ന്യൂസ് ഡെസ്ക് മലയാളം യുകെ

റൺവേയിൽ നിന്ന് വിമാനം തെന്നി മാറിയതിനെ തുടർന്ന് ലീഡ്‌സ് ബ്രാഡ്‌ഫോർഡ് വിമാനത്താവളം അടച്ചു . ബാബെറ്റ് കൊടുങ്കാറ്റ് വീശിയടിച്ചതിനെ തുടർന്നുണ്ടായ പ്രശ്നങ്ങളാണ് അപകടത്തിന് കാരണമായത്. വിമാനത്താവളത്തിൽ ലാൻഡ് ചെയ്യാൻ വന്ന ഹോളിഡേ ജെറ്റ് വിമാനമാണ് അപകടത്തിൽ പെട്ടത്.

അപകടം നടന്ന ഉടനെ തന്നെ അഗ്നി ശമന സേനാഗങ്ങൾ സംഭവസ്ഥലത്തെത്തി എല്ലാ യാത്രക്കാരെയും സുരക്ഷിതരാക്കി വിമാനത്താവളത്തിൽ നിന്ന് പുറത്തിറക്കി. സുരക്ഷാ കാരണങ്ങളാൽ വിമാനത്താവളം അടച്ചു . സംഭവങ്ങളെ തുടർന്ന് ഉണ്ടായ ബുദ്ധിമുട്ടിൽ എയർപോർട്ട് അധികൃതർ യാത്രക്കാരോട് ക്ഷമാപണം നടത്തി.

തീപിടുത്തം ഒന്നും ഉണ്ടായിട്ടില്ലെന്നും എല്ലാവരെയും സുരക്ഷിതരായി പുറത്തിറക്കി എന്നും വെസ്റ്റ് യോർക്ക്ഷെയർ ഫയർ ആൻഡ് റെസ്ക്യൂ സർവീസ് പറഞ്ഞു . ഇന്ന് തന്നെ എയർപോർട്ട് തുറക്കാൻ സാധിക്കുമെന്നാണ് അധികൃതർ പറയുന്നത്. എന്നിരുന്നാലും വിമാനത്താവളത്തിലേയ്ക്ക് പുറപ്പെടുന്നതിനുമുമ്പ് തങ്ങളുടെ ഫ്ലൈറ്റിന്റെ സ്റ്റാറ്റസ് എന്താണെന്ന് ഉറപ്പ് വരുത്തണമെന്നും അവരവരുടെ എയർലൈനും ആയി ബന്ധപ്പെടണമെന്നും യാത്രക്കാർക്ക് നിർദ്ദേശം നൽകപ്പെട്ടിട്ടുണ്ട് .