ലിസ മാത്യു, മലയാളം യു കെ ന്യൂസ്‌ ടീം

യു കെ :- വിവാദ ചുംബന ദൃശ്യങ്ങൾ പുറത്തു വന്നതിനെ തുടർന്ന് രാജിവച്ച മുൻ ആരോഗ്യ സെക്രട്ടറി മാറ്റ് ഹാൻകോക്കും ഗിന കൊളഡാഞ്ചലോയും ഒരുമിച്ച് ജീവിതം ആരംഭിച്ചു. കഴിഞ്ഞ ആഴ്ച അവസാനമാണ് മാറ്റ് ഹാൻകോക്ക് ആരോഗ്യ സെക്രട്ടറി സ്ഥാനത്തുനിന്ന് രാജി വച്ചത്. ഇതോടൊപ്പംതന്നെ 15 വർഷം നീണ്ട, ഭാര്യ മാർത്തയുമായുള്ള വിവാഹ ജീവിതവും അദ്ദേഹം അവസാനിപ്പിച്ചു. നാൽപത്തിമൂന്നുകാരിയായ ഗിനയും ഒലിവർ ട്രെസ്സുമായുള്ള 12 വർഷം നീണ്ട വിവാഹ ജീവിതം അവസാനിപ്പിച്ചാണ് മാറ്റിനൊപ്പം എത്തിയത്. കഴിഞ്ഞാഴ്ചയാണ് സൺ പത്രം ഇരുവരും തമ്മിലുള്ള ബന്ധം ജനങ്ങൾക്ക് മുമ്പിൽ വെളിപ്പെടുത്തിയത്. ഇതിനുശേഷം ഒരാഴ്ചയ്ക്കുള്ളിൽ തന്നെ ഇരുവരും ഒരുമിച്ച് ജീവിതം ആരംഭിച്ചിരിക്കുകയാണ്.

തങ്ങളുടെ ബന്ധം നിയമപരമായി സാധുവാക്കാനുള്ള തീരുമാനത്തിലാണ് ഇരുവരുമെന്ന് അടുത്ത സുഹൃത്തുക്കൾ വ്യക്തമാക്കി. കഴിഞ്ഞ വ്യാഴാഴ്ചയാണ് മാർത്ത തന്റെ ഭർത്താവിനെ മറ്റൊരു ബന്ധമുണ്ടെന്ന് ആദ്യമായി അറിയുന്നത്. വൈറ്റ് ഹാളിലെ സിസിടിവി ഓഫീസ് ദൃശ്യങ്ങളിൽ, ഇരുവരും ഒരുമിച്ചുള്ള ദൃശ്യങ്ങൾ സൺ ടിവി പുറത്തുവിട്ടതിനെ തുടർന്നാണ് വിവാദങ്ങൾ ആരംഭിച്ചത്. മാർത്തയ്ക്ക് ഇതൊരു ഞെട്ടിപ്പിക്കുന്ന അറിവായിരുന്നു എന്ന് കുടുംബാംഗങ്ങൾ അറിയിച്ചു. യൂണിവേഴ്സിറ്റി തലം മുതൽ തന്നെ മാറ്റുമായി കൊളഡാഞ്ചലോയ്ക്ക് സൗഹൃദം ഉണ്ടായിരുന്നതായി റിപ്പോർട്ടുകൾ പുറത്തുവരുന്നുണ്ട്. വിവാദത്തിൽ ഉൾപ്പെട്ട് കടുത്ത വിമർശനങ്ങൾക്ക് ഒടുവിലാണ് മാറ്റ് ഹാൻകോക്ക് രാജി അറിയിച്ചത്.

ബ്രിട്ടനെ ഞെട്ടിച്ച മാറ്റ് ഹാൻകോക്കിൻെറയും സെക്രട്ടറിയുടെയും ചുംബനദൃശ്യങ്ങൾ മാധ്യമങ്ങളിൽ വൻ വാർത്തയായിരുന്നു. കൊളഡാഞ്ചലോയുമായുള്ള ഹാൻ‌കോക്കിന്റെ ചുംബനം സെൻട്രൽ ലണ്ടനിലെ ആരോഗ്യവകുപ്പിന്റെ ആസ്ഥാനത്തെ ഓഫീസിനു പുറത്തുള്ള ഇടനാഴിയിൽ നടന്നതായുള്ള ദൃശ്യങ്ങളാണ് പുറത്തുവന്നത്. കഴിഞ്ഞ വർഷം മാർച്ചിലാണ് ഹെൽത്ത്‌ ഡിപ്പാർട്മെന്റിൽ ഉപദേശകയായി കൊളഡാഞ്ചലോയെ നിയമിക്കുന്നത്. ഇപ്പോൾ ലീവിങ്ങ് ടുഗെതറിലായ ഇരുവരും നേരത്തെ വിവാഹിതരും, മൂന്ന് മക്കളുടെ രക്ഷിതാക്കളുമാണ്. ഓക്സ്ഫോർഡ് യൂണിവേഴ്സിറ്റിയിലെ പഠനകാലം മുതൽ സുഹൃത്തായ എം‌എസ് കൊളഡാഞ്ചലോയെ കഴിഞ്ഞ സെപ്റ്റംബറിൽ ആരോഗ്യവകുപ്പിന്റെ നോൺ എക്സിക്യൂട്ടീവ് ഡയറക്ടറാക്കി ഹാൻ‌കോക്ക് നിയമിച്ചതും വിവാദങ്ങൾക്ക് തിരികൊളുത്തിയിരുന്നു.