ഹരികുമാര് ഗോപാലന്
യുക്മ നോര്ത്ത് വെസ്റ്റ് റീജിയന്റെ നേതൃത്വത്തില് വാരിങ്ടണില് നടന്ന സ്പോര്ട്സ് ഡേ കായിക പ്രേമികളെകൊണ്ടും മത്സരാര്ഥികളെ കൊണ്ടും സമ്പല് സമൃദ്ധമായി.
രാവിലെ യുക്മ ദേശീയ സമിതി അംഗം തമ്പി ജോസ് മാര്ച്ച് പാസ്റ്റിന് കൊടി ഉയര്ത്തിയതൊടെ മത്സരങ്ങള്ക്ക് തുടക്കമായി.
ചടങ്ങുകള് ആരംഭിക്കുന്നതിനു മുന്പ് അകാലത്തില് നിര്യാതരായ യുക്മ ഭാവഹികളായ എബ്രഹാം ജോര്ജ് രഞ്ജിത് കുമാര്, ജോയ നോബി എന്നിവര്ക്ക് ഒരു മിനിറ്റു മൗനം ആചരിച്ചു ആദരാഞ്ജലികള് അര്പ്പിച്ചു.
നോര്ത്ത് വെസ്റ്റ് പ്രസിഡണ്ട് ഷീജോ വര്ഗീസ് അധ്യക്ഷനായിരുന്നു. തങ്കച്ചന് എബ്രഹാം സ്വാഗതം ആശംസിച്ചു.ആശംസകള് അര്പ്പിച്ചുകൊണ്ട് പ്രിസ്റ്റന് മലയാളി അസോസിയേഷന് പ്രസിഡണ്ട് ജോജി ലിവര്പൂള്, മലയാളി അസോസിയേഷന് പ്രസിഡണ്ട് ടോം ജോസ് തടിയംപാട്, വാരിങ്ങംടണ് അസോസിയേഷന് പ്രസിഡണ്ട് സുരേഷ് നായര്, എന്നിവര് സംസാരിച്ചു.
ഏറ്റവും കൂടുതല് പോയിന്റ് നേടി പ്രിസ്ടോന് മലയാളി അസോസിയേഷന് ഒന്നാം സ്ഥാനം നേടി രണ്ടാം സ്ഥാനം വാരിങ്ങംടണ് അസോസിയേഷനും മൂന്നാം സ്ഥാനം മഞ്ചെസ്സ്ര് മലയാളി അസോസിയേഷനും കരസ്ഥമാക്കി. ലിവര്പൂള് മലയാളി അസോസിയേഷന് വടം വലിയില് ഒന്നാം സ്ഥാനം നേടി. മത്സര വിജയികള്ക്ക് വിവിധ അസോസിയേഷന് ഭാരവാഹികള് ട്രോഫികള് വിതരണം ചെയ്തു.
ലിവര്പൂള് മലയാളി അസോസിയേഷനു വേണ്ടി മത്സരിച്ച എല്ലാവര്ക്കും നന്ദി അറിയിക്കുന്നു.
പ്രവാസി മലയാളികളുടെ പ്രിയ ഓണ്ലൈന് പ്രസിദ്ധീകരണം യുക്മ സാംസ്കാരികവേദി പ്രസിദ്ധീകരിക്കുന്ന ജ്വാല ഇ-മാഗസിന്റെ ജൂണ് ലക്കം പ്രസിദ്ധീകരിച്ചു. പ്രവാസികളായ എഴുത്തുകാരെ പ്രോത്സാഹിപ്പിക്കുക എന്ന ലക്ഷ്യത്തോടെ ആരംഭിച്ച ജ്വാല ഇ മാഗസിന് വളരെ ചുരുങ്ങിയ കാലത്തിനിടെ വളരെ പ്രചാരം നേടി വളര്ച്ചയുടെ പാതയിലാണ്. വര്ഗീയ വെറിയും അന്ധവിശ്വസവും മതമേധാവിത്വ ശക്തികളും ചേര്ന്ന് സമൂഹത്തിലെ താഴെക്കിടയിലുള്ള ജനങ്ങളുടെ ജീവിതം ദുസ്സഹമാക്കുന്ന പ്രവണക്കെതിരെ യുക്മ പോലുള്ള പ്രസ്ഥാനങ്ങള് ഉണര്ന്നു പ്രവര്ത്തിക്കണമെന്ന് എഡിറ്റോറിയലില് ചീഫ് എഡിറ്റര് റജി നന്തികാട്ട് സൂചിപ്പിക്കുന്നു.
നിരവധി ഉന്നത നിലവാരം പുലര്ത്തുന്ന രചനകള് ജൂണ് ലക്കത്തെ സമ്പന്നമാക്കുന്നു. മലയാള സാഹിത്യത്തിലെ കാര്ന്നോര് ശ്രീ. എം.ടി വാസുദേവന് നായര് എഴുതിയ വില്പ്പന എന്ന ചെറുകഥയെ അവലോകനം ചെയ്തു കൊണ്ട് എസ്. ജായേഷ് എഴുതിയ ജീവിതങ്ങള്ക്കിടയിലെ കൈമാറ്റപ്രക്രിയകള് എന്ന ലേഖനത്തിലൂടെ ശ്രീ. എം.ടി വാസുദേവന് നായരെ ആഴത്തില് മനസിലാക്കുവാന് സാധിക്കുന്നു. ജ്വാല ഇ മാഗസിനില് ജോര്ജ്ജ് അറങ്ങാശ്ശേരി എഴുതുന്ന പംക്തി സ്മരണകളിലേക്ക് ഒരു മടക്കയാത്രയില് തന്റെ കോളേജ് വിദ്യാഭാസ കാലത്തെ രസകരമായ ഒരനുഭവം വളരെ രസകരമായി ഒരു വട്ടം കൂടി ഊട്ടിയിലേക്ക് എന്ന അധ്യായത്തില് വിവരിക്കുന്നു.
പ്രമുഖ ഇംഗ്ലീഷ് സാഹിത്യകാരന് ജോര്ജ്ജ് ഓര്വെല് എഴുതിയ ‘എ ഹാങ്ങിങ്’ എന്ന ചെറുകഥയുടെ സ്മിത മീനാക്ഷി എഴുതിയ മലയാളം പരിഭാഷ തൂക്കികൊല്ലല് മൂല കഥയോട് വളരെയധികം നീതി പുലര്ത്തി. നിര്മ്മല രചിച്ച കുരിശ് തറപ്പ് ഒരന്വേഷണം, ശ്രീകല മേനോന് എഴുതിയ ബ്രാഹ്മണ്യം, ബിന്ദു എം.വി എഴുതിയ കറുത്ത പെണ്ണ് എന്നീ കഥകള് ജ്വാലയുടെ കഥാവിഭാഗത്തെ ധന്യമാക്കുന്നു.
രമേശ് കുടമാളൂരിന്റെ മരണകാവ്യങ്ങള്, അനിത എം.എ യുടെ ഉടല്കലര്പ്പ് ബിന്ദു ആനമങ്ങാട് രചിച്ച സ്മാരകങ്ങള് പിറവിയെടുക്കുന്നത് എന്നീ കവിതകളും മനോഹരമായ രചനകളാണ്. പ്രമുഖ സാഹിത്യകാരി കെ. ആര്. മീരയുടെ സാഹിത്യ ലോകത്തേക്കുള്ള ഒരു വാതില് തുറക്കുകയാണ് ഷൈന് ഷാജന് എഴുതിയ മീരയില് നിന്ന് വായിച്ചെടുത്ത പെണ്മയും പ്രണയവും എന്ന ലേഖനം. ലോക പ്രസിദ്ധമായ ആറന്മുള കണ്ണാടിയുടെയുംആറന്മുള വള്ളംകളിയുടെയും ആറന്മുള സദ്യയുടെയും ജന്മഗേഹമായ ആറന്മുള എന്ന സ്ഥലത്തിന്റെ ചരിത്ര വസ്തുതകളിലേക്ക് ഒരു എത്തി നോട്ടമാണ് രാജേഷ് കുമാര്. കെ എഴുതിയ വള്ളപ്പാട്ടു പാടുന്ന ആറന്മുളയുടെ മണ്ണില് എന്ന ലേഖനം.
ജ്വാല ഇ മാഗസിന്റെ ജൂണ് ലക്കം വായിക്കുവാന് താഴെ കൊടുത്തിരിക്കുന്ന ലിങ്കില് ക്ലിക് ചെയ്യുക
ലണ്ടന്: ബ്രക്സിറ്റ് നിലവില് വരുന്നതോടെ യുകെയിലെ വിപണി കമ്പനികള്ക്ക് പ്രതികൂല സാഹചര്യം സൃഷ്ടിച്ചേക്കുമെന്ന് റിപ്പോര്ട്ട്. ഇ്കാര്യത്തില് വ്യക്തതയാവശ്യപ്പെട്ട് എയര്ബസിന് പിന്നാലെ ബി.എം.ഡബ്യൂയും രംഗത്ത് വന്നു. ബ്രക്സിറ്റ് നിലവില് വരുന്നതോടെ യൂറോപ്യന് വിപണിയില് വമ്പന് കമ്പനികള്ക്ക് വലിയ നഷ്ടമുണ്ടാകുമെന്ന് അഭ്യൂഹങ്ങള്ക്കിടെയാണ് രാജ്യവിടുമെന്ന് പരോക്ഷമായി സൂചിപ്പിച്ച് ബി.എം.ഡബ്യൂ രംഗത്ത് വന്നിരിക്കുന്നത്. വിപണിയിലെ മാറ്റങ്ങള് സംബന്ധിച്ച കൃത്യമായി വിവരങ്ങള് ലഭ്യമാക്കണമെന്ന് ബി.എം.ഡബ്യൂ യൂകെ മേധാവി ഇയാന് റോബര്ട്ട്സണ് ആവശ്യപ്പെട്ടു. ബ്രക്സിറ്റുമായി ബന്ധപ്പെട്ട അരക്ഷിതാവസ്ഥ തുടരുകയാണെങ്കില് രാജ്യവിടുമെന്ന് എയര്ബസ് മുന്നറിയിപ്പ് നല്കിയിരുന്നു. തങ്ങളുടെ വിപണിയെ ബ്രക്സിറ്റ് പ്രതികൂലമായി ബാധിക്കുമെന്ന് ചൂണ്ടി കാണിച്ചായിരുന്നു കമ്പനിയുടെ മുന്നറിയിപ്പ്.
ഏതാണ്ട് 14,000ത്തോളം തൊഴിലാളികള് ജോലി ചെയ്യുന്ന സ്ഥാപനമാണ് എയര്ബസ്. യുകെയില് നിന്ന് കമ്പനി മാറ്റി സ്ഥാപിച്ചാല് രാജ്യത്തെ തൊഴില് മേഖലയ്ക്ക് കനത്ത തിരിച്ചടിയാകും. അതേസമയം രാജ്യത്തെ വിപണിയെയും വ്യാവസായിക മേഖലയേയും യാതൊരുവിധത്തിലും ബ്രക്സിറ്റ് പ്രതികൂലമായി ബാധിക്കില്ലെന്ന നിലപാടിലാണ് യുകെ സര്ക്കാര്. ഇക്കാര്യത്തില് യാതൊരുവിധ അവ്യക്തതയുമില്ലെന്നാണ് അധികൃതരുടെ വാദം. എന്നാല് ബ്രക്സിറ്റ് പ്രത്യാഘാതങ്ങളെക്കുറിച്ച് വന്കിട കമ്പനികള് ആശങ്കയിലാണെന്നാണ് ബി.എം.ഡബ്യൂവിന്റെ മുന്നറിയിപ്പിലൂടെ വ്യക്തമാവുന്നത്. യൂറോപ്യന് യൂണിയനിലെ 28 അംഗങ്ങള്ക്കും ഡ്യൂട്ടി ഫ്രീ വിപണന സാധ്യത ബ്രക്സിറ്റിന് ശേഷം ഇല്ലാതാകും. നിലവില് യൂറോപ്പിന് പുറത്തുള്ള വിപണിക്ക് സമാനമായി 27 അംഗരാജ്യങ്ങളില് നിയമങ്ങള് വരാന് സാധ്യതയുള്ളതായി സാമ്പത്തിക വിദഗ്ദ്ധര് സൂചന നല്കുന്നു.
യൂകെയില് ബി.എം.ഡബ്യൂ നിര്മ്മിക്കുന്നത് റോള്സ് റോയിസ് കാറുകളാണ്. കമ്പനിയില് ഏതാണ്ട് 8000ത്തോളം തൊഴിലാളികളുമുണ്ട്. ബ്രക്സിറ്റ് നയമാറ്റത്തിലുണ്ടാകുന്ന കാര്യങ്ങളില് വ്യക്തത നല്കാന് അധികൃതര് തയ്യാറായില്ലെങ്കില് കമ്പനി രാജ്യവിടുമെന്നാണ് സൂചന. എന്നാല് ഇക്കര്യം സംബന്ധിച്ച് യാതൊരു ഔദ്യോഗിക വിശദീകരണങ്ങളും വന്നിട്ടില്ല. സര്ക്കാരിന്റെ ട്രേഡ് നയങ്ങളെക്കുറിച്ചും നികുതി നിരക്കുകളെക്കുറിച്ചും കൃത്യമായി വിവരം നല്കാന് സര്ക്കാര് തയ്യാറാകാണം. ഒരുമാസത്തിനുള്ള ഇതിനെക്കുറിച്ചുള്ള വ്യക്തമായ വിവരങ്ങള് ലഭിച്ചില്ലെങ്കില് കമ്പനി ഇതര മാര്ഗങ്ങളെക്കുറിച്ച് അന്വേഷിക്കേണ്ടി വരുമെന്ന് ബി.എം.ഡബ്യൂ യൂകെ മേധാവി ഇയാന് റോബര്ട്ട്സണ് വ്യക്തമാക്കിയിട്ടുണ്ട്.
ടോം ജോസ് തടിയംപാട്
നിയമനിര്മ്മാണ സഭയുടെ നടുവിലിരുന്നു നിയമം നിര്മ്മിക്കുമ്പോള് നിര്മിക്കുന്ന നിയമം ആര്ക്കുവേണ്ടിയാണോ അവര് അനുഭവിക്കുന്ന വിഷയങ്ങളില് ഒരു അവബോധം അത് നിര്മ്മിക്കുന്നവര്ക്ക് ഉണ്ടാകണം എന്ന തിരിച്ചറിവയിരിക്കണം സൗത്ത് വിരളിലെ യുവ വനിതാ എം.പി അലിസണ് മാക്ഗവേണിനെ വിരളിലെ ഒരു നഴ്സിംഗ് ഹോമില് കെയറര് ജോലി ചെയ്യാന് പ്രേരിപ്പിച്ചത്. അലിസണ് ജോലിചെയ്യാന് വന്നത് ഒരു മലയാളി നടത്തുന്ന ലവ് റ്റൂ കെയര് (Love To Care)എന്ന ഏജന്സി വഴിയാണ് എന്നതും ഒരു ചരിത്രമായി.
ഏജന്സി നടത്തുന്ന ബെര്ക്കിന് ഹെഡില് താമസിക്കുന്ന പാല കരൂര് സ്വദേശി ഞാവള്ളിയില് ആണ്ടുകുന്നേല് മാത്യു അലക്സാണ്ടര് പറയുന്നത് ഇത്തരം ഒരു അനുഭവം ആദൃമായിട്ടാണന്നാണ്. മാത്യുവിനു വിരളിലെ ഏജന്സി കൂടാതെ വെയില്സിലും, മാഞ്ചസ്റ്ററിലും ഏജന്സികളുണ്ട്.
ഒട്ടേറെ മലയാളികള് ജോലി ചെയ്യുന്ന ഈ മേഖലയില് അവര് അനുഭവിക്കുന്ന ബുദ്ധിമുട്ടുകളില് നിന്നും മോചനം അലിസണിന്റെ ഈ പ്രവര്ത്തനം കൊണ്ട് ഉണ്ടാകുമെന്ന പ്രതീക്ഷയിലാണ് മലയാളി സമൂഹവും. എം.പി നിയമപരമായ എല്ലാ നടപടിക്രമങ്ങളും പൂര്ത്തിയാക്കിയാണ് ജോലി ആരംഭിച്ചതെന്നും മാത്യു കൂട്ടിച്ചേര്ത്തു. ബ്രിട്ടീഷ് സമൂഹത്തിന്റെ ജീവിത കാലയളവ് വര്ദ്ധിക്കുകയും പ്രായം ചെന്നവരുടെ എണ്ണം ക്രമാധീതനായി ഉയരുകയും ചെയ്യുന്ന ഈ കാലത്ത് കെയര് സര്വിസിന്റെ പ്രധാന്യം കൂടിവരികയാണ്, ആ സമയത്ത് ഈ മേഖലയില് ജോലി ചെയ്യുന്നവര് ഉള്പ്പെടെയുള്ളവരുടെ പ്രശ്നങ്ങള് പഠിക്കുന്നതിനു എം.പി. അലിസണ് മാക്ഗവേണിന്റെ ശ്രമത്തെ എത്ര അഭിനന്ദിച്ചാലും കുറഞ്ഞു പോകില്ല.
എം.പി സാധാരണ കെയര് ജോലി ചെയുന്നവര് ചെയ്യുന്ന മുഴുവന് ജോലിയും ചെയ്തിട്ടാണ് പോയത്. ഒരു കാലത്ത് മഹാരാജക്കാന്മാര് പ്രജകള് തൃപ്തരാണോ എന്നറിയാന് വേഷം മാറി ജനങ്ങള്ക്കിടയില് നടന്നത് നാം കേട്ടിട്ടുണ്ട് എന്നാല് ജനാധിപത്യം വന്നപ്പോള് അധികാരത്തിന്റെ ദന്തഗോപുരങ്ങളില് വസിക്കുന്നവര്ക്ക് അലിസണിന്റെ പ്രവര്ത്തനം മാതൃകയാക്കാവുന്നതാണ്.
ഹേയ് ഫീവര് പ്രതിരോധ മരുന്ന് കഴിച്ച് നിരത്തിലിറങ്ങുന്ന ഡ്രൈവര്മാരുടെ ലൈസന്സുകള് റദ്ദ് ചെയ്യപ്പെടുമെന്ന് സൂചന. പ്രതിരോധ മരുന്ന് ഗുരുതര പാര്ശ്വഫലങ്ങള് ഉണ്ടാക്കുന്നുവെന്ന കണ്ടെത്തലിനെ തുടര്ന്നാണ് നടപടി. ഹെറോയിന്, കഞ്ചാവ് തുടങ്ങിയവ ഉപയോഗിച്ച് വാഹനം ഓടിക്കുമ്പോള് ലഭിക്കുന്ന കേസിന് സമാനമായിരിക്കും പ്രതിരോധ മരുന്നെടുക്കുന്ന ഡ്രൈവര്മാരും ചാര്ജ് ചെയ്യപ്പെടുക. 20 മില്യണിലധികം ഡ്രൈവര്മാരാണ് സ്ഥിരമായി ആന്റിഹിസ്തമിന് എന്ന പ്രതിരോധ മരുന്ന് ഉപയോഗിക്കുന്നതായി വെളിപ്പെടുത്തിയിരിക്കുന്നത്. ഗുരുതരമായ പാര്ശ്വഫലങ്ങള് ഉണ്ടാക്കുന്നതാണ് ഈ മരുന്ന്. ഉറക്കമില്ലാഴ്മ, ക്ഷീണം, തലച്ചോറിന്റെ സ്ഥിരതയില്ലാഴ്മ തുടങ്ങിയവയാണ് ആന്റിഹിസ്തമിന് സൃഷ്ടിക്കുന്ന പ്രധാന പാര്ശ്വഫലങ്ങള്.
ഈ മരുന്ന് ഉപയോഗിച്ച് കഴിഞ്ഞാല് നിരത്തില് കൃത്യതയോടെ വാഹനമോടിക്കാന് കഴിയില്ല. അത് അപകടം ക്ഷണിച്ചു വരുത്തുകയും ചെയ്യും. ആന്റിഹിസ്തമിന് വ്യാപകമായി ഉപയോഗിക്കപ്പെടുന്നതായി ശ്രദ്ധയില്പ്പെട്ട അധികൃതര് നടപടി സ്വീകരിക്കുവാന് ഉത്തരവിടുകയായിരുന്നു. എന്നാല് ഭൂരിഭാഗം ഡ്രൈവര്മാരും ഇവയുടെ പാര്ശ്വഫലങ്ങളെക്കുറിച്ച് ധാരണയില്ലാത്തവരാണ്. എന്നാല് ഗുരുതരമായ ആരോഗ്യ പ്രശ്നങ്ങള് സൃഷ്ടിക്കുന്ന ഇത്തരം ടാബ്ലെറ്റുകള് വാഹനമോടിക്കുമ്പോള് ഉപയോഗിക്കരുതെന്ന് വിദഗ്ദ്ധര് കര്ശന നിര്ദേശം നല്കുന്നു. ആന്റിഹിസ്തമിന് പ്രധാനമായും തടസപ്പെടുത്തുന്നത് മനുഷ്യന് റിയാക്ട് ചെയ്യാനുള്ള കഴിവിനെയാണ്. റിയാക്ഷന് സമയം വര്ദ്ധിക്കുമ്പോള് നിരത്തില് കൃത്യതയുണ്ടാവില്ല. അമിത അളവില് മരുന്ന് ഉള്ളില് ചെന്നാല് മദ്യത്തിന്റെ സ്വാധീത്തെക്കാള് അപകടം നിറഞ്ഞതായി മാറാനും സാധ്യതയുണ്ട്.
സമീപകാലത്തെ ഏറ്റവും തെളിച്ചമുള്ള സമ്മറാണ് യുകെയില് ലഭ്യമായിട്ടുള്ളത്. ഇത് അന്തരീക്ഷത്തിലെ പോളണ് കണങ്ങളുടെ അളവും ഗണ്യമായി വര്ദ്ധിക്കാന് കാരണമായിട്ടുണ്ട്. ഹേയ് ഫീവര് ഭീതിയില് നിന്ന് മുക്തി നേടുകയെന്ന ഉദ്ദേശത്തോടെയാണ് പലരും ഇത്തരം ടാബ്ലെറ്റുകള് കഴിക്കുന്നത്. എന്നാല് പാര്ശ്വഫലങ്ങള് ഗുരുതര പ്രശ്നങ്ങള് സൃഷ്ടിക്കുന്നു. ഇത്തവണ ഹേയ് ഫീവര് നിരവധി ഡ്രൈവര്മാരെ പിടികൂടിയതായി മോട്ടോറിംഗ് എഡിറ്ററായ അമാന്റാ സ്റ്റ്രേട്ടണ് വ്യക്തമാക്കുന്നു. ഫീവറിനെ പ്രതിരോധിക്കാന് എടുക്കുന്ന മരുന്നുകളെക്കുറിച്ച് കൃത്യതയില്ല. ഇതിനായി ഡ്രൈവര്മാര് വിദഗ്ദ്ധരായ ആളുകളെ സമീപിക്കണമെന്നും അവര് ആവശ്യപ്പെട്ടു. ഈ വര്ഷം ഇതുവരെ ലഹരി മരുന്ന് ഉപയോഗവുമായി ബന്ധപ്പെട്ട് 1,106 ഡ്രൈവര്മാര്ക്കെതിരെയാണ് പോലീസ് കേസെടുത്തിരിക്കുന്നത്. ഇവയില് ഭൂരിഭാഗവും ഗുരുതരമായ ട്രാഫിക് നിയമലംഘനങ്ങളാണ്.
ലണ്ടന്: എന്.എച്ച്.എസിന്റെ നേതൃത്വത്തില് യുകെയിലെ ആദ്യത്തെ ഇന്റര്നെറ്റ് അഡിക്ഷന് ക്ലിനിക്ക് സ്ഥാപിതമാകുന്നു. ലണ്ടന് ആശുപത്രിയിലായിരിക്കും പുതിയ സംവിധാനം നിലവില് വരിക. സംരഭത്തിന്റെ മേല്നോട്ടവും ഫണ്ടിംഗും കൈകാര്യം ചെയ്യുക എന്.എച്ച്.എസായിരിക്കും. സമീപകാലത്ത് യുകെയിലെ കൗമാര പ്രായക്കാര്ക്കിടയില് ഗെയിമിംഗ് ഡിസോഡറുകള് വര്ദ്ധിക്കുന്നതായി കണ്ടെത്തിയതിനെ തുടര്ന്നാണ് പുതിയ നീക്കം. ഇത്തരം ഡിസോഡറുകളെ ഫലപ്രദമായി നേരിടാനും സൗജന്യ ചികിത്സാ ലഭ്യമാക്കുന്നതിനും പുതിയ പദ്ധതി ഗുണകരമാവും. ഗെയിമിംഗ് ഡിസോഡറുകള് മാനസികാരോഗ്യവുമായി ബന്ധപ്പെട്ട് കിടക്കുന്ന അസുഖമാണെന്ന് ലോകാരോഗ്യ സംഘടന കഴിഞ്ഞ ആഴ്ച്ച പ്രഖ്യാപിച്ചിരുന്നു.
ക്ലിനിക്കിന്റെ മേല്നോട്ടം സെന്ഡ്രല് ആന്റ് നോര്ത്ത്വെസ്റ്റ് ലണ്ടന് എന്എച്ച്എസ് ട്രസ്റ്റായിരിക്കും. പദ്ധതിയുടെ ആദ്യഘട്ടത്തില് ഗെയിമിംഗ് ഡിസോഡറുകളുടെ ചികിത്സയുമായി ബന്ധപ്പെട്ട് മാത്രമായിരിക്കും ക്ലിനിക്ക് പ്രവര്ത്തിക്കുക. എന്നാല് പിന്നീട് ഇന്റര്നെറ്റ് സംബന്ധിയായ അഡിക്ഷനുകള്ക്കും ചികിത്സ ക്ലിനിക്കില് ലഭ്യമാക്കുമെന്നാണ് വിവരം. നിലവില് ഗെയിമിംഗ് അഡിക്ഷനുകള്ക്ക് ചില സ്വകാര്യ ക്ലിനിക്കുകളില് ചികിത്സ ലഭ്യമാണ് എന്നാല് ഇതിന് വലിയ തുക ചെലവഴിക്കേണ്ടി വരും. എന്എച്ച്എസ് സ്ഥാപനം നിലവില് വരുന്നതോടെ ഈ പ്രശ്നം മാറുമെന്നാണ് അധികൃതരുടെ പ്രതീക്ഷ. പോണ് വീഡിയോ അഡിക്ഷന് പോലുള്ള രോഗങ്ങള്ക്കും ഭാവിയില് ക്ലിനിക്കില് ചികിത്സാ സൗകര്യം ലഭ്യമാകും. ലോകത്തിലെ മിക്ക രാജ്യങ്ങളും ഇത്തരം ഇന്റര്നെറ്റ്, ഗെയിമിംഗ് അഡിക്ഷനുകള്ക്ക് ചികിത്സ ലഭ്യമാക്കാനുള്ള നടപടികള് ആരംഭിച്ചിട്ടുണ്ട്.
ഏറെ നാളുകള്ക്ക് ശേഷമാണ് ഇത്തരമൊരു എന്എച്ച്എസ് ക്ലിനിക്ക് യാഥാര്ത്ഥ്യമാകുന്നത്. ഈ രോഗങ്ങള്ക്ക് ചികിത്സ ലഭ്യമാക്കുകയെന്നത് എന്എച്ച്എസിനെ സംബന്ധിച്ചടത്തോളം ധാര്മിക ഉത്തരവാദിത്വം ഉണ്ടായിരുന്നു. കൗമാരാക്കാര്ക്കും അവരുടെ കുടുംബങ്ങള് പുതിയ പദ്ധതി ഗുണകരമാവുമെന്നത് തീര്ച്ചയാണെന്നും സൈക്യാര്ട്ടിസ്റ്റായ ഹെന്റിറ്റ ബോവ്ഡന്-ജോണ്സ് വ്യക്തമാക്കുന്നു. ഇന്റര്നെറ്റ്, ഗെയിമിംഗ് അഡിക്ഷന് ഏറ്റവും കൂടുതല് ബാധിക്കുന്നത് കുട്ടികളെയും കൗമാര പ്രായക്കാരെയുമാണ്. ഇതിന് ഫലപ്രദമായ ചികിത്സ ലഭ്യമാണെങ്കിലും വിഷയത്തിലുള്ള അറിവില്ലാഴ്മ മാതാപിതാക്കളെ ആശയകുഴപ്പത്തിലാക്കുന്നു. പുതിയ ക്ലിനിക്ക് വരുന്നതോടെ ഇത്തരം അഡിക്ഷനുകള് സൃഷ്ടിക്കുന്ന പ്രശ്നങ്ങളെക്കുറിച്ച് ആളുകള് കൂടുതല് ബോധവാന്മാരാകുമെന്നാണ് എന്എച്ച്എസ് കരുതുന്നത്.
റയന് നൈനാന് ചില്ഡ്രന്സ് ചാരിറ്റിയുടെ ആഭിമുഖ്യത്തില് അഞ്ചാമത് ഫൈവ് എ സൈഡ് ഫുട്ബോള് ടൂര്ണ്ണമെന്റ് ശനിയാഴ്ച ഹൈ വൈകോമ്പില് നടക്കും. ഫുട്ബോള് മത്സരങ്ങള്ക്കൊപ്പം കുട്ടികള്ക്കും മുതിര്ന്നവര്ക്കും ഒരുപോലെ പങ്കെടുത്ത് ആസ്വദിക്കാവുന്ന ഫാമിലി ഫണ് ഡേയും അന്ന് സംഘടിപ്പിച്ചിട്ടുണ്ട്. ഫുട്ബോള് മത്സരത്തിലൂടെയും ഫാമിലി ഫണ് ഡേയിലൂടെയും ലഭ്യമാകുന്ന തുക റയന് നൈനാന് ചില്ഡ്രന്സ് സൊസൈറ്റി നടത്തി വരുന്ന ചാരിറ്റി പ്രവര്ത്തനങ്ങള്ക്ക് ആയിരിക്കും ഉപയോഗിക്കുക. ബ്രെയിന് ട്യൂമര് ബാധിതരായ കുട്ടികളുടെ ചികിത്സയ്ക്കും കൊട്ടാരക്കരയില് പ്രവര്ത്തിക്കുന്ന റയന് നൈനാന് ക്യാന്സര് പ്രൊജക്റ്റിനുമായിരിക്കും ഈ പ്രോഗ്രാം വഴി ലഭിക്കുന്ന തുക നല്കുന്നത്.
ഏഴാം വയസ്സില് ബ്രെയിന് ട്യൂമര് ബാധിതനായി ഈ ലോകത്തോട് യാത്ര പറഞ്ഞ് സ്വര്ഗ്ഗീയ ഭവനത്തിലേക്ക് യാത്രയായ റയന് നൈനാന് എന്ന കിത്തു മോന്റെ ഓര്മ്മയ്ക്കായി ആരംഭിച്ചതാണ് റയന് നൈനാന് ചില്ഡ്രന്സ് സൊസൈറ്റി. ഫുട്ബോള് ഏറെ ഇഷ്ടപ്പെട്ടിരുന്ന ചെല്സി ടീമിന്റെ ആരാധകനായിരുന്ന റയന് നൈനാന് എന്ന കൊച്ചു മിടുക്കന്റെ അകാല വേര്പാടിനെ തുടര്ന്ന് റയന്റെ മാതാപിതാക്കളായ സജി ജോണ് നൈനാനും ആഷ മാത്യുവും ചേര്ന്ന് ആണ് റയന് നൈനാന് ചില്ഡ്രന്സ് സൊസൈറ്റിക്ക് തുടക്കം കുറിച്ചത്. തങ്ങളുടെ മകന്റെ ജീവിതം തട്ടിയെടുത്ത ബ്രെയിന് ട്യൂമര് രോഗത്തിനെതിരെ പോരാടുക എന്ന ലക്ഷ്യം മുന്നിര്ത്തിയാണ് ആര്എന്സിസിയുടെ പ്രവര്ത്തനങ്ങള്ക്ക് ഇവര് ചുക്കാന് പിടിക്കുന്നത്.
കഴിഞ്ഞ നാല് തവണയും നടത്തിയ ഫൈവ് എ സൈഡ് ഫുട്ബോള് ടൂര്ണ്ണമെന്റും ഫാമിലി ഫണ് ഡേയും നിരവധി ആളുകളെ ആകര്ഷിച്ചിരുന്നു. ഏകദേശം അഞ്ഞൂറോളം ആളുകള് ഓരോ വര്ഷവും ഈ പ്രോഗ്രാമിനായി ഒത്ത് കൂടുന്നുണ്ട്. സബ് ജൂണിയര്, ജൂണിയര്, സീനിയര്, ലേഡീസ് കാറ്റഗറികളില് ആണ് മത്സരങ്ങള് സംഘടിപ്പിക്കുന്നത്. കുട്ടികള്ക്കായി മറ്റ് നിരവധി വിനോദ പരിപാടികളും അന്ന് തന്നെ സംഘടിപ്പിക്കുന്നതിനാല് ഓരോ വര്ഷവും നിരവധി കുട്ടികള് ആണ് ഈ പരിപാടിക്കായി കാത്തിരിക്കുന്നത്. വൈവിധ്യമാര്ന്ന ഫുഡ് സ്റ്റാള്, രുചികരമായ കേക്കുകള്, ഫേസ് പെയിന്റിംഗ്, മെഹന്ദി, നെക്ക് ആന്ഡ് ഷോള്ഡര് മസ്സാജ്, നെയില് ആര്ട്ട്, തംബോല തുടങ്ങി നിരവധി കാര്യങ്ങള് കുട്ടികള്ക്കായി ഒരുക്കിയിട്ടുണ്ട്.
ശനിയാഴ്ച കാലത്ത് ഒന്പത് മണി മുതല് ആരംഭിക്കുന്ന ഫുട്ബോള് മത്സരങ്ങളും മറ്റ് വിനോദങ്ങളും വൈകിട്ട് അഞ്ച് മണിയോടെ ആയിരിക്കും സമാപിക്കുന്നത്.
നാല് വര്ഷം കൊണ്ട് അന്പതിനായിരം പൌണ്ടോളം ചാരിറ്റി പ്രവര്ത്തനങ്ങള്ക്ക് കണ്ടെത്തി കഴിഞ്ഞ ആര്എന്സിസിക്ക് കൂട്ടായി നില്ക്കുന്ന സുഹൃത്തുക്കളും അഭ്യുദയകാംക്ഷികളും മികച്ച പിന്തുണയാണ് ഇവര്ക്ക് നല്കുന്നത്. മലയാളം യുകെ ആര്എന്സിസിയുടെ മീഡിയ പാര്ട്ണര് ആയി രംഗത്തുണ്ട്. ടെസ്കോ, കിംഗ്ഡം യുകെ, വെയിറ്റ്റോസ്, ഹിയര് ആന്ഡ് നൌ തുടങ്ങിയവരാണ് ആര്എന്സിസി ഇവന്റുകളുടെ സ്പോണ്സര്മാരായി രംഗത്തുള്ളത്. ആര്എന്സിസിയുടെ പ്രവര്ത്തനങ്ങള് കൂടുതല് മനസ്സിലാക്കാന് www.rncc.org.uk എന്ന വെബ്സൈറ്റ് സന്ദര്ശിക്കുകയോ https://www.facebook.com/RNCCUK/ എന്ന ഫേസ്ബുക്ക് പേജ് ലൈക്ക് ചെയ്യുകയോ ചെയ്യാവുന്നതാണ്.
ജോസി ജോസഫ്
സെന്ട്രല് മാഞ്ചസ്റ്റര് സീറോ മലബാര് കമ്യൂണിറ്റിയുടെ ആഭിമുഖ്യത്തില് ഭാരത അപ്പസ്തോലന് മാര് തോമാശ്ലീഹായുടേയും ഭാരതത്തിലെ പ്രഥമ വിശുദ്ധ അല്ഫോന്സാമ്മയുടേയും സംയുക്ത തിരുനാളും സണ്ഡേ സ്കൂള് വാര്ഷികവും 2018 ജൂലൈ 7, 8 തീയതികളില് അത്യാഘോഷപൂര്വ്വംകൊണ്ടാടും. തിരുന്നാളാഘോഷങ്ങള് ഗംഭീരമാക്കുവാനുള്ള ഒരുക്കങ്ങള് സെന്റ് ജോസഫ് ചര്ച്ച് ലോംഗ്സൈറ്റ് സീറോ മലബാര് കമ്യൂണിറ്റിയുടെ ചുമതല വഹിക്കുന്ന ഗ്രേറ്റ്ബ്രിട്ടന് രൂപതാ ചാന്സിലര് ഫാ. മാത്യു പിണക്കാട്ടിന്റെ നേതൃത്വത്തില് നടന്നു വരുന്നു. തിരുനാളിനോട് അനുബന്ധിച്ച് 2018 ജൂണ് 30 മുതല് ജുലൈ 6ാംതീയതിവരെ എല്ലാ വാര്ഡ് യൂണിറ്റുകളിലും നൊവേന ഉണ്ടായിരിക്കുന്നതാണ്.
തിരുനാള് കൊടിയേറ്റ് ദിവസമായി ജൂലൈ 7ാം തീയതി ശനിയാഴ്ച ഉച്ചക്ക് 2.30ന് തിരുക്കര്മ്മങ്ങള് ആരംഭിക്കും. ഫാ. സാജന് നെട്ടപ്പെങ് ദിവ്യബലിക്കും നൊവേനക്കും കാര്മ്മികനാകും. നൊവേനക്ക് ശേഷം കൃത്യം 4.30ന് ഫാ. ഇയാന് ഫാരല് തിരുനാള് കൊടിയേറ്റ് കര്മ്മം നിര്വഹിക്കുന്നതാണ്.
പ്രധാന തിരുനാള് ദിവസമായ ഞായറാഴ്ച വൈകുന്നേരം 3ന് പ്രധാന തിരുക്കര്മ്മങ്ങള് ആരംഭിക്കും. സീറോ മലബാര് സെന്ററില് നിന്നും തിരുശേഷിപ്പുമായി പ്രദക്ഷിണമായി ബഹുമാനപ്പെട്ട വൈദികരൊന്നിച്ച് ഇടവകാംഗങ്ങള് ദേവാലയത്തില് പ്രവേശിച്ച ശേഷം തിരുസ്വരൂപ പ്രതിഷ്ടയും തുടര്ന്ന് അത്യാഘോഷ പൂര്വ്വമായ തിരുനാള് പാട്ട് കുര്ബാനയും ആരംഭിക്കും. വിഥിന്ഷോ സീറോ മലബാര് ചര്ച്ച് ചാപ്ലയിനും പ്രശസ്ത വചന പ്രഘോഷകനും കൂടിയായ റവ. ഫാ. ജോസ് അഞ്ചാനിക്കലാണ് തിരുനാളിന് മുഖ്യകാര്മ്മികനാകുന്നത്. മറ്റ് വൈദികര് സഹകാര്മ്മികരാകും. ദിവ്യബലിക്ക് ശേഷം ലദീഞ്ഞും സമാപനാശീര്വാദവും നടക്കും.
തുടര്ന്ന് കുഞ്ഞുങ്ങളെ അടിമ വയ്ക്കുന്നതിനും, കഴുന്ന് എടുക്കുന്നതിനും സൗകര്യം ഉണ്ടായിരിക്കും. വിമണ്ഫോറത്തിന്റെയും സീറോ മലബാര് യൂത്ത് ലീഗിന്റെയും സ്റ്റാളുകള് ഉണ്ടായിരിക്കും.
തുടര്ന്ന് 5.30ന് സീറോ മലബാര് സെന്ററില് മതബോധന സ്കൂള് വാര്ഷിക പരിപാടികള് ആരംഭിക്കുന്നതാണ് ഇടവകാംഗങ്ങളുടെയും സണ്ഡേ സ്ക്കൂള് കുട്ടികളുടെയും നേതൃത്വത്തിലുള്ള കലാസന്ധ്യ ആരംഭിക്കും.
ന്യത്തങ്ങള്, സ്കിറ്റുകള്, പാട്ടുകള് എന്നിങ്ങനെ വിവിധ കലാപരിപാടികള് ഉണ്ടായിരിക്കും. 8ന് സ്നേഹവിരുന്നോടെ തിരുനാളാഘോഷങ്ങള്ക്ക് സമാപനം കുറിക്കും.
തിരുനാളാഘോഷങ്ങളില് പങ്ക് ചേര്ന്ന് വിശുദ്ധരുടെ അനുഗ്രഹങ്ങള് പ്രാപിക്കുവാന് എല്ലാവരേയും റവ. ഫാ. മാത്യു പിണക്കാട്ടും തിരുനാള് കണ്വീനര് ജോസി ജോസഫും കമ്മിറ്റി അംഗങ്ങളും സ്വാഗതം ചെയ്യുന്നു.
കൂടുതല് വിവരങ്ങള്ക്ക് ട്രസ്റ്റിമാരുമായി ബന്ധപ്പെടുക:
ഹാന്സ് ജോസഫ് 07951222331
വര്ഗ്ഗീസ് കോട്ടയ്ക്കല് 07812365564
ദേവാലയത്തിന്റെ വിലാസം:-
ST.JOSEPH CHURC-H,
PORTLAND CRESCENT,
LONGSIGHT,
MANCHE STER ,
MI3 OBU.
സംഗമങ്ങളുടെ സംഗമം എന്നറിയപ്പെടുന്ന ഉഴവൂര് സംഗമത്തിന് ജൂണ് 22ാം തിയതി ചെല്ട്ടണ് ഹാമിലെ ക്രോഫ്റ്റ് ഫാമില് തുടക്കമാകും. ഈ വര്ഷത്തെ ഉഴവൂര് സംഗമത്തില് വിശിഷ്ട അതിഥിയായി എത്തുന്നത് പ്രമുഖ സിനിമതാരം ലാലു അലക്സാണ്. യു.കെയിലെ അദ്ദേഹത്തിന്റെ ആദ്യത്തെ പൊതു പരിപാടിയായിരിക്കും ഉഴവൂര് സംഗമം.
പരസ്പരം അറിയുക, സ്നേഹിക്കുക, സഹായിക്കുക എന്നീ സന്ദേശങ്ങളുമായി യുകെയിലെ ഉഴവൂര് നിവാസികള് ഗ്രഹാതുരത്വം ഉണര്ത്തുന്ന ഓര്മ്മകളുമായി ഈ വര്ഷവും വൈവിധ്യമാര്ന്ന പാരിപാടികളുമായി ഒന്നിക്കുന്നു. ജൂണ് 22 വെള്ളിയാഴ്ച്ച നടക്കുന്ന സൗഹൃദ സായാഹ്നത്തിന് യുകെയിലെ പ്രശ്സ്ത എന്റര്ടൈയ്ന്മെന്റ് ഗ്രൂപ്പായ Desi Natchഉം യുകെയിലെ പ്രശ്സതരായ ഗായകരും ചേര്ന്ന് കൊഴുപ്പേകും.
ഈ വര്ഷത്തെ ഉഴവൂര് സംഗമത്തിന്റെ പ്രധാന ആകര്ഷണമായ യുകെയിലെ നാല് റീജിണില് നിന്നുള്ള ഉഴവൂര്ക്കാരായ ചുണക്കുട്ടന്മാര് നാല് വള്ളങ്ങളിലായി തുഴയെറിയുന്ന വാശിയേറിയ വള്ളംകളി മത്സരം ജൂണ് 23 ശനിയാഴ്ച്ച രാവിലെ 11 മണിക്ക് ക്രോഫ്റ്റ് ഫാമിലെ തടാകത്തില് വെച്ച് നടക്കും. ഇതിനെ തുടര്ന്ന് വാശിയേറിയ വടംവലി മത്സരവും പ്രൗഢഗംഭീരമായ സാംസ്ക്കാരിക ഘോഷയാത്രയും പൊതുസമ്മേളനവും വിവിധ കലാപരിപാടികളും അരങ്ങേറും.
സംഗമത്തിനുള്ള എല്ലാ ഒരുക്കങ്ങളും പൂര്ത്തിയായതായി ശ്രീ. സ്റ്റീഫന് ജോസഫ് തെരുവത്ത് ചീഫ് കോഡിനേറ്റര് ഉം ശ്രീ ജെയിംസ് ഫിലിപ്പ് ചെയര്മാനും ആയുള്ള കമ്മറ്റി അറിയിച്ചു.
ഈ വര്ഷത്തെ ഉഴവൂര് സംഗമത്തിന് ആശംസകള് അര്പ്പിച്ചുകൊണ്ട് Midlands Insurance, Firstring Global Online Tution, Study Well Medicine എന്നീ സ്ഥാപനങ്ങളാണ് സ്പോണ്സര്മാരായി രംഗത്ത് ഉള്ളത്. Team Moon Light Event ആണ് ഈ വര്ഷത്തെ ഉഴവൂര് സംഗമത്തിന്റെ ഇവന്റ് മാനേജ്മെന്റ് നിര്വ്വഹിക്കുന്നത്.
ലോകകപ്പ് പോലെ തന്നെ റഷ്യയിൽ ചർച്ചയാകുകയാണ് ഫിഫ ലോകകപ്പ് സ്റ്റേഡിയത്തിനു മുകളില് കണ്ട അത്ഭുത വെളിച്ചം. ലോകകപ്പ് വേദികളിലൊന്നായ നിസ്നി നോവ്ഗരഡ് സ്റ്റേഡിയത്തിനു മുകളിൽ നിന്നായിരുന്നു ആ കാഴ്ച. ജൂൺ 24ന് ഇംഗ്ലണ്ടിന്റെ മത്സരം നടക്കാനിരിക്കുന്ന ആ സ്റ്റേഡിയത്തിനു മുകളിലൂടെ പ്രത്യേകതരം വെളിച്ച വിന്യാസം പോകുന്നത് ജനങ്ങളുടെ കണ്ണില്പ്പെടുകയായിരുന്നു. മത്സ്യത്തിന്റെ ആകൃതിയിൽ ആകാശത്തിലൂടെ പോകുന്ന വെളിച്ചമായിരുന്നു അത്. ഈ വെളിച്ചത്തിന്റെ വിഡിയോ ഇപ്പോൾ നവമാധ്യമങ്ങളിൽ വൈറലായിരിക്കുകയാണ്. ലോകകപ്പ് കാണാന് അന്യഗൃഹ ജീവികൾ എത്തിയതാണെന്ന് വരെ വാര്ത്തകൾ പ്രചരിച്ചു.
എന്നാൽ പിന്നീടാണ് സംഭവം മനസ്സിലായത്. ലോകകപ്പിന്റെ ആരവത്തിനിടയില് തങ്ങളുടെ ബഹിരാകാശ ശേഷിയിലെ ശക്തി ഒന്ന് പരീക്ഷിച്ചതാണ് റഷ്യ. റഷ്യയുടെ കൃത്രിമ ഉപഗ്രഹ വിക്ഷേപണത്തെയായിരുന്നു ഇതെന്നാണ് വിശദീകരണം. ഗ്ലോനസ് –എം എന്ന കൃത്രിമോപഗ്രഹത്തിന്റെ വിക്ഷേപണമായിരുന്നു അത്. മുൻ തീരുമാനിച്ചതു പ്രകാരം ജൂൺ 17നായിരുന്നു വിക്ഷേപണം.