ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: പുകയില ഉൽപന്നങ്ങൾ ഉപേക്ഷിക്കാൻ പ്രോത്സാഹിപ്പിക്കുന്നതിനായി ഒരു ദശലക്ഷം പുകവലിക്കാർക്ക് സൗജന്യ വാപ്പിംഗ് സ്റ്റാർട്ടർ കിറ്റ് നൽകാൻ ഒരുങ്ങി സർക്കാർ. പുകവലി ഉപേക്ഷിക്കാൻ ജനങ്ങളെ പ്രോത്സാഹിപ്പിക്കുന്ന വിവിധ പദ്ധതികളുടെ ഭാഗമായാണ് നടപടി. ഇന്ന് മുതൽ ആരംഭിക്കുന്ന ക്യാമ്പയിൻ ജനങ്ങൾക്ക് ഇടയിൽ ഇതിനോടകം തന്നെ വലിയ ജനശ്രദ്ധയാണ് പിടിച്ചു പറ്റിയിരിക്കുന്നത്. ഗർഭിണികളായ സ്ത്രീകൾക്ക് പുകവലി നിർത്താൻ 400 പൗണ്ടാണ് സർക്കാർ പദ്ധതിയിലൂടെ വാഗ്ദാനം ചെയ്യുന്നത്. പുകവലിയുടെ ദൂഷ്യവശങ്ങൾ വ്യക്തമാക്കി കൊണ്ട് സിഗരറ്റ് പാക്കറ്റുകൾക്കുള്ളിൽ തന്നെ അവബോധം പകർന്നു നൽകാനും പദ്ധതി ലക്ഷ്യമിടുന്നു.

2030ഓടെ ഇംഗ്ലണ്ടിൽ പുകവലിക്കുന്നവരുടെ നിരക്ക് 5 ശതമാനത്തിൽ താഴെയാക്കാനാണ് സർക്കാർ ലക്ഷ്യമിടുന്നത്. പ്രായപൂർത്തിയാകാത്ത പുകവലിക്ക് അടിമപ്പെട്ടവരെയും, അനധികൃതമായി വില്പന നടത്തുന്നവർക്കെതിരെ കർശന നടപടികൾ സ്വീകരിക്കുമെന്നും അധികൃതർ വ്യക്തമാക്കുന്നു. സ്വാപ്പ് ടു സ്റ്റോപ്പ് എന്ന് പേരിട്ടിരിക്കുന്ന പദ്ധതി പ്രകാരം പുകവലിക്ക് അടിമപ്പെട്ടു പോകുന്ന ആളുകളെ ജീവിതത്തിലേക്ക് മടക്കി കൊണ്ടുവരാൻ കഴിയുമെന്ന് ആരോഗ്യമന്ത്രി നീൽ ഒബ്രിയൻ പറഞ്ഞു. തുടർച്ചയായി പുക വലിക്കുന്ന ആളുകളിൽ മൂന്നിൽ രണ്ട് പേർ മരണപ്പെടുമെന്നും, മനുഷ്യ ജീവനുകൾ നിഷ്പ്രയാസം കവർന്നെടുക്കുന്ന മരുന്നാണ് സിഗരറ്റ് എന്നും അദ്ദേഹം കൂട്ടിച്ചേർത്തു.

ഇംഗ്ലണ്ടിൽ ഗർഭകാലത്തും 9% സ്ത്രീകൾ പുകവലിക്കുന്നുണ്ടെന്നാണ് ഔദ്യോഗിക കണക്കുകൾ സാക്ഷ്യപ്പെടുത്തുന്നത്. ഇതിനെല്ലാം പരിഹാരം എന്നുള്ള നിലയിലാണ് നിലവിൽ ഈ പദ്ധതിയെ സർക്കാർ കാണുന്നത്. പ്രാഥമിക ഘട്ടം എന്നുള്ള നിലയിൽ പ്രാദേശിക ഭരണകൂടങ്ങളെയും ചേർത്ത് നിർത്തി കൊണ്ട് മുന്നോട്ട് പോകാനാണ് ആരോഗ്യ വകുപ്പ് ലക്ഷ്യമിടുന്നത്. ഏകദേശം 45 മില്യൺ പൗണ്ട് ചെലവ് വരുന്ന പദ്ധതിക്ക് ആരോഗ്യ വകുപ്പിൽ നിന്നാണ് പണം അനുവദിക്കുന്നത്.

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: തീവ്രവാദികൾ എന്ന് സംശയിക്കുന്ന 20 പേർ ബ്രിട്ടനിലെത്തിയതായി ഇന്റലിജൻസ് റിപ്പോർട്ട്‌. ബ്രിട്ടീഷ് ചാനൽ മുറിച്ചു കടന്ന ഇവർ ചെറിയ ബോട്ടുകൾ വഴിയാണ് എത്തിയത്. ഇസ്ലാമിക് സ്റ്റേറ്റ് ഉൾപ്പെടെയുള്ള ഗ്രൂപ്പുകളുമായി ബന്ധമുള്ള വിദേശികൾ കഴിഞ്ഞ വർഷം വടക്കൻ ഫ്രാൻസിൽ നിന്ന് യുകെയിൽ അനധികൃതമായി എത്തിയിരുന്നു. സമാനമായ നിലയിലാണ് ഇപ്പോൾ ആളുകൾ എത്തിയിരിക്കുന്നതെന്നാണ് പുറത്ത് വരുന്ന വിവരം. ഇവരിൽ ഭൂരിപക്ഷം ആളുകളും ബ്രിട്ടനിൽ തുടരുകയാണ്. പുതിയതായി എത്തിയ 19 പേർ വിവിധ ഇടങ്ങളിൽ ഒളിച്ചു താമസിക്കുകയാണെന്നാണ് സുരക്ഷാ വിഭാഗം മേധാവി പറയുന്നത്.

19 പേരെ സംബന്ധിച്ചുള്ള അന്വേഷണങ്ങൾ പോലീസ് ഊർജിതമാക്കിയിട്ടുണ്ട്. സെക്യൂരിറ്റി സർവീസ് എംഐ 5, ഗവൺമെന്റ് ലിസണിംഗ് പോസ്റ്റ് ജിസിഎച്ച്ക്യു, കൗണ്ടർ ടെററിസം പോലീസ് എന്നിവരും ഇവരെ നിരീക്ഷിച്ചുവരുന്നു. കഴിഞ്ഞ വർഷം എത്തിയ അറിയപ്പെടുന്ന ഭീകരരിൽ അഞ്ച് പേർ ഇറാഖി, അഞ്ച് ഇറാനിയൻ, നാല് അഫ്ഗാൻ, നാല് സോമാലിയ, ഒരാൾ ലിബിയൻ എന്നിവരാണ്. ഇവരിൽ ഏഴ് പേർ ഇസ്ലാമിക് സ്റ്റേറ്റുമായി നേരിട്ട് ബന്ധമുള്ളവരാണെന്നാണ് പുറത്ത് വരുന്ന നിർണായക വിവരം. ബാക്കിയുള്ളവർ അഫ്ഗാൻ അഫിലിയേറ്റ് ആയ ഇസ്ലാമിക് സ്റ്റേറ്റും ഖൊറാസാനുമായും, ഇറാനിയൻ ഭീകരസംഘടനകളുമായും ബന്ധമുള്ളവരാണ്.

ബ്രിട്ടീഷ് ചാനൽ മുറിച്ച് കടന്നപ്പോൾ മുതൽ ഈ സംഘത്തെ നിരീക്ഷിക്കുന്നുണ്ടെന്നും, എന്താണ് ഇവരുടെ ലക്ഷ്യമെന്ന് അറിയില്ലെന്നും സുരക്ഷാ വിഭാഗം മേധാവി പറഞ്ഞു. ഭീകര സംഘടനകളുമായി ചേർന്ന് പ്രവർത്തിച്ച ആളുകൾ എന്ന നിലയിൽ തന്നെ ഇത് തങ്ങളുടെ ഉത്തരവാദിത്തം വർദ്ധിപ്പിക്കുന്നുണ്ടെന്നും അദ്ദേഹം പറഞ്ഞു. ഭീകരവാദികളുടെ നുഴഞ്ഞു കയറ്റം ഒരേ സമയം രാഷ്ട്രീയ വിവാദങ്ങൾക്കും തിരി തെളിയിച്ചിട്ടുണ്ട്. ഇപ്പോൾ രാജ്യത്തേക്ക് നിയമവിരുദ്ധമായി കുറ്റവാളികൾ മാത്രമല്ല, തീവ്രവാദ ബന്ധമുള്ള ആളുകളും എത്തി തുടങ്ങിയിരിക്കുകയാണെന്ന് മുൻ ആർമി ഓഫീസറും ടോറി എംപിയുമായ ബോബ് സീലി പറഞ്ഞു.

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: ഈസ്റ്റർ ദിനത്തിൽ ലണ്ടനിൽ നടന്നത് ഞെട്ടിക്കുന്ന ലൈംഗികാതിക്രമം. കാനലിനു സമീപത്തു വച്ചാണ് രണ്ട് പെൺകുട്ടികൾ അതിക്രൂര പീഡനത്തിന് ഇരയായത്. സംഭവത്തിൽ പോലീസ് അന്വേഷണം ആരംഭിച്ചിട്ടുണ്ട്. ശനിയാഴ്ച രാത്രി 9.30 നും 10.10 നും ഇടയിൽ എയിൽസ്ബറിയിലെ പാർക്ക് സ്ട്രീറ്റിന് സമീപമുള്ള കനാൽ റോഡിലാണ് സംഭവം. പ്രാഥമിക അന്വേഷണത്തിൽ സംശയം തോന്നിയ പതിനേഴുവയസുകാരനെ പോലീസ് അറസ്റ്റ് ചെയ്തെങ്കിലും പിന്നീട് ജാമ്യത്തിൽ വിട്ടയച്ചു.

സംഭവത്തിൽ അന്വേഷണം പുരോഗമിക്കുകയാണെന്നും, പ്രതികളെ എത്രയും പെട്ടെന്ന് നിയമത്തിനു മുന്നിൽ കൊണ്ടുവരുമെന്നും കേസിന്റെ അന്വേഷണ ചുമതലയുള്ള ഉദ്യോഗസ്ഥൻ ഡിറ്റക്ടീവ് സർജന്റ് തോമസ് ബൂത്ത് പറഞ്ഞു. കേസിൽ പോലീസ്, സിസിടിവി ദൃശ്യങ്ങൾ ശേഖരിക്കാൻ ഒരുങ്ങുകയാണ്. സമീപത്തെ കടകളിലും, സൂപ്പർ മാർക്കറ്റുകളിലെയും ക്യാമറകൾ പരിശോധിക്കും. എന്നാൽ സംഭവത്തെ കുറിച്ച് എന്തെങ്കിലും ദൃശ്യങ്ങളോ, വിവരങ്ങളോ കൈമാറാൻ ആഗ്രഹിക്കുന്നവർ പോലീസ് എമർജൻസി നമ്പർ ആയ 101 ൽ വിളിക്കുകയോ, അല്ലെങ്കിൽ പോലീസ് വെബ്സൈറ്റ് മുഖേനെ 43230154466 എന്ന റഫറൻസ് നമ്പർ ഉപയോഗിച്ചോ റിപ്പോർട്ട്‌ സമർപ്പിക്കാവുന്നതാണ്.

പെൺകുട്ടികൾ ലൈംഗിക അതിക്രമത്തിനിരയാകുന്ന സംഭവങ്ങളിൽ സർക്കാർ മൗനം പാലിക്കുകയാണെന്ന വിമർശനം പ്രതിപക്ഷം ഉയർത്തുന്നതിനിടയിലാണ് പുതിയ കേസ് റിപ്പോർട്ട്‌ ചെയ്തിരിക്കുന്നത്. ഇത്തരം ആക്രമണങ്ങൾ ചെറുക്കാൻ ടാസ്ക് ഫോഴ്സുകൾക്ക് രൂപം നൽകുമെന്ന് പ്രധാനമന്ത്രി റിഷി സുനക് നേരത്തെ പ്രഖ്യാപിച്ചിരുന്നു. എന്നാൽ അതെല്ലാം കേവലം വാഗ്ദാനം മാത്രമായി അവശേഷിക്കുകയാണെന്നും, പ്രധാനമന്ത്രിയുടെ വാദങ്ങൾ പൊള്ളായാണെന്നും ലേബർ പാർട്ടി നേതാക്കൾ ഇന്നലെ പ്രതികരണം നടത്തിയിരുന്നു.

ന്യൂസ് ഡെസ്ക് മലയാളം യുകെ ന്യൂസ്

യുകെയിലുടനീളമുള്ള വോഡഫോൺ ഉപഭോക്താക്കൾക്ക് ബ്രോഡ്ബാൻഡ് ഇന്റർനെറ്റ് സേവനം നഷ്ടപ്പെട്ടതായി റിപ്പോർട്ട്. 2,800-ലധികം ഉപയോക്താക്കളാണ് ഇന്റർനെറ്റ് ആക്‌സസ് ഇല്ലെന്ന പരാതിയുമായി ഓൺലൈൻ സേവനങ്ങളിലെ പ്രശ്‌നങ്ങൾ കൈകാര്യം ചെയ്യുന്ന ഡൗൺഡിറ്റക്ടർ എന്ന വെബ്‌സൈറ്റിൽ ബന്ധപ്പെട്ടത്. ഇതിന് പിന്നാലെ തങ്ങളുടെ ഉപഭോക്താക്കൾക്ക് ഉണ്ടായ അസൗകര്യത്തിൽ ഖേദിക്കുന്നുവെന്നും പ്രശ്‌നം പരിഹരിക്കാൻ ശ്രമിക്കുകയാണെന്നും വോഡഫോൺ അറിയിച്ചു. 50,000-ത്തിലധികം ബ്രോഡ്‌ബാൻഡ് ഉപഭോക്താക്കൾക്കുള്ള വിർജിൻ മീഡിയ ഒ 2 വിൽ പ്രശ്‌നങ്ങൾ റിപ്പോർട്ട് ചെയ്‌തതിന് പിന്നാലെയാണ് വോഡഫോണിൻെറ സേവനങ്ങളിൽ തകരാർ റിപ്പോർട്ട് ചെയ്‌തിരിക്കുന്നത്‌.

ഒരു ദശലക്ഷത്തിലധികം ഉപഭോക്താക്കളുള്ള യുകെയിലെ ഏറ്റവും വലിയ ബ്രോഡ്‌ബാൻഡ് ദാതാക്കളിൽ ഒന്നാണ് വോഡഫോൺ. ഉപഭോക്താക്കളുടെ കൈയിൽ നിന്ന് ഉയർന്ന തുക വാങ്ങിക്കുന്ന സാഹചര്യത്തിൽ സേവനങ്ങളിൽ ഉണ്ടാകുന്ന പ്രശ്‌നങ്ങൾ വൻ ജനരോക്ഷമാണ് ഉണ്ടാക്കിയിരിക്കുന്നത് . ഏപ്രിലിൽ മിഡ്-കോൺട്രാക്റ്റ് വിലവർദ്ധന വരുത്തുന്ന ബ്രോഡ്‌ബാൻഡ് ദാതാക്കളിൽ ഒന്നാണ് വോഡഫോൺ. ഇതുമൂലം ചില ഉപഭോക്താക്കൾക്ക് വിലയിൽ 15% വർദ്ധനവ് വരെ വരും.

ഇന്റർനെറ്റ് സേവനം തടസമായത് വീട്ടിലിരുന്ന് ജോലി ചെയ്യുന്നതിനെ ബാധിച്ചതായി നിരവധി ഉപയോക്താക്കൾ ട്വീറ്റ് ചെയ്തു. ഇന്റർനെറ്റ് സേവനം നഷ്ടമായവരുടെ എണ്ണം ഇനിയും വ്യക്തമല്ല. ബ്രോഡ്‌ബാൻഡ് പ്രശ്‌നങ്ങൾ പരിഹരിക്കാൻ എത്ര സമയമെടുക്കുമെന്ന് ഉറപ്പില്ല. എന്നാൽ എത്രയും പെട്ടെന്ന് തന്നെ സേവങ്ങൾ പുനഃസ്ഥാപിക്കാൻ തങ്ങൾ ശ്രമിക്കുന്നുണ്ടന്നും കമ്പനി അറിയിച്ചു.

ന്യൂസ് ഡെസ്ക് മലയാളം യുകെ ന്യൂസ്

പുതിയതായി ഡ്രൈവിംഗ് ലൈസൻസ് എടുത്ത മലയാളികൾക്ക് യുകെയിലെ ഡ്രൈവിംഗ് നിയമങ്ങളെ കുറിച്ചുള്ള അറിവില്ലായ്മ പലപ്പോഴും പ്രശ്നങ്ങൾ സൃഷ്ടിക്കാറുണ്ട്. കേരളത്തിലെ റോഡുകളിൽ നിന്നും ഡ്രൈവിംഗ് രീതികളിൽ നിന്നും തികച്ചും വ്യത്യസ്തമാണ് ഇവിടെ എന്ന് മനസ്സിലാക്കി വരുമ്പോഴേക്കും പിഴ ഒട്ടേറെ ഒടുക്കേണ്ടതായി വന്നിട്ടുണ്ടാവും. യുകെയിൽ എത്തി വളരെ നാളായ മലയാളികൾക്ക് പോലും ഹൈവേ കോഡും മറ്റ് നിയമങ്ങൾ മാറുന്നതിനെ കുറിച്ചുള്ള അറിവില്ലായ്മയും പലപ്പോഴും പ്രശ്നങ്ങൾ സൃഷ്ടിക്കാറുണ്ട്.

രാജ്യത്ത് റോഡുകളിൽ സഞ്ചരിക്കുവാനുള്ള സുരക്ഷാ മുൻക്രമം പുതുക്കിയിട്ടുണ്ട്. റോഡിൽ ഏറ്റവും വലിയ വാഹനങ്ങൾ ഓടിക്കുന്നവർക്കാണ് ഏറ്റവും കൂടുതൽ ഉത്തരവാദിത്വങ്ങൾ ഉണ്ടായിരിക്കുന്നത്. അപകടം സംഭവിക്കാൻ ഏറ്റവും കൂടുതൽ സാധ്യതയുള്ള കാൽനടക്കാർക്കും സൈക്കിൾ സവാരിക്കാർക്കും കുതിര സവാരിക്കാർക്കും സുരക്ഷ ഉറപ്പാക്കുന്ന രീതിയിലാണ് ഹൈവേ കോഡ് പരിഷ്കരിച്ചിരിക്കുന്നത് . ഇതനുസരിച്ച് യുകെയിൽ കാൽനടക്കാരുടെ സുരക്ഷയ്ക്ക് ഉയർന്ന മുൻകരുതലുണ്ട്. കാൽനടക്കാർ കഴിഞ്ഞാൽ ഏറ്റവും സുരക്ഷാ പരിഗണന ലഭിക്കുന്ന വിഭാഗം സൈക്കിൾ യാത്രക്കാരും കുതിര സവാരിക്കാരുമാണ്.

പുതിയ നിയമം അനുസരിച്ച് റോഡിലൂടെ സഞ്ചരിക്കുന്ന കുതിരസവാരിക്കാർക്ക് വളരെ സമീപത്തു കൂടി വാഹനം ഓടിക്കുന്നത് ശിക്ഷാർഹമാണ്. 3550 അപകടങ്ങളാണ് കഴിഞ്ഞവർഷം കുതിരസവാരിക്കാർ ഉൾപ്പെടുന്നതായി രാജ്യത്ത് ആകമാനം റിപ്പോർട്ട് ചെയ്യപ്പെട്ടത്. ഈ അപകടങ്ങളിൽ 139 കുതിര സവാരിക്കാർക്ക് പരിക്കേൽക്കുകയും ചെയ്തിട്ടുണ്ട്. നിരത്തിൽ സമീപത്തായി ഒരു കുതിരയെ കണ്ടാൽ വാഹനത്തിൻറെ വേഗപരിധി 10 മൈലിൽ കൂടാൻ പാടില്ലന്നുള്ളതും നിയമത്തിൽ ഉൾപ്പെടുത്തിയിട്ടുണ്ട്. കുതിര സമീപത്ത് ഉണ്ടെങ്കിൽ ഹോൺ മുഴക്കുന്നതിനും നിയന്ത്രണമുണ്ട്.

ന്യൂസ് ഡെസ്ക് മലയാളം യുകെ ന്യൂസ്

കഴിഞ്ഞ ദിവസം വെസ്റ്റ് ബാങ്കിൽ നടന്ന വെടിവയ്പ്പിൽ മരണപ്പെട്ട ബ്രിട്ടീഷ്-ഇസ്രായേൽ സഹോദരിമാരുടെ പിതാവാണ് തൻെറ മക്കളെ “സുന്ദരികളായ മാലാഖമാർ” എന്ന് വിശേഷിപ്പിച്ച് വികാരഭരിതനായി ആദരാഞ്ജലി അർപ്പിച്ചത്. 20-ഉം 15-ഉം വയസ്സുള്ള മായയും റിനാ ഡീയുമാണ് വെള്ളിയാഴ്ച ഇസ്രായേൽ സെറ്റിൽമെന്റിന് സമീപം പാലസ്തീൻ അക്രമികൾ കാർ ആക്രമിച്ചതിന് പിന്നാലെ കൊല്ലപ്പെട്ടത്. അവരുടെ 45-കാരിയായ അമ്മ ലൂസി ഡീ ആക്രമണത്തിൽ പരുക്കേറ്റ് അബോധാവസ്ഥയിൽ തുടരുകയാണ്. ഇവരുടെ പിതാവ് റാബി ലിയോ ഡീ പിന്നിൽ മറ്റൊരു വാഹനത്തിൽ ആയിരുന്നു.

മറ്റ് മൂന്ന് കുട്ടികളുള്ള റാബി ഡീ, തന്റെ ഭാര്യ അബോധാവസ്ഥയിൽ നിന്ന് പുറത്ത് വരും എന്ന ഉറച്ച വിശ്വാസത്തിലാണ്. തൻെറ മക്കൾക്ക് എന്ത് സംഭവിച്ചു എന്ന ലൂസിയുടെ ചോദ്യത്തിനു താൻ എന്ത് മറുപടി നൽകും എന്ന് പറഞ്ഞ് അദ്ദേഹം പൊട്ടിക്കരയുകയായിരുന്നു. വെസ്റ്റ് ബാങ്കിലെ ക്ഫാർ എറ്റ്സിയോണിലെ ജൂത സെറ്റിൽമെന്റിലെ ഒരു സെമിത്തേരിയിൽ നടന്ന ശുശ്രുഷയിൽ തൻറെ മക്കൾ മാലാഖമാരായിരുന്നു, ഇനി അവർ ഞങ്ങളുടെ കാവൽ മാലാഖമായിരിക്കും എന്ന് അദ്ദേഹം കൂട്ടിച്ചേർത്തു.

മുസ്‌ലിംകൾക്കും ജൂതന്മാർക്കും പവിത്രമായ അൽ അഖ്‌സ പള്ളി സുരക്ഷാ പ്രതിസന്ധിയുടെ കേന്ദ്രമാണ്. കഴിഞ്ഞ ബുധനാഴ്ച ഇസ്രായേൽ പോലീസ് പള്ളി റെയ്ഡ് ചെയ്തപ്പോൾ ആയുധങ്ങളുമായുള്ള യുവാക്കൾ അവരെ തടഞ്ഞുനിർത്തിയതായി പോലീസ് വെളിപ്പെടുത്തി. പതിനഞ്ചും ഇരുപതും വയസ്സുള്ള ബ്രിട്ടീഷ്-ഇസ്രായേലി പൗരത്വമുള്ള രണ്ടു പെൺകുട്ടികൾ മരിച്ചത് ലോക മനസാക്ഷിയെ ഞെട്ടിക്കുന്നതായിരുന്നു .

ഇസ്രയേലീ പട്ടാളം ആദ്യം അറിയിച്ചത് ജോർദാൻ വാലിയിലെ ഈ അക്രമത്തിന് കാരണം ഇസ്രയേലീ-പാലസ്തീനി ഡ്രൈവർമാർ തമ്മിലുള്ള സംഘർഷമാണെന്നാണ്. പിന്നീട് ഇസ്രയേലീ വാഹനങ്ങളിൽ മാത്രം ബുള്ളറ്റിൻ്റെ ദ്വാരങ്ങൾ കണ്ടെത്തിയ സൈന്യം, ഇത് മനഃപൂർവം നടത്തിയ ആക്രമണമാണെന്ന് അറിയിച്ചു. ബി.ബി.സി.റിപ്പോർട്ട് പ്രകാരം മരിച്ച സഹോദരിമാരുടെ കുടുംബം വെസ്റ്റ് ബാങ്കിലെ, ഇഫ്രാത്ത് എന്ന ഇസ്രയേലീ സെറ്റിൽമെന്റിലേയ്ക്ക് കുടിയേറിയവരാണ്.

ന്യൂസ് ഡെസ്ക് മലയാളം യുകെ ന്യൂസ്

ലണ്ടൻ: രാജ്യത്ത് കുട്ടികളെ ലൈംഗികമായി ദുരുപയോഗം ചെയ്യുന്നവർക്കെതിരെ നടപടി കടുപ്പിക്കണമെന്ന ആവശ്യവുമായി ലേബർ പാർട്ടി നേതൃത്വം രംഗത്ത് വന്നു. ഈ ആവശ്യമുന്നയിച്ച് സമൂഹമാധ്യമങ്ങളിൽ പോസ്റ്ററുകളും പ്രത്യക്ഷപ്പെട്ടിട്ടുണ്ട്. ഫലപ്രദമായ നടപടികൾ സർക്കാർ സ്വീകരിക്കുന്നില്ലെന്നും ലൈംഗിക കുറ്റകൃത്യങ്ങളിൽ പ്രതിയായ ആളുകൾ നിയമത്തിന്റെ മുന്നിൽ നിന്ന് രക്ഷപ്പെട്ടതായും ലേബർ പാർട്ടി നേതാവ് കെയർ സ്റ്റാർമർ പറഞ്ഞു. ഋഷി സുനകിനും സർക്കാരിനും എതിരെ രൂക്ഷ വിമർശനങ്ങളാണ് അദ്ദേഹം നടത്തിയത്.

കുട്ടികൾക്കെതിരെ റിപ്പോർട്ട്‌ ചെയ്യുന്ന കേസുകളുടെ എണ്ണം അനുദിനം വർധിക്കുന്നതായാണ് കണക്കുകൾ ചൂണ്ടിക്കാണിക്കുന്നത്. കേസുകളിൽ നടപടി എത്രയും പെട്ടെന്ന് സ്വീകരിക്കുവാനായി ടാസ്ക് ഫോഴ്സ് ഇതുവരെ നടപ്പിലാകാത്തതും പ്രതിപക്ഷത്തെ പ്രകോപിപ്പിച്ചിട്ടുണ്ട്.   ക്രൈം പോളിസിയുടെ ചുമതലയുള്ള ഷാഡോ ഹോം സെക്രട്ടറി യെവെറ്റ് കൂപ്പറും സർക്കാരിന്റെ നടപടികളിൽ കടുത്ത വിയോജിപ്പ് ഇതിനോടകം തന്നെ അറിയിച്ചിട്ടുണ്ട്.

കുട്ടികൾക്ക് എതിരെയുള്ള ലൈംഗികാതിക്രമങ്ങൾ തടയുന്നതിനും പ്രതികളെ പിടികൂടുന്നതിനും പോലീസിന് വൻ വീഴ്ച പറ്റിയതായുള്ള റിപ്പോർട്ടുകൾ നേരത്തെ പുറത്തുവന്നു വന്നിരുന്നു . കുട്ടികൾക്കെതിരെയുള്ള ലൈംഗിക കുറ്റകൃത്യങ്ങളിൽ പോലീസിന്റെ ഭാഗത്ത് വീഴ്ചയുണ്ടോ എന്ന അന്വേഷണത്തിൽ ചില കേസുകളിൽ 18 മാസമായിട്ടും ഒന്നും ചെയ്യാത്ത ഉദ്യോഗസ്ഥരെ വരെ കണ്ടെത്തുകയുണ്ടായി. ഇൻറർനെറ്റിന്റെയും ഫോണിന്റെയും വ്യാപകമായ ഉപയോഗം മൂലം പലപ്പോഴും കുട്ടികൾ ഓൺലൈനിൽ വ്യാപകമായി ദുരുപയോഗം ചെയ്യാനുള്ള സാധ്യതകൾ വളരെ കൂടുതലാണ്. കുട്ടികളെ ലൈംഗികമായി ചൂഷണം ചെയ്യുന്നതിനായി വല വീശുന്നവരെ തിരിച്ചറിയുന്നതിനായി പോലീസ് ആധുനിക സാങ്കേതിക വിദ്യകൾ വ്യാപകമായി ഉപയോഗിക്കുന്നുണ്ട്. അതുകൊണ്ടുതന്നെ ആയിരക്കണക്കിന് കുട്ടികളെ അപകടസാധ്യത ഉള്ളവരായി തിരിച്ചറിഞ്ഞ് അപകടത്തിൽ നിന്ന് രക്ഷപ്പെടുത്താൻ സാധിച്ചതായാണ് സർക്കാരിന്റെ അവകാശവാദം

ന്യൂസ് ഡെസ്ക് മലയാളം യുകെ ന്യൂസ്

എലിസബത്ത് രാജ്ഞിയുടെ മരണശേഷമുള്ള ആദ്യ ഈസ്റ്റർ ശുശ്രൂഷയ്ക്കായി വിൻഡ്‌സർ കാസിലിൽ ഒത്ത് കൂടി രാജാവും മറ്റ് മുതിർന്ന രാജകുടുംബാംഗങ്ങളും. ചാൾസ് രാജാവിനോടൊപ്പം അദ്ദേഹത്തിൻെറ ഭാര്യയും രാജ്ഞിയുമായ കാമില, സഹോദരങ്ങളായ പ്രിൻസസ് റോയൽ, ഡ്യൂക്ക് ഓഫ് യോർക്ക് എന്നിവരും ഉണ്ടായിരുന്നു. വെയിൽസിലെ രാജകുമാരനും രാജകുമാരിയും അവരുടെ മൂന്ന് കുട്ടികളുമായി സെന്റ് ജോർജ്ജ് ചാപ്പലിലെ ചടങ്ങുകളിൽ പങ്കെടുത്തു. കഴിഞ്ഞ വർഷം, ജോർജ്ജ് രാജകുമാരനും ഷാർലറ്റ് രാജകുമാരിയും മാത്രമാണ് ഇവർക്കൊപ്പം ഈ ദിവസം ചടങ്ങുകളിൽ പങ്കെടുത്തത്.

വില്യം രാജകുമാരനും കുടുംബവും നീല നിറത്തിലുള്ള ഷേഡുകളിൽ വർണ്ണാഭമായ വസ്ത്രങ്ങളിൽ വന്നപ്പോൾ ചാൾസും കാമിലയും കടും നീല വസ്ത്രങ്ങളാണ് ധരിച്ചത്. ശുശ്രുഷയിൽ പങ്കെടുത്ത മറ്റ് രാജകുടുംബാംഗങ്ങളിൽ എഡിൻബർഗിലെ പുതിയ ഡ്യൂക്ക് എഡ്വേർഡ്, ഡച്ചസ് സോഫി, അവരുടെ മകൻ ജെയിംസ് എന്നിവരും ഉൾപ്പെടുന്നു. ഈ വേനൽക്കാലത്ത് തന്റെ രണ്ടാമത്തെ കുഞ്ഞിനെ പ്രതീക്ഷിക്കുന്ന യൂജിൻ രാജകുമാരി ഭർത്താവ് ജാക്ക് ബ്രൂക്ക്സ്ബാങ്കിനും സഹോദരി ബിയാട്രിസ് രാജകുമാരിയ്ക്കും അവരുടെ ഭർത്താവ് എഡ്വാർഡോ മാപ്പെല്ലി മോസിയ്ക്കും ഒപ്പം പങ്കെടുത്തു.

പതിനഞ്ചാം നൂറ്റാണ്ടിൽ പണികഴിപ്പിച്ച കിംഗ് ജോർജ്ജ് ആറാമൻ മെമ്മോറിയൽ ചാപ്പലിലാണ് ശുശ്രൂഷ നടന്നത്. എലിസബത്ത് രാജ്ഞിയെ സംസ്‌കരിച്ചതും ഇതേ ചാപ്പലിൽ ആണ്. വെസ്റ്റ്മിൻസ്റ്റർ ആബിയിൽ ചാൾസിന്റെ കിരീടധാരണത്തിന് ഒരു മാസത്തിൽ താഴെ മാത്രം സമയം ഉള്ളപ്പോഴാണ് രാജകുടുംബാംഗങ്ങളുടെ ഈ ഒത്തു ചേരൽ.

ന്യൂസ് ഡെസ്ക് മലയാളം യുകെ ന്യൂസ്

ടൈപ്പ് 2 പ്രമേഹവും വൃക്കരോഗവും ഉള്ള ഒരു ദശലക്ഷത്തിലധികം ആളുകൾക്ക് വൃക്ക തകരാറുകൾ, ഹൃദയ സങ്കീർണതകൾ,എന്നിവയ്ക്കുള്ള സാധ്യത കുറയ്ക്കുന്ന പ്രതിദിന ഗുളികകൾ കണ്ടെത്തി. അൻപതിൽ ഒരു പ്രമേഹ രോഗിക്ക് എന്ന തലത്തിൽ വൃക്ക തകരാർ സംഭവിക്കുന്നുണ്ട്. രക്തത്തിലെ ഉയർന്ന പഞ്ചസാരയുടെ അളവ് രക്തക്കുഴലുകൾക്ക് കേടുപാടുകൾ വരുത്തുമ്പോൾ വിഷവസ്തുക്കളെ ഫിൽട്ടർ ചെയ്യുവാനുള്ള ശേഷി കുറയുന്നതാണ് ഇതിന് കാരണം. വൃക്കരോഗം ഹൃദയത്തിന് അമിത ആയാസം നൽകുകയും ഹൃദയസ്തംഭനത്തിനുള്ള സാധ്യത ഉയർത്തുകയും ചെയുന്നു. ഹൃദ്രോഗങ്ങളുടെ പരമ്പരാഗത ചികിത്സ തൊണ്ടവേദന, തലകറക്കം തുടങ്ങിയ മറ്റ് പാർശ്വഫലങ്ങൾക്കും കാരണമാകും. ഈ ഒരു സാഹചര്യത്തിലാണ് ഇംഗ്ലണ്ടിലെ ആരോഗ്യ വിദഗ്ദ്ധർ പുതിയ മരുന്ന് കണ്ടെത്തിയിരിക്കുന്നത്.

വൃക്കരോഗവും ടൈപ്പ് 2 പ്രമേഹ രോഗികളുമായവരെ ചികിൽസിക്കാൻ ഫൈൻറെനോൺ എന്ന മരുന്നാണ് ആരോഗ്യ വിദഗ്ദ്ധർ കണ്ടെത്തിയത്. മരുന്ന് വൃക്ക തകരാർ കുറയ്ക്കുന്നതോടൊപ്പം ഹൃദയ സംബന്ധമായ രോഗങ്ങൾക്കുള്ള സാധ്യത കുറയ്ക്കുന്നതായാണ് ശാസ്ത്രജ്ഞർ കണ്ടെത്തിയത്. മരുന്നിന് അംഗീകാരം നൽകാനുള്ള സ്കോട്ട്‌ലൻഡിന്റെ തീരുമാനത്തിന് പിന്നാലെയാണ് ഡിസംബറിൽ ഫൈൻറെനോണിന്റെ അംഗീകാരത്തിനായി വിദഗ്ധർ മുന്നോട്ട് വന്നത്.

വർഷങ്ങളായി ടൈപ്പ് 2 പ്രമേഹവുമായി ബന്ധപ്പെട്ട വൃക്കരോഗമുള്ള ആളുകളെ സംബന്ധിച്ചുള്ള ചികിത്സകൾ ഏറെ വലച്ചിരുന്നു. അതുകൊണ്ട് തന്നെ ഫൈനറിനോണിന്റെ വരവ് ടൈപ്പ് 2 പ്രമേഹവും വൃക്കരോഗവുമുള്ള ഒരു ദശലക്ഷത്തിലധികം ആളുകൾക്ക് ആശ്വാസവർത്തയാണ്. നിലവിലെ ചികിത്സകൾ നടത്തിയാലും ഹൃദ്രോഗ സാധ്യത വളരെ കൂടുതലാണ് എന്ന് ബാർട്ട്സ് ഹെൽത്ത് എൻ എച്ച് എസ് ട്രസ്റ്റിലെ കൺസൾട്ടന്റ് നെഫ്രോളജിസ്റ്റായ ഡോ. കീരൻ മക്കഫെർട്ടി പറഞ്ഞു. യുകെയിൽ ഏകദേശം 3.5 ദശലക്ഷം ആളുകൾക്ക് ടൈപ്പ് 2 പ്രമേഹമുണ്ട്. ജനിതകം, പൊണ്ണത്തടി, വ്യായാമക്കുറവ് എന്നിവയാണ് ഇതിന് പിന്നിലെ കാരണങ്ങൾ.

രമേശ് ചെന്നിത്തല

മാനവരാശിയുടെ വീണ്ടെടുപ്പിനായി മനുഷ്യപുത്രൻ ഉയിർത്തെഴുന്നേറ്റ ആ സുദിനം ആഗതമായിരിക്കുകയാണ്. കേരളത്തിൽ നിന്നുള്ള ഒരു രാഷ്ട്രീയക്കാരൻ എന്ന നിലയിൽ, യുണൈറ്റഡ് കിംഗ്ഡത്തിലെ നമ്മുടെ മലയാളി സമൂഹത്തിന് ഈ സന്തോഷത്തിന്റെ സന്ദേശം പങ്കുവയ്ക്കുന്നതിൽ ഞാൻ അഭിമാനിക്കുന്നു. നിങ്ങളുടെ സമ്പന്നമായ സാംസ്കാരിക പൈതൃകം മുറുകെപ്പിടിച്ചുകൊണ്ട് നിങ്ങളുടെ പുതിയ വീടിന് നിങ്ങൾ നൽകുന്ന നിരവധി സംഭാവനകൾ ഞാൻ തിരിച്ചറിയുന്നു. ലോകം മുഴുവൻ കോവിഡിനെയും മറ്റ് മഹാമാരികളെയും ഒക്കെ അതിജീവിച്ചുകൊണ്ട് മുന്നോട്ട് നീങ്ങുകയാണ്. പ്രതീക്ഷകൾ അസ്തമിച്ചു പോകുന്ന വർത്തമാനകാലത്ത് ഈസ്റ്റർ നൽകുന്ന പ്രത്യാശയും പ്രതീക്ഷയും വളരെ വലുതാണ്. മനുഷ്യനായും മാനവികതയുടെ മഹത്തായ മാതൃകകൾ സമ്മാനിച്ചും കടന്ന് പോയ ദൈവപുത്രന്റെ ഉയിർപ്പ്, അതുകൊണ്ട് തന്നെ കെട്ടകാലത്തിന്റെ മധ്യത്തിലായിരിക്കുന്ന ഈ സമയം പുതുജീവനാണ് ഒരർത്ഥത്തിൽ സമ്മാനിക്കുന്നത്. ഉയിർപ്പ് നൽകുന്ന പ്രതീക്ഷ അത് വീണ്ടെടുപ്പിന്റെയാണ്.

പ്രവാസികളായ മനുഷ്യരെ സംബന്ധിച്ചിടത്തോളം ഈസ്റ്റർ പോലെയുള്ള ആഘോഷങ്ങൾ പ്രധാനമാണ്. ജീവിതത്തിലെ സ്വപ്നങ്ങൾക്ക് നിറം പകരുവനായി നാടും വീടും വിട്ട്, അന്യനാട്ടിൽ വന്ന് കഷ്ടപ്പെടുന്നവരാണ് പ്രവാസികൾ. നമുക്ക് അറിവുള്ളത് പോലെ നാട്ടിലൊക്കെ വലിയ ആഘോഷമാണ് വീടുകളിൽ ഈസ്റ്ററിനെ തുടർന്ന് നടക്കുന്നത്. എന്നാൽ പ്രവാസികൾ ഇതെല്ലാം അകലെ നിന്ന് നോക്കി കാണാനാണ് ശ്രമിക്കുന്നത്. പ്രത്യേകിച്ച് യുകെയിൽ ഉള്ളവർ ജീവിതത്തിന്റെ ഭാവി സ്വപ്നങ്ങളെ കൂടെ കൂട്ടുവാനാണ് ശ്രമിക്കുന്നത്. മലയാള നാട്ടിൽ നിന്ന് പണ്ട് ഗൾഫ് നാടുകളിലേക്ക് ചേക്കേറിയിരുന്ന ആളുകളെ പോലെയാണ് ഇന്ന് യുകെയിലേക്കുള്ള ഒഴുക്ക്. കേരളത്തിലും രാജ്യത്തും തൊഴിൽ ഇല്ലാതെ വരുന്നതിനെ തുടർന്നാണ് ഈ ഒഴുക്ക് ഉണ്ടാകുന്നത് എന്നുള്ളത് വ്യക്തമാണ്. അഭ്യസ്ഥവിദ്യരായ നിരവധി ചെറുപ്പക്കാർ തൊഴിൽ ഇല്ലാതെ ബുദ്ധിമുട്ടുന്നുണ്ട്. ഇവരുടെ ഒക്കെ പ്രതീക്ഷയാണ് യുകെ യിൽ എത്തുക എന്നുള്ളത്. അതിനായിട്ടാണ് ഇന്ന് അവർ പരിശ്രമിക്കുന്നത്. 25 ലക്ഷം തൊഴിൽ അവസരങ്ങൾ ഒരുക്കുമെന്ന് വാഗ്ദാനം ചെയ്തു അധികാരത്തിൽ കയറിയ മോദി സർക്കാർ ഇന്ന് അതിനെ പറ്റി ഒരു അക്ഷരം പോലും മിണ്ടുന്നില്ല. അതേസമയം തന്നെ കേരളത്തിൽ ഇടതുപക്ഷ മന്ത്രി സഭ പി എസ് സിയെ പോലും അട്ടിമറിച്ചു പാർട്ടി നിയമനങ്ങൾ നടത്തുകയാണ്. ഇതാണ് നാട്ടിലെ സാഹചര്യം. ഒരർത്ഥത്തിൽ,യുകെയിലെ ഗവണ്മെന്റ് സംവിധാനവും മറ്റ് മേഖലകളും മലയാളി സമൂഹത്തിനു നൽകുന്ന പിന്തുണയെയാണ് ഈ ഒഴുക്ക് കാണിക്കുന്നത്. പ്രത്യേകിച്ച് ഇന്ന് ഏറ്റവും കൂടുതൽ ആളുകൾ ജോലി ചെയ്യുന്ന മേഖലയായ നേഴ്സിംഗിന് ഏറ്റവും കൂടുതൽ സംഭാവനകൾ നൽകുന്ന രാജ്യമാണ് യുകെ. അതിൽ വർക്ക്‌ ചെയ്യുന്നതിൽ ഏറെയും മലയാളികളാണ് എന്നുള്ളതും ശ്രദ്ധേയമാണ്.

ഒരു രാജ്യത്തിന്റെ ഭാവി എന്നത് മെഡിക്കൽ രംഗമാണ്. ആരോഗ്യമുള്ള തലമുറയെ വാർത്തെടുക്കാൻ മെഡിക്കൽ രംഗത്ത് നല്ല രീതിയിലുള്ള മുന്നേറ്റം ആവശ്യമാണ്. കേരളത്തിൽ ഹരിപ്പാട് മണ്ഡലത്തെയാണ് ഞാൻ പ്രതിനിധീകരിക്കുന്നത്. കേരളത്തിലെ ആദ്യ സൗജന്യ ഡയാലിസിസ് സെന്റർ ആരംഭിച്ചത് ഹരിപ്പാടാണ്. വിദ്യാർത്ഥികളുടെ പഠനത്തെ മുൻ നിർത്തി മെഡിക്കൽ വിദ്യാഭാസത്തിനു ഊന്നൽ നൽകുവാനും, എല്ലാവർക്കും വിദ്യാഭ്യാസം എന്ന ആശയം നടപ്പിലാക്കുവാനും എന്റെ പൊതുപ്രവർത്തന ജീവിതത്തിലൂടെ ഒരു പരിധി വരെ സാധിച്ചിട്ടുണ്ട്. ഇന്ന് നാട്ടിലെ വിദ്യാഭ്യാസത്തെക്കാൾ മലയാളികൾ തെരഞ്ഞെടുക്കുന്നത് യുകെയിലെയാണ്. അത് ഈ രാജ്യം വിദ്യാഭ്യാസ മേഖലയ്ക്ക് നൽകുന്ന സംഭാവനകളെയും പ്രത്യേക പരിഗണനയെയുമാണ് സൂചിപ്പിക്കുന്നത്. ഇപ്പോൾ യുകെയിൽ ജോലി ചെയുന്ന നേഴ്സുമാരിൽ 25000 ത്തിലധികം പേരും മലയാളികളാണ്. ഇതെല്ലാം ഈ രാജ്യം ഇവരെ എത്രമാത്രം സ്നേഹിക്കുന്നു എന്നുള്ളതാണ് വ്യക്തമാക്കുന്നത്. പൊതുപ്രവർത്തകനായി നിലകൊള്ളുന്ന ഒരാൾ എന്ന നിലയിൽ തന്നെ മെഡിക്കൽ രംഗവുമായി ചേർന്ന് നിന്ന് പ്രവർത്തിക്കാൻ ഈ കാലയളവിൽ സാധിച്ചിട്ടുണ്ട്. രാജീവ് ഗാന്ധി ഇൻസ്റ്റിറ്റ്യൂട് ഓഫ് ബയോടെക് റിസേർച്ച് സെൻ്റർ പൂജപ്പുര, തിരുവനന്തപുരം 1993ൽ തുടങ്ങി. 300 ഓളം ശാസ്ത്രജ്ഞൻമാർ റിസേർച്ച് നടത്തുന്നു. 1000 ത്തിലധികം തൊഴിലവസരങ്ങൾ സൃഷ്ടിച്ച ആരോഗ്യമേഖലയിലെ എടുത്തു പറയേണ്ട മറ്റൊരു സംഭാവനയാണിത്.

സമൂഹത്തിൽ ഒറ്റപ്പെട്ട് കഴിയുന്നവരാണ് ഓട്ടിസം ബാധിച്ച കുട്ടികൾ. അവരെ ചികിത്സിക്കുന്നതിനായി “സബർമതി” എന്ന 6 ജോലിക്കാരുള്ള കേന്ദ്രവും തുടങ്ങാനായി സാധിച്ചതിൽ ഒത്തിരി ചാരിതാർത്ഥ്യം ഉണ്ട്. സ്കൂൾ ഓഫ് മെഡിക്കൽ എഡ്യൂക്കേഷന്റെ ഭാഗമായി കേരളത്തിൽ ഉടനീളം പ്രവർത്തിക്കാനും സാധിച്ചിട്ടുണ്ട്. കേരളത്തിൽ തന്നെ നിരവധി ആശുപത്രികളുടെയും, നേഴ്സിംഗ് കോളേജുകൾക്കും തുടക്കം കുറിക്കാൻ സാധിച്ചിട്ടുണ്ട്. ഈ മേഖലകളിൽ സീറോ മലബാർ സഭയുടെ സംഭാവന പ്രത്യേകിച്ചു എടുത്ത് പറയേണ്ടതാണ്. നേഴ്സിംഗ് രംഗത്ത് നൽകുന്ന പരിശീലനവും പ്രവർത്തനമികവും പ്രശംസനീയമാണ്.

ഇന്ത്യ മഹാരാജ്യം അതിന്റെ ചരിത്രത്തിലെ തന്നെ ഏറ്റവും വലിയ പ്രതിസന്ധിയെ അഭിമുഖീകരിച്ചാണ് ഇപ്പോൾ കടന്നു പോകുന്നത്. വർഗീയതയും ഫാസിസ്റ്റ് ഭരണ നടപടികളും രാജ്യത്തിന്റെ നിലനിൽപ്പിനെ തന്നെ അപകടത്തിലാക്കുകയാണ്. ഇന്ന് ഭരണം കയ്യാളുന്ന സംഘപരിവാർ, മതനിരപേക്ഷതയെ റദ്ദ് ചെയ്യാൻ നിരന്തരം പരിശ്രമിക്കുകയാണ്. ഒരു രാജ്യം ഒരു നിയമം എന്നിങ്ങനെ തുടങ്ങി പൗരന്മാരുടെ വ്യക്തി സ്വാതന്ത്ര്യത്തിൽ വരെ അന്യായമായ ഇടപെടലുകൾ ഇന്ന് നടക്കുന്നു. എതിർക്കുന്ന ശബ്ദങ്ങളെയെല്ലാം നിശബ്ദമാക്കാൻ അക്ഷീണം അവർ പരിശ്രമിക്കുകയാണ്. രാജ്യത്തെ തന്നെ കോർപ്പറേറ്റ് ഭീമൻമാർക്ക് അടിയറവ് വെക്കാൻ അവർ ഒരുമ്പെടുന്നു. പ്രതീക്ഷയുടെ തുരുത്തായി ചില ഇടങ്ങൾ മാത്രം ഇന്ന് മാറുകയാണ്. ജനാധിപത്യം എത്ര നാൾ നിലനിൽക്കും എന്നുള്ളതും സംശയത്തിൽ തന്നെയാണ്.

രാജ്യം ഇന്ന് ഉറ്റുനോക്കുന്ന നേതാവാണ് രാഹുൽ ജി. യുകെയിൽ എത്തിയപ്പോൾ നിങ്ങൾ നൽകിയ സ്നേഹവായ്പുകളെ കുറിച്ച് അദ്ദേഹം നേരത്തെ പരാമർശിച്ചിട്ടുള്ളതാണ്. ഇന്ത്യയിലെ സാഹചര്യം രാഹുൽ ജി നിങ്ങളുമായി ചർച്ച ചെയ്തിട്ടുണ്ട്. നിങ്ങളുടെ ചോദ്യങ്ങളും, ചർച്ചകളും അദ്ദേഹം വളരെയേറെ താല്പര്യത്തോടെയാണ് വീക്ഷിച്ചത്. യുകെയിൽ ആയിരിക്കുമ്പോൾ തന്നെ മാതൃരാജ്യത്തോടുള്ള നിങ്ങളുടെ സ്നേഹവും കരുതലും പ്രത്യേകം പരാമർശിക്കേണ്ടതാണ്. രാജ്യം ഇന്ന് കടന്ന് പോകുന്ന അവസ്ഥയെ കുറിച്ച് നിങ്ങളും ബോധവാന്മാരാണ് എന്നുള്ളത് ആ ചർച്ചയിൽ നിന്നും വ്യക്തമാണ്. രാജ്യത്തിന്റെ നിലനിൽപ്പിനു വേണ്ടിയാണ് ഓരോ ഇന്ത്യക്കാരനും, ജനാധിപത്യ മതനിരപേക്ഷ വ്യക്തികളും നിലനിൽക്കേണ്ടത് എന്നുള്ളതും ഈ അവസരത്തിൽ ഓർമ്മിപ്പിക്കുന്നു.

മലയാളികളെ ഇത്രയേറെ കരുതുകയും ആദരിക്കുകയും ചെയ്യുന്ന രാജ്യം വേറെ ഉണ്ടെന്ന് തോന്നുന്നില്ല. തമാശയെന്ന മട്ടിൽ പറയുന്ന ഒരു കാര്യമാണ് ലോകത്തിന്റെ ഏത് കോണിൽ ചെന്നാലും മലയാളി ഉണ്ടാകും എന്ന്. എന്നാൽ അത് ഇന്ന് യാഥാർഥ്യമായി എന്ന് മാത്രമല്ല, ഉള്ളത് മുഴുവനും മലയാളികൾ ആണ്. അതുകൊണ്ട് യുകെയിലെ എല്ലാ മലയാളികൾക്കും ഉയിർപ്പിന്റെ എല്ലാവിധ സ്നേഹവും സന്തോഷവും നേരുന്നു. മലയാളികളായ പ്രവാസികളെ ഒരു കുടക്കീഴിൽ ഒരുമിച്ച് ചേർക്കുവാനാണല്ലോ മലയാളം യുകെ എന്ന ഓൺലൈൻ പോർട്ടൽ പ്രവർത്തിക്കുന്നത്. മലയാളം യുകെയുടെ എല്ലാ വായനക്കാർക്കും ഉയിർപ്പിന്റെ എല്ലാ ആശംസകളും പ്രാർത്ഥനകളും നേരുന്നു.