിഡന്റുമായ ശ്രീ സി എ ജോസഫ് നിർവ്വഹിച്ചു. വൂസ്റ്റർ ഫാമിലി ക്ലബ്ബ് പ്രസിഡന്റ് ശ്രീ ജോബിൾ ജോസ് അധ്യക്ഷത വഹിച്ചു. സെക്രട്ടറി ബിബിൻ കെ ജോയ് സ്വാഗതവും എക്സിക്യൂട്ടീവ് കമ്മറ്റി അംഗം റോബിൻ കരുണാകരൻ നന്ദിയും പറഞ്ഞു.

വൂസ്റ്റർ ഫാമിലി ക്ലബ്ബിന്റെ നേതൃത്വത്തിൽ നടത്തിവരുന്ന ‘എന്റെ  മലയാളം’  സ്കൂളിൽ 100% അറ്റൻഡൻസ് കരസ്ഥമാക്കി പഠിക്കുന്ന കുട്ടികളായ ജോസഫ് ബിബിൻ, തീർത്ഥ്വ അനീഷ്,അമേയ അജേഷ്, ആരവ് അജേഷ്, ആലിയ ബിൻസ് എന്നിവർക്കുള്ള ക്യാഷ് അവാർഡും മെഡലുകളും ചടങ്ങിൽ വിതരണം ചെയ്തു. വൂസ്റ്റർ ഫാമിലി ക്ലബ്ബിന്റെ  പ്രവർത്തനങ്ങൾ ഏവർക്കും മാതൃകയാണെന്നും ഫാമിലി ക്ലബ്ബുകൾ പോലെയുള്ള കൂട്ടായ്മകൾ പുതിയ തലമുറയ്ക്ക് തടസ്സം വരാതെ പഴയ തലമുറയിൽപ്പെട്ട കൂടുതൽ ആളുകളെ ഉൾപ്പെടുത്തി യുകെയിലുടനീളം വളർന്നു വരേണ്ടത് അനിവാര്യമാണെന്നും സിഎ ജോസഫ്  തന്റെ പ്രസംഗത്തിൽ സൂചിപ്പിച്ചു. മലയാളഭാഷ പുതിയ തലമുറയിലേക്ക് പകർന്നു നൽകുവാനുള്ള ഫാമിലി ക്ലബ്ബിന്റെ വലിയ ഉദ്യമത്തിന്റെ തെളിവാണ് ഒരു വർഷത്തിലധികമായി നടന്നുവരുന്ന ‘എന്റെ മലയാളം’ സ്കൂളിലെ നിരവധി കുട്ടികൾ 100% ഹാജർ കരസ്ഥമാക്കി പഠിക്കുന്നതും, അവർക്ക് നൽകിയ അംഗീകാരങ്ങൾ ഏവർക്കും മാതൃകാപരമാണെന്നും സിഎ ജോസഫ് അഭിപ്രായപ്പെട്ടു.

മലയാളം മിഷൻ യു കെ ചാപ്റ്റർ പ്രസിഡന്റ് എന്ന നിലയിൽ കഴിഞ്ഞ അഞ്ചുവർഷമായി പ്രവർത്തിച്ചു വന്നിരുന്ന ശ്രീ സി എ ജോസഫിന്റെ ശ്രദ്ധേയമായ പ്രവർത്തനങ്ങൾക്ക് അംഗീകാരമെന്ന നിലയിൽ ഫാമിലി ക്ലബ് പ്രസിഡണ്ട് ശ്രീ ജോബിൾ ജോസും എന്റെ മലയാളം സ്കൂൾ പ്രധാന അധ്യാപിക രമ്യ അനീഷും ചേർന്ന് അദ്ദേഹത്തെ പൊന്നാട അണിയിച്ചും, വൈസ് പ്രസിഡന്റ് ശ്രീ സിനോജ് സെബാസ്റ്റ്യൻ ഉപഹാരം നൽകിയും ആദരിക്കുകയുണ്ടായി.

തുടർന്ന് നടന്ന കലാപരിപാടികൾ കാണികൾക്ക് കണ്ണിനും കാതിനും നവ്യാനുഭവം പകർന്നു നൽകുന്നവയായിരുന്നു. വൂസ്റ്ററിലെ അറിയപ്പെടുന്ന ഗായകരായ സെബാസ്റ്റ്യൻ,  അജിത് തുടങ്ങിയവരും നർത്തകരായ മിട്ടു അഭിലാഷ്, മഞ്ജുഷ ബിൻസ്, ജിനു അനൂപ് എന്നിവരും ചേർന്നവതരിപ്പിച്ച നൃത്തങ്ങളും അബിത സുബിന്റെ നേതൃത്വത്തിൽ  അൽഫോൻസാ ഫ്രാൻസിസും, അനു സെബാസ്റ്റ്യനും ചേർന്നവതരിപ്പിച്ച മാഷ് അപ്പും അത്യാപൂർവ്വമായ കലാപ്രകടനത്തിന്റെ നേർസാക്ഷ്യമായി മാറി. ഫാമിലി ക്ലബ്ബിലെ കുട്ടികൾ അവതരിപ്പിച്ച വിവിധ കലാപരിപാടുകളും കണ്ണിന് കുളിർമയേകി.

അവതാരകയായി എത്തിയ സവിത ആർ രാജേഷ് ആഘോഷ പരിപാടികളുടെ വിജയത്തിന് വലിയ സംഭാവനയാണ് നൽകിയത്. ആഘോഷത്തോടനുബന്ധിച്ച് ഒരുക്കിയ വിഭവസമൃദ്ധമായ സദ്യയും പായസവും പങ്കെടുത്തവർക്കെല്ലാം നാടിന്റെ രുചിയും ഓർമ്മകളും സമ്മാനിച്ചു.

മിട്ടു അഭിലാഷ് നേതൃത്വം  നൽകിയ ഫാമിലി ബിംഗോയും ആഘോഷത്തിന്റെ വേറിട്ട ആകർഷണമായി മാറി. ഓരോ കുടുംബവും ആവേശത്തോടെ പങ്കെടുത്ത മത്സരത്തിൽ വിജയികൾക്ക് ശ്രി സി എ ജോസഫ് സമ്മാനങ്ങൾ വിതരണം ചെയ്തു. ഈ വർഷത്തെ വൂസ്റ്റർ ഫാമിലി ക്ലബ്ബിന്റെ  ഈസ്റ്റർ–വിഷു ആഘോഷങ്ങൾക്ക്  ഷിബിൻ മാത്യു,സാജു മാത്യു, ജോൺ ബാബു, അനീഷ് കുമാർ,ബിൻസ് ജോർജ്, വിപിൻ കെ എം എന്നിവർ നേതൃത്വം നൽകി. ചടങ്ങിൽ വൂസ്റ്ററിലെ മലയാളി സംരംഭമായ പട്ടുനൂലിന്റെ ഇന്ത്യൻ വസ്തങ്ങളുടെയും ആഭരണങ്ങളുടെയും പ്രദർശനവും വില്പനയും ഉണ്ടായിരുന്നു.

ആഷ്‌ലി കുര്യൻ

സ്റ്റോക്ക് ഓൺ ട്രെന്റ്: മലങ്കര സിറിയൻ ഓർത്തഡോക്സ് യു.കെ. കൗൺസിലിന് (MSOC) കീഴിൽ പ്രവർത്തിക്കുന്ന പ്രശസ്തമായ സ്റ്റോക്ക് ഓൺ ട്രെന്റ് സെന്റ് കുര്യാക്കോസ് ദേവാലയത്തിന് പുതിയ ഭരണസമിതി നിലവിൽ വന്നു. ആത്മീയവും സാമൂഹികവുമായ മേഖലകളിലും ചാരിറ്റി പ്രവർത്തനങ്ങളിലും സജീവ സാന്നിധ്യമായ ഈ ഇടവക, യു.കെ. ഭദ്രാസനത്തിന്റെ കുടുംബസംഗമവും കരോൾ വിരുന്നും അതിമനോഹരമായി സംഘടിപ്പിച്ചു ശ്രദ്ധനേടിയതാണ്.

വളർച്ചയുടെ പുതിയ പടവുകൾ ലക്ഷ്യമിട്ട്, ഇടവകയുടെ ഭാവി പ്രവർത്തനങ്ങൾക്ക് നേതൃത്വം നൽകാൻ കഴിവുറ്റതും പരിചയസമ്പന്നവുമായ പുതിയ ഭരണസമിതിയെ പള്ളി പൊതുയോഗം തിരഞ്ഞെടുത്തു.
ഭരണസമിതി ഭാരവാഹികൾ:

• പ്രസിഡന്റ്: ഫാദർ ഗീവർഗീസ് പാലിക്കുടത്ത് (നാട്ടിൽ: മഞ്ഞപ്ര സെന്റ് ജോർജ് സിറിയൻ പള്ളി)
• പള്ളി രക്ഷാധികാരി: ഫാദർ സിബി വാലയിൽ(നാട്ടിൽ: തൊട്ടിക്കാനം സെന്റ് ജോർജ് യാക്കോബായ സുറിയാനി പള്ളി)
• സെക്രട്ടറി: എബിൻ ബേബി (നാട്ടിൽ: പിറമാടം സെന്റ് ജോൺസ് യാക്കോബായ സുറിയാനി പള്ളി)
• ട്രസ്റ്റി: സജിത്ത് കുര്യാക്കോസ് (നാട്ടിൽ: പേരൂർ മർത്തശ്മൂനി യാക്കോബായ സുറിയാനി പള്ളി)
• കൗൺസിലർ: വിജി കെ.പി. (നാട്ടിൽ: മുളന്തുരുത്തി സെന്റ് തോമസ് കത്തീഡ്രൽ)
• പി.ആർ.ഒ: ആഷ്‌ലി കുര്യൻ (നാട്ടിൽ: കോതമംഗലം സെന്റ് മേരിസ് കത്തീഡ്രൽ)
കമ്മിറ്റി അംഗങ്ങൾ:
സാലി ബിനോയ്, സാംസൺ ജോസഫ്, ബേസിൽ പി.ഇ, പ്രിൻസ് പീറ്റർ,
വിഭാഗം ഭാരവാഹികൾ:
• സൺഡേ സ്കൂൾ ഹെഡ്മാസ്റ്റർ: ഷിബു വർഗീസ്

• വനിതാ സമാജം സെക്രട്ടറി: ഷിന്നി നെബു
• ⁠യൂത്ത് അസോസിയേഷൻ:അലീന ജിൽസൺ
• വനിതാ സമാജം ട്രസ്റ്റി: ബിന്ദു വിജി
• വനിതാ സമാജം ജോയിന്റ് സെക്രട്ടറി: ഷിബിമോൾ മാത്യു

(Ex-Officio): സാജു ജോസഫ്, ബേസിൽ ജോയി

• ഓഡിറ്റർ: ബിനോയ് കുര്യൻ

ബ്ലാക്ക്ബേൺ: യുണൈറ്റഡ് മലയാളി അസോസിയേഷൻ (UMA) ബ്ലാക്ക്ബേൺ സംഘടിപ്പിച്ച ഈസ്റ്റർ–വിഷു ആഘോഷം ഏപ്രിൽ 18-ന് ആവേശപൂർവ്വം നടന്നു.

“Magical Musical Night” എന്ന പേരിൽ സംഗീതം, സ്കിറ്റ്, ഈസ്റ്റർ–വിഷു ആഘോഷഘടകങ്ങൾ എന്നിവ ഉൾപ്പെടുത്തിയ സമഗ്രമായ പരിപാടിയാണ് അവതരിപ്പിച്ചത്. അംഗങ്ങൾ ഒന്നിച്ചുകൂടിയ ഈ ആഘോഷം ഒരുമിച്ചുള്ള ഒരു മനോഹര സംഗമമായി മാറി.

വിഷു കൈനീട്ടവും ഈസ്റ്റർ എഗ് വിതരണവും പരിപാടിയുടെ ഭാഗമായി സംഘടിപ്പിച്ചു. സർപ്രൈസ് ഭാഗ്യസമ്മാനങ്ങളും പരിപാടിയെ കൂടുതൽ ആകർഷകമാക്കി.

പരിപാടി വിജയകരമാക്കുന്നതിൽ കൾച്ചറൽ കമ്മിറ്റിയുടെ പങ്ക് ശ്രദ്ധേയമായിരുന്നു. പരിപാടിയുടെ വിജയത്തിന് പിന്നിൽ പ്രവർത്തിച്ച എല്ലാവർക്കും സംഘാടകർ നന്ദി അറിയിച്ചു.

അനിൽ ഹരി

LMHS സംഘടിപ്പിച്ച വർണ്ണശബളമായ വിഷു ആഘോഷം വിഷുപുലരി 2026 11 ആം തിയ്യതി ലിവർപൂൾ കാർദിനാൾ ഹീനൻ സ്‌കൂളിൽ വച്ച് അതിഗംഭീരമായി നടത്തപ്പെട്ടു. രാവിലെ എട്ടു മണിക്ക് ഒരുക്കിയ അതിമനോഹരമായി വിഷുക്കണിയോടെ ആരംഭിച്ച ചടങ്ങുകൾക്ക് വിഷുപൂജ, വിഷു കൈനീട്ടം തുടങ്ങിയവ ഗൃഹാതുരത്വത്തിൻ്റെ നിറം പകർന്നു. പത്തുമണിയോടെ LMHS എക്സിക്യൂട്ടിവ് കമിറ്റി പ്രസിഡൻ്റ് ശ്രീ സായികുമാർ ഉണ്ണികൃഷ്ണൻ ഔപചാരികമായി സദസ്സിനെ സ്വാഗതം ചെയ്ത് സംസാരിച്ചു. തുടർന്ന് ഈയടുത്ത് നടന്ന നൃത്ത പരീക്ഷയിൽ ഉന്നത വിജയം കൈവരിച്ച സാത്വിക ആർട്ട് & കൾചറൽ സ്‌കൂളിലെ വിദ്യാർത്ഥികൾക്കുള്ള സർട്ടിഫിക്കറ്റ് വിതരണവും നടന്നു.

തുടർന്ന് നിഷ മുണ്ടേക്കാട് വിഷുവിൻ്റെ ഐതിഹ്യവും പ്രാധാന്യവും വിഷു ആഘോഷം എങ്ങനെ നമ്മുടെ ജീവിതവുമായി ഇഴുകിച്ചേർന്നിരിക്കുന്നു എന്നും സദസ്സിനെ അഭിസംബോധന ചെയ്ത് സംസാരിച്ചു. പിന്നെ ചെണ്ടമേളത്തിൻ്റെ അകമ്പടിയോടെ കാണികളിലെ ത്രസിപ്പിച്ചു കൊണ്ട് ഉറിയടി നൃത്തം അരങ്ങേറി രാധാകൃഷ്ണന്മാരും കുചേലനും ഗോപികമാരും ഒക്കെയായി ഉറിയടി നൃത്തം ഏവരുടേയും മനം കവർന്നു. തുടർന്ന് LMHS ൻ്റെ ഭജന സംഘം നാദതരംഗിണി ഭജൻസ് അവതരിപ്പിച്ച കൃഷ്ണാർച്ചന ഭജനകളും ആസ്വാദക മനസ്സിൽ ഭക്തിയും സന്തോഷവും നിറച്ചു. തുടർന്ന് എല്ലാവരും വിഭവസമൃദ്ധമായൊരുക്കിയ രുചികരമായ വിഷു സദ്യ ആസ്വദിച്ചു.

സദ്യക്കിടയിലും ചില കലാപരിപാടികളും കളികളുമായി അവതാരകർ സദസ്സിനെ ആസ്വാദനത്തിൻ്റെ വിവിധ തലങ്ങളിലേയ്ക്ക് കൊണ്ടുപോയിരുന്നു.

ഉച്ചതിരിഞ്ഞ് 2:30-ന് LMHS ബാലഗോകുലത്തിലെ കൊച്ചു മിടുക്കന്മാരും മിടുക്കികളം ആലപിച്ച പ്രാർത്ഥനഗാനത്തോടെ വിഷു ദിന സാംസ്കാരിക പരിപാടികൾ ആരംഭിച്ചു. തുടർന്ന് സാത്വിക യിലെ കുട്ടികൾ അവതരിപ്പിച്ച ഭരതനാട്യം, കുട്ടികളുടെ ഗാനാലാപനം എന്നിവയുണ്ടായി. സാത്വികയിലെ തന്നെ ചെറിയ കുട്ടികളുടെ ബോളിവുഡ് ഡാൻസിനു ശേഷം നിഷാ മാധവൻ അവതരിപ്പിച്ച കഥക് ഒരു വ്യത്യസ്ത ആസ്വാദനം പ്രദാനം ചെയ്തു. മുതിർന്നവരുടെ സെമി ക്ലാസിക്കൽ ഡാൻസ്, കുട്ടികളുടെ സംഘനൃത്തങ്ങൾ എന്നിവയെക്കൂടാതെ സദസ്സിനെ രോമാഞ്ചം കൊള്ളിച്ച പ്രകടനവുമായി സാത്വികയിലെ നൃത്താദ്ധ്യാപിക കൃഷ്ണപ്രിയയും സംഘവുമവതരിപ്പിച്ച സീതാകല്യാണം എന്ന നൃത്തശില്പം ആസ്വാദകമനസ്സിൽ ആഹ്ലാദമുണർത്തി. തുടർന്ന് കേരളത്തിൻ്റെ തനതു കലാരൂപമായ ലാസ്യതരംഗിണി മോഹിനിയാട്ടം ഫ്യൂഷനുമായി അദ്ധ്യാപിക ശ്രുതി ബിനോജിൻ്റെ ശിഷ്യർ അരങ്ങു നിറഞ്ഞാടി. ഒന്നിനൊന്ന് മികച്ച പ്രകടനം കാഴ്ചവച്ച നൃത്തഗാനങ്ങൾക്ക് മാറ്റു കൂട്ടിക്കൊണ്ട് ലേഖ രാംകുമാർ ആവിഷ്കരിച്ച “കൃഷ്ണാർപ്പണം” എന്ന സ്കിറ്റുമായി LMHS കുടുംബാംഗങ്ങൾ രംഗത്തത്തി. പ്രധാനമായും കൃഷ്ണഭക്തയായ കുറൂരമ്മയുടെ കഥ പറഞ്ഞ ഈ കലാസൃഷ്‌ടി ആദ്യന്തം കാണികളെ പിടിച്ചിരുത്തി. പൂന്താനം മേൽപ്പത്തൂർ വില്വമംഗലം തുടങ്ങിയവരുടെ കഥയും കുട്ടികൾക്കും മുതിർന്നവർക്കും ഒരു പോലെ ആസ്വാദകമായി. സ്‌കിറ്റ് കണ്ടതോടെ ഗുരുവയൂരിലെത്തുവാൻ ധൃതിയായി എന്നാണ് ഒരാസ്വാദകൻ ഭക്തിപൂർവ്വം പ്രതികരിച്ചത്. അത്രയും മനസ്സിനെ തൊടുന്ന അവതരമായിരുന്നു അരങ്ങേറിയത്. തുടർന്നും നൃത്തങ്ങളും ഗാനങ്ങളും മറ്റുമായി LMHS ലെ കലാകാർ ആസ്വാദമനസ്സിനെ കവർന്നു. ഒടുവിൽ സാത്വിക നൃത്താദ്ധ്യാപിക ഡോ സുപ്രിത ഐതലിൻ്റെ അതിമനോഹരമായ ഭരതനാട്യത്തോടെ കലാപരിപാടികൾക്ക് തിരശ്ശീല വീണു. പ്രോഗ്രാമിൽ പങ്കെടുത്ത എല്ലാ കലാകാരന്മാർക്കും സർട്ടിഫിക്കറ്റുകൾ സമ്മാനിച്ചു.

വിഷുദിനാഘോഷത്തിൻ്റെ ടൈറ്റിൽ സ്പോൺസറായ സയാൻ മോർഡ്ഗേജസ് നടത്തിയ റാഫിൾ മത്സരത്തിൽ വിജയിച്ചവർക്ക് സയാനിനു വേണ്ടി ശ്രീ അനീഷ് സമ്മാനങ്ങൾ വിതരണം ചെയ്തു. LMHS നടത്തിയ ലക്കി ഡ്രോയിൽ വിജയിച്ചവർക്കുള്ള സമ്മാനദാനവും നടക്കുകയുണ്ടായി. അതു പോലെ തന്നെ മറ്റൊരു സ്പോൺസറായ റിഷാ കളക്ഷനും വിവിധ മത്സരവിജയികൾക്ക് സമ്മാനം നൽകുകയുണ്ടായി. LMHS സെക്രട്ടറി ഡോ. നിതിൻ ഉണ്ണിക്കൃഷ്ണൻ നന്ദിപ്രകടനത്തോടെ വിഷുപ്പുലരി 2026 ആഘോഷം ഔദ്യോദികമായി സമാപിച്ചു. ആഘോഷം ഗംഭീര വിജയമാക്കുന്നതിന് സഹായിച്ച എല്ലാവരോടും എക്സിക്യൂട്ടിവ് കമ്മിറ്റി നന്ദി അറിയിച്ചു.

മനോജ് ജോസഫ്

ലോകമെങ്ങും ജാതി-മത-വർഗ്ഗീയ ചിന്തകൾ മനുഷ്യരെ ഭിന്നിപ്പിക്കുമ്പോൾ, ജാതിക്കും മതത്തിനും വർണ്ണത്തിനും മുകളിൽ മനുഷ്യത്വം എന്ന ഉദാത്തമായ സന്ദേശമുയർത്തി ലിവർപൂൾ മലയാളി അസോസിയേഷൻ (LIMA) സംഘടിപ്പിച്ച ഈസ്റ്റർ-വിഷു ഈദ് ആഘോഷത്തിൽ മേഴ്‌സിസൈഡിലെ മലയാളികൾ ജാതി-മത ഭേദമന്യേ ഒറ്റക്കെട്ടായി ഒത്തുചേർന്നപ്പോൾ അത് പ്രവാസ മണ്ണിലെ മതമൈത്രിയുടെയും ഐക്യത്തിന്റെയും നേർക്കാഴ്ചയായി മാറി.

ഏപ്രിൽ 18 വൈകുന്നേരം 5 മണിക്ക് ലിവർപൂൾ കാർഡിനൽ ഹീനൻ സ്‌കൂൾ ഓഡിറ്റോറിയത്തിൽ ആരംഭിച്ച പരിപാടിയിൽ ലിവർപൂളിലെയും പരിസര പ്രദേശങ്ങളിലെയും നൂറുകണക്കിന് മലയാളികൾ പങ്കെടുത്തു. ലിമ കമ്മിറ്റി അംഗങ്ങളുടെ നേതൃത്വത്തിൽ പ്രസിഡന്റ്‌ ശ്രീ. ബിജു ജോർജ് ഭദ്രദീപം തെളിച്ചു പ്രോഗ്രാം ഉദ്ഘാടനം ചെയ്തു. മനുഷ്യർ എന്നും ഒറ്റക്കെട്ടായി നിൽക്കണമെന്നും മാനവികതയുടെ കൊടിക്കൂറ ഉയർത്തിപ്പിടിക്കണമെന്നും അദ്ദേഹം തന്റെ അധ്യക്ഷപ്രസംഗത്തിൽ ഓർമ്മിപ്പിച്ചു. ലിമയുടെ സെക്രട്ടറി ബ്ലെസ്സൺ രാജൻ സ്വാഗതം ആശംസിച്ചു. ഐക്യത്തിന്റെ പ്രതീകമായി വിവിധ വിഭാഗങ്ങളെ പ്രതിനിധീകരിച്ച് ഏഴു തിരിയിട്ട ഭദ്രദീപം തെളിയിച്ച ചടങ്ങിൽ ജോയിൻ്റ് സെക്രട്ടറി ആതിര ശ്രീജിത്ത് കൃതജ്ഞത രേഖപ്പെടുത്തി.

അതിമനോഹരമായി കൃഷ്ണവേഷം ധരിച്ചെത്തിയ കുട്ടികളെ വിഷുക്കണി കാണിച്ചുകൊണ്ടുള്ള ചടങ്ങ് ആഘോഷങ്ങൾക്ക് ഐശ്വര്യം പകർന്നു. തുടർന്ന് നടന്ന രാധാ-കൃഷ്ണ വേഷപ്പകർച്ച മത്സരം കാണികൾക്ക് നയനാന്ദകരമായ കാഴ്ചയായി. മത്സരത്തിൽ പങ്കെടുത്ത എല്ലാ കുട്ടികൾക്കും ആകർഷകമായ സമ്മാനങ്ങൾ വിതരണം ചെയ്തു. ഹാളിലെത്തിയ 12 വയസ്സുവരെയുള്ള എല്ലാ കുട്ടികൾക്കും ലിവർപൂളിലെ പ്രമുഖ ദമ്പതിമാരായ ഡോക്ടർ ജോർജ് കുരുവിളയും ഡോക്ടർ സൂസൻ കുരുവിളയും ചേർന്ന് വിഷുക്കൈനീട്ടവും ഈസ്റ്റർ എഗ്ഗും വിതരണം ചെയ്തു.

കൃഷ്ണ പ്രിയയും ടീമും (ശ്രീസൂര്യ ഡാൻസ് സ്റ്റുഡിയോ) അവതരിപ്പിച്ച ആകർഷകമായ നൃത്തപ്രകടനങ്ങൾ വേദിയെ വർണ്ണാഭമാക്കി. ആഘോഷങ്ങളുടെ പ്രധാന ആകർഷണമായിരുന്ന ‘കൊച്ചിൻ ഗോൾഡൻ ഹിറ്റ്‌സ്’ അവതരിപ്പിച്ച മെഗാ സ്റ്റേജ് ഷോ കാണികളെ ആവേശത്തിലാഴ്ത്തി. ആഘോഷത്തിന്റെ ഭാഗമായി ‘കറി ചട്ടി’ ഒരുക്കിയ രണ്ട് കൂട്ടം പായസം ഉൾപ്പെടെയുള്ള വിഭവസമൃദ്ധമായ ഡിന്നറാണ് പങ്കെടുത്തവർക്കായി വിളമ്പിയത്. ഈ വിസ്മയ നിമിഷങ്ങളെല്ലാം അതിന്റെ പൂർണ്ണതയിൽ ഒപ്പിയെടുത്തത് പിജെ ഫോട്ടോഗ്രഫിയാണ്.

യുകെയിലെ ആദ്യകാല മലയാളി അസോസിയേഷനുകളിൽ ഒന്നായ ലിമയുടെ ഈ ഐക്യസംഗമം മേഴ്‌സിസൈഡ് മലയാളികളുടെ ചരിത്രത്തിലെ അഭിമാന നിമിഷമായി മാറി.

യുകെയിലെ സ്റ്റോക്ക് ഓൺ ട്രെന്റിലെ സെന്റ് കുര്യാക്കോസ് ജാക്കോബൈറ്റ് പള്ളിയുടെ നേതൃത്വത്തിൽ സമാഹരിച്ച 1,68,000 രൂപയുടെ സഹായം അഡ്വ. അനൂപ് ജേക്കബ് എംഎൽഎ, എറണാകുളം മുളന്തുരുത്തിയിൽ പ്രവർത്തിക്കുന്ന ബെത്ലെഹേം വയോജന പരിപാലന കേന്ദ്രമായ ബെത്ലെഹേം ജെരിയാട്രിക് കെയർ ഹോമിലെ അനിൽ അച്ചന് കൈമാറി. കാർഡിയാക് ടേബിൾ വാങ്ങുന്നതിനായാണ് ഈ തുക വിനിയോഗിക്കുന്നത്.

കഷ്ടാനുഭവ ആഴ്ച്ചയോടനുബന്ധിച്ച് നടത്തിയ ചാരിറ്റി പിരിവിലൂടെയാണ് തുക സമാഹരിച്ചത്. പള്ളി വികാരി ഫാദർ ഗീവർഗീസ് പള്ളിക്കൂടത്ത്, ഇടവക അംഗവും മുൻ വികാരിയും ആയ ഫാദർ സിബി വാലായിൽ, പള്ളി സെക്രട്ടറി സാജു ജോസഫ്, ട്രസ്റ്റി ബേസിൽ ജോയി, ഭദ്രാസന കൗൺസിൽ അംഗം വിജി കെ പി എന്നിവർ ചേർന്നാണ് ഈ സംരംഭത്തിന് നേതൃത്വം നൽകിയത്.

ജെറിൻ ടി ഏലിയാസ്, ജോളി പി തോമസ്, ഷാജി മാധവൻ, രതീഷ് കെ ദിവാകരൻ, മഞ്ചു കൃഷ്ണൻകുട്ടി എന്നിവരുടെ സാന്നിധ്യത്തിൽ നടന്ന ചടങ്ങിലാണ് ചെക്ക് കൈമാറിയത്.

ലണ്ടനിൽ ഒരു ഗുരുവായൂരപ്പ ക്ഷേത്രം എന്ന സാക്ഷാത്കാരത്തിമായി പ്രവർത്തിച്ചുകൊണ്ടിരിക്കുന്ന ലണ്ടൻ ശ്രീ ഗുരുവായൂരപ്പ സേവാസംഘവും,മോഹൻജി ഫൗണ്ടേഷനും ചേർന്ന് ലണ്ടൻ വിഷു വിളക്ക് സംഘടിപ്പിക്കുന്നു. 2026 ഏപ്രിൽ 25 ശനിയാഴ്ച വൈകുന്നേരം 5.30 PM മുതൽ ലണ്ടനിലെ ക്രോയ്ഡൺ തോണ്ടൺ ഹീത്തിലെ വെസ്റ്റ് തൊണ്ടോൻ കമ്മ്യൂണിറ്റി സെൻഡറിൽ വച്ചാണ് ചടങ്ങുകൾ നടത്തപ്പെടുന്നത്.അന്നേ ദിവസം ലൈവ് ഓർക്കസ്ട്രയോട് കൂടിയ ഭക്തി ഗാനസുധ,വിഷുക്കണി,ശ്രീമതി ചിത്ര ലക്ഷ്മി നേതൃത്വം കൊടുക്കുന്ന ദക്ഷിണ യുകെ അവതരിപ്പിക്കുന്ന നൃത്തശില്പം ,അകാലത്തിൽ ലണ്ടൻ മലയാളികളെ വിട്ടു പോയ ഹരിയേട്ടനെ അനുസ്മരിക്കുന്ന ചടങ്ങായ ഓർമകളിൽ ഹരിയേട്ടൻ , ശേഷം ദീപാരാധന,പ്രസാദഊട്ട് (വിഷുസദ്യ) എന്നിവ ഉണ്ടായിരിക്കുന്നതാണ് .സാമൂഹ്യ ,സാംസ്‌കാരിക രംഗത്തെ പ്രമുഖർ ഈ ചടങ്ങിൽ പങ്കെടുക്കും.ഈ സായം സന്ധ്യയിലേക്കു എല്ലാവരെയും സ്വാഗതം ചെയ്യുന്നതായി സംഘടകർ അറിയിച്ചു.

ഇംഗ്ലണ്ടിലെ കെന്റ് അയ്യപ്പ ക്ഷേത്രവും കെന്റ് ഹിന്ദു സമാജവും ചേർന്ന് സംഘടിപ്പിച്ച വിഷു ആഘോഷങ്ങൾ വർണാഭമായി. 2026 ഏപ്രിൽ 15 വിഷു ദിവസം രാവിലെ 9 മണിക്ക് നട തുറന്ന് നിർമ്മാല്യ ദർശനവും തുടർന്ന് ഉഷപൂജയും , വിഷു കണിയും, വിഷു കൈനീട്ടവും, വിഷു പ്രത്യേക പൂജയും, ഉച്ചപൂജയും നടത്തി 12:30 ന് നട അടച്ചു.

വൈകുന്നേരം 4 മണിക്ക് വീണ്ടും നട തുറന്ന്‌ മഹാസുദർശന പൂജ, പ്രദോഷ പൂജ എന്നിവയോടൊപ്പം ശ്രീ അരുൺ കൈമളും ശ്രീ വിഘ്‌നേഷ് നാഗരാജനും നയിച്ച വൃന്ദാവൻ ഭജൻസ് യുകെ യുടെ ഭക്തിഗാനമേള, ശ്രീമതി ചിത്ര ലക്ഷ്മി നേതൃത്വം കൊടുത്ത ദക്ഷിണ യുകെ അവതരിപ്പിച്ച നൃത്തനൃത്ത്യ കലാവിരുന്ന് എന്നിവക്ക് ഒപ്പം ദീപാരാധനയും 8 മണിക്ക് അത്താഴ പൂജയും നടത്തപ്പെട്ടു . പൂജകൾക്ക് ശ്രീ അഭിജിത്ത് , താഴൂർ മന ഹരിനാരായണൻ നമ്പിടിശ്വർ എന്നിവർ പ്രധാന കാർമികത്വം വഹിച്ചു. വെള്ളിയോട്ടില്ലം ശ്രീ അദ്രിത് വാസുദേവ് പൂജകൾക്ക് സഹ കർമികത്വം വഹിച്ചു. സാംസ്ക്കാരിക കലാവിരുന്നിന് ശ്രീ അനൂപും, ശ്രീമതി മൃദുലയും, ശ്രീമതി ചിത്ര ലക്ഷ്മിയും ചേർന്ന് വിളക്ക് കൊളുത്തി. വിഷു സദ്യക്ക് കെന്റ് ഹിന്ദു സമാജത്തിലെ വനിതകൾ നേതൃത്വം നൽകി.

വർഷം തോറും സ്കോട്ട് ലൻഡിലെ ഏല്ലാ ഗായകരും ഗായക പ്രേമികളും ഒത്തു ചേരുന്ന സിംഫണി 2026 നു ആദ്യമായി അബെർദീൻ വേദി ആകുന്നു ഈ ശനി ആഴ്ച്ച 18/04/26. ഹെത്രിബൺ സ്കൂൾ ഓഡിറ്റോറിയത്തിൽ 3 മണിക്ക് തിരി തെളിയുന്ന കലാ സായാഹ്നത്തിൽ സ്കോട്ട് ലൻഡിലെ വിവിധ ഭാഗത്തു നിന്നും എത്തുന്നവരുടെ ഗാന നൃത്ത പരിപാടികൾ അരങ്ങേറും. കൂടാതെ നാടൻ കേരളീയ വിഭവങ്ങളുടെ നിരവധി സ്റ്റാളുകളും മിതമായ നിരക്കിൽ ഒരുക്കിയിട്ടുണ്ടെന്ന് സംഘാടകർ അറിയിച്ചു . പ്രവേശന fee 3pound ആണ് . പ്രവേശന പാസ്സുകൾക്കും മറ്റു വിവരങ്ങൾക്കും താഴെ കാണുന്ന നമ്പറിൽ ബന്ധപ്പെടാവുന്നതാണ്.

Josy 07846064118
Johny 07718424386
George 07886077191
venue :heathryburn school,hopes road.Aberdeen ab167Rw