ന്യൂസ് ഡെസ്ക്, മലയാളം യുകെ
യൂറോപ്പിലെ വിവിധ രാജ്യങ്ങളിൽ ബുധനാഴ്ച ദൃശ്യമാകുന്ന സമ്പൂർണ സൂര്യഗ്രഹണം കാണാൻ ലക്ഷക്കണക്കിന് ആളുകൾ നിരീക്ഷണ കേന്ദ്രങ്ങളിലേക്കും തുറസായ പ്രദേശങ്ങളിലേക്കും ഒഴുകി. സ്പെയിൻ, ബ്രിട്ടൻ, ഐസ്ലൻഡ് എന്നിവിടങ്ങളിലാണ് ഗ്രഹണത്തിന്റെ ഏറ്റവും മികച്ച കാഴ്ച ലഭിക്കുക. പടിഞ്ഞാറൻ യൂറോപ്പിലെ നിരവധി രാജ്യങ്ങളിൽ സൂര്യപ്രകാശം ഏറെ നേരം മറയുന്ന അപൂർവ പ്രതിഭാസത്തിനാണ് ജനങ്ങൾ സാക്ഷ്യം വഹിക്കുന്നത്.
സ്പെയിനിൽ നൂറ്റാണ്ടിലേറെയായി ആദ്യമായി സമ്പൂർണ സൂര്യഗ്രഹണം ദൃശ്യമാകുന്നതിനാൽ വലിയ ആവേശമാണ് നിലനിൽക്കുന്നത്. ആറു ദശലക്ഷത്തോളം ആളുകൾ ഗ്രഹണപാതയിലേക്കെത്തുമെന്നാണ് അധികൃതരുടെ കണക്ക്. മാഡ്രിഡ് പ്ലാനറ്റേറിയത്തിലെ ജ്യോതിശാസ്ത്രജ്ഞൻ സീസർ ഗോൺസാലസ് ഇതിനെ “പ്രകൃതിയിലെ ഏറ്റവും മനോഹരമായ കാഴ്ചകളിലൊന്ന്” എന്ന് വിശേഷിപ്പിച്ചു. സ്പെയിനിനൊപ്പം പോർച്ചുഗലിന്റെ ചില ഭാഗങ്ങൾ, ഗ്രീൻലാൻഡ്, ഐസ്ലൻഡ് എന്നിവിടങ്ങളിലും സമ്പൂർണ ഗ്രഹണം ദൃശ്യമാകും.
72 വർഷത്തിനുശേഷം ആദ്യമായി സമ്പൂർണ സൂര്യഗ്രഹണം കാണുന്ന ഐസ്ലൻഡിൽ വിമാനമാർഗവും കപ്പൽമാർഗവും ആയിരക്കണക്കിന് സന്ദർശകരാണ് എത്തിയത്. എന്നാൽ മേഘാവൃത കാലാവസ്ഥ കാഴ്ചയെ ബാധിക്കുമെന്ന ആശങ്കയുണ്ട്. പശ്ചിമ ഐസ്ലൻഡിലാണ് ഗ്രഹണം ഏറ്റവും വ്യക്തമായി ദൃശ്യമാകുക. അതേസമയം, ഐസ്ലൻഡിക് സംഗീതതാരം Björk ഗ്രഹണത്തോടനുബന്ധിച്ച് പ്രത്യേക സംഗീതമേള സംഘടിപ്പിച്ചിട്ടുമുണ്ട്. ബ്രിട്ടനിൽ 1999-ന് ശേഷം ആദ്യമായാണ് ഇത്തരമൊരു ഗ്രഹണാനുഭവം ലഭിക്കുന്നത്. അടുത്ത സമ്പൂർണ സൂര്യഗ്രഹണം ബ്രിട്ടനിൽ 2090-ലായിരിക്കും ദൃശ്യമാകുക.
Leave a Reply