ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: സാമ്പത്തിക പ്രതിസന്ധിക്കിടയിലും മിനി ബഡ്ജ്റ്റിൽ പ്രതീക്ഷ വെച്ചിരുന്നതിന്റെ കാരണം വെളിപ്പെടുത്തി ബാങ്ക് ഓഫ് ഇംഗ്ലണ്ട് ഡെപ്യൂട്ടി ഗവർണർ. 50 ബില്യൺ പൗണ്ടിന്റെ പ്രശ്നം വിപണിയേ തകർക്കുമ്പോഴും പ്രതീക്ഷ ഈ ബഡ്ജ്റ്റിൽ ആയിരുന്നെന്നും അദ്ദേഹം വ്യക്തമാക്കുന്നു. എന്നാൽ ഇപ്പോൾ സാമ്പത്തിക പ്രതിസന്ധിക്കിടയിൽ ബോണ്ട്‌ വിപണിയിൽ ഇടപെടാൻ സർക്കാർ ഒരുങ്ങുകയാണ്. സാമ്പത്തിക പ്രതിസന്ധി രാജ്യത്തെ പിടിച്ചു കുലുക്കുന്നതിനിടയിലാണ് ഈ മാറ്റം. നിലവിലെ പ്രശ്നങ്ങളെ അതിജീവിക്കുവാൻ ഉദ്യോഗസ്ഥർ ഇടപെട്ടുവെന്ന് ബാങ്കിന്റെ നടപടികളെ ന്യായീകരിച്ച് എംപിമാർക്ക് അയച്ച കത്തിൽ ഡെപ്യൂട്ടി ഗവർണർ ജോൺ കുൻലിഫ് പറയുന്നു.

ലയബിലിറ്റി-ഡ്രൈവ് ഇൻവെസ്റ്റ്‌മെന്റ് (എൽഡിഐ) ഫണ്ടുകളുടെ മൂല്യം പൂജ്യമായി കുറഞ്ഞതിനാൽ, ദശലക്ഷക്കണക്കിന് പെൻഷൻക്കാർക്ക് അവരുടെ റിട്ടയർമെന്റ് കാലത്ത് നഷ്ടം സംഭവിക്കുന്നുണ്ട്. രാജ്യത്തെ സാധാരണ മനുഷ്യരുടെ കയ്യിൽ പോലും പണമെത്താത്ത ഗുരുതരമായ പ്രതിസന്ധിയിലൂടെയാണ് രാജ്യം കടന്നുപോകുന്നതെന്ന് ജോൺ പറഞ്ഞു.

പെൻഷൻ ഫണ്ട് തകർച്ച എൽഡിഐകളിലാണ് കേന്ദ്രീകരിച്ചിരിക്കുന്നത്. സമീപകാല വിപണിയിലെ ചാഞ്ചാട്ടം മൂലം മുമ്പ് ഒരിക്കലും അഭിമുഖീകരിക്കാത്ത പ്രശ്നമാണിത്. ഇത് പരിഹരിക്കാൻ എല്ലാഭാഗത്തും നിന്നും പരിശ്രമം നടക്കുന്നുണ്ട്. ഭാവിയിലെ ആവശ്യങ്ങൾക്ക് ചെലവാക്കാൻ പണമുണ്ടെന്ന് ഉറപ്പാക്കാൻ അന്തിമ-ശമ്പള പെൻഷൻ സ്കീമുകൾ എൽഡിഐകൾ ഉപയോഗിക്കുകയാണ്.

ഗവൺമെന്റ് ബോണ്ടുകൾ വാങ്ങുന്നതിനായി പെൻഷൻ ഫണ്ടുകൾ കടം എടുക്കാൻ അനുവദിക്കുന്നതിലൂടെ പലിശനിരക്കുകൾ, പണപ്പെരുപ്പം, കറൻസികൾ എന്നിവയിലും ഈ പ്രശ്നങ്ങൾ കടക്കുമെന്ന സൂചനയാണ് ഇപ്പോൾ ലഭിക്കുന്നത്.

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: രാജ്യത്ത് വൈദ്യുതി വിതരണം തടസപ്പെടുമെന്ന മുന്നറിയിപ്പുമായി നാഷണൽ ഗ്രിഡ്. ശൈത്യകാലത്ത് ഗ്യാസ് വിതരണം കുറവായതാണ് ഇതിനു കാരണമെന്നും അധികൃതർ ചൂണ്ടിക്കാട്ടുന്നു. വൈദ്യുതി ദിവസവും മൂന്ന് മണിക്കൂർ വരെ മുടങ്ങാൻ സാധ്യതയുണ്ടെന്നാണ് മുന്നറിയിപ്പിൽ പറയുന്നത്. നിലവിലെ ഊർജപ്രതിസന്ധിയും ഇതിനു പ്രധാന കാരണമാണ്.

ഊർജപ്രതിസന്ധി രൂക്ഷമാകുന്ന സാഹചര്യത്തിൽ മറ്റു ബദൽ മാർഗങ്ങൾ ആലോചിക്കണമെന്നാണ് വിദഗ്ദർ അഭിപ്രായപ്പെടുന്നത്. തിരക്കേറിയ സമയങ്ങളിൽ വെട്ടിക്കുറയ്ക്കലുകൾ സംഭവിക്കുകയും ഉപഭോക്താക്കൾക്ക് മുൻകൂട്ടി മുന്നറിയിപ്പ് നൽകുകയും ചെയ്യും. അതേസമയം വിതരണം തടസപ്പെടുന്നത് ഒരു പരിധിവരെ വീടുകളെ ബാധിക്കില്ല എന്നാണ് ഗ്രിഡ് ചൂണ്ടിക്കട്ടുന്നത്. ആവശ്യക്കാർ കൂടുതലുള്ള സമയങ്ങളിൽ, ഒരുപക്ഷേ പുലർച്ചെ, അല്ലെങ്കിൽ വൈകുന്നേരം 4 മണിക്കും 9 മണിക്കും ഇടയിൽ ഉണ്ടാകാൻ സാധ്യതയുള്ള പവർ കട്ടിനെക്കുറിച്ച് ഒരു ദിവസം മുമ്പെങ്കിലും ഉപഭോക്താക്കൾക്ക് മുന്നറിയിപ്പ് നൽകും. രാജ്യത്തിന്റെ എല്ലാ മേഖലകളെയും ഒരേ സമയം ബാധിക്കാത്ത രീതിയിലാണ് അവ ക്രമീകരിക്കുക. ഓഗസ്റ്റിൽ ലിസ് ട്രസ് പ്രചാരണം നടത്തുമ്പോൾ ഈ ശൈത്യകാലത്ത് ഊർജ്ജ പ്രതിസന്ധി ഉണ്ടാകില്ലെന്ന് പ്രതിജ്ഞയെടുത്തിരുന്നു.

എന്നാൽ വ്യാഴാഴ്ച മാധ്യമപ്രവർത്തകരുടെ ചോദ്യത്തിന് പ്രധാനമന്ത്രിയുടെ മറുപടി ഇങ്ങനെ ആയിരുന്നു;

‘ഞങ്ങൾക്ക് വ്യക്തമായത് യുകെയിൽ നല്ല ഊർജ വിതരണമുണ്ട്, മറ്റ് പലതിനെക്കാളും മികച്ച സ്ഥാനത്താണ് ഞങ്ങൾ. പക്ഷേ തീർച്ചയായും നമുക്ക് ചെയ്യാൻ കഴിയുന്ന കൂടുതൽ കാര്യങ്ങളുണ്ട്. അതുകൊണ്ടാണ് ഭാവിയിൽ സുരക്ഷിതമായ ഊർജ വിതരണമുണ്ടെന്ന് ഉറപ്പാക്കിക്കൊണ്ട് പ്രവർത്തിക്കുന്നത്’- അവർ കൂട്ടിച്ചേർത്തു.

ന്യൂസ് ഡെസ്ക് മലയാളം യുകെ ന്യൂസ്

യു കെ :- ഇന്ത്യ-പാകിസ്ഥാൻ ക്രിക്കറ്റ് മത്സരത്തെത്തുടർന്ന് ലെസ്റ്ററിൽ അടുത്തിടെ നടന്ന കലാപങ്ങൾ യുകെയിലേക്കുള്ള അനിയന്ത്രിതമായ കുടിയേറ്റവും പുതുമുഖങ്ങളുടെ സംയോജനത്തിലെ പരാജയവും മൂലമാണെന്ന് ബ്രിട്ടനിലെ ഇന്ത്യൻ വംശജയായ ആഭ്യന്തര സെക്രട്ടറി സുവല്ല ബ്രെവർമാൻ കുറ്റപ്പെടുത്തി. ഒക്‌ടോബർ 4-ന് വൈകുന്നേരം ബർമിംഗ്ഹാമിൽ നടന്ന കൺസർവേറ്റീവ് പാർട്ടി വാർഷിക സമ്മേളനത്തിൽ ആഭ്യന്തര മന്ത്രിയായി നിയമിതയായ ശേഷമുള്ള തന്റെ ആദ്യ പ്രസംഗത്തിലാണ് ബ്രേവർമാൻ ഈ പരാമർശം നടത്തിയത്. കഴിഞ്ഞ മാസം നിരവധി ഹിന്ദു-മുസ്ലിം ഗ്രൂപ്പുകൾ ഉൾപ്പെട്ട സംഘട്ടനങ്ങൾക്ക് ശേഷം കിഴക്കൻ ഇംഗ്ലണ്ട് നഗരം താൻ സന്ദർശിച്ചതിനെ കുറിച്ച് ബ്രെവർമാൻ തന്റെ പ്രസ്താവനയിൽ പരാമർശിച്ചു. ഇന്ത്യൻ വംശജരുടെ സുരക്ഷയെക്കുറിച്ച് ആശങ്ക പ്രകടിപ്പിച്ച് ലണ്ടനിലെ ഇന്ത്യൻ ഹൈക്കമ്മീഷനും  ഇതേ തുടർന്ന് പ്രസ്താവന ഇറക്കിയിരുന്നു. താൻ ലെയ്സെസ്റ്റർ അടുത്തിടെ സന്ദർശിച്ചതായും നിരവധി മതങ്ങളിലും സംസ്കാരങ്ങളിലുമുള്ള ആളുകൾ ഒരുമിച്ച് ചേർന്ന് താമസിക്കുന്ന ഒരു സ്ഥലമാണ് അതെന്നും, എന്നാൽ അവിടെയും വലിയൊരു വിഭാഗം പുതുമുഖങ്ങളെ സംയോജിപ്പിക്കുന്നതിൽ പരാജയപ്പെട്ടിരിക്കുന്നതിനാലാണ് കലാപങ്ങളും ആഭ്യന്തര പ്രശ്നങ്ങളും ഉണ്ടാകുന്നതെന്ന് ബ്രെവർമാൻ പറഞ്ഞു.

കുറഞ്ഞ വൈദഗ്ധ്യമുള്ള വിദേശ തൊഴിലാളികളെ വെട്ടിക്കുറയ്ക്കുമെന്നുള്ള ആഭ്യന്തര സെക്രട്ടറിയുടെ പ്രസ്താവന ഇന്ത്യയിൽ നിന്നുള്ള കുടിയേറ്റക്കാരെ ബാധിക്കുമെന്നാണ് പ്രാഥമിക നിഗമനം. കുടിയേറ്റത്തെ നിയന്ത്രിക്കുന്നതിന്റെ ഭാഗമായി,  ഇംഗ്ലീഷ് ചാനലിലൂടെ അനധികൃത കുടിയേറ്റക്കാരെ കൊണ്ടുവരുന്ന ചെറുബോട്ടുകളെ നിയന്ത്രിക്കുമെന്നും ആഭ്യന്തര മന്ത്രി വ്യക്തമാക്കിയിട്ടുണ്ട്. ഇത്തരം നിയന്ത്രണങ്ങൾ ഇന്ത്യയിൽ നിന്നും ബ്രിട്ടനിലേക്ക് പോകുവാൻ ആഗ്രഹിക്കുന്നവർക്ക് തടസ്സമാകും എന്ന ആശങ്കയും നിലനിൽക്കുന്നുണ്ട്.

സാമൂഹിക രാഷ്ട്രീയ രംഗത്തെ മികച്ച ഇടപെടലിനുള്ള 2022 ലെ മലയാളം യുകെ അവാർഡ് ശ്രീ. ബൈജു വർക്കി  തിട്ടാലയ്ക്ക്. ഒക്ടോബർ എട്ടിന് കീത്ത് ലിയിലെ വിക്ടോറിയ ഹാളിൽ വച്ച് നടക്കുന്ന പ്രൌഡ ഗംഭീരമായ ചടങ്ങിൽ വച്ച് ബൈജു വർക്കി തിട്ടാലയ്ക്ക് ഈ അവാർഡ് സമ്മാനിക്കും. ഒക്ടോബർ എട്ട് ശനിയാഴ്ച ഉച്ചയ്ക്ക് രണ്ട് മണി മുതലാണ് മലയാളം യുകെ ഓൺലൈൻ പോർട്ടൽ സംഘടിപ്പിക്കുന്ന അവാർഡ് നൈറ്റും ബോളിവുഡ് ഡാൻസ് ഫെസ്റ്റും നടക്കുക. യുകെ മലയാളി സമൂഹത്തിൽ നിന്നും വിവിധ മേഖലകളിൽ അനിതര സാധാരണമായ നിലയിൽ മികച്ച പ്രവർത്തനം കാഴ്ച വച്ചവരെയാണ് മലയാളം യുകെ അവാർഡിന് തെരഞ്ഞെടുത്തിരിക്കുന്നത്.

കേരളത്തിലെ ഒരു സാധാരണ കർഷക തൊഴിലാളി കുടുംബത്തിൽ ജനിച്ച് സാമ്പത്തിക പരാധീനതകളാൽ ഉന്നത വിദ്യാഭ്യാസത്തിന് അവസരം നിഷേധിക്കപ്പെടുകയും ചെയ്തിട്ടുള്ള ബൈജു വർക്കി തിട്ടാല യുകെയിലെത്തിയ ശേഷം സ്വ പ്രയത്നത്തിലൂടെ ഉയർന്ന് വന്ന അപൂർവ്വ വ്യക്തിത്വമാണ്. 2013 ൽ ആംഗ്ലിയ റസ്കിൻ യൂണിവേഴ്സിറ്റിയിൽ നിന്നും എൽ എൽ ബി ബിരുദം നേടിയായിരുന്നു തുടക്കം. പിന്നീട് ഈസ്റ്റ് ആംഗ്ലിയ യൂണിവേഴ്സിറ്റിയിൽ നിന്നും എംപ്ലോയ്മെൻറ് ലോയിൽ ഉന്നത ബിരുദം നേടി. ഇക്കാലയാളവിൽ തന്നെ യുകെയിലുടനീളം സഞ്ചരിച്ച് ജോലിസ്ഥലങ്ങളിൽ തൊഴിലാളികൾ നേരിടുന്ന അവകാശ ലംഘനങ്ങൾക്കെതിരെ ബോധവത്കരണം നടത്തുകയും ചെയ്തു. തൊഴിൽ രംഗത്ത് നീതി നിഷേധിക്കപ്പെട്ട പലർക്കും ബൈജുവിന്റെ സേവനങ്ങൾ ഇക്കാലത്ത് തുണയായി മാറിയിരുന്നു.

2018 ൽ കേംബ്രിഡ്ജിലെ ഈസ്റ്റ് ചെസ്റ്റർട്ടൻ മണ്ഡലത്തിൽ നിന്നും കൌൺസിലർ ആയി തെരഞ്ഞെടുക്കപ്പെട്ട ബൈജു വർക്കി തിട്ടാല മികച്ച പ്രവർത്തനം കാഴ്ച വയ്ക്കുകയും 2022 ൽ വീണ്ടും തെരഞ്ഞെടുക്കപ്പെടുകയും ഉണ്ടായി. കൌൺസിലർ ആയി പ്രവർത്തിക്കുന്നതിനിടയിൽ തന്നെ 2019 ൽ സോളിസിറ്റർ ആയി മാറിയ ബൈജു തിട്ടാല  ക്രിമിനൽ ഡിഫൻസ് ലോയർ ആയി ജോലിയിൽ പ്രവേശിക്കുകയും ചെയ്തു.

യുകെയിലെത്തിയ മലയാളികൾ ഏറ്റവുമധികം പേരും തൊഴിൽ രംഗമായി തെരഞ്ഞെടുത്ത ആതുര സേവനരംഗത്ത് നേരിടുന്ന വിവേചനങ്ങൾക്കെതിരെ നടത്തിയ പ്രവർത്തനങ്ങളിലൂടെയാണ് ബൈജു വർക്കി തിട്ടാല കൂടുതൽ ശ്രദ്ധേയനായത്. യൂറോപ്യൻ യൂണിയന് വെളിയിലുള്ള നഴ്സുമാർക്ക് ഏർപ്പെടുത്തിയിട്ടുള്ള ഭാഷാപരിജ്ഞാന നിബന്ധനകൾ മൂലം മലയാളികളായ നിരവധി നഴ്സുമാർക്ക് അർഹിക്കുന്ന ജോലിയും തൊഴിൽ പരമായ ഉയർച്ചയും പലപ്പോഴും തടയപ്പെട്ടിരുന്നു. ഇതിനെതിരെ യുകെയിൽ ഉയർന്ന് വന്ന പ്രതിഷേധങ്ങളിൽ നിർണ്ണായക പങ്ക് വഹിച്ച ബൈജു വർക്കി തിട്ടാല പ്രാദേശിക എം പി മാരുടെയും മറ്റും നേതൃത്വത്തിൽ  നടത്തിയ കാമ്പെയിനുകളിലും നിറ  സാന്നിദ്ധ്യമായിരുന്നു . ഇത്തരം പ്രവർത്തനങ്ങളുടെ ഫലമായി ഭാഷാ പ്രാവീണ്യം സംബന്ധിച്ച് ഏർപ്പെടുത്തിയിരുന്ന പല കടുത്ത നിബന്ധനകളും പിൻവലിക്കുകയുണ്ടായി.

മലയാളം യുകെ അവാർഡ് ലഭിക്കുന്നതിൽ സന്തോഷം രേഖപ്പെടുത്തിയ ബൈജു വർക്കി തിട്ടാല മലയാളി നഴ്സുമാർക്ക് വേണ്ടി താൻ നടത്തിയ പോരാട്ടങ്ങൾ കൂടി പരിഗണിച്ചാണ് അവാർഡ് എന്നത് കൂടുതൽ ചാരിതാർഥ്യം നല്കുന്നതായും പറഞ്ഞു. തന്റെ സേവനങ്ങൾ മലയാളം യുകെയിലൂടെ അംഗീകരിക്കപ്പെട്ടപ്പോൾ  ഈ രംഗത്ത് തന്നോടൊപ്പം പ്രവർത്തിച്ചവരെ ഈ സമയം ഓർമ്മിക്കാതിരിക്കാൻ പറ്റില്ലെന്നും ബൈജു പറഞ്ഞു. ഡെർബിയിൽ നിന്നും നോട്ടിംഗ്ഹാമിൽ നിന്നും കേംബ്രിഡ്ജിൽ നിന്നും ഗ്ലാസ്ഗോയിൽ നിന്നും ബെൽഫാസ്റ്റിൽ നിന്നും   ലണ്ടനിലെത്തി കാമ്പെയിനിൽ പങ്കെടുത്തവർ, കേംബ്രിഡ്ജ് എം പി, കൌൺസിലർമാർ, സാമൂഹ്യ പ്രവർത്തന രംഗത്തെ സഹപ്രവർത്തകരായ സുഗതൻ തെക്കേപ്പുര, കാർമൽ മിരാൻഡ, ഇബ്രാഹിം വക്കുളങ്ങര, ആന്റണി സേവ്യർ, ജിജി നട്ടാശ്ശേരി,  എ ഐ സി നേതാവ് ഹർസേവ് ബെയിൻസ്,  മാധ്യമ രംഗത്ത് നിന്ന് മികച്ച പിന്തുണ നല്കിയ മലയാളം യുകെയും പ്രത്യേകിച്ച് ചീഫ് എഡിറ്റർ ബിൻസു ജോൺ, ഡയറക്ടറായ തോമസ് ചാക്കോ തുടങ്ങിയവർ നല്കിയ സപ്പോർട്ട്, യുക്മയുടെ പ്രഥമ പ്രസിഡന്റ് ആയിരുന്ന വർഗീസ് ജോൺ  തുടങ്ങി നിരവധി പേരെ ഈ സമയം എടുത്തുപറയാൻ ആഗ്രഹിക്കുന്നു എന്നും ബൈജു തിട്ടാല അറിയിച്ചു.

ഒക്ടോബര്‍ എട്ടാം തീയതി യോര്‍ക്ഷയറിലെ കീത്തിലിയില്‍ നടക്കുന്ന അവാര്‍ഡ് നൈറ്റിന് വളരെ വിപുലമായ ഒരുക്കങ്ങളാണ് മലയാളം യുകെ ന്യൂസ് ഒരുക്കിയിരിക്കുന്നത്.  ഉച്ചതിരിഞ്ഞ് രണ്ടുമണിക്ക് ആരംഭിക്കുന്ന ബോളിവുഡ് ഡാൻസ് മത്സരങ്ങളും മലയാളം യുകെ അവാർഡ് നൈറ്റും വൈകുന്നേരം 9 മണിയോടെ അവസാനിക്കും. യുകെയുടെ വിവിധ ഭാഗങ്ങളിലുള്ള തിരഞ്ഞെടുക്കപ്പെട്ട കലാകാരന്മാര്‍ അവാര്‍ഡ് നൈറ്റില്‍ വിസ്മയങ്ങള്‍ വിരിയിക്കാനുള്ള ഒരുക്കത്തിലാണ്. അവാര്‍ഡ് നൈറ്റ് മനോഹരമാക്കാനായിട്ട് ആധുനിക സാങ്കേതിക വിദ്യയുടെ സഹായത്തോടെയുള്ള മികച്ച സൗകര്യങ്ങളാണ് പ്രേക്ഷകര്‍ക്കായി കാത്തിരിക്കുന്നത്.

താഴെ നൽകിയിരിക്കുന്ന ലിങ്കിൽ ഒക്ടോബർ എട്ടിന് രണ്ട് മണി മുതൽ പരിപാടിയുടെ തത്സമയ സംപ്രേഷണം ലഭ്യമാണ്.

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: ഒക്ടോബർ 8-ാം തീയതി യോർക്ക് ഷെയറിൽ വച്ച് നടത്തപ്പെടുന്ന മലയാളം യുകെ അവാർഡ് നൈറ്റിൽ യുകെയിലെ മികച്ച ജീവകാരുണ്യ പ്രവർത്തകനുള്ള അവാർഡ് ടോം ജോസഫ് തടിയമ്പാടിന് സമ്മാനിക്കും. ജീവകാരുണ്യ പ്രവർത്തനങ്ങൾക്കുള്ള സംഭാവനകളെ പരിഗണിച്ചാണ് ഇദ്ദേഹത്തെ അവാർഡ് ജേതാവായി തെരഞ്ഞെടുത്തത്.ഇടുക്കി ചാരിറ്റിയുടെ സെക്രട്ടറിയായ ടോം ഒരു പതിറ്റാണ്ടിലേറെയായി കേരളത്തിൽ അശരണരും നിരാലംബരുമായ നിരവധി പേർക്ക് തന്റെ ചാരിറ്റി പ്രവർത്തനത്തിലൂടെ സഹായഹസ്തം നൽകിയിട്ടുണ്ട്.

ഒക്ടോബര്‍ എട്ടാം തീയതി യോര്‍ക്ഷയറിലെ കീത്തിലിയില്‍ നടക്കുന്ന അവാര്‍ഡ് നൈറ്റിന് വളരെ വിപുലമായ ഒരുക്കങ്ങളാണ് മലയാളം യുകെ ന്യൂസ് ഒരുക്കിയിരിക്കുന്നത്.  ഉച്ചതിരിഞ്ഞ് രണ്ടുമണിക്ക് ആരംഭിക്കുന്ന ബോളിവുഡ് ഡാൻസ് മത്സരങ്ങളും മലയാളം യുകെ അവാർഡ് നൈറ്റും വൈകുന്നേരം 9 മണിയോടെ അവസാനിക്കും. യുകെയുടെ വിവിധ ഭാഗങ്ങളിലുള്ള തിരഞ്ഞെടുക്കപ്പെട്ട കലാകാരന്മാര്‍ അവാര്‍ഡ് നൈറ്റില്‍ വിസ്മയങ്ങള്‍ വിരിയിക്കാനുള്ള ഒരുക്കത്തിലാണ്. അവാര്‍ഡ് നൈറ്റ് മനോഹരമാക്കാനായിട്ട് ആധുനിക സാങ്കേതിക വിദ്യയോടെ സഹായത്തോടെയുള്ള മികച്ച സൗകര്യങ്ങളാണ് പ്രേക്ഷകര്‍ക്കായി കാത്തിരിക്കുന്നത്.

താഴെ നൽകിയിരിക്കുന്ന ലിങ്കിൽ ഒക്ടോബർ എട്ടിന് രണ്ട് മണി മുതൽ പരിപാടിയുടെ തത്സമയ സംപ്രേഷണം ലഭ്യമാണ്.

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: രണ്ട് വർഷത്തെ ഫിക്സഡ് റേറ്റ് മോർട്ട്ഗേജിന്റെ പലിശ നിരക്ക് 14 വർഷത്തിനിടെ ആദ്യമായി 6% കടന്നു. സാധാരണ ഇടപാടിന് 6.07% നിരക്കാണ് ഉള്ളതെന്ന് സാമ്പത്തിക വിവര സേവനമായ മണിഫാക്‌സ് പറയുന്നു. 2008 നവംബറിലെ സാമ്പത്തിക പ്രതിസന്ധിക്ക് ശേഷമാണ് ഇത്രയും ഉയർന്നത്. മോർട്ട്ഗേജ് നിരക്കുകൾ മാസങ്ങളായി വർദ്ധിച്ചുകൊണ്ടിരിക്കുകയാണ്, എന്നാൽ ഏകദേശം രണ്ടാഴ്ച മുമ്പ് മിനി ബജറ്റിലെ വീഴ്ചയുടെ ഫലമായി കുത്തനെ വർദ്ധനവ് രേഖപ്പെടുത്തിയിട്ടുണ്ട്.

ആദ്യമായി വാങ്ങുന്നവരെയും റീമോർട്ട്ഗേജ് ചെയ്യാൻ ആഗ്രഹിക്കുന്നവരെയും ഇത് ബാധിക്കുന്നു. പ്രതിമാസം ശരാശരി 100,000 പേരെങ്കിലും അവരുടെ നിലവിലെ മോർട്ട്‌ഗേജ് അവസാനിപ്പിക്കുന്നു. ഇതുമൂലം അവരുടെ പ്രതിമാസ തിരിച്ചടവിൽ ഗണ്യമായ വർദ്ധനവ് നേരിടുന്നു.

“ഫിക്സഡ് മോർട്ട്ഗേജ് നിരക്കുകളിലേക്കുള്ള വർദ്ധനയെക്കുറിച്ച് കടം വാങ്ങുന്നവർ ആശങ്കാകുലരായിരിക്കാം, പക്ഷേ അവർക്ക് ഇപ്പോൾ ലഭ്യമായ ഡീലുകൾ വിലയിരുത്തുന്നതിന് അവർ ഉപദേശം തേടേണ്ടത് അത്യാവശ്യമാണ്,” മണിഫാക്ടിൽ നിന്നുള്ള റേച്ചൽ സ്പ്രിംഗാൽ പറയുന്നു.

“കൂടുതൽ സമയത്തേക്കുള്ള ഫിക്സിംഗ് കൂടുതൽ ആകർഷകമായി തോന്നിയേക്കാം, പ്രത്യേകിച്ചും ശരാശരി രണ്ടും അഞ്ചും വർഷത്തെ സ്ഥിരമായ നിരക്കുകൾ ഒരു ദശാബ്ദത്തിനിടയിൽ കാണാത്ത നിലവാരത്തിലേക്ക് ഉയരുന്നതിനാൽ. ഉപഭോക്താക്കൾ ഇപ്പോൾ ഒരു വീട് വാങ്ങാനുള്ള ശരിയായ സമയമാണോ അതോ കാത്തിരിക്കണോ എന്ന് ശ്രദ്ധാപൂർവ്വം ആലോചിക്കണം. വരും ആഴ്ചകളിൽ കാര്യങ്ങൾ എങ്ങനെ മാറുമെന്ന് കാണുക.” അവർ കൂട്ടിച്ചേർത്തു.

നിലവിലെ സാമ്പത്തിക അനിശ്ചിതത്വത്തിനിടയിൽ പണമിടപാടുകാർ നിരക്കുകളിൽ സുരക്ഷിതമായി കളിക്കുകയാണെന്ന് ബ്രോക്കർമാർ പറയുന്നു. എന്നാൽ ചെലവ് ക്രമേണ കുറയാൻ തുടങ്ങുമെന്നാണ് വിഷയത്തിൽ വിദഗ്ധർ ചൂണ്ടിക്കാട്ടുന്നത്.

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: വാഹനയുടമകൾക്ക് മുന്നറിയിപ്പുമായി അധികൃതർ. ഇന്ധനം നിറയ്ക്കുന്നതമായി ബന്ധപ്പെട്ടാണ് പുതിയ മുന്നറിയിപ്പ്. ഇന്ധനം നിറയ്ക്കുമ്പോൾ ഇടയ്ക്ക് വെച്ച് പ്രവർത്തനം നിലച്ചാൽ നിർത്തിവെക്കണമെന്നാണ് മുന്നറിയിപ്പിൽ പറയുന്നത്. ഇത് വാഹനത്തിന് കേടുപാടുകൾ ഉണ്ടാക്കുമെന്നും ഉടമകൾക്ക് സാമ്പത്തിക നഷ്ടം വരുത്തിവെക്കുമെന്നുമാണ് അധികൃതർ പറയുന്നത്.

‘ടോപ്പിംഗ് ഓഫ്’ എന്നറിയപ്പെടുന്ന ഫ്യൂവൽ പമ്പ് ആദ്യത്തെ ക്ലിക്കിന് ശേഷം വീണ്ടും ഞെക്കിയാൽ ഏറ്റവും അടുത്തുള്ള പൗണ്ടിലേക്ക് റൗണ്ട് അപ്പ് ചെയ്യുന്നത് മൂല്യവത്താണെന്ന് തോന്നുമെങ്കിലും, അത് ശരിയല്ലെന്നാണ് യുകെ ലീസിംഗ് സ്ഥാപനമായ സെലക്ട് കാർ ലീസിംഗ് മാനേജിംഗ് ഡയറക്ടർ ഗ്രഹാം കോൺവേ പറയുന്നത്.

അദ്ദേഹത്തിന്റെ വാക്കുകൾ ഇങ്ങനെ..”ഇന്ധനം നിറയ്ക്കുമ്പോൾ അധിക ഇന്ധനം എൻട്രിക്ക് താഴെയുള്ള ചെറിയ ഡ്രെയിനിലേക്കും നിങ്ങളുടെ വാഹനത്തിന് താഴെയുള്ള നിലത്തിലേക്കും ഒഴുകും. ചില പമ്പുകളിൽ അധിക ഇന്ധനം വന്നേക്കാം.ഇത് പൈപ്പിലേക്ക് തിരികെ വലിച്ചെടുക്കും. അവരുടെ സ്വന്തം ഇന്ധനം അവർക്ക് തിരികെ നൽകാൻ നിങ്ങൾ പെട്രോൾ സ്റ്റേഷനിൽ പണം നൽകുന്നുവെന്നാണ് ഇതിനർത്ഥം. കൂടുതൽ ഗുരുതരമായ ഒരു പ്രശ്നം, നിങ്ങളുടെ കാറിന് കേടുപാടുകൾ വരുത്തുകയും നിങ്ങൾക്ക് ഗുരുതരമായ പണച്ചെലവ് വരുത്തുകയും ചെയ്യും എന്നുള്ളതാണ്”.

മിച്ചമുള്ള പെട്രോളോ ഡീസലോ ടാങ്കിലേക്ക് നിർബന്ധിക്കുകയാണെങ്കിൽ, ഇത് ദ്രാവക ഇന്ധനത്തെ പൈപ്പുകളിലേക്ക് തള്ളിവിടുകയും നീരാവി വീണ്ടെടുക്കൽ സംവിധാനത്തെ നശിപ്പിക്കുകയും ചെയ്യുമെന്നും അധികൃതർ ചൂണ്ടികാട്ടുന്നു. ഒരേ സമയം സാമ്പത്തികപരവും അല്ലാതെയുമുള്ള നഷ്ടമാണ് ഇതിലൂടെ ഉണ്ടാകുന്നത്.

ന്യൂസ് ഡെസ്ക് മലയാളം യുകെ ന്യൂസ്

യു കെ :- എട്ടുവർഷം മുൻപ് നടന്ന കൗമാരക്കാരിയുടെ മരണത്തിൽ ഹെൽത്ത് ആൻഡ് സേഫ്റ്റി ആക്ട് പ്രകാരം വിചാരണ നേരിടുകയാണ് കെയർ ഹോം ഉടമ. 2014 ഒക്ടോബറിൽ ബ്രിസ്റ്റോളിൽ ഓട്ടിസം& അസ്‌പേർജർസ് സിൻഡ്രോം അനുഭവിക്കുന്നവരെ സംരക്ഷിക്കുന്നതിനായുള്ള അലക്സാണ്ട്ര ഹൗസിൽ വച്ചാണ് പതിനെട്ടു വയസ്സുകാരി മെലിസ്സ മാറ്റിയെസനെ ജയ്സ്ൻ കോൺറോയി കൊലപ്പെടുത്തിയത്. അന്ന് 19 വയസ്സുകാരനായ കോൺറോയ്ക്ക് ജീവപര്യന്തം തടവുശിക്ഷ ലഭിക്കുകയും ലൈംഗികമായി പ്രേരിപ്പിച്ച കൊലപാതകത്തിന് ബ്രിസ്റ്റോൾ ക്രൗൺ കോടതിയിൽ കുറഞ്ഞത് 19 വർഷം തടവ് ലഭിക്കുകയും ചെയ്തിരുന്നു. ഈ വർഷം സെപ്തംബറിൽ, ഹെൽത്ത് ആൻഡ് സേഫ്റ്റി എക്സിക്യൂട്ടീവ് (എച്ച്എസ്ഇ) അലക്സാന്ദ്ര ഹോംസ് (ബ്രിസ്റ്റോൾ) ലിമിറ്റഡിനെതിരെയും, അതിന്റെ മുൻ കെയർ ഹോം ജനറൽ മാനേജർ ഇവോൺ ഹിനിനെതിരെയും മാറ്റിസണിന്റെ മരണത്തിൽ കുറ്റം ചുമത്തിയതായി പ്രഖ്യാപിച്ചു.

ഹെൽത്ത് ആന്റ് സേഫ്റ്റി അറ്റ് വർക്ക് ആക്ട് 1974-ന് വിരുദ്ധമായ രണ്ട് കുറ്റങ്ങൾ നേരിടാനായി കമ്പനി അധികൃതരും ഹിന്നിനൊപ്പം ബുധനാഴ്ച ബ്രിസ്റ്റോൾ മജിസ്‌ട്രേറ്റ് കോടതിയിൽ ഹാജരായി. 2014 ഫെബ്രുവരി 13 നും ആ വർഷം ഒക്ടോബർ 13 നും ഇടയിൽ സ്ഥാപനത്തിലെ താമസക്കാരിൽ നിന്നുള്ള ആക്രമണത്തിൽ നിന്നും കെയർ ഹോമിലെ ജീവനക്കാരുടെ ആരോഗ്യം, സുരക്ഷ, ക്ഷേമം എന്നിവ ഉറപ്പാക്കുന്നതിലും പരാജയപ്പെട്ടതിനാണ് ഹിൻ ആൻഡ് അലക്‌സാന്ദ്ര ഹോംസ് (ബ്രിസ്റ്റോൾ) ലിമിറ്റഡിനെതിരെ പ്രാഥമികമായി കുറ്റം ചുമത്തിയിരിക്കുന്നത്. ഡെവോണിലെ ഇൽഫ്രാകോംബെയിൽ നിന്നുള്ള 44 കാരനായ ഹിനും ബ്രിസ്റ്റോളിലെ കിംഗ്‌സ്‌വുഡിലെ കമ്പനിയും കോടതി വാദത്തിനിടെ തങ്ങൾക്കെതിരായ രണ്ട് കുറ്റങ്ങളിൽ കുറ്റം നിഷേധിച്ചു. ജില്ലാ ജഡ്ജി ലിൻ മാത്യൂസ് ഹിനിന് നിരുപാധിക ജാമ്യം അനുവദിക്കുകയും കേസ് ഒക്ടോബർ 31 ന് ബ്രിസ്റ്റോൾ ക്രൗൺ കോടതിയിലേക്ക് മാറ്റുകയും ചെയ്തു.

ന്യൂസ് ഡെസ്ക് മലയാളം യുകെ ന്യൂസ്

പെണ്ണുങ്ങളായാൽ നല്ല അടക്കോം ഒതുക്കോം വേണം . അലമാരിയിൽ വച്ചിട്ടില്ലേ കുറെ എടുക്കാത്ത തുണികളും പാത്രങ്ങളുമൊക്കെ ? അതെ നമ്മുടെ പെണ്ണുങ്ങളും അങ്ങനെത്തന്നെയാവണമെന്ന് പറയാതെ പറയുന്ന അല്ലെങ്കിൽ അടക്കി പറഞ്ഞു ചിരിക്കുന്ന മനുഷ്യർക്കിടയിലൂടെ വളർന്നു വന്ന ഒരുവളാണ് ഇന്നീ ഇവിടെ വരെയെത്തി നിൽക്കുന്ന ജോസ്‌നയെന്ന മലയാളി നേഴ്‌സ്‌ അവസാന വർഷ വിദ്യാർത്ഥിനി. ഇതാ മലയാളം യുകെയുടെ സോഷ്യൽ റീഫോമർ (സാമൂഹിക പരിഷ്‌കർത്താവ്) അവാർഡിന് അർഹയായിരിക്കുന്നു.

അതെ ഒരു പക്കാ ക്രിസ്ത്യൻ കുടുംബത്തിൽ പിറന്ന് നല്ല നടപ്പ് പഠിക്കാൻ വളരെ ചെറുപ്പം മുതലേ കന്യാസ്ത്രീകളുടെ പരിചരണത്തിൽ കോൺവെന്റിൽ വളർന്ന് മനസിന് നല്ല തഴക്കവും വഴക്കവും വരുത്തി, പിന്നീട് പറിച്ചുനടപ്പെട്ടതും ഒരുപറ്റം നല്ല കന്യാത്രീകളും അച്ചന്മാരുമൊക്കെ അടങ്ങുന്ന ഒരു ഫാമിലിയിലേക്ക് തന്നെയാണ്. അങ്ങനത്തെയൊരു ചുറ്റുപാടിൽനിന്നും വളർന്ന് ഇന്നീ നിലയിലേക്ക് എത്താൻ , പലരും പറയാൻ മടിക്കുന്ന നാണിക്കുന്ന എന്നാൽ അടിസ്ഥാനമായി തന്നെ അറിയേണ്ടുന്ന ഒരു വിഷയം സമൂഹത്തിൽ ഇതിനുമാത്രം പൊക്കത്തിൽ ആളിക്കത്തിക്കാൻ ഈ കുട്ടിക്ക് ആകുന്നുണ്ടെങ്കിൽ അവളുടെ ഉള്ളിന്റെ ഉള്ളിലെ നെരിപ്പോടിലെ ചൂട് എന്തുമാത്രമുണ്ടാകുമെന്ന് നമുക്കൂഹിക്കാവുന്നതിനുമപ്പുറമാണ്.

എപ്പോഴും ചിരിച്ചു കളിച്ചു ആർത്തുല്ലസിച്ചു നടക്കുന്ന ഒരു ചിത്രശലഭത്തോടാണ് അവളെ അവളുടെ സഹപാഠികൾ നോക്കികാണുന്നത് . എപ്പോഴും സന്തോഷം, വർത്തമാനം , തമാശകൾ , പൊട്ടിച്ചിരി, അവളെ ചിരിച്ച മുഖത്തോടെയല്ലാതെ ആരും കണ്ടിട്ടില്ല എന്നും കൂട്ടുകാർ പറയുന്നു . അതിനർത്ഥം അവൾക്ക് സങ്കടപെടാൻ ഒന്നുമില്ല എന്നാണോ? അല്ല ഒരിക്കലുമല്ല . മറിച്ചു ഏതൊരു കുറ്റപ്പെടുത്തലുകളെയും , അവഗണനകളെയും , കളിയാക്കലുകളെയും , പ്രലോഭനങ്ങളെയും അതിജീവിക്കാൻ അവളിന്ന് പഠിച്ചിരിക്കുന്നു .

എല്ലാത്തിനെയും അതിന്റെതായ രീതിയിൽ മാത്രം നോക്കിക്കാണുക, കയ്യടിക്കുന്നവരുടെ കയ്യടിയിൽ അവ ഏറെനേരം നീണ്ടു നിൽക്കില്ല എന്ന് മനസിലാക്കിത്തന്നെ ചെറിയൊരു പുഞ്ചിരി നൽകി കടന്ന് പോകുന്ന , കുറ്റം പറയുന്നവരുടെ, പുച്ഛിക്കുന്നവരുടെ ചെയ്തികൾ അവരുടെ ഹോർമോൺ ഉല്പാദിപ്പിക്കുന്ന അവരുടെ മാത്രം ഉല്പന്നമായി മാത്രം കണ്ട് അത് മേടിക്കാതെ കടന്നു പോവുന്ന, പണം, പദവി, പ്രശംസ ഒന്നിനും അടിമപ്പെടാതെ ഇരിക്കുന്ന, പലരും പറയാൻ മടിക്കുന്ന കാര്യങ്ങൾ മുഖം നോക്കാതെ വെട്ടി തുറന്നു പറയുന്ന, സമൂഹത്തിന് വേണ്ടുന്ന പല നല്ലകാര്യങ്ങളും സ്വന്തം പോക്കറ്റിലെ പണമോ സമയമോ നോക്കാതെ ചെയ്യുന്ന, മതത്തിനോ രാഷ്ട്രീയത്തിനോ അടിമപ്പെടാതെ പച്ച മനുഷ്യനായി ജീവിക്കുന്ന രീതികൾ , ഇവയൊക്കെ ജോസ്‌നയെന്ന നേഴ്‌സിനെ മറ്റുള്ളവരിൽ നിന്നും ഏറെ വ്യത്യസ്തയാക്കുന്നു.

എഴുതിത്തുടങ്ങിയപ്പോൾ എല്ലാവരും എതിർത്തു , ഇങ്ങനെയൊക്കെ പെണ്ണുങ്ങൾ എഴുതാമോ , അതോ ഇനി ഇതൊക്കെ വീട്ടിൽ നടക്കുന്ന കാര്യങ്ങളാണോ ഈ ഏഴുതികൂട്ടുന്നതെന്ന ചോദ്യങ്ങൾ, പെണ്ണുങ്ങളായാൽ നല്ല അടക്കവും ഒതുക്കവും വേണമെന്ന ശകാരങ്ങൾ, കുട്ടികളെ നോക്കാറുണ്ടോ, വീട്ടിൽ കഞ്ഞി വക്കാറുണ്ടോ എന്നീ ചോദ്യങ്ങൾ…. എല്ലാറ്റിനെയും പുല്ലുപോലെ പറിച്ചു കളഞ്ഞു അവൾ അവൾക്കായി വഴിതെളിച്ചു ….കുറ്റപ്പെടുത്തലുകൾ, പരിഹാസങ്ങൾ, ഇവയെല്ലാം അവൾ അവൾക്കു തന്നെ തഴച്ചു വളരാൻ വളമാക്കി ….ഇന്നിതാ വളർന്നുവരുന്ന പുതുതലമുറയ്ക്ക് അവരുടെ സുരക്ഷയ്ക്കായി സൗജന്യമായി ബുക്ക് പബ്ലിഷ് ചെയ്യുന്നു , അതിനായി ഗവൺമെന്റ് തലത്തിൽ ടീച്ചർമാർക്കും മാതാപിതാക്കൾക്കുമായി സൗജന്യ ഓൺലൈൻ ക്ലാസ്സുകളെടുക്കുന്നു …
ഇനിയും ജോസ്‌നയെന്ന ടീച്ചർക്ക് ഇനിയും വളരാനേറെയുണ്ട് .

അതെ…. വളരാൻ പെണ്ണെണോ ആണെന്നോ ഇല്ല…
പണമോ, പദവിയോ, മത രാഷ്ട്രീയ അടിമത്വങ്ങളോ ഒന്നുമൊരു തടസമല്ല…മുനവെച്ച ചോദ്യങ്ങൾക്ക്‌ ചെവി കൊടുക്കാത്തതുകൊണ്ട് ഇന്ന് നാട്ടിലെ സ്കൂളുകളിൽ കുട്ടികൾക്കായി സെക്സ് എഡ്യൂക്കേഷൻ ക്ലാസുകൾ ഓൺലൈൻ ആയി എടുത്തുകൊടുക്കുന്നു… ഇനിയെങ്കിലും നമ്മുടെ കണ്ണും കാതും തുറന്ന്… മഞ്ഞ കണ്ണടയില്ലാതെ നോക്കിക്കാണാം… അവാർഡ് ജേതാവിന് അഭിനന്ദനങ്ങൾ…

ഒക്ടോബര്‍ എട്ടാം തീയതി യോര്‍ക്ഷയറിലെ കീത്തിലിയില്‍ നടക്കുന്ന അവാര്‍ഡ് നൈറ്റിന് വളരെ വിപുലമായ ഒരുക്കങ്ങളാണ് മലയാളം യുകെ ന്യൂസ് ഒരുക്കിയിരിക്കുന്നത്.  ഉച്ചതിരിഞ്ഞ് രണ്ടുമണിക്ക് ആരംഭിക്കുന്ന ബോളിവുഡ് ഡാൻസ് മത്സരങ്ങളും മലയാളം യുകെ അവാർഡ് നൈറ്റും വൈകുന്നേരം 9 മണിയോടെ അവസാനിക്കും. യുകെയുടെ വിവിധ ഭാഗങ്ങളിലുള്ള തിരഞ്ഞെടുക്കപ്പെട്ട കലാകാരന്മാര്‍ അവാര്‍ഡ് നൈറ്റില്‍ വിസ്മയങ്ങള്‍ വിരിയിക്കാനുള്ള ഒരുക്കത്തിലാണ്. അവാര്‍ഡ് നൈറ്റ് മനോഹരമാക്കാനായിട്ട് ആധുനിക സാങ്കേതിക വിദ്യയുടെ സഹായത്തോടെയുള്ള മികച്ച സൗകര്യങ്ങളാണ് പ്രേക്ഷകര്‍ക്കായി കാത്തിരിക്കുന്നത്.

താഴെ നൽകിയിരിക്കുന്ന ലിങ്കിൽ ഒക്ടോബർ എട്ടിന് രണ്ട് മണി മുതൽ പരിപാടിയുടെ തത്സമയ സംപ്രേഷണം ലഭ്യമാണ്.

ന്യൂസ് ഡെസ്ക് മലയാളം യുകെ ന്യൂസ്

യു കെ :- സ്കൂളിൽ നിന്നുള്ള അവധിക്കാല വിനോദയാത്രയ്ക്കിടെ ഫ്രഞ്ച് തടാകത്തിൽ 2015 ജൂലൈയിൽ മുങ്ങി മരിച്ച ജെസ്സിക്ക ലോസണിന്റെ മരണത്തിൽ മനഃപൂർവമല്ലാത്ത നരഹത്യയ്ക്ക് വിചാരണ നേരിടുന്ന മൂന്ന് അധ്യാപകരുടെ വാദം ഫ്രഞ്ച് കോടതി കേട്ടു. അന്നത്തെ യാത്രയുടെ നേതൃത്വം വഹിച്ചിരുന്ന സ്റ്റീവൻ ലെയ്ൻ, ചാന്റൽ ലൂയിസ്, ഡെയ്‌സി സ്റ്റാതേഴ്‌സ് എന്നിവരാണ് മനഃപൂർവമല്ലാത്ത നരഹത്യയ്ക്ക് വിചാരണ നേരിടുന്നത്. ഹള്ളിനടുത്തുള്ള വില്ലർബിയിലെ വോൾഫ്രെട്ടൺ സ്കൂളിലെ വിദ്യാർത്ഥിനിയായിരുന്ന ജെസ്സിക്ക ലിമോജസ് നഗരത്തിനടുത്തുള്ള തടാകത്തിൽ ഒരു പൊണ്ടൂൺ മറിഞ്ഞതിനെ തുടർന്ന് മരണപ്പെട്ടത്. പോണ്ടൂൺ വളരെ സുരക്ഷിതമാണെന്നാണ് താൻ കരുതിയതെന്ന് ലേയ്ൻ കോടതിയിൽ പറഞ്ഞു. ഫ്രഞ്ച് പട്ടണമായ ടുലെയിലെ പാലൈസ് ഡി ജസ്റ്റിസിലാണ് ഇവരുടെ വിചാരണ നടന്നത്. സ്‌കൂളിൽ നിന്നോ അധ്യാപകരിൽ നിന്നോ യാതൊരു പിന്തുണയും ലഭിച്ചിട്ടില്ലെന്നും, വിചാരണ വേളയിൽ അധ്യാപകർക്ക് ബഹുമാനവും സത്യസന്ധതയും ഉണ്ടായിരിക്കുമെന്ന് താൻ പ്രതീക്ഷിച്ചിരുന്നുവെന്ന് കുട്ടിയുടെ അമ്മ ബ്രെൻഡ ലോസൺ കോടതിയിൽ വ്യക്തമാക്കി. മകളുടെ മരണത്തിലേക്ക് നയിച്ച സംഭവങ്ങളുടെ യഥാർത്ഥ അവസ്ഥ വിചാരണയ്ക്കിടെ മാത്രമാണ് തനിക്ക് മനസ്സിലായതെന്നും ഏഴ് വർഷമായി സ്‌കൂളോ അധ്യാപകരോ തനിക്ക് ഒരു വിശദീകരണം പോലും നൽകിയിട്ടില്ലെന്നും അവർ പറഞ്ഞു.

മൂന്ന് അധ്യാപകർക്കും ലൈഫ് ഗാർഡ് ലിയോ ലെമയറിനും മൂന്ന് വർഷത്തെ തടവ് ശിക്ഷയാണ് താൻ ശുപാർശ ചെയ്യുന്നതെന്ന് തന്റെ പ്രസ്താവനയിൽ പ്രോസിക്യൂട്ടർ മിറിയം സോറിയ ടുള്ളിലെ അധികാരപരിധി തലവനായ മേരി-സോഫി വാഗെറ്റിനോട് അറിയിച്ചു. ജെസീക്കയുടെ മരണത്തിൽ പങ്കുവഹിച്ചതിന് ലിജിനിയാക് പട്ടണത്തിലെ പ്രാദേശിക അധികാരികൾക്ക് 45,000 യൂറോ പിഴ ചുമത്തണമെന്നും പ്രോസിക്യൂട്ടർ ആവശ്യപ്പെട്ടു.
കുട്ടികളെ നിരീക്ഷിക്കുന്നതിനുള്ള അശ്രദ്ധമൂലം നീന്തലിനിടെ ജെസീക്ക എവിടെയാണെന്ന് അധ്യാപികമാർക്കൊന്നും തന്നെ കാണാനായില്ലെന്നും സോറിയ പറഞ്ഞു. 2015 ജൂലൈ 21 ന് ഫ്രാൻസിലേക്കുള്ള അഞ്ച് ദിവസത്തെ സ്കൂൾ യാത്രയ്ക്കിടെ തടാകത്തിൽ മുങ്ങിമരിക്കുമ്പോൾ ഹളിലെ വോൾഫ്രെട്ടൺ സ്കൂളിലെ വിദ്യാർത്ഥിനിയായിരുന്നു അന്ന് 12 വയസ്സുള്ള ജെസീക്ക ലോസൺ.  അധ്യാപകർക്ക് ആവശ്യമായ ശിക്ഷ നൽകണമെന്നാണ് പ്രോസിക്യൂട്ടർ കോടതിയിൽ അവസാനമായി ആവശ്യപ്പെട്ടത്.