ന്യൂസ് ഡെസ്ക് മലയാളം യുകെ

യു കെ :- പതിനാറു വയസ്സുകാരിയായ പെൺകുട്ടിയെ ഓർഡർ ഡെലിവറിക്കിടെ ഉപദ്രവിക്കാൻ ശ്രമിച്ച് ഊബർ ഈറ്റ്സ് ഡ്രൈവർ. മക്ഡോണൾഡിൽ നിന്നുള്ള ഓർഡർ ഡെലിവറിക്കിടെയാണ് ഊബർ ഈറ്റ്സ് ഡ്രൈവർ മുഹമ്മദ്‌ ജുനൈദ് പതിനാറു വയസ്സുകാരിയെ ആക്രമിക്കുവാൻ ശ്രമിച്ചത്. ഫുഡ്‌ ഡെലിവറി ചെയ്തശേഷം, തനിക്ക് റേറ്റിംഗ് നൽകുവാനായി ആവശ്യപ്പെട്ട് ഇയാൾ പെൺകുട്ടിയുടെ വീട്ടിലേക്ക് കയറി ചെല്ലുകയായിരുന്നു. മനഃപ്പൂർവമായി പെൺകുട്ടിയെ ആലിംഗനം ചെയ്തതോടൊപ്പം ചുംബിക്കാനും ഇയാൾ ശ്രമിച്ചതായി മാഞ്ചെസ്റ്റർ ഈവെനിംഗ് ന്യൂസ് റിപ്പോർട്ട് ചെയ്തു. ഇതിനു ശേഷം ഇയാൾ പെൺകുട്ടിയുടെ ഫോൺ തട്ടിയെടുത്ത് റേറ്റിങ്ങും നടത്തി.

പെൺകുട്ടിയെ ആലിംഗനം ചെയ്യുവാൻ ശ്രമിക്കുന്നതിനിടെ, പെൺകുട്ടി പുതച്ചിരുന്ന ബ്ലാങ്കറ്റും ഇയാൾ വലിച്ചു നീക്കിയതായും പെൺകുട്ടി പരാതിയിൽ പറഞ്ഞു. പോലീസ് ചോദ്യം ചെയ്യലിൽ ആദ്യം ഇയാൾ കുറ്റം ചെയ്തതായി വിസമ്മതിച്ചു. താൻ ഫുഡ് ഡെലിവറി നടത്തിയ ശേഷം ഉടൻ തന്നെ തിരികെ പോയതായി ഇയാൾ പോലീസിനോട് പറഞ്ഞു. എന്നാൽ പിന്നീട് ഇയാൾ കുറ്റം ചെയ്തതായി തെളിഞ്ഞു.