ന്യൂസ് ഡെസ്ക് മലയാളം യുകെ

യുകെയിലെ ബെർമിങ്ങ്ഹാമിൽ വച്ചു നടന്ന യൂറോപ്പിലെ കോതമംഗലം സ്വദേശികളുടെ സംഗമത്തിൽ പങ്കെടുത്ത എല്ലാവർക്കും ഗ്രഹാതുരത്തിന്റെയും, ബാല്യകാലത്തിന്റെയും മധുര സ്മരണകളെ ഓർമ്മിപ്പിക്കുന്ന പഴയ കാലത്തിലേക്ക് ഒരു തിരിച്ചു പോക്ക് ആയിരുന്നു. കോതമംഗലം സംഗമത്തിന്റെ ഉൽഘാടനം ശ്രീമാൻ ഷോയി കുര്യാക്കോസ്, ശ്രീ സോജൻ മണിയിരിക്കൽ, ശ്രീ എൽദോസ് സണ്ണി, ശ്രീ ജോസ് വലിയപറമ്പിൽ, ശ്രീ വിജു ഇടയ്ക്കാട്ടുകുടിയിൽ എന്നിവർ ചേർന്ന് ഭദ്രദീപം കൊളുത്തി നിർവഹിച്ചു.

തുടർന്ന് കുട്ടികളുടെയും, മുതിർന്നവരുടെയും വിവിധ കലാ പരിപാടികൾ ഉണ്ടായിരുന്നു.
പങ്കെടുത്ത എല്ലാവർക്കും വിഭവ സമൃദമായ സദ്യയായിരുന്നു സഘാടകർ ഒരുക്കിയിരുന്നത്.

ഹൈറേഞ്ചിൻ്റെ പ്രവേശന കവാടവും, കാർഷിക മേഖലയുമായ കോതമംഗലത്തു നിന്ന് ഭാവി ജീവിതം കരുപിടിപ്പിക്കുന്നതിനായി യൂറോപ്പിൻ്റെ നാനാഭാഗങ്ങളിൽ കുടിയേറിയ കോതമംഗലംകാരുടെ സ്നേഹ സംഗമത്തിൻ്റെ മാമാങ്കമായിരുന്നു ജൂലൈ എട്ടിന് അരങ്ങേറിയ കോതമംഗലം സംഗമം – 2023.

കാലത്തിൻ്റെ കുത്തൊഴുക്കിൽ ഒരു കാലത്ത് ജന്മദേശത്ത് നിന്ന് വിട്ടിട്ടുപോയ പഴയ കളിക്കൂട്ടുകാരെയും സഹപാഠികളെയും നീണ്ട ഇടവേളക്ക് ശേഷം വീണ്ടും കണ്ടുമുട്ടുന്നതിനുള്ള വേദിയായി കോതമംഗലം സംഗമം – 2023 മാറി.

” മതനിരപേക്ഷ സമൂഹം സർഗ്ഗാത്മക യൗവ്വനം” എന്ന സന്ദേശവുമായി സമീക്ഷയുകെയുടെ 2023ലെ മെമ്പർഷിപ്പ് ക്യാമ്പയിൻ ഉദ്ഘാടനം ഈ വരുന്ന ഞായറാഴ്ച്ച (ജൂലൈ 9) വൈകുന്നേരം 5 മണിക്ക് നോർത്താംപ്റ്റണിൽ വെച്ച് നടത്തപ്പെടുന്നു. ( ( Venue: St. Alban’s Church ,Broadmead Ave, Northampton NN3 2RA)

നാഷണൽ പ്രസിഡന്റ് ശ്രീ. ശ്രീകുമാർ ഉള്ളപ്പിള്ളിൽ അദ്ധ്യക്ഷത വഹിക്കുന്ന ചടങ്ങിൽ വെച്ച് നാഷ്ണൽ സെക്രട്ടറി ശ്രീ ദിനേശ് വെള്ളാപ്പള്ളി അംഗത്വ വിതരണം ഉദ്ഘാടനം ചെയ്യും. ജൂലൈ1ന് ആരംഭിച്ച ക്യാമ്പയിൻ ഒക്ടോബർ 8 ന് സമാപിക്കും. പുരോഗമന ആശയങ്ങൾ ചിന്തിക്കുകയും പ്രചരിപ്പിക്കുകയും ചെയ്യുന്നവരെയും പുതുതായി യുകെയിൽ എത്തുന്നവരിലെ സമാന ചിന്താഗതിക്കാരെയും സംഘടനയോട് ചേർത്തു നിർത്തുക എന്നതാണ് നൂറ് ദിവസം നീണ്ടുനിൽക്കുന്ന മെമ്പർഷിപ്പ് ക്യാമ്പയിനിലൂടെ സംഘടന ലക്ഷ്യമിടുന്നത്. വർഗീയതയെ ചെറുത്തുതോൽപ്പിക്കാനും മതനിരപേക്ഷതയും മാനവിക മൂല്യങ്ങളും ഊട്ടിയുറപ്പിക്കുവാനും സമൂഹത്തിൽ പുരോഗമന കലാ സാംസ്കാരിക സംഘടനകൾ ശക്തി പ്രാപിക്കേണ്ടത് കാലഘട്ടത്തിന്റെ ആവിശ്യമാണ് , ഇത് ഉൾക്കൊണ്ടുകൊണ്ട് സമീക്ഷയുകെയിൽ അണിചേർന്ന് ഒന്നിച്ച് പ്രവർത്തിക്കാൻ ഏവരെയും സ്വാഗതം ചെയ്യുന്നതായി ഭാരവാഹികൾ അറിയിച്ചു.

മെയ്ഡ് സ്റ്റോൺ : പിങ്ക് നിറമണിഞ്ഞ പട്ടണവും മോട്ട് പാർക്കും സാക്ഷിയായി ഇക്കഴിഞ്ഞ ഞായറാഴ്ച മെയ്ഡ്സ്റ്റോൺ മലയാളി അസോസിയേഷൻ അംഗങ്ങൾ 10 കിലോമീറ്ററും 5 കിലോമീറ്ററും ഓടിയെത്തിയപ്പോൾ സുമനസ്സുകൾ അവർക്ക് സമ്മാനിച്ചത് 9000 – ത്തോളം പൗണ്ട് .

‘റേസ് ഫോർ ലൈഫ് ‘ എന്ന് പേരിട്ട ചാരിറ്റി സംരംഭം സംഘടിപ്പിച്ചത് ‘ക്യാൻസർ റിസർച്ച് യുകെ ‘ എന്ന സന്നദ്ധ സംഘടന. ക്യാൻസർ റിസർച്ചിനു വേണ്ടി ജൂലൈ മാസം രണ്ടാം തീയതി ആയിരങ്ങൾ പങ്കെടുത്ത ഈ മഹാസംരഭത്തിൽ മെയ്ഡ് സ്റ്റോൺ മലയാളി അസോസിയേഷൻ (എംഎംഎ ) അംഗങ്ങൾ ഗ്രൂപ്പായി പങ്കു ചേരുകയായിരുന്നു.

എം എം എ കമ്മിറ്റി നേതൃത്വം നൽകിയ ഈ കൂട്ടയോട്ടത്തിൽ വ്യക്തികളായും കുടുംബങ്ങളായും അണിചേർന്നത് എം എം എ യിലെ 57 അംഗങ്ങൾ .

ഓരോ അംഗങ്ങളും നിശ്ചിത ഫീസ് നൽകി രജിസ്റ്റർ ചെയ്തതിനു ശേഷം സുഹൃത്തുക്കളോടും സഹപ്രവർത്തകരോടും ബന്ധുമിത്രാദികളോടും സംഭാവനകൾ ക്ഷണിക്കുകയായിരുന്നു.

സംഘടനാ പ്രവർത്തനത്തിൽ എന്നും നവ മാതൃകകൾ തീർക്കുന്നതിൽ മുൻപന്തിയിൽ ഉള്ള എംഎംഎ ഇക്കുറിയും പതിവ് തെറ്റിച്ചില്ല എന്ന് മാത്രമല്ല ഒരുമിച്ചുള്ള മുന്നേറ്റത്തിലൂടെ സമൂഹത്തിനു നന്മ ചെയ്യുന്നതിനും മാനുഷിക മൂല്യങ്ങളെ ഉയർത്തിക്കാട്ടുന്നതിനും സാധിക്കുമെന്ന് വളരുന്ന പുത്തൻ തലമുറയ്ക്ക് മാർഗദർശനം നൽകുന്ന സംരംഭമാക്കി ‘ റേസ് ഫോർ ലൈഫ് ‘ മാറ്റി. കുട്ടികളുടെയും സ്ത്രീകളുടെയും വൻ പങ്കാളിത്തം ഇത് അടിവരയിടുന്നു.

നമ്മൾ ജീവിക്കുന്ന ഈ രാജ്യത്തിൻറെ ചിന്താധാരയോടും സാംസ്കാരികതയോടും ചേർന്ന് നിൽക്കേണ്ടതിന്റെ ആവശ്യകതയും ‘ റേസ് ഫോർ ലൈഫ് ‘ സ്വാഗതം ചെയ്യുന്നു.

ഓട്ടത്തിൽ പങ്കുചേർന്ന് വൻതുകകൾ സമാഹരിച്ച രഞ്ജിഷ് നാരായണൻ. ജൂബി ബൈജു , മിനി ശങ്കരനാരായണൻ , ബെറ്റി റോയ്, അന്ന രഞ്ജു എന്നിവരെ വേദിയിൽ തന്നെ എം എം എ പ്രസിഡൻറ് ബൈജു ഡാനിയേൽ , സെക്രട്ടറി ബൈജു തങ്കച്ചൻ എന്നിവർ അഭിനന്ദിക്കുകയും പങ്കെടുത്ത് വിജയിപ്പിച്ച ഓരോ അംഗങ്ങൾക്കും സംഭാവന നൽകിയ ഓരോ വ്യക്തികൾക്കും നന്ദി പറയുകയും ചെയ്തു.

എം എം എ ‘ ക്യാൻസർ റിസർച്ച് യുകെ ‘ കോ – ഓർഡിനേഷൻ ഭംഗിയായി നിർവഹിച്ച ജിസ്ന എബിയെയും മറ്റു കമ്മറ്റി അംഗങ്ങളെയും ഭാരവാഹികളും അംഗങ്ങളും അഭിനന്ദിച്ചു.

ജോളി എം. പടയാട്ടില്‍

വേള്‍ഡ്‌ മലയാളി കൗണ്‍സില്‍ NRK ഫോറത്തിന്റെ ഉല്‍ഘാടനവും, പ്രവാസി മലയാളികള്‍ക്കായി വേള്‍ഡ്‌ മലയാളി കൗണ്‍സില്‍ യുറോപ്പ്‌ റീജിയന്‍ നടത്തിക്കൊണ്ടിരിക്കുന്ന കലാസാംസ്‌കാരിക വേദിയുടെ 3-ാം സമ്മേളനവും, ജൂണ്‍ 30 -ാം തീയതി വൈകിട്ടു ഇന്ത്യന്‍ സമയം ഏഴരക്കു വെര്‍ച്ചല്‍ പ്ളാറ്റ്‌ ഫോമിലൂടെ ലോകത്തിന്റെ വിവിധ രാജ്യങ്ങളില്‍ നിന്നുള്ള പ്രവാസി മലയാളികളുടെ സാന്നിദ്ധൃത്തില്‍ നടന്നു.

വേള്‍ഡ്‌ മലയാളി കൗണ്‍സില്‍ യൂറോപ്പ്‌ റീജിയന്‍ ചെയര്‍മാന്‍ ജോളി തടത്തിലിന്റെ അധ്യക്ഷതയില്‍ ചേര്‍ന്ന യോഗം യൂറോപ്പിലെ അനുഗ്രഹീത കലാകാരനായ സോബിച്ചന്‍ ചേന്നങ്കരയുടെ ഈശ്വര പ്രാര്‍ത്ഥനയോടെയാണ്‌ തുടങ്ങിയത്‌. വേള്‍ഡ്‌ മലയാളി കൗണ്‍സില്‍ യൂറോപ്പ്‌ റീജിയന്‍ പ്രസിഡന്റ്‌ ജോളി എം. പടയാട്ടില്‍ന്റെ സ്വാഗതത്തിനുശേഷം NRK ഫോറം പ്രസിഡന്റ്‌ ശ്രീ. അബ്ദുള്‍ ഹാക്കീം പ്രവാസികള്‍ക്കായി രൂപീകരിച്ചിട്ടുള്ള NRK ഫോറത്തിന്റെ ഉദ്ദേശലക്ഷ്യ ങ്ങളെക്കൂറിച്ചു വിശദമായി പ്രതിപാദിച്ചു.

പ്രമുഖ വൃവസായിയും, വേള്‍ഡ്‌ മലയാളി കൗണ്‍സില്‍ ഗ്ളോബല്‍ പ്രസിഡന്റുമായ ശ്രീ . ജോണ്‍ മത്തായി വേള്‍ഡ്‌ മലയാളി കൗണ്‍സില്‍ NRK ഫോറം ഔദ്യോഗികമായി ഉല്‍ഘാടനം ചെയ്തു. തുടര്‍ന്ന്‌ പ്രവാസികള്‍ അഭിമുഖീകരിക്കുന്ന പ്രശ്നങ്ങളെക്കുറിച്ചു നടന്ന ചര്‍ച്ചകളില്‍ നോര്‍ക്ക റൂട്ട്സ്‌ പ്രതിനിധികളായ ശ്രീമതി രമണി എസ്‌. ശ്രീമതി ഷീബ സി., ശ്രീമതി ഷീബ എസ്‌ എന്നിവര്‍ പങ്കെടുത്തു. പ്രവാസികള്‍ക്കായി നോര്‍ക്ക ചെയ്തുകൊണ്ടിരിക്കുന്ന സേവനങ്ങളെ, പ്രവര്‍ത്തനങ്ങളെ ഫ്രസ്വമായി പ്രതിപാദിക്കുകയും, അതിനോടനുബന്ധിച്ചുള്ള ചോദ്യങ്ങള്‍ക്ക്‌ മറുപടി നല്‍കുകയും ചെയ്തു. പ്രവാസികള്‍ക്കുള്ള ഐഡന്റി കാര്‍ഡിന്റെ പ്രാധാന്യം എടുത്തുകാണിച്ച ശ്രീമതി രമണി, അത്യാഹിത സാഹചര്യങ്ങളില്‍ പ്രവാസികളുമായി ബന്ധപ്പെടാനുള്ള മുഖ്യകണ്ണിയാണ്‌ ഐഡന്റി കാര്‍ഡ്‌ എന്ന്‌ പ്രത്യേകം പറയുകയുണ്ടായി. പ്രവാസികള്‍ക്കായി ഏര്‍പ്പെടുത്തിയിട്ടുള്ള ഹെല്‍ത്ത്‌ ഇന്‍ഷുറന്‍സ്‌ തുടങ്ങി സംസ്ഥാന ഗവണ്‍മെന്റിന്റെ വിവിധ പദ്ധതികളെപ്പറ്റി ശ്രീമതി ഷീബയും വിശദമായി പ്രതിപ്പാദിച്ചു.

വേള്‍ഡ്‌ മലയാളി കൗണ്‍സില്‍ ജര്‍മന്‍ പ്രൊവിന്‍സ്‌ പ്രസിഡന്റും, മാധ്യമപ്രവര്‍ത്തകനും, കലാ സാംസ്കാരികരംഗത്തു തനതായ വ്യക്തിമുദ്ര പതിപ്പിച്ചിട്ടുള്ള, പരിണത പ്രജഞനുമായ ജോസ്‌ കുബിളുവേലിലാണു ഈ കലാസാംസ്കാരികവേദി മോഡറേറ്റ്‌ ചെയ്തത്‌.

പ്രസിദ്ധ ഗായികയും വേള്‍ഡ്‌ മലയാളി കൗണ്‍സില്‍ അജ് മന്‍ പ്രൊവിന്‍സ്‌ അംഗവുമായ ശ്രീമതി ജോമി വില്‍സന്‍, അമേരിക്കയിലെ നോര്‍ത്ത്‌ ടെക്സാസ്‌ പ്രൊവിന്‍സില്‍നിന്നുള്ള യുവഗായികയായ കുമാരി എമ്മ റോബിന്‍, യൂറോപ്പിലെ അനുഗ്രഹീത ഗായകനായ ജെയിംസ്‌ പാത്തിക്കല്‍, യു. കെ. നോര്‍ത്തു വെസ്റ്റ് പ്രൊവിന്‍സ്‌ പ്രസിഡന്റ്‌ ലിതീഷ്‌ രാജ്‌ പി. തോമസ്‌, എന്നിവരുടെ ഗാനങ്ങളും, വേള്‍ഡ്‌ മലയാളി കൗണ്‍സില്‍ ഗ്ളോബല്‍ വിമന്‍സ്‌ ഫോം പ്രസിഡന്റും, വാഗ്മിയും, കൊച്ചിന്‍ യൂണിവേഴ്‌സിറ്റിയിലെ ഇംഗ്ലീഷ്‌ പ്രൊഫസറും, എഴുത്തുകാരിയുമായ പ്രൊഫസര്‍ ഡോ. ലളിത മാത്യുവിന്റെ ചെറുകഥയും ഈ കലാസാംസ്കാരിക സമ്മേളനത്തെ ധന്യമാക്കി.

വേള്‍ഡ്‌ മലയാളി കൗണ്‍സില്‍ ഗ്ളോബല്‍ ചെയര്‍മാന്‍ ശ്രീ. ഗോപാലപിള്ള, ശശി നായര്‍ (NRK), മേഴ്‌സി തടത്തില്‍ (WMC Vice chairperson), ജോണ്‍സന്‍ തലശല്ലൂര്‍ (Chairman Americal Region), ഷൈന്‍ ചന്ദ്രസേനന്‍ (President Mid. East), പ്രൊഫസര്‍ ഡോ.ലളിത മാത്യു (President Global Womens Forum), ചെറിയാന്‍ ടീ കീക്കാടു (President Business Forum), ഡോ. അജി അബ്ദുള്ള (Secretary India Region), ഡോ. വിജയലക്ഷ്മി (Chairperson India Region), ഡോ. ജിമ്മി ലോനപ്പന്‍ (President Global Medical Forum), കണ്ണുബെക്കര്‍ (Global Vice President), ജെയിംസ്‌ ജോണ്‍ (Global Vice President), ടി.എന്‍.കൃഷ്ണകുമാര്‍ (President engineering Forum, President Pravasi legal sell), ഗ്രിഗറി മേടയില്‍ (Global Vice Chairman), ഷാജി (President Dubai Texas), പോള്‍സന്‍ (Chairman Dubai province), രാജേഷ്‌ പിള്ളെ (Associate Secretary Dubai Province) എന്നിവര്‍ ആശംസകള്‍ നേര്‍ന്നു സംസാരിച്ചു.

വേള്‍ഡ്‌ മലയാളി കൗണ്‍സില്‍ യൂറോപ്പ്‌ റീജിയന്‍ ജനറല്‍ സെക്രട്ടറി ബാബു തോട്ടപ്പിള്ളി കൃതജ്ഞത പറഞ്ഞു.

എല്ലാ മാസത്തിന്റേയും അവസാനത്തെ വെള്ളിയാഴ്ച നടക്കുന്ന ഈ കലാസാംസ്‌കാരിക വേദിയില്‍ എല്ലാ പ്രവാസി മലയാളികള്‍ക്കും, അവര്‍ താമസിക്കുന്ന രാജ്യങ്ങളില്‍നിന്നുകൊണ്ടുതന്നെ ഇതില്‍ പങ്കെടുക്കുവാനും, അവരുടെ കലാസൃഷ്ടികള്‍ അവതരിപ്പിക്കുവാനും (കവിതകള്‍, ഗാനങ്ങള്‍ തുടങ്ങിയവ ആലപിക്കുവാനും) ആശയവിനിമയങ്ങള്‍ നടത്തുവാനും അവസരം ഉണ്ടായിരിക്കുന്നതാണ്‌.

രണ്ടുമണിക്കൂര്‍ നീണ്ടുനില്‍ക്കുന്ന ഈ സാംസ്‌കാരിക സമ്മേളനത്തിന്റെ ആദ്യത്തെ ഒരു മണിക്കൂർ പ്രവാസികള്‍ അഭിമുഖീകരിക്കുന്ന പ്രശ്നങ്ങളെക്കുറിച്ചാണ്‌ ചര്‍ച്ച ചെയ്യപ്പെടുക. ഇതില്‍ തെരഞ്ഞെടുത്ത വിഷയങ്ങളെ ആധികാരികമായി പ്രതികരിക്കുവാന്‍ കഴിയുന്ന ഉദ്യോഗസ്ഥരോ, മ്രന്തിമാരോ പങ്കെടുക്കുന്ന ചര്‍ച്ചയായിരിക്കും നടക്കുക. അടുത്ത സമ്മേളനം ജൂലൈ 28 നാണ്‌ നടക്കുന്നത്‌.

എല്ലാ പ്രവാസി മലയാളികളേയും ഈ കലാസാംസ്‌കാരിക കൂട്ടായ്മയിലേക്ക്‌ വേള്‍ഡ്‌ മലയാളി കൗണ്‍സില്‍ യൂറോപ്പ്‌ റീജിയന്‍ സ്വാഗതം ചെയ്യുന്നു.

ജോളി എം. പടയാട്ടില്‍ (President) 04915753181523 , ജോളി തടത്തില്‍ (Chairman) 0491714426264, ബാബു തോട്ടപ്പിള്ളി (Secretary) 0447577834404

മെയ്ഡ്സ്റ്റോണ്‍: ഓക്ക്‌ വുഡ്‌, സെന്റ്‌ അഗസ്റ്റിന്‍ മൈതാനങ്ങള്‍ ആവേശകൊടുമുടിയില്‍ പ്രകമ്പനം കൊണ്ട മുഹൂര്‍ത്തങ്ങള്‍ സമ്മാനിച്ചു കൊണ്ട്‌ 2023 എം എം എ ഓള്‍ യു കെ T 20 ക്രിക്കറ്റ്‌ കപ്പ്‌ സ്വന്തമാക്കി എല്‍ ജി ആര്‍ ഇലവന്‍ ടീം.

ജൂണ്‍ മാസം 25 ഞായറാഴ്ച നടന്ന ടൂര്‍ണമെന്റിന്റെ ഫൈനലില്‍ എല്‍ ജി ആര്‍ ഇലവന്‍ നേരിട്ടത്‌ പ്രഗത്ഭരായ യുണൈറ്റഡ്‌ കെന്റ്‌ ക്രിക്കറ്റ്‌ ക്ലബിനെയാണ്‌.

മുന്‍ വര്‍ഷത്തെ ചാമ്പ്യന്മാര്‍ കൂടിയായ യുണൈറ്റഡ്‌ കെന്റ്‌ ടീം ടോസ്‌ നേടി എല്‍ ജി ആറിനെ ബാറ്റിങ്ങിന്‌ അയക്കുകയായിരുന്നു. ഇന്നിങ്സിന്റെ ആദ്യ ബോളില്‍ തന്നെ സിക്സര്‍ പായിച്ചു കൊണ്ട്‌ തുടങ്ങിയ എല്‍ ജി ആറിന്റെ ലക്ഷ്യം കപ്പില്‍ കുറഞ്ഞതൊന്നുമല്ലെന്ന്‌ വ്യക്തമാക്കി കൊണ്ടായിരുന്നു പിന്നീടുള്ള ഇന്നിങ്സ്‌ പുരോഗമിച്ചത്‌. തുടരെ പായിച്ച ബൗണ്ടറികളും സിക്‌സറുകളും വിക്കറ്റുകള്‍ക്കിടയിലെ സമര്‍ത്ഥമായ റണ്‍ വേട്ടയും കാണികള്‍ക്കു സമ്മാനിച്ച ആനന്ദം വര്‍ണനാതീതമാണ്‌.

സമയ പരിമിതി മൂലം പത്ത്‌ ഓവറുകളായി കുറച്ച ഫൈനലില്‍ എല്‍ ജി ആര്‍ അടിച്ചു കൂട്ടിയ 128 റണ്‍സ്‌ മറികടക്കുക എന്ന ദുഷ്കരമായ ദാത്യവുമായി ബാറ്റിങ്ങിനിറങ്ങിയ യുണൈറ്റഡ്‌ കെന്റ്‌ പൊരുതിയെങ്കിലും ലക്ഷ്യത്തിലെത്തുന്നതിനു മുന്‍പ്‌ എല്ലാവരും പുറത്താകുകയായിരുന്നു.

ചാമ്പ്യന്മാര്‍ക്ക്‌ ട്രോഫി സമ്മാനിച്ചത്‌ എം എം എ പ്രസിഡന്റ്‌ ബൈജു ഡാനിയേലും ക്യു-ലീഫ്‌ കെയര്‍ സാരഥി ജിനു മാത്യൂസും സംയുക്തമായാണ്‌. 750 പൗണ്ട്‌ സമ്മാനത്തുക കൈമാറി ഒന്നാം സമ്മാനം സ്പോണ്‍സര്‍ ചെയ്ത സ്റ്റെര്‍ലിങ്‌ സ്‌ട്രീറ്റ്‌ മോര്‍ട്ട്‌ ഗേജ്‌ ആന്‍ഡ്‌ പ്രൊട്ടക്ഷന്‍ പ്രൊപ്രൈറ്റര്‍ ബോബന്‍ വര്‍ഗീസും വേദിയില്‍ നിറഞ്ഞു നിന്നു.

റണ്ണര്‍-അപ്പ്‌ സ്ഥാനം കരസ്ഥമാക്കിയ യുണൈറ്റഡ്‌ കെന്റ്‌ ക്രിക്കറ്റ്‌ ക്ലബിന്‌ എം എം എ സെക്രട്ടറി ബൈജു തങ്കച്ചന്‍ ട്രോഫി സമ്മാനിച്ചപ്പോള്‍ സമ്മാനത്തുകയായ 450 പൗണ്ട്‌ സ്പോണ്‍സര്‍ ചെയ്ത നളഭീമ ഇന്ത്യന്‍ റെസ്റ്റോറന്റ്‌ ഉടമ സ്വാമിനാഥന്‍ ആശംസകള്‍ അറിയിച്ചു. കെന്റ്‌ കേരള സ്പൈസസിന്റെ സുജിത്‌ തുക കൈമാറി. മറ്റൊരു സ്പോണ്‍സറായ എം ജി ട്യൂഷന്‍സും ആശംസകള്‍ അറിയിച്ചു.

മൂന്നാം സ്ഥാനത്ത്‌ ടണ്‍ബ്രിഡ്ജ്‌ വെല്‍സ്‌ ടീമായ എസ്‌ ആര്‍ സി സി എത്തിയപ്പോള്‍ നാലാം സ്ഥാനം നേടിയത്‌ ഹോം ടീം കൂടിയായ മെയ്ഡ്‌ സ്റ്റണ്‍ ചാമ്പ്യന്‍സ്‌ ടീമാണ്‌.

മികച്ച ബാറ്റ്സ്‌ മാനായി എല്‍ ജി ആറിന്റെ സിബിയും മികച്ച ബൗളറായി എല്‍ ജി ആറിന്റെ തന്നെ ബാബുവും തിളങ്ങി.

എം എ ട്രഷററും സ്പോണ്‍സറുമായ ബാബു സ്കറിയ (വിക്ടറി ഹീറ്റിങ്‌ ആന്‍ഡ്‌ പ്ലംബിങ്‌), സ്പോര്‍ട്സ്‌ കോ-ഓര്‍ഡിനേറ്റര്‍മാരായ ബിജു ബഹനാന്‍, ഷൈജന്‍ തോമസ്‌, കമ്മിറ്റി അംഗങ്ങളായ ജോഷി ആനിത്തോട്ടം, ലാലിച്ചന്‍ ജോസഫ്‌, സ്പോണ്‍സര്‍മാരായ ജിനു ജേക്കബ്‌ (ജൂബിലി ട്രെയിനിങ്‌), ബിനു ജോര്‍ജ്‌ (ഗര്‍ഷോം ടി വി), സലിം (ബി ഗുഡ്‌ കെയര്‍), ശ്രീജിത്ത്‌ (കംപാഷന്‍ കെയര്‍), എന്നിവര്‍ ട്രോഫികളും സമ്മാനത്തുകകളും സമ്മാനിച്ചു. റഫറിമാരായ മാര്‍ട്ടിന്‍, നദീം എന്നിവര്‍ക്ക്‌ മോമെന്റോയും സമ്മാനിച്ചു.

രുചികരമായ ഭക്ഷണ സ്റ്റാളുമായി കെന്റ്‌ കേരള സ്പൈസസും കൂള്‍ ഡ്രിങ്ക്‌സ്‌, സ്നാക്സ്‌ സ്റ്റാളുമായി എം എം എ മൈത്രിയും ചേര്‍ന്നപ്പോള്‍ മെയ്സ്റ്റൺ ഇതു വരെ കണ്ട മികച്ച ഒരു കായിക മേളക്ക്‌ കൊഴുപ്പേകി.

എല്ലാ ടീമുകള്‍ക്കും സ്പോണ്‍സര്‍മാര്‍ക്കും, പ്രോത്സാഹനവുമായി മൈതാനത്തെത്തിയ കാണികള്‍ക്കും, ഓക്‌ വുഡ്‌, സെന്റ്‌ അഗസ്റ്റിന്‍ സ്‌കൂളുകള്‍ക്കും, എം എം എ മെന്‍സ്‌ ക്ലബ്‌, യൂത്ത്‌ ക്ലബ്‌, മൈത്രി വോളണ്ടിയര്‍മാര്‍ക്കും പ്രസിഡണ്ടും സെക്രട്ടറിയും കമ്മിറ്റി അംഗങ്ങളും നന്ദി അറിയിച്ചു.

ഉണ്ണികൃഷ്ണൻ ബാലൻ

യുകെയിലെ പുരോഗമന കലാ-സാംസ്കാരിക സംഘടനയായ സമീക്ഷ യുകെയുടെ പ്രവർത്തനം വിപുലീകരിക്കുന്നതിന്റെ ഭാഗമായി ഈ വർഷത്തെ അംഗത്വ വിതരണ ക്യാമ്പയിൻ ജൂലൈ 1 ന് ആരംഭിക്കും . ” മതനിരപേക്ഷ സമൂഹം സർഗ്ഗാത്മക യൗവ്വനം” എന്ന ആശയത്തെ മുൻ നിർത്തിയാകും ക്യാമ്പയിൻ. ഇടതുപക്ഷ പുരോഗമന ആശയങ്ങൾ ചിന്തിക്കുകയും പ്രചരിപ്പിക്കുകയും ചെയ്യുന്നവരെയും പുതുതായി യുകെയിൽ എത്തുന്നവരിലെ സമാന ചിന്താഗതിക്കാരെയും സംഘടനയോട് ചേർത്തു നിർത്തുക എന്നതാണ് നൂറ് ദിവസം നീണ്ടുനിൽക്കുന്ന മെമ്പർഷിപ്പ് ക്യാമ്പയിനിലൂടെ സംഘടന ലക്ഷ്യമിടുന്നത്. ഒക്ടോബർ 8 വരെ ആണ് ക്യാമ്പയിൻ.

2019 ൽ സിപിഎം ജനറൽസെക്രട്ടറി സഖാവ് സീതാറാം യെച്ചൂരി ആണ് സമീക്ഷ യുകെ യുടെ ആദ്യത്തെ മെമ്പർഷിപ്പ് ക്യാമ്പയിൻ ഉത്‌ഘാടനം ചെയ്തത് . ഒരു നൂറു ദിനങ്ങൾ ഒരായിരം മെമ്പറുമാർ എന്ന ലക്ഷ്യത്തോടെ തുടങ്ങിയ ആവർഷത്തെ ക്യാമ്പയിനിലൂടെ യുകെ യുടെ വിവിധ ഭാഗങ്ങളിൽ നിന്നായി അനേകം ഇടതുപക്ഷ സഹയാത്രികരെ സംഘടനയിൽ എത്തിക്കാനായി . സമീക്ഷ യുകെയുടെ യൂണിറ്റ്കൾ ഉള്ള പ്രദേശങ്ങളിലെ പുരോഗമന ആശയഗതിക്കൊപ്പം നിലകൊള്ളുന്ന സുഹൃത്തുക്കളെയും സഖാക്കളെയും ഇടതുപക്ഷ സാംസ്കാരിക സംഘടനയുടെ കാലിക പ്രസക്തി ബോധ്യപ്പെടുത്തി ഒപ്പം നിർത്തിക്കൊണ്ട് സംഘടനയുടെ മുന്നൊട്ടുള്ള പ്രവർത്തനങ്ങൾ കൂടുതൽ ശക്തമാക്കാൻ സാധിക്കും എന്ന് പ്രത്യാശിക്കുന്നതായി സമീക്ഷ യുകെ ഭാരവാഹികൾ പറഞ്ഞു .

വർഗീയതയെ ചെറുത്തുതോൽപ്പിക്കാനും മതനിരപേക്ഷതയും മാനവിക മൂല്യങ്ങളും ഊട്ടിയുറപ്പിക്കുവാനും സമൂഹത്തിൽ ഇടതുപക്ഷ പുരോഗമന കലാ സാംസ്കാരിക സംഘടനകൾ ശക്തി പ്രാപിക്കേണ്ടത് കാലഘട്ടത്തിന്റെ ആവിശ്യമാണ് , നല്ലൊരു നാളേയ്ക്കായ് സമീക്ഷ യുകെയിലൂടെ ഒരുമിച്ച് പ്രവർത്തിക്കാൻ എല്ലാവരും മുന്നോട്ടു വരാൻ തയ്യാറാവണം എന്ന് ഭാരവാഹികൾ അഭ്യർത്ഥിച്ചു . സമീക്ഷ യുകെ യൂണിറ്റുകൾ ഇല്ലാത്ത സ്ഥലങ്ങളിലെ സംഘടനയോട് ചേർന്ന് പ്രവർത്തിക്കുവാൻ ആഗ്രഹിക്കുന്നവർ താഴെ കൊടുത്തിരിക്കുന്ന സമീക്ഷ യുകെ ഭാരവാഹികളുമായി ബന്ധപ്പെടാൻ അഭ്യർത്ഥിക്കുന്നു .

ശ്രീ. ദിനേശ് വെള്ളാപ്പള്ളി (നാഷ്ണൽ സെക്രട്ടറി): +44 7828 659608
ശ്രീ . ബൈജു പി.കെ : +44 7471111571

ബർമിങ്ങ്ഹാം : ചാലക്കുടി മേഖലയിൽ നിന്നും യുകെയുടെ നാനാഭാഗങ്ങളിൽ ഉള്ളവർ കഴിഞ്ഞ ശനിയാഴ്ച ജൂൺ 24ന് വാൾസാളിൽ സമ്മേളിച്ചു. സോജനും, ജിബിയും ആലപിച്ച ഈശ്വര പ്രാത്ഥനയോടെ തുടങ്ങിയ യോഗത്തിൽ പ്രസിഡന്റ്‌ ഷീജോ മൽപ്പാൻ അദ്ധ്യക്ഷത വഹിക്കുകയും, ഉൽഘാടനം ചെയ്‌ത്‌ പ്രസംഗിക്കുകയും, സെക്രട്ടറി ഷാജു മാടപ്പിള്ളി സ്വാഗതം ആശംസിക്കുകയും, യോഗത്തിൽ റിപ്പോർട്ട്‌ അവത രിപ്പിക്കുകയും ചെയ്തു. ട്രഷറർ ദീപ ഷാജു നന്ദി അർപ്പിക്കുകയും ചെയ്തു.കഴിഞ്ഞ വർഷം അകാലത്തിൽ വേർപിരിഞ്ഞുപോയ ചാലക്കുടി ചങ്ങാത്തം അംഗം ബൈജു മേനാച്ചേരിയെ അനുസ്മരിച്ചു ഒരു മിനിറ്റ് മൗനം ആചരിച്ചു.പ്രോഗ്രാം കോ ഓർഡിനേറ്റ് ചെയ്തതു ടാൻസി പാലാട്ടി, സിനി മോൾ ബിജു, ജോയൽ, ഷൈജി ജോയ്, സൈബിൻ പാലാട്ടി, ദീപ ഷാജു, തുടങ്ങിവർ. പുതിയ ഭാരവാഹികൾളെ 2023-24 വർഷതെക്കു തെരഞ്ഞെടുത്തു.

പ്രസിഡന്റ്‌ സോജൻ കുര്യാക്കോസ് -ബിർമിങ്ങ്ഹാം, സെക്രട്ടറി ആദർശ് ചന്ദ്രശേഖർ -സ്റ്റോക്ക് ഓൺ ട്രെന്റ്, ട്രെഷരാർ ജോയ് അന്തോണി -ബർമിങ്ങ്ഹാം എന്നിവർ തെരഞ്ഞിടുക്കപ്പെട്ടു. തുടർന്ന്‌ കുട്ടികളുടെയും, മുതിർന്നവരുടെയും കലാപരിപാടികൾ വേദിയെ അവിസ്മണിയമാക്കി.നാടൻ സദ്യ എവരും ആസ്വതിച്ചു.അടുത്ത വർഷം കാണാം എന്ന ശുഭപ്രതിക്ഷയോടെ എല്ലാവരും സ്വഭവനങ്ങളിലേക്ക് യാത്രയായി.

ചാവറ കുര്യാക്കോസ് അച്ചൻ ഏവുപ്രേസ്യാമ്മ എന്നിവരാൽ കേരളത്തിലെ പുണ്യഭൂമി എന്നറിയപ്പെടുന്ന കൂനംമ്മാവ് വരാപ്പുഴ നാട്ടിൽ നിന്നും യു കെ യിലേയ്ക്ക് കുടിയേറിയവരുടെ കൂട്ടായ്മ ജൂലൈ മാസം 7, 8, 9 തീയതികളിൽ ഡെർബിയിൽ നടത്തുവാൻ തീരുമാനിച്ചിരിക്കുന്നു.

ജൂലൈ 7 -ന് വൈകിട്ട് 5 മണിയോടെ ഡെർബിയിലെ ഹൈ അഷ്‌ ഫാം ഹൗസിൽ തുടക്കം കുറിക്കും. എല്ലാ വർഷത്തെയും പോലെ കുട്ടികളുടെയും മുതിർന്നവരുടെയും വിവിധ കലാപരിപാടികൾ ഉണ്ടായിരിക്കുന്നതാണ്. രജിസ്ട്രേഷൻ പുരോഗമിച്ചു കൊണ്ടിരിക്കുന്നു. ഇനിയും പങ്കെടുക്കാൻ താല്പര്യം ഉള്ളവർ ബെന്നി പാറക്കൽ +447878587302 (ലണ്ടൻ) സോയു (നോർത്തംപ്റ്റോൺ) +447737035507 സിറോഷ് (ബെർമ്മിഹാം )+447828659934 ഫെലിക്സ് (സ്വാൻസി) +447988978588 എന്നിവരുമായി ബന്ധപ്പെടുക.

ജോൺസൺ കളപ്പുരയ്ക്കൽ

എഫ് ഒ പി പ്രസ്റ്റൺ സംഘടിപ്പിച്ച ആൾ ‘യു കെ മലയാളി ബാഡ്മിൻറൺ ടൂർണമെന്റിൻ്റ് ആവേശ പോരാട്ടത്തിന് വേദിയായി…. ജൂൺ പത്തിന് പ്രസ്റ്റൺ ‘കോളേജ് ക്യാമ്പസിൽ ആയിരുന്നു മത്സരങ്ങൾ. 501 പൗണ്ട് ക്യാഷ് പ്രൈസും എഫ് ഒ പി എവർറോളിങ് ട്രോഫിയും മാണ് ഒന്നാം സമ്മാനം… പൊരിഞ്ഞ പോരാട്ടത്തിനൊടുവിൽ ജൂവൽ ആൻഡ് മേബിൾ ടീം (. സ്വാൻസേ ). എഫ് ഒ പി. എവർറോളിങ് ട്രോഫിക്ക് അർഹരായി.

മികച്ച പോരാട്ടം കാഴ്ചവച്ച ധനുഷ് ജോയൽ ടീം (ലിവർപൂൾ )രണ്ടാം സമ്മാനത്തിന് അർഹരായി 301 പൗണ്ടാണ് രണ്ടാം സമ്മാനം. ഫെബിൻ ആൻഡ് സുദീപ്. ടീം (ലണ്ടൻ). £101 മൂന്നാം സ്ഥാനത്തിന് അർഹരായി. ലെവിൻ ആൻഡ് ജെയ്സൺ ടീം (വാട്ട് ഫോർഡ് ) നാലാം സ്ഥാനത്തിൻ്റെ എഫ് ഒ പി ട്രോഫി കരസ്ഥമാക്കി. പ്രസ്റ്റൺ കോളേജ് ക്യാമ്പസിൽ രാവിലെ 9 മണിക്ക് ആരംഭിച്ച മത്സരത്തിൽ 44 ടീമുകൾ അണിനിരന്നു പ്രീക്വാർട്ടർ കോർട്ട് സെമിഫൈനൽ മത്സരങ്ങളും ഇഞ്ചോടിഞ്ച് പോരാട്ട വേദികളായി മാറി. മിന്നൽ പിണർ പോലുള്ള ഷോട്ടുകളും തന്ത്രപരമായ പ്ളേസിങ്ങുകളും മിനുറ്റുകൾ നീണ്ടു നിൽക്കുന്ന റാലികളുമായി പ്രമുഖ ടീമുകൾ കളം നിറഞ്ഞു കളിച്ചപ്പപ്പോൾ യുകെയിലെ മലയാളി കരുത്തിന്റെ മറ്റൊരു നേർക്കാഴ്ചയായി..

ഒരു ടീമിൽ ഒരാൾ നിർബന്ധമായും മലയാളിയായിരിക്കണം എന്നുള്ളതായിരുന്നു നിബന്ധന
മലയാളികളെ മാത്രം പങ്കെടുപ്പിച്ചുകൊണ്ട് നടത്തുന്ന യുകെയിലെ ആദ്യത്തെ മലയാളി ബാഡ്മിൻറൺ ടൂർണമെൻറ് ഫ്രണ്ട്സ് ഓഫ് പ്രസ്റ്റൺമലയാളി അസോസിയേഷൻറെ സംഘടന പാടവത്തെ മികവുറ്റതാക്കി.
എഫ് ഒ പി കോർഡിനേറ്റർ സിന്നി ജേക്കബ് ടൂർണമെൻറ് കൺവിനേഴ് ബിജു മൈക്കിൾ ബിജു സൈമൺ ബെന്നി ചാക്കോ എന്നിവരുടെ നേതൃത്വത്തിലുള്ള വിപുലമായ കമ്മിറ്റികൾ ടൂർണമെൻറിൻ്റെ വിജയത്തിനായി പ്രവർത്തിച്ചു.

ടൂർണമെന്റിൽ പങ്കെടുത്തവർക്കും വിജയത്തിനായി പ്രവർത്തിച്ചവർക്കും ..എഫ് ഒ പി യോടൊപ്പം സഹകരിച്ച സ്പോൺസർ. FOCOUS FINSURE LTD (Insurence and mortgage group ) നു സംഘാടക സമിതിക്ക് വേണ്ടി കോർഡിനേറ്റർ സിന്നി ജേക്കബ് നന്ദി അറിയിച്ചു.

ജോമോന്‍ തെക്കേക്കൂറ്റ്

യുകെ യില്‍ താമസിക്കുന്ന കോട്ടയം ജില്ലയിലെ മോനിപ്പള്ളിക്കാരുടെ കൂട്ടായ്മയായ മോനിപ്പള്ളി സംഗമം യുകെ, ഈ വര്‍ഷം ജൂലൈ ഒന്നിന് ബര്‍മിങ്ഹാമിലെ ആൽഡ്രിഡ്ജ് കമ്മ്യൂണിറ്റി സെന്ററില്‍ വച്ച് നടത്തപ്പെടുന്നു.യുകെയില്‍ ജാതിമതഭേതമന്യ നടത്തപ്പെടുന്ന മികച്ച സംഗമങ്ങളില്‍ ഒന്നായ, മോനിപ്പള്ളി സംഗമം ഈ വര്‍ഷം സ്വദേശത്തും വിദേശത്തും താമസിക്കുന്ന മോനിപ്പള്ളിക്കാര്‍ക്ക് പങ്കെടുക്കുവാനായിട്ട് ഗ്ലോബല്‍ മോനിപ്പള്ളി സംഗമമായി കൊണ്ടാടുന്നു.

രാവിലെ പത്തരയ്ക്ക് തുടങ്ങുന്ന ചെണ്ടമേളത്തോടെ ആയിരിക്കും മോനിപ്പള്ളി സംഗമത്തിന് തുടക്കം കുറിക്കുക. അതിനുശേഷം സ്വാഗത നൃത്തവും പൊതുസമ്മേളനവും ഉണ്ടായിരിക്കും.കുട്ടികള്‍ക്കും മുതിര്‍ന്നവര്‍ക്കുമായി വിവിധ ഇനം ഇന്‍ഡോര്‍ ഗെയിമുകളും ഫണ്‍ ഗെയിംസുകളും നടത്തപ്പെടും. നാടന്‍ രീതിയിലുള്ള ഉച്ചഭക്ഷണം മോനിപ്പിള്ളി സംഗമത്തിന്റെ പ്രത്യേകതയാണ്. ഉച്ചയ്ക്ക് ശേഷം ബെസ്റ്റ് കപ്പിള്‍സ് എവര്‍ റോളിംഗ് ട്രോഫിക്ക് വേണ്ടിയുള്ള മത്സരവും ഉണ്ടായിരിക്കുന്നതാണ്.മോനിപ്പള്ളി ഗ്രാമത്തിന്റെ പ്രധാന കായിക ഇനമായ വാശിയേറിയ വടം വലി മത്സരം ഇക്കുറിയും സംഗമത്തിന് മാറ്റുകൂട്ടുമെന്നതില്‍ സംശയമില്ല.

പതിനഞ്ചാമത് മോനിപ്പള്ളി സംഗമ ത്തിന്റെ ഭാഗമായി വിവിധ രാജ്യങ്ങളില്‍ നിന്ന് വരുന്നവര്‍ക്ക് സ്‌കോട്ടിഷ് ഹൈലാന്‍ഡ് കാണുവാനുള്ള അവസരവും സംഘാടകര്‍ ഒരുക്കിയിട്ടുണ്ട്. ബര്‍മിംഗ്ഹാമില്‍ നിന്ന് ജൂലൈ 4, ചൊവ്വാഴ്ച രാവിലെ പുറപ്പെടുന്ന നാലുദിവസത്തെ coach ടൂര്‍ വെള്ളിയാഴ്ച വൈകിട്ട് തിരിച്ചെത്തുന്നതായിരിക്കും. ഇനിയും അതില്‍ ആര്‍ക്കെങ്കിലും പോകുവാന്‍ താല്പര്യമുള്ളവര്‍ ഉണ്ടെങ്കില്‍ (നാട്ടില്‍ നിന്ന് വന്നവര്‍ പ്രത്യേകിച്ച് ) മോനിപ്പള്ളി സംഗമ യുകെ കമ്മിറ്റിയെ ബന്ധപ്പെടുക. (ആളൊന്നിന് 395 പൗണ്ട് including ട്രാന്‍സ്‌പോര്‍ട്ട്, ഫുഡ് ആന്‍ഡ് അക്കോമഡേഷന്‍.)

മോനിപ്പള്ളിയിലെയും പരിസര പ്രദേശങ്ങളിലുള്ള എല്ലാവരെയും സംഗമത്തിലേയ്ക്ക് സ്വാഗതം ചെയ്യുന്നു